John 8

Ariya Yesus a Oliv manaq oqej. Nobqolo ambru a olo tigelosiqa atra tal miligiq gilej. Gilsiq di sonaqa tamo uŋgasari kalil naŋgi aqa areq beqnabqa a di awesosiqa Qotei aqa anjam palontosiq minjroqnej. Ariya uŋa bei tamo wo une ateqnab tamo qudei naŋgi na unsibqa dal anjam qalie tamo naŋgi ti Farisi naŋgi ti minjrnab naŋgi na uŋa di ojsib osi bosib tamo uŋgasari naŋgo ŋamgalaq di tigelteb. Osib Yesus minjeb, “O Qalie Tamo Koba, uŋa endi tamo bei wo une ateqnab tamo qudei naŋgi na unonub. Ni qalie, Moses a nami dal anjam endegsi neŋgreŋyej, ‘Uŋa bei a tamo wo une atimqa meniŋ na qalib moiem.’ Deqa ni kiersi marqam?” Naŋgi Yesus laŋa are qameteb. Naŋgi endegsib are qaleb, “Iga Yesus laŋa are qametonam a anjam bei grotimqa qusim a ojqom.” Onaqa Yesus a kamba naŋgi anjam bei minjrosai. A mana qamsiq turuosiqa baŋ gei na mandamq di neŋgreŋyoqnej.

Onaqa naŋgi na olo anjam di Yesus nenemyonabqa a tigelosiqa minjrej, “Nuŋgo ambleq di tamo yai a une saiqoji? A na namo meniŋ osim uŋa di qalem.” Osiqa olo turuosiqa mandamq di neŋgreŋyoqnej. Onaqa naŋgi Yesus aqa anjam di qusibqa naŋgi segi segi kalil oqedosib jaraieb. Tamo kokba naŋgi namoosib jaraionab qudei bunueb. Osib Yesus uratonab a segi di soqnej. Uŋa di a Yesus aqa ulatamuq di tigelesoqnej.

10 Onaqa Yesus a olo tigelosiqa uŋa di minjej, “Uŋa, tamo naŋgi qabitonub? Tamo bei na ino une qa olo mermosai.” 11 Onaqa uŋa dena Yesus minjej, “Od, Tamo Koba, tamo bei na ijo une qa olo merbosai.” Onaqa Yesus na minjej, “E dego ino une qa mermqasai. Deqa ni gile. Olo une bei ataim.”

Yesus a puloŋ bul deqa a na tamo uŋgasari mandamq endi unub qaji naŋgi suwantnjreqnu

12 Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.” 13 Onaqa Farisi naŋgi Yesus aqa anjam di qusibqa endegsib minjeb, “Ni ino segi wau qa ti kumbra qa ti anjam mareqnum. Deqa tamo naŋgi ino anjam quetmaib.” 14 Onaqa Yesus na kamba minjrej, “Di bole. E ijo segi kumbra qa anjam mareqnum. Ariya tamo naŋgi ijo anjam quetbqa kere. Di kiyaqa? E qabe na bem di e segi qalie bole. E qabitsiy puluosiy olo oqwai di dego e qalie. Ariya e qabe na bem di niŋgi qaliesai. E qabitsiy puluosiy olo oqwai di dego niŋgi qaliesai. 15 Niŋgi laŋa mandam qa kumbra na tamo naŋgi peginjreqnub. E tamo naŋgo kumbra qa peginjrosaieqnum. 16 Ariya e na tamo naŋgo kumbra qa naŋgi peginjrqai di tamo naŋgi ijo anjam quetbqa kere. Di kiyaqa? E segi na tamo naŋgi peginjrosaieqnum. Ijo Abu e qariŋbej qaji a ombla na wauoqnsim tamo naŋgi peginjreqnum. 17 Nuŋgo dal anjam bei endegsib neŋgreŋyeb unu, ‘Tamo aiyel naŋgi anjam qujai marqab di naŋgo anjam bole.’ 18 Deqa e segi na ijo wau qa ti ijo kumbra qa ti anjam mareqnum. Ijo Abu e qariŋbej qaji a dego e ombla na ijo wau qa ti ijo kumbra qa ti anjam mareqnum.”

19 Onaqa Farisi naŋgi na Yesus nenemyeb, “Ino Abu qabi unu?”

Onaqa Yesus na kamba minjrej, “Niŋgi e qa qaliesai deqa ijo Abu qa dego niŋgi qaliesai. Niŋgi e qa qalie qamu niŋgi ijo Abu qa dego qalie qamu.”

20 Yesus a atra tal miligiq di sosiqa tamo uŋgasari naŋgi anjam degsi minjrej. A silali ato qaji warum jojomq di awesoqnej. Warum dia tamo naŋgi Qotei atraiyoqnsibqa silali atoqneb. Yesus ojqa bati kereosaisoqnej deqa tamo bei na a ojosai.

Yesus a marej, “Qure e oqwai qaji di niŋgi oqwa keresai.”

