John 7

Yesus a yori bati unqa marsiq Jerusalem gilej

Bati bei Yesus a Galili sawaq dia laqnej. A Judia sawaq dia laqajqa uratej. Di kiyaqa? Juda tamo kokba naŋgi a qalib moiqajqa maroqneb deqa. Ariya Juda naŋgo yori bati koba jojomej. Yori bati di aqa utru agi marqai. Juda naŋgo moma naŋgi nami jagwa oqajqa tal gereiyeleŋosib osi laqneb deqa are qalqajqa bati. Deqa Yesus aqa aube naŋgi na minjeb, “Ni Galili sawa endi saim. Ni sawa endi uratosim Judia sawaq gile. Gilsim dia ino maŋwa babtoqnimqa ino aŋgro naŋgi unoqnqab. Tamo bei na aqa kumbra babtqa osimqa a uliosim yqasai. Deqa ni ino maŋwa boleq na yqa marsimqa ni tamo uŋgasari kalil naŋgo ŋamgalaq di tigelosim yoqne.” Yesus aqa aube naŋgi a qa naŋgo areqalo siŋgilatosai deqa naŋgi degsib misiliŋ anjam minjeb. Onaqa Yesus na kamba minjrej, “Ijo bati kereosaiunu. Ariya bati kalil di nuŋgo bati. Tamo uŋgasari mandamq endi unub qaji naŋgi niŋgi jeutŋgwa keresai. Ariya naŋgi gaigai e jeutbeqnub. Di kiyaqa? E naŋgo kumbra uge uge babtetnjreqnum deqa. Niŋgi Jerusalem gilsib yori bati di uniye. E gilqa keresai. Di kiyaqa? Ijo bati kereosaiunu.” Degsi minjrsiqa a Galili sawaq di soqnej.

10 Ariya aqa aube naŋgi yori bati di unqajqa gilnabqa a dego gilej. A boleq na gilosai. A loumosiq gilej. Yim tamo naŋgi a unaib deqa. 11 Ariya yori bati di brantonaqa Juda tamo kokba naŋgi Jerusalem dia Yesus qa ŋamoqneb. Ŋamosib maroqneb, “Yesus a qabi unu?” 12 Onaqa tamo uŋgasari naŋgi segi segi anjam gargekoba laŋa laŋa Yesus qa maroqneb. Qudei naŋgi mareb, “Yesus a tamo bolequja.” Qudei naŋgi mareb, “Sai. A na tamo uŋgasari naŋgi gisa gisaŋnjreqnu.” 13 Naŋgi degsib maroqneb. Ariya naŋgi Juda tamo kokba naŋgi ulainjrsib deqa naŋgi a qa boleq na anjam marosaioqneb.

14 Ariya yori bati gilsiq ambleqyonaqa Yesus a segi brantosiqa atra tal miligiq gilsiq dia tamo uŋgasari naŋgi Qotei aqa anjam palontosiq minjroqnej. 15 Onaqa Juda tamo kokba naŋgi Yesus aqa anjam di qusibqa naŋgi are koba qaloqnsib segi segi maroqneb, “Yesus a powo kobaquja di qabe na osiqa anjam mareqnu? A nami skul beiq gilosai.” 16 Onaqa Yesus na kamba minjrej, “Anjam e mareqnum qaji endi ijo anjam sai. Anjam endi ijo Abu e qariŋbej qaji aqa anjam. 17 Tamo bei a Qotei aqa areqalo dauryqajqa are soqnimqa anjam e mareqnum qaji endi aqa utru a geregere poiyqas. Osim qalieqas, ijo anjam endi Qotei aqaq dena bej. E ijo segi areqalo na marosaieqnum. A degsim qalieqas. 18 Tamo bei aqa segi areqalo na anjam marqas di a aqa segi ñam soqtqa osim deqa anjam marqas. Ariya Qotei agi e qariŋbej qaji aqa ñam e soqtqa osim deqa anjam mareqnum. Deqa e tamo bole. E gisaŋ tamo sai.

