John 19

Onaqa Pailat na Yesus osiqa aqa qaja tamo naŋgo baŋq di atsiqa minjrej, “Niŋgi na Yesus bu toqoŋ na kumbaiŋyiye.” Degsi minjrnaqa naŋgi na Yesus osib bu toqoŋ na kumbaiŋyeb. Kumbaiŋysib koboonaqa naŋgi na sil luwit osib lulumosib dena mandor kokba naŋgo gate tatal bul gereiysib aqa gateq di atetosib siŋgila na teqiyeb. Osib gara jugo olekoba lent mandor kokba naŋgi gaigai jigeqnub deqaji bei osib Yesus jigeteb. A segi qa Mandor Koba maroqnej deqa naŋgi na kumbra degyeb. Osib Yesus aqa areq bosib a misiliŋyoqnsib gisaŋ na biŋiyoqnsib minjoqneb, “O Juda naŋgo Mandor Koba, kaiye.” Naŋgi degsib Yesus misiliŋyoqnsib baŋ lubtosib aqa ulatamuq di qaloqneb.

Onaqa Pailat a Yesus olo osiqa aqa talq dena oqeq atsiqa tamo uŋgasari naŋgo ulatamuq dia tigeltej. Tigeltosiq minjrej, “Niŋgi tamo endi uniye. E aqa jejamuq di une bei yala unosaibolesai. Niŋgi di qalieqajqa deqa e Yesus niŋgi qa osi bonum.” Ariya Yesus a oqedej. Gate tatal sil luwit na gereiyosib aqa gateq di ateteb qaji de ti gara lent a jigeteb qaji de ti qoji oqedej. Onaqa Pailat na olo minjrej, “Tamo endi uniye.”

Degsi minjrnaqa atra tamo kokba ti naŋgo qaja tamo naŋgi ti Yesus unsibqa naŋgi murqumyoqnsib Pailat waiŋyoqnsib minjoqneb, “Ni na ŋamburbasq di qame! Ni na ŋamburbasq di qame!” Onaqa Pailat na minjrej, “Niŋgi segi na Yesus osib ŋamburbasq di qamiye. E aqa jejamuq di une bei unosai.” Onaqa Juda tamo kokba naŋgi na olo Pailat minjeb, “Yesus a segi qa marqo, ‘E Qotei aqa Ŋiri.’ Aqa une deqa a moiem. Gago dal anjam degsi unu.”

Onaqa Pailat a naŋgo anjam di qusiqa a tulaŋ ulaugetej. Osiqa a olo Yesus osiq tal miligiq gilsiqa nenemyej, “Ni qabe na bem? Ni e merbe.” Onaqa Yesus a mequmesoqnej. A na kamba anjam bei Pailat minjosai. 10 Onaqa Pailat na olo minjej, “Ni anjam bei merbqasai e? Ni que. E tamo kobaquja. Deqa e na odqai di naŋgi ni uratmib ni gilqam. E na saidqai di naŋgi ni uratmqasai. Naŋgi ni osib ŋamburbasq di qamqab. Ni degsi poimosai e?”

11 Onaqa Yesus na Pailat minjej, “Qotei laŋ qureq di unu qaji a na ni siŋgila emosai qamu ni na e kumbra bei ebqa keresai qamu. Deqa ino une kiñala. Ariya atra tamo gate agi e ojsiq ino baŋq di atqo qaji aqa une kobaquja.” 12 Yesus a na Pailat degsi minjnaqa qusiqa olo oqedosiqa Juda tamo kokba naŋgi minjrej, “Uŋgum. E Yesus uratit gilqas.” A na naŋgi degsi minjreqnaqa naŋgi na olo tulaŋ saidoqnsib murqumyoqnsib minjoqneb, “Ni Yesus uratim gilaiq. Ni a uratqam di ni mandor koba Sisar aqa wau tamo bolesai. Yesus a marqo, ‘E segi mandor koba.’ A degsi marqo deqa a na Sisar jeu atqo.”