21 Onaqa Yesus a na olo tamo uŋgasari naŋgi endegsi minjrej, “E niŋgi uratŋgitqa niŋgi e qa ŋamqab e nubqasai. Niŋgi nuŋgo une ti sosibqa moreŋqab. Qure e oqwai qaji di niŋgi oqwa keresai.” 22 Onaqa Juda naŋgi Yesus aqa anjam di qusibqa naŋgi segi segi endegsib maroqneb, “Yesus a kiyaqa marqo, ‘Qure e oqwai qaji di niŋgi oqwa keresai’? A na aqa segi jejamu qalim moiqas kio?” 23 Onaqa Yesus na olo minjrej, “Niŋgi mandam tamo. E laŋ goge qaji tamo. Niŋgi mandam endeqaji tamo. E mandam endeqaji tamo sai. 24 Deqa e niŋgi merŋgonum, niŋgi nuŋgo une ti sosibqa moreŋqab. E segi qujai Qotei. Niŋgi deqa nuŋgo areqalo siŋgilatqasai di niŋgi nuŋgo une ti sosibqa moreŋqab.”

25 Onaqa naŋgi na Yesus nenemyeb, “Ni tamo yai?” Onaqa Yesus na minjrej, “E nami ijo ñam ubtsim merŋgem. 26 E nuŋgo kumbra qa anjam gargekoba merŋgwajqa ijo areqaloq di unu. Deqa e nuŋgo kumbra qa niŋgi pegiŋgwai. Ariya ijo Abu e qariŋbej qaji a anjam bole qa utru. Deqa anjam kalil a na merbeqnu qaji di e quoqnsim tamo uŋgasari mandamq endi unub qaji naŋgi minjreqnum.” Yesus a na naŋgi degsi minjrej.

27 Naŋgi qaliesai, Yesus a naŋgi aqa Abu qa anjam degsi minjrej. 28 Deqa a na olo minjrej, “Niŋgi na e Tamo Aŋgro soqtbosib gaintbibqa bati deqa niŋgi poiŋgwas, e segi qujai Qotei. Osib qalieqab, e ijo segi areqalo na kumbra bei yosaieqnum. Anjam kalil ijo Abu na merbeqnaq queqnum qaji di segi mareqnum. 29 Ijo Abu e qariŋbej qaji a e ombla sosiqa taqbejunu. A na e uratbosaieqnu. Di kiyaqa? E gaigai kumbra kalil a tulaŋ areareteqnu qaji di yeqnum.” 30 Yesus a anjam degsi marnaqa tamo uŋgasari naŋgi qusibqa naŋgi gargekoba Yesus qa naŋgo areqalo siŋgilateb.

Tamo uŋgasari naŋgi anjam bole qa utru poinjrim une na naŋgi ojqa keresai

31 Ariya Yesus a na Juda naŋgi a qa naŋgo areqalo siŋgilateb qaji naŋgi endegsi minjrej, “Niŋgi ijo anjam siŋgila na ojqab di niŋgi ijo aŋgro tiŋtiŋ sqab. 32 Deqa niŋgi anjam bole geregere qalieqab. Yimqa anjam bole dena niŋgi aqaryaiŋgimqa une bei na niŋgi ojqa keresai.” 33 Onaqa naŋgi na kamba minjeb, “Iga Abraham aqa moma. Iga nami tamo bei aqa kaŋgal tamo laŋaj sosai. Deqa ni kiyaqa mergonum, ‘Une bei na niŋgi ojqa keresai’?”

34 Onaqa Yesus na kamba minjrej, “Niŋgi quiye. E bole merŋgwai. Tamo kalil une yoqnsib laqnub qaji naŋgi une aqa kaŋgal tamo laŋaj bul unub. 35 Kaŋgal tamo laŋaj naŋgi laŋa wau tamo unub. Naŋgi abu saiqoji. Ariya aŋgro naŋgi abu ti. Deqa naŋgi gaigai naŋgo abu ombla na sqab. 36 E Qotei aqa Ŋiri deqa e Abu ti. Deqa e na niŋgi aqaryaiŋgitqa une bei na niŋgi ojqa keresaibolesai.

37 “E qalie, niŋgi Abraham aqa moma unub. Ariya ijo anjam nuŋgo are miligiq di sosai. Utru deqa niŋgi e lubsib moiotbqa mareqnub. 38 Kumbra kalil ijo Abu na e osorbej qaji agi e na olo niŋgi saiŋgeqnum. Ariya niŋgi dego kumbra kalil nuŋgo abu na osorŋgeqnu qaji di niŋgi yeqnub.”

