Luke 16

Yesus a ñoro taqato tamo aqa kumbra qa yawo anjam marej

Yesus a na Farisi naŋgi anjam degsi minjrsiq koboonaqa olo aqa aŋgro naŋgi yawo anjam bei endegsi minjrej, “Ñoro tamo bei soqnej. Aqa ñoro kalil aqa wau tamo bei na taqatoqnej. Bati bei tamo qudei naŋgi na ñoro tamo di minjeb, ‘Ino ñoro taqato tamo a na ino ñoro kalil laŋa uyeqnu.’ Degsi minjnabqa a na ñoro taqato tamo di metonaq aqa areq bonaqa minjej, ‘Ni qa anjam degsi merbonubqa e quonum. Ni kiyaqa kumbra degyonum? Deqa ni ijo ñoro kalil uyonum qaji di sisiyosim merbimqa e geregere qalieosiy ni kobotmqai. Yim ni ijo ñoro olo taqatoqnqasai.’

“Onaqa ñoro taqato tamo di a segi are qalej, ‘E kierqai? Ijo tamo koba a na e kobotbqas. E siŋgila saiqoji. Deqa e wau bei yqa keresai. E tamo qudei naŋgi minjrit silali laŋa ebqab e jemaibqas. Deqa e kierqai? E qalieonum. Tamo qudei nami ijo tamo koba aqaq dena ñoro osibqa naŋgi a kamba olo yqajqa minjeb qaji naŋgi di metnjrit ijoq babqa ñoro nami eb qaji di e na aguq atitqa naŋgi e qa tulaŋ areboleboleinjrqas. Deqa ijo tamo koba a na e wibimqa tamo naŋgi dena e osi gilsib naŋgo talq dia e geregereiboqnqab.’ A degsi are qalsiqa tamo kalil nami aqa tamo koba aqaq dena ñoro eb qaji naŋgi metnjrnaq bonabqa tamo namo bej qaji di nenemyej, ‘Ni ñoro gembub ijo tamo koba aqaq dena em?’ Onaqa minjej, ‘E goreŋ kulum 100 em.’ Degsi minjnaqa ñoro taqato tamo na minjej, ‘Pepa naŋgi nami neŋgreŋyeb qaji di osim goreŋ kulum 50 segi neŋgreŋye. Amqa ijo tamo koba a bosim pepa di unsim goreŋ kulum 50 segi olo yaimqas.’ Osiqa olo tamo bei nenemyej, ‘Ni ñoro gembub ijo tamo koba aqaq dena em?’ Onaqa minjej, ‘E bem sum aqa quŋ 100 em.’ Degsi minjnaqa ñoro taqato tamo na minjej, ‘Pepa naŋgi nami neŋgreŋyeb qaji di osim bem sum aqa quŋ 80 segi neŋgreŋye. Amqa ijo tamo koba a bosim pepa di unsim bem sum aqa quŋ 80 segi olo yaimqas.’

“Onaqa ñoro tamo a aqa ñoro taqato tamo aqa kumbra gisaŋ di poiyonaqa aqa ñam soqtosiq minjej, ‘Ni keretonum.’ Degsi minjej. Di kiyaqa? Ñoro taqato tamo uge di a powo ti sosiq deqa kumbra gisaŋ di yej. Deqa niŋgi quiye. Mandam endeqa tamo uŋgasari naŋgi mandam qa kumbra dauryqajqa naŋgo powo kobaquja. Ariya niŋgi Qotei aqa segi tamo uŋgasari suwaŋoq di unub qaji niŋgi mandam qa kumbra dauryqajqa nuŋgo powo kiñala.

“Deqa e niŋgi endegsi merŋgwai. Niŋgi mandam qa ñoro na tamo uŋgasari naŋgi aqaryainjroqnibqa naŋgi na niŋgi kadoiŋgwab. Osib bunuqna mandam qa ñoro kalil koboamqa naŋgi na niŋgi joqsib tal gaigai sqas qaji dia niŋgi geregereiŋgoqnqab.

10 “Niŋgi tamo bei aqa baŋq di ñoro kiñala atib a na geregere taqatqas di niŋgi ñoro qelikoba dego aqa baŋq di atibqa a na geregere taqatqas. Ariya niŋgi tamo bei aqa baŋq di ñoro kiñala atib a na geregere taqatqasai di niŋgi ñoro qelikoba dego aqa baŋq di atibqa a na geregere taqatqasai. 11 Niŋgi mandam qa ñoro geregere taqatqasai di laŋ qure qa ñoro dego niŋgi geregere taqatqa keresai. Deqa tamo yai na laŋ qure qa ñoro nuŋgo baŋq di atqas? Tamo dego bei sosai. 12 Niŋgi tamo bei aqa ñoro geregere taqatqasai di nuŋgo segi ñoro dego geregere taqatqa keresai. Deqa tamo yai na ñoro bei nuŋgo baŋq di atqas? Tamo dego bei sosai.

13 “Tamo qujai a tamo kokba aiyel naŋgo sorgomq di sqa keresai. A tamo kobaquja bei qalaqalaiyosim olo tamo kobaquja bei qa are ugeiyqas. Bei aqa anjam dauryoqnqas. Bei qoreiyqas. Dego kere niŋgi silali ti Qotei ti ombla turtsib naŋgo sorgomq di sqa keresai.”