13 Naŋgi na Pailat degsib minjnab qusiqa a olo Yesus osiq oqedosiqa aqa awo jaram kobaq di awoej. Pailat a gaigai tamo naŋgo une qa peginjrqa oqnsiq deqa awo jaramq dia awooqnej. Jaram so qaji sawa di aqa ñam Meniŋ Bijal. Hibru anjam na Gabata mareqnub. 14 Ariya Juda naŋgo yori bati brantqa laqnej deqa yori bati aqa iŋgi iŋgi kalil gereiyosib atnab soqnej. Seŋ bati 12 onaq qanam jigeej. Deqa Pailat na Yesus osiqa Juda tamo kokba naŋgi minjrej, “Niŋgi nuŋgo mandor koba uniye.” 15 Onaqa naŋgi tulaŋ koba leleŋosib minjeb, “Ni na a taqal waiy! Osim ŋamburbasq di qame!” Onaqa Pailat na minjrej, “E nuŋgo mandor koba osiy ŋamburbasq di qamqai e?” Onaqa atra tamo kokba naŋgi na kamba minjeb, “Gago mandor bei saiqoji. Gago mandor qujai agi Sisar.” 16 Onaqa Pailat a naŋgo areqalo dauryosiqa Yesus osiq naŋgo baŋq di atsiqa minjrej, “Niŋgi na Yesus osib ŋamburbasq di qamiye.”

Naŋgi na Yesus osib ŋamburbasq di qameb

17 Degsi minjrnaqa ariya qaja tamo naŋgi na Yesus osib aqa qawarq di aqa segi ŋamburbas qoboiyetosib a baŋ ojsib Jerusalem qure uratosib osi gilsib sawa agu kiñala bei aqa ñam Tamo Gate Tanu di branteb. Ñam di Hibru anjam na Golgota mareqnub. 18 Di brantosib Yesus osib ŋamburbasq di qameb. Tamo aiyel dego ŋamburbasq di gaintnjrsib ñumeb. Yesus a ambleq di gaintsib tamo bei aqa baŋ qonaŋq di gainteb. Bei aqa baŋ woq di gainteb.

19 Onaqa Pailat a ŋam sarqei bei osiqa quraq di anjam endegsi neŋgreŋyej, “Yesus Nasaret qaji a Juda naŋgo Mandor Koba.” Degsi neŋgreŋyosiq ŋam sarqei di osi gilsiqa qaja tamo naŋgi enjrnaqa naŋgi na osib Yesus aqa ŋamburbas mutu gogeq di qameb. 20 Sawa agu Yesus ŋamburbasq di qameb qaji di Jerusalem qure jojom. Deqa Juda tamo uŋgasari tulaŋ gargekoba naŋgi gile beoqnsib anjam Pailat na neŋgreŋyej qaji di sisiyoqneb. Anjam di Hibru anjam na Rom naŋgo anjam na ti Grik naŋgo anjam na ti turtsiq neŋgreŋyej. 21 Onaqa Juda naŋgo atra tamo kokba naŋgi na Pailat minjeb, “‘Yesus a Juda naŋgo Mandor Koba’ anjam degsi neŋgreŋyaim. ‘A marej, “E Juda naŋgo Mandor Koba,” ’ degsi neŋgreŋye.”

22 Onaqa Pailat na minjrej, “Uŋgum. E anjam neŋgreŋyonum degesoqnem.”

23 Ariya qaja tamo naŋgi na Yesus ŋamburbasq di qamsibqa naŋgi Yesus aqa gara eleŋqa marsib gilteleŋeb. Gilteleŋosib tumbol qolqe ateb. Aqa gara jugo olekoba di gara baŋga qujai na gereiyeb. Gara baŋga bei na totoryosai. Gara di tulaŋ boledamu. 24 Deqa qaja tamo naŋgi segi segi qairosib mareb, “Iga gara di bumbraŋyqasai. Iga meniŋ silali alaŋonam tamo yai aqa meniŋ na buŋnjrqas a na gara di oqas.” Degsib marsib meniŋ silali alaŋeb. Naŋgi kumbra di yeb deqa Qotei aqa anjam bei nami neŋgreŋyeb qaji di aqa damu brantej. Agi nami endegsib neŋgreŋyeb, “Naŋgi ijo gara eleŋqa marsib gilteleŋqab. Gilteleŋosib meniŋ silali alaŋqab.”

25 Yesus aqa ai wo aqa ani yala wo ŋamburbas utruq di tigelesoqneb. Maria Makdala qaji wo Klopas aqa ŋauqali Maria wo naŋgi aiyel dego bosib koba na tigelesoqneb. 26 Onaqa Yesus a tirosiqa aqa ai wo aqa aŋgro bei a tulaŋ qalaqalaiyoqnej qaji a wo naŋgi aiyel ŋamburbas utruq di tigelesonab unjrsiqa aqa ai metosiq minjej, “O ai, di ino aŋgro.” 27 Osiqa aŋgro di minjej, “Di ino ai.” Onaqa bati qujai deqa aŋgro dena Yesus aqa ai osiqa aqa segi talq dia ombla sosibqa taqatoqnej.