39 Onaqa Juda naŋgi Yesus aqa anjam di qusibqa olo kamba minjeb, “Gago abu bole agi Abraham.” Onaqa Yesus na minjrej, “Niŋgi Abraham aqa aŋgro qamu kumbra Abraham nami yoqnej qaji di niŋgi dego yeqnub qamu. 40 Sai. Qotei aqa anjam bole kalil a na e merbeqnaq queqnum qaji di e niŋgi olo merŋgeqnum. Yeqnaqa niŋgi olo e lubsib moiotbqa mareqnub. Abraham a nami kumbra deqaji yosaioqnej. 41 Niŋgi nuŋgo abu aqa kumbra yeqnub.” Onaqa naŋgi na minjeb, “Gago ai naŋgi laŋa laŋa laosib iga ŋambabtgosai. Gago Abu qujai agi Qotei.” 42 Onaqa Yesus na minjrej, “Qotei a nuŋgo Abu qamu niŋgi e qalaqalaibonub qamu. Di kiyaqa? E Qotei aqaq dena bem deqa. E ijo segi areqalo na bosai. Qotei na e qariŋbonaq bem.

43 “Kiyaqa niŋgi ijo anjam endi poiŋgosai? Utru endegsi merŋgwai. Niŋgi ijo anjam quqwa keresai deqa. 44 Niŋgi nuŋgo abu Satan aqa aŋgro. Niŋgi nuŋgo abu Satan aqa areqalo dauryqajqa tulaŋ siŋgilaeqnub. Satan a nami tamo qalo qaji tamo soqnej agi bini unu. A kumbra bole dauryosaieqnu. Di kiyaqa? A kumbra bole dauryqajqa torei urateqnu. A anjam marqas di a gisaŋ anjam segi marqas. A gisaŋ anjam qa utru. A gisaŋ tamo. A gisaŋ anjam kalil aqa abu. 45 Ariya e anjam bole merŋgeqnum deqa niŋgi ijo anjam nuŋgo areqaloq di siŋgilatosaieqnub. 46 E une yonum niŋgi degsib are qaleqnub e? Niŋgi degsib are qalqab di niŋgi ijo une babtiye. Ariya e anjam bole marqai di niŋgi kiyaqa ijo anjam nuŋgo areqaloq di siŋgilatosaieqnub? 47 Qotei aqa aŋgro naŋgi aqa anjam kalil queqnub. Niŋgi Qotei aqa aŋgro sai deqa niŋgi aqa anjam quosaieqnub.”

Yesus a marej, “Abraham a ŋambabosaisonaqa e Qotei ombla soqnem.”

48 Onaqa Juda naŋgi Yesus aqa anjam di qusibqa minjeb, “Iga bole maronum, ni Samaria qaji tamo. Mondor uge inoq di unu.” 49 Onaqa Yesus na kamba minjrej, “Mondor uge ijoq di sosai. E ijo Abu aqa ñam soqteqnum. Ariya niŋgi na olo ijo ñam ugetetbeqnub. 50 E ijo segi ñam soqtqa are qalosaieqnum. Ijo Abu a segi na ijo ñam soqtetbeqnu. Agi a na qujai nuŋgo une qa niŋgi pegiŋgwas. 51 Niŋgi quiye. E bole merŋgwai. Tamo bei na ijo anjam qusim dauryqas di a olo moiqa keresai. Saibolesai.”

52 Onaqa Juda naŋgi na minjeb, “Endego iga qalieonum, mondor uge inoq di unu. Abraham a moiej. Qotei aqa medabu o qaji tamo kalil naŋgi dego moreŋekriteb. Ariya ni maronum, ‘Tamo bei na ijo anjam qusim dauryqas di a olo moiqa keresai.’ 53 Ni na gago moma utru Abraham buŋyqam kio? A moiej. Qotei aqa medabu o qaji tamo kalil naŋgi dego moreŋeb. Deqa ni segi qa kiersi marqam?”

54 Onaqa Yesus na kamba minjrej, “E ijo segi ñam soqtonum qamu e laŋa soqtonum qamu. Ariya ijo Abu na ijo ñam soqtetbeqnu. Agi niŋgi a qa mareqnub, ‘A gago Qotei.’ 55 Ariya niŋgi a qa qaliesai. Ariya e segi a qa qalie. E a qa qaliesai degsi marqai di e niŋgi bul gisaŋ tamo sqai. E a qa qalieosim deqa agi aqa anjam dauryeqnum.

56 “Nuŋgo moma utru Abraham a nami ijo bqajqa bati unqa marsiqa areboleboleiyonaq soqnej. A unsiqa tulaŋ areboleboleiyej.” 57 Onaqa Juda naŋgi Yesus aqa anjam di qusibqa minjeb, “Ino wausau 50 osaiunu. Ni Abraham unem e?” 58 Onaqa Yesus na kamba minjrej, “Niŋgi quiye. E bole merŋgwai. Abraham a ŋambabosaisonaqa e nami Qotei ombla soqnem.”

59 Onaqa naŋgi Yesus aqa anjam di qusibqa naŋgi a qa minjiŋ oqetnjrnaqa meniŋ eleŋosib Yesus meniŋ na qalsib moiotqa yonab a loumosiq atra tal uratosiq ulaŋej.

Copyright information for `BOJ