Luke 18

Uŋa qobul a bati gaigai anjam gereiyo tamo na a aqaryaiyqa minjoqnej

1Yesus a na aqa aŋgro naŋgi anjam degsi minjrej. Osiqa naŋgi bati gaigai Qotei pailyoqnib asginjraim deqa olo yawo anjam bei endegsi minjrej, “Qure beiq dia anjam pegiyo tamo bei soqnej. Tamo di aqa kumbra bolesai. A Qotei ulaiyosaioqnej. A tamo uŋgasari naŋgi qa dego are qalosaioqnej. 3Qure dia uŋa qobul bei dego soqnej. A bati gaigai anjam pegiyo tamo di aqa areq giloqnsiqa minjoqnej, ‘Tamo bei na e gulube ebeqnu. Deqa ni na aqaryaibosim gago aiyel anjam pegiyetgimqa tamo dena e olo gulube ebqasai.’ 4A degsi minjeqnaqa a aqaryaiyqa uratoqnej. Ariya bunuqna a are qalej. ‘Bole, e Qotei ulaiyosaieqnum. E tamo uŋgasari naŋgi qa are qalosaieqnum. 5Ariya uŋa qobul di a bati gaigai e waiŋboqnsiqa merbeqnu, “Ni aqaryaibe.” A merbo gaigai yeqnu deqa uŋgum e aqa anjam gereiyetqai. E aqa anjam gereiyetqasai di a bati gaigai ijo areq boqnsim sqas. Yimqa e tulaŋ asgibo uge.’”

6Tamo Koba Yesus a na aqa aŋgro naŋgi yawo anjam degsi minjrsiqa olo minjrej, “Anjam pegiyo tamo uge aqa anjam marej qaji di niŋgi quonub. 7Qusib are qaliye. Qotei a tamo bole. A tamo uge sai. Deqa aqa segi tamo uŋgasari nami giltnjrej qaji naŋgi qolo ti qanam ti pailyoqnqab di a naŋgo pail qusimqa tariŋsokobaiyqasai. A naŋgi urur aqaryainjrqas. 8E niŋgi merŋgwai. Qotei a na aqa segi tamo uŋgasari naŋgi urur aqaryainjroqujatqas. Ariya mondoŋ e Tamo Aŋgro laŋ goge dena bosiyqa tamo uŋgasari mandamq endi unub qaji naŋgi kumbra kieryoqnsib soqnibqa e unjrqai. Naŋgi e qa naŋgo areqalo siŋgilatosib sqab kio sai kio di geregere unqai.”

Farisi tamo bei wo takis o qaji tamo bei wo naŋgi aiyel Qotei pailyeb

9Tamo qudei naŋgi mareqnub, “Iga tamo bole. Iga tamo qudei naŋgi unub dego sai. Naŋgi tamo uge.” Tamo qudei naŋgi degsib mareqnub. Deqa Yesus na tamo deqaji naŋgi yawo anjam endegsi minjrej, 10“Tamo aiyel naŋgi Qotei pailyqajqa marsibqa atra tal miligiq gileb. Bei Farisi tamo. Bei takis o qaji tamo. 11Naŋgi atra tal miligiq gilsibqa Farisi tamo a namo tigelosiqa aqa segi jejamu soqtosiqa endegsi pailyej, ‘O Qotei, e tamo qudei naŋgi unub dego sai. E gisaŋ na tamo uŋgasari naŋgi silali yainjrosaieqnum. E sambala kumbra yosaieqnum. E kumbra uge bei dego yosaieqnum. E takis o qaji tamo di bul sai. 12E gaigai ni pailmqa oqnsim iŋgi ti ya ti urateqnum. E ijo segi iŋgi iŋgi kalil poteleŋoqnsim oto bei ni atraimeqnum.’ 13Farisi tamo a degsiqa Qotei pailyej. Onaqa takis o qaji tamo a kiñala isaq di tigelesosiqa laŋ goge koqyosim pailyqajqa jemaiyonaqa turuosiqa are soqoŋyosiqa marej, ‘O Qotei, e une ti. Deqa ni e qa dulosimqa ijo une kalil kobotetbe.’ Takis o qaji tamo a degsiqa Qotei pailyej.”

14Yesus a yawo anjam degsi minjrsiqa olo minjrej, “Niŋgi quiye. E bole merŋgwai. Takis o qaji tamo di aqa une kalil Qotei na kobotetonaqa a olo puluosiqa aqa talq aiej. Ariya Farisi tamo di aqa une Qotei na kobotetosai. Di kiyaqa? Tamo kalil naŋgo segi ñam soqteqnub qaji naŋgi di Qotei na olo naŋgo ñam aguq atetnjrqas. Ariya tamo naŋgi naŋgo segi ñam aguq ateqnub qaji naŋgi di Qotei na olo naŋgo ñam soqtetnjrqas.”

Yesus a marej, “Aŋgro du du naŋgi ijo areq bqajqa saidnjraib.”

15Yesus a anjam degsi marsiq koboonaqa tamo uŋgasari qudei naŋgo aŋgro du du naŋgi Yesus na aqa baŋ naŋgo gateq di atetnjrqajqa deqa joqsib Yesus aqa areq beb. Beqnabqa Yesus aqa aŋgro naŋgi na saidnjrsib minjreb, “Nuŋgo aŋgro du du joqsib endeq baib.” 16Degsib saidnjreb deqa Yesus na aŋgro du du naŋgi metnjrsiqa aqa aŋgro naŋgi ŋiriŋtnjrsiqa minjrej, “Aŋgro du du naŋgi metnjribqa ijo areq bebe. Naŋgi saidnjraib. Di kiyaqa? Tamo uŋgasari naŋgi aŋgro du du dego bul sqab di Qotei a naŋgo Mandor Koba sosim naŋgi taqatnjrqas. 17Niŋgi quiye. E bole merŋgwai. Niŋgi aŋgro du du naŋgi dego bul sqasai di Qotei a niŋgi osim taqatŋgwasai. Deqa a nuŋgo Mandor Koba sqa keresai dego.”

Juda gate bei iŋgi iŋgi koba ti soqnej qaji a Yesus ombla anjam mareb.

18Onaqa Juda gate bei na Yesus endegsi nenemyej, “O Qalie Tamo Bole, e kiersiyqa ŋambile gaigai sqai?” 19Onaqa Yesus na kamba minjej, “Ni kiyaqa e tamo bole qa merbonum? Qotei a segi qujai tamo bole. 20Ariya ni Qotei aqa dal anjam kalil qalie unum. ‘Ni tamo bei aqa uŋa jejamu ojetaim. Ni tamo bei qalsim moiotaim. Ni bajiŋaim. Ni tamo bei aqa jejamu laŋa gisaŋyaim. Ni ino ai wo abu wo naŋgo sorgomq di geregere sosimqa naŋgo anjam dauryoqne.’” 21Onaqa Juda gate dena olo Yesus minjej, “E aŋgro kiñala qa dal anjam di kalil dauryosim boqnem agi bini degsi unum.” 22Degsi minjnaqa qusiqa kamba minjej, “Ni dal anjam