19 “Nami Moses na niŋgi dal anjam eŋgej. Ariya nuŋgo ambleq di tamo bei a dal anjam di dauryosaieqnu. Kiyaqa niŋgi e lubsib moiotbqa mareqnub?” 20 Onaqa tamo uŋgasari naŋgi na kamba Yesus minjeb, “Mondor uge inoq di unu. Yai naŋgi na ni lumsib moiotmqa mareqnub?” 21 Onaqa Yesus na kamba minjrej, “E maŋwa qujai babtonamqa niŋgi kalil are koba qaleqnub. 22 Ariya niŋgi are qaliye. Moses a na niŋgi muluŋ eŋgej. Onaqa niŋgi yori bati qa nuŋgo aŋgro naŋgi muluŋ breinjreqnub. Bole, Moses a muluŋ qa utru sai. Nuŋgo moma naŋgi muluŋ qa utru. 23 Niŋgi Moses aqa dal anjam geregere dauryqa oqnsib deqa niŋgi yori bati qa nuŋgo aŋgro naŋgi muluŋ breinjreqnub. Ariya e yori bati qa tamo qujai aqa jejamu boletonumqa niŋgi unsibqa kiyaqa e qa ŋiriŋonub? 24 Laŋa ŋamdamu na iŋgi iŋgi tenemtoqnaib. Kumbra bole na iŋgi iŋgi kalil tenemtoqniye.”

Tamo uŋgasari naŋgi qalieqajqa, Yesus a tamo yai

25 Ariya bati deqa tamo uŋgasari qudei Jerusalem di soqneb qaji naŋgi Yesus aqa kumbra di unsibqa naŋgi segi segi endegsib maroqneb, “Yesus a kio Juda tamo kokba naŋgi na qalib moiqajqa mareqnub? 26 Niŋgi uniye. A boleq na anjam mareqnaqa naŋgi a anjam bei minjosaieqnub. Naŋgi qalieonub kio, tamo di a Kristus? 27 Kristus aqa qure utru di tamo bei a qaliesai. Ariya tamo endi aqa qure utru di iga qalie bole.”

28 Onaqa Yesus a atra tal miligiq di sosiqa a na tamo uŋgasari naŋgi Qotei aqa anjam palontosiq minjroqnej. Osiqa leleŋosiq endegsi minjrej, “Niŋgi are qalonub, niŋgi e qa qalie. E qabe na bem di niŋgi qalie e? Ariya e ijo segi areqalo na bosai. Ijo Abu na e qariŋbonaq bem. Ijo Abu a segi kumbra bole qa utru. Ariya niŋgi a qa qaliesai. 29 E a qa bole qalie. E a ombla sonamqa dena e qariŋbonaq agi bem.”

30 Onaqa naŋgi Yesus aqa anjam di qusibqa naŋgi a ojsib tonto talq di waiyqa mareb. Ariya a ojqa bati kereosaisoqnej deqa tamo bei na a ojosai. 31 Bati deqa tamo uŋgasari gargekoba naŋgi Yesus qa naŋgo areqalo siŋgilateb. Osib mareb, “Kristus a bosim Qotei aqa maŋwa gargekoba tamo endena babteqnu qaji di buŋyqa keresai.”

Farisi naŋgi na qaja tamo naŋgi Yesus ojqa qariŋnjreb

32 Tamo uŋgasari naŋgi anjam degsib Yesus qa mareqnab Farisi naŋgi qusibqa atra tamo kokba naŋgi ti koroosib qaja tamo qudei naŋgi qariŋnjrnabqa Yesus ojqa gileb. 33 Deqa Yesus a endegsi marej, “E niŋgi koba na sokiñalaysiy ijo Abu e qariŋbej qaji aqaq olo oqwai. 34 Oqitqa niŋgi e qa ŋamqab e nubqasai. Qure e sqai qaji di niŋgi oqwa keresai.” 35 Onaqa Juda naŋgi segi segi maroqneb, “Yesus a qabitimqa iga a unqasai? A Grik naŋgo sawaq gilqas kio? Gilsim dia Juda tamo qudei naŋgi koba na sosib Grik naŋgi anjam minjroqnqas kio? 36 A marqo, ‘Niŋgi e qa ŋamqab e nubqasai. Qure e sqai qaji di niŋgi oqwa keresai.’ Utru kiyaqa a degsi marqo?”

