Luke 13

Tamo a are bulyqasai di a padalqas

Yesus a anjam degsi marsiq koboonaqa tamo qudei naŋgi na aqa areq bosib minjeb, “O Tamo Koba, Galili tamo qudei naŋgi Jerusalem dia wagme osib Qotei atraiyeqnabqa Pailat na aqa qaja tamo qudei naŋgi qariŋnjrnaq gilsib naŋgi ñumnab naŋgo leŋ aisiq wagme naŋgo leŋ ti tuturej.” Onaqa Yesus na minjrej, “Niŋgi kiersib are qalonub? Galili tamo naŋgi di Qotei aqa ŋamdamuq di une kokba ti soqneb deqa kio degsib ñumeleŋeb? Ariya Galili tamo qudei naŋgi Qotei aqa ŋamdamuq di une kiñilala ti unub deqa naŋgi ñumeleŋosai. Niŋgi degsib are qalonub kio? Niŋgi degsib are qalaib. E niŋgi merŋgwai. Niŋgi are bulyqasai di niŋgi kalil dego padalqab. Jerusalem dia tal olekoba aqa ñam Siloam di puosiqa tamo 18-pela naŋgi ñumnaq moreŋeb. Deqa niŋgi kiersib are qalonub? Tamo 18-pela moreŋeb qaji naŋgi Qotei aqa ŋamdamuq di une kokba ti soqneb deqa kio naŋgi degsib moreŋeb? Ariya tamo uŋgasari kalil Jerusalem di unub qaji naŋgi une kiñilala ti unub deqa naŋgi moreŋosai. Niŋgi degsib are qalonub kio? Niŋgi degsib are qalaib. E niŋgi merŋgwai. Niŋgi are bulyqasai di niŋgi kalil dego padalqab.”

Ŋam geitosai qaji aqa yawo anjam

Yesus a na naŋgi degsi minjrsiqa olo yawo anjam bei endegsi minjrej, “Tamo bei na aqa wauq gilsiqa saga qura yagej. Bunuqna a qura gei oqajqa marsiq gilej. Gilsiq unej qura geitosai. Deqa a na aqa wau taqato tamo minjej, ‘Ni que. Wausau qalub gilqo e boqnsim ŋam atoqnem qura geitosai. Deqa uŋgum. Qomsim waiy. A kiyaqa mandam aqa namur laŋa saitqas?’ Onaqa wau taqato tamo na minjej, ‘O Tamo Koba, mati uratim soqnem. Wausau qujai endeqa e na aqa utruq dia moror qamsiy namur atsiy unqai. Degyitqa wausau bei qa geitqas kio sai kio? Saiamqa ni marim e qomsiy waiyqai.’” Yesus a na naŋgi yawo anjam degsi minjrej.

Yori bati bei qa Yesus na uŋa bei boletej

10 Onaqa yori bationaqa Yesus a Juda naŋgo Qotei tal miligiq gilsiqa tamo uŋgasari naŋgi koroesonabqa Qotei aqa anjam minjroqnej. Minjroqnsiqa ŋam atej uŋa bei sonaq unej. Uŋa di a maiyej. Mondor uge na ma yonaqa wausau 18 a groŋosiq laqnej. A tiŋtiŋ tigelqa keresai. 12 Deqa Yesus na uŋa di unsiq metonaqa aqa areq bonaqa minjej, “O uŋa, ni que. Endego ino ma ni uratmqo.” 13 Degsi minjsiqa uŋa aqa jejamuq di baŋ atnaqa aqa ma koboonaqa a tiŋtiŋ tigelosiqa Qotei pailyosiqa aqa ñam soqtej. 14 Onaqa Qotei tal taqato tamo a Yesus aqa kumbra di unsiqa minjiŋ oqetej. Di kiyaqa? Yesus a yori bati qa uŋa di boletej deqa. Deqa Qotei tal taqato tamo na tamo uŋgasari naŋgi endegsi minjrej, “Bati 6-pela iga waueqnum. Deqa wau qa bati segi nuŋgo ma boletqajqa boqniye. Yori bati qa nuŋgo ma boletqajqa baib.” 15 A degsi marnaqa Tamo Koba Yesus na kamba minjej, “Niŋgi gisaŋ tamo. Niŋgi yori bati gaigai nuŋgo bulmakau ti donki ti joqsib giloqnsib ya anainjreqnub. 16 Ariya uŋa endi a Abraham aqa leŋ. Satan na ma yonaqa wausau 18 ma ti soqnej. Deqa e kiyaqa yori bati qa aqa ma di uratit sqas? Sai. E boletqai.” 17 Yesus a degsi marnaqa aqa jeu tamo naŋgi aqa anjam di qusibqa naŋgi kalil jemainjrej. Kumbra kalil Yesus na yoqnej qaji di tulaŋ bolequja deqa tamo uŋgasari kalil naŋgi di unoqnsib tulaŋ areboleboleinjroqnej.

Sis yago qa yawo anjam

18 Onaqa Yesus na olo minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Yawo anjam kie niŋgi merŋgitqa anjam di aqa utru niŋgi geregere poiŋgwas? 19 Deqa e anjam endegsi merŋgwai. Qotei aqa kumbra di tamo bei na sis yago osiq aqa wauq di yagej dego kere. Bunuqna sis a oqsiq tulaŋ kobaqujaej. Onaqa qebari naŋgi bosib aqa daniq dia simi ateleŋeb.”