Yesus a moiej

28 Ariya Yesus a endegsi qalieej, “Wau kalil ijo Abu na ebej qaji agi kobotonum.” Osiqa Qotei aqa anjam bei nami neŋgreŋyeb qaji di aqa damu brantqajqa deqa marej, “E ya qarbqo.” 29 A degsi marnaqa qaja tamo naŋgi qusibqa gara ñeŋgi bei osib wain isa kobaq di tuqtosib ŋamtaŋ bei aqa dani osib mutuq di gara ñeŋgi qosisib osib Yesus anaiyqajqa soqtosib aqa medabuq di ateb. Wain di ya nobu bei ŋamburbas utruq di nami atnab soqnej qaji dena tigsib Yesus anaiyeb. 30 Onaqa Yesus a wain isa koba di uysiqa marej, “Bini e ijo wau kobotonum.” Degsi marsiqa aqa gate gulaiŋosiqa mondor titosiq moiej.

Qaja tamo bei na aqa qaja osiq Yesus aqa jar baŋgaq di qamej

31 Ariya Juda naŋgo yori bati koba brantqa laqnej deqa yori bati aqa iŋgi iŋgi kalil gereiysib atnab soqnej. Nebe yori bati kobaquja. Deqa Juda naŋgi mareb, “Iga yori bati qa tamo naŋgi ŋamburbasq di uratnjrim sqasai.” Osib Pailat aqa areq bosib minjeb, “Ni na ino qaja tamo naŋgi minjrimqa gilsib tamo ŋamburbasq di gaiŋejunub qaji naŋgo siŋga gentetnjribqa urur moreŋabqa osib subq atqab.” 32 Onaqa Pailat a naŋgo anjam di qusiqa odosiq aqa qaja tamo qudei qariŋnjrnaq gilsib tamo aiyel Yesus koba na ŋamburbasq di gaiŋesoqneb qaji naŋgo siŋga gentetnjreb. 33 Osib Yesus aqa areq gilsib uneb a nami moiej. Deqa naŋgi aqa siŋga gentosai. 34 Ariya qaja tamo bei a na aqa qaja osiq Yesus aqa jar baŋgaq di qamnaq leŋ ti ya ti aiej. 35 E Jon. Naŋgi kumbra di yonabqa e ijo segi ŋamdamu na unem. Deqa e bini mare mare laqnum. Anjam e mareqnum qaji endi bole. E segi qalieonum, e anjam bole mareqnum. Deqa niŋgi ijo anjam endi qusib Yesus qa nuŋgo areqalo siŋgilatiye. 36 Qaja tamo naŋgi kumbra di yeb deqa Qotei aqa anjam bei nami neŋgreŋyeb qaji di aqa damu brantej. Agi endegsib neŋgreŋyeb, “Naŋgi aqa tanu bei gentqasai.” 37 Qotei aqa anjam bei dego aqa damu brantej. Anjam agiende, “Naŋgi qaja na aqa jar baŋgaq di qamsibqa koqyesqab.”

Naŋgi na Yesus aqa qusa osib sub bunujq di ateb

38 Onaqa tamo bei aqa ñam Josep a Yesus aqa jejamu osim subq atqa marsiqa Pailat a nenemyqa gilej. Josep a Arimatea qure qaji. A Yesus daurysi laqnej qaji. A Juda tamo kokba naŋgi ulainjrsiq deqa uliosiq Yesus daurysi laqnej. A boleq na dauryosaioqnej. Ariya Josep a Pailat aqa areq gilsiqa nenemyej, “Ni e odbimqa e Yesus aqa jejamu osiy subq atqa kere e?” Onaqa Pailat na Josep odyonaqa a Yesus aqa jejamu osiq subq atqa gilej. 39 Nikodemus agi nami qolo Yesus aqaq gilej qaji a dego Josep ombla na Yesus aqa jejamu osib subq atqa gileb. Nikodemus a gilqa osiqa ŋam so aqa ya quleq ti utru aiyela turtosiq gereiyosiq osi gilej. Ŋam so aqa ya di aqa gulube 30 kilogram. 40 Onaqa naŋgi aiyel Yesus aqa jejamu osib gara boledamu na dalaosib ŋam so aqa ya di osib aqa jejamuq di liyeb. Juda naŋgi na tamo subq atqa oqnsib degyeqnub.

41 Sawa Yesus ŋamburbasq di qameb qaji qalaq dia mandam taqal bei soqnej. Mandam taqal dia sub bunuj bei soqnej. Sub dia nami tamo bei atosaisoqneb. 42 Sub di isaq di sosai. A jojomq di soqnej. Juda naŋgo yori bati aqa iŋgi iŋgi kalil gereiyqa bati brantej deqa naŋgi aiyel na Yesus aqa jejamu osib sub dia ateb.

Copyright information for `BOJ