Yesus a dal anjam qa ti Qotei a tamo uŋgasari naŋgo Mandor Koba sosiq naŋgi taqatnjreqnu deqa ti anjam palontosiq marej

14 Yesus a na aqa aŋgro naŋgi anjam degsi minjrnaqa Farisi naŋgi qusib deqa Yesus yomuiyeb. Farisi naŋgi bati gaigai silali koba oqnqajqa are qaloqneb. Utru deqa naŋgi Yesus yomuiyeb. 15 Onaqa Yesus na kamba Farisi naŋgi minjrej, “Niŋgi mareqnub, ‘Iga kumbra bole yo qaji tamo. Tamo uŋgasari naŋgo ŋamdamuq dia iga kumbra bole bole yeqnum.’ Niŋgi degsib mareqnub. Ariya nuŋgo are miligi di Qotei a segi qalie. Di kiyaqa? Kumbra qudei tamo naŋgi arearetnjreqnu qaji di Qotei aqa ŋamdamuq di tulaŋ ugedamu.

16 “Nami Qotei aqa dal anjam ti Qotei aqa medabu o qaji tamo naŋgo anjam ti maroqneb dena bosi bosiq Jon aqa bati brantej. Jon aqa bati brantej dena bosiq agi bini tamo naŋgi sawa sawa kalilq dia Qotei aqa anjam bole palontosib mareqnub. Tamo kalil naŋgi Qotei na taqatnjrsim naŋgo Mandor Koba sqajqa deqa are qaloqnsib areqalo di tulaŋ siŋgilatejunub.

17 “Laŋ ti mandam ti koboqab. Ariya Qotei aqa dal anjam mutu kiñala bei koboqasai bolesai.”

Yesus a tamo bei na aqa ŋauŋ uratqa kumbra qa anjam marej

18 Yesus a anjam degsi marsiqa olo endegsi marej, “Tamo bei na aqa ŋauŋ uratosimqa olo uŋa bei oqas tamo dena aqa ŋauŋ kumbra uge yqo. Uŋa bei aqa gumbuluŋ na a uratimqa bunuqna tamo bei na olo oqas tamo dena uŋa di kumbra uge yqo.”

Yesus a ñoro tamo wo Lasarus wo naŋgo sa anjam marej

19 Yesus a anjam degsi minjrsiq koboonaqa olo anjam bei endegsi minjrej, “Ñoro tamo bei soqnej. A bati gaigai gara bole bole jugoqnsiqa tulaŋ areboleboleiyeqnaqa iŋgi bole bole uyoqnsiq soqnej. 20 Ariya aqa tal meq dia tamo uge bei aqa ñam Lasarus a bati gaigai awooqnsiq ŋeioqnsiq soqnej. Lasarus a iŋgi iŋgi tulaŋ saibolesai. Aqa jejamu kalil yu na ugetej. 21 Deqa a tal meq dia awesonaqa ñoro tamo a iŋgi uyeqnaqa ñeŋgi ululoŋeqnaqa osiq uyoqnej. Aqa yuq dena leŋ aieqnaqa bauŋ naŋgi boqnsib naŋgo meŋ na yu bilgetoqneb.

22 “Bati bei Lasarus moiej. Moinaqa Qotei aqa laŋ aŋgro naŋgi bosib aqa qunuŋ osib Abraham aqa areq di awoteb. Ariya bunuqna ñoro tamo a dego moinaqa subq ateb. 23 Subq atnabqa aqa qunuŋ aisiq moio qureq di soqnej. Sosiqa jaqatiŋ kobaiyeqnaqa tarosiqa Abraham isaq di sonaq unej. Lasarus a Abraham aqa areq di awesonaq unsiqa tulaŋ koba maosiqa Abraham minjej, ‘O Abu Abraham, e ŋamyuoq endi sosimqa tulaŋ kaŋkaŋoqnsim jaqatiŋ koba eqnum. Deqa ni e qa are ugeimimqa Lasarus minjim aqa baŋ gei yaq di tuqtosimqa bosim ijo meŋq di atimqa kiñala ulilibqas.’

25 “Onaqa Abraham na minjej, ‘O aŋgro, ni are qale. Ni nami ñoro koba ti sosimqa areboleboleimeqnaqa iŋgi bole bole uyoqnem. Ni degsi sonamqa Lasarus a ino iŋgi ñeŋgi uyoqnsiq soqnej. Deqa bini Lasarus a sawa bole endi sosiqa a tulaŋ areboleboleiyeqnu. Ariya ni agi ŋamyuoq di sosimqa jaqatiŋ koba eqnum. 26 Ni ŋam atsim une. Ni ti iga ti ambleq di sub guma koba unu. Deqa iga na sub di laqaiosim nuŋgoq bqa keresai. Niŋgi dego sub di laqaiosib gagoq bqa keresai.’

27 “Onaqa ñoro tamo dena kamba Abraham minjej, ‘O Abraham, ni na Lasarus minjimqa olo puluosimqa ijo abu aqa talq gilsim ijo was 5-pela naŋgi saidnjrimqa naŋgi sawa uge endeq bqasai.’ 29 Onaqa Abraham na minjej, ‘Ino was naŋgi Moses aqa dal anjam qalieonub. Naŋgi Qotei aqa medabu o qaji tamo naŋgo anjam dego qalieonub. Naŋgi anjam di dauryqab di kere.’ 30 Onaqa ñoro tamo dena olo minjej, ‘O Abu Abraham, di keresai. Ariya tamo bei moio qaji a subq na tigelosim anjam minjrimqa di naŋgi qusib are bulyosib dauryqab.’

31 “Onaqa Abraham na minjej, ‘Tamo naŋgi Moses aqa dal anjam ti Qotei aqa medabu o qaji tamo naŋgo anjam ti qusib are bulyqasai di tamo bei a subq na tigelosim naŋgi anjam minjrqas di dego naŋgi qusib are bulyqasai.’”

Copyright information for `BOJ