Bem tiyeqnu qaji sum aqa yawo anjam

20 Osiqa Yesus a olo yawo anjam bei endegsi minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Yawo anjam kie niŋgi merŋgitqa anjam di aqa utru niŋgi geregere poiŋgwas? 21 Deqa e anjam endegsi merŋgwai. Qotei aqa kumbra di bem tiyeqnu qaji sum bul. Uŋa bei a bem tiyeqnu qaji sum kiñala osiqa bem sum laŋaj ti turtsiq web kobaqujaq dia bulyonaqa bem kalil tiyekritej.”

Niŋgi siraŋme kiñalaq dena miligiq gilqajqa wauoiye

22 Yesus a yawo anjam degsi marsiq koboonaqa tigelosiqa Jerusalem aiqajqa gam dauryosiq aioqnsiqa qure kokba ti qure kiñilala ti dia Qotei aqa anjam minjre minjre aioqnej. 23 Aieqnaqa tamo bei na minjej, “O Tamo Koba, tamo quja quja segi Qotei na eleŋamqa naŋgi ŋambile gaigai sqab e? Ni iga geregere merge.” Onaqa Yesus na kamba minjrej, 24 “Niŋgi siraŋme kiñalaq dena miligiq gilqajqa wauoiye. Niŋgi quiye. Tamo gargekoba naŋgi miligiq gilqajqa wauoqnib ugeinjroqnqas. 25 Tal aqa abu a tigelosim warum miligiq gilsim siraŋme kabutimqa niŋgi oqeq di tigelosibqa siraŋme kindokindoŋosib minjoqnqab, ‘O Tamo Koba, ni na siraŋme waqtetgime.’ Amqa a na kamba merŋgwas, ‘Niŋgi tal qabe? E niŋgi qaliesai.’ 26 Degsi merŋgimqa niŋgi na minjqab, ‘O Tamo Koba, iga ni ombla iŋgi ti ya ti uyoqnem. Ni gago qureq dia Qotei aqa anjam plaltosim mergoqnem.’ 27 Degsi minjibqa a na kamba merŋgwas, ‘Niŋgi tal qabe? E niŋgi qaliesai. Deqa niŋgi kalil jaraiiye. Niŋgi kumbra uge yo qaji tamo.’ 28 A na niŋgi degsim merŋgsim niŋgi qalaq di breiŋgwas. Yimqa Abraham na Aisak na Jekop na Qotei aqa medabu o qaji tamo kalil naŋgi ti Qotei na taqatnjrsim naŋgo Mandor Koba soqnimqa niŋgi naŋgi unjrsibqa akamkobayoqnsib pailoqnsib nuŋgo jaqatiŋ qa qalagei anjam atoqnqas. 29 Tamo uŋgasari gargekoba naŋgi sawa guta na guma na tauŋ na bebeŋ na ti bosib Qotei aqa qureq di koroeleŋabqa Qotei a naŋgo Mandor Koba sosim naŋgi taqatnjrqas. Yimqa naŋgi Qotei ombla awoosib iŋgi uyqab. 30 Niŋgi quiye. Tamo qudei bini ñam koba ti unub qaji naŋgi mondoŋ ñam saiqoji sqab. Ariya tamo qudei bini ñam saiqoji unub qaji naŋgi mondoŋ ñam koba ti tigelqab.”

Yesus a Jerusalem qure qa are ugeiyej

31 Onaqa bati deqa Farisi tamo qudei naŋgi Yesus aqa areq bosib minjeb, “Mandor Koba Herot a ni lumsim moiotmqa mareqnu. Deqa ni sawa endi uratosim ulaŋ.” 32 Onaqa Yesus na kamba minjrej, “Niŋgi gilsib gisaŋ tamo Herot a endegsib minjiye, ‘Yesus a marqo, “Bini e mondor uge naŋgi winjroqnsiyqa tamo ma ti naŋgi boletnjroqnqai. Nebe dego e wau di yoqnqai. Ariya alieb e ijo wau di kobotqai.” ’ Niŋgi gilsib Herot degsib minjiye. 33 Bini e walwelosi aisiy nebe olo tigelosiy aisiy ariya alieb e Jerusalem di brantqai. Di kiyaqa? Jerusalem dia qujai jeu tamo naŋgi na Qotei aqa medabu o qaji tamo naŋgi ñumib moreŋqab. Naŋgi qure beiq dia naŋgi ñumqasai.

34 “O Jerusalem tamo uŋgasari, Qotei na aqa medabu o qaji tamo naŋgi nuŋgoq qariŋnjreqnaqa niŋgi na meniŋ na ñumeqnab moreŋeqnub. Bati gargekoba e na niŋgi tuwe du du bul koroiŋgwajqa yeqnam niŋgi uratsib jaraieqnub. 35 Deqa niŋgi quiye. Qotei na nuŋgo atra tal kobaquja uratetŋgimqa a laŋa sqas. Deqa niŋgi e olo nubqasai. Degsim gilsim gilsim mondoŋ e olo laŋ qureq na boqnitqa niŋgi e nubsibqa marqab, ‘Niŋgi uniye. Tamo a bqo di Tamo Koba Qotei aqa ñam na bqo. Deqa Qotei na a tulaŋ qalaqalaiyqo.’”

Copyright information for `BOJ