Yesus a ŋambile gaigai sqajqa ya qa anjam marej

37 Ariya yori bati gilsiq koboqa laqnaqa yori kobaquja brantej. Bati deqa Yesus a tigelosiqa leleŋosiq marej, “Tamo bei a ya qaryimqa ijoq bosim ya uyem. 38 Tamo bei a e qa aqa areqalo siŋgilatqas di aqa are miligiq na ŋambile gaigai sqajqa ya oqoqnsim ya ani bul polyoqnqas. Nami Qotei aqa anjam degsib neŋgreŋyeb unu.” 39 Yesus a ya qa marej di a Qotei aqa Mondor qa sigitosiqa yawo anjam marej. Yesus a laŋ qureq oqsiq ñam koba osaisoqnej deqa Qotei aqa Mondor bosaisoqnej. A bunuqna oqsim Qotei aqa Mondor qariŋyim bamqa tamo naŋgi Yesus qa naŋgo areqalo siŋgilatqab qaji naŋgi Qotei aqa Mondor oqab. Deqa Yesus a yawo anjam degsi marej.

Tamo uŋgasari naŋgi Yesus aqa anjam qusib poaiyeleb

40 Onaqa tamo uŋgasari qudei naŋgi Yesus aqa anjam di qusib mareb, “Bole, Qotei aqa medabu o qaji tamo kobaquja nami Qotei na qariŋyim bqajqa marej qaji agi a endi.” 41 Onaqa tamo qudei naŋgi mareb, “Tamo endi a bole Kristus.” Onaqa tamo qudei naŋgi mareb, “Sai. Kristus a bqas di a Galili sawaq dena bqasai. 42 Kristus a Devit aqa leŋ dena ŋambabosim aqa qure utru Betlehem dena bqas. Nami Qotei aqa anjam degsib neŋgreŋyeb unu.” 43 Tamo uŋgasari naŋgi degsib Yesus qa anjam tititosib ŋiriŋosib poeleŋeb. 44 Osib tamo qudei naŋgi Yesus ojqa mareb. Mareb di tamo bei na ojosai.

Juda gate kokba naŋgi Yesus qa naŋgo areqalo siŋgilatosai

45 Onaqa qaja tamo Farisi naŋgi na qariŋnjrnab Yesus aqaq gileb qaji naŋgi olo puluosib atra tamo kokba ti Farisi ti naŋgoq ainabqa minjreb, “Niŋgi kiyaqa Yesus ojsib osi bosai?” 46 Onaqa qaja tamo naŋgi na kamba minjreb, “Iga Yesus aqa anjam quonum di anjam bolequja maroqnaj. Tamo bei nami anjam deqaji marosaioqnej. Deqa iga a ojosai.” 47 Onaqa Farisi naŋgi na minjreb, “Yesus a na niŋgi dego gisaŋgwo e? 48 Niŋgi uniye. Juda tamo koba bei Yesus qa aqa areqalo siŋgilatosai. Farisi tamo bei dego Yesus qa aqa areqalo siŋgilatosai. Sai bolesai. 49 Ariya tamo uŋgasari laŋa laŋaj naŋgi dal anjam qaliesai deqa agi Yesus qa naŋgo areqalo siŋgilatonub. Deqa Qotei a na naŋgi qoreinjrim torei padalqab.” Farisi naŋgi na qaja tamo naŋgi degsib minjreb.

50 Onaqa Juda gate bei Nikodemus agi nami Yesus aqaq gilsiq anjam minjej qaji a Farisi naŋgo ambleq di tigelosiqa endegsi minjrej, 51 “Gago dal anjam kiersi unu? Iga tamo bei ojsim aqa une laŋa minjqom e? Sai. Gago dal anjam a degsi sosai. Iga mati aqa anjam qusim aqa kumbra geregere qalieqom.” 52 Onaqa Farisi naŋgi na kamba minjeb, “Ni dego Galili qaji tamo kio? Qotei aqa anjam nami neŋgreŋyeb qaji di geregere peleiye. Peleiyqam endegsi poimqas, Qotei aqa medabu o qaji tamo bei Galili sawaq dena bqasai.”

Naŋgi na uŋa bei une atej qaji a ojsib Yesus aqa areq osi beb

53 Onaqa koro koboonaqa naŋgi kalil jaraiosibqa naŋgo segi segi talq gileleŋeb.

Copyright information for `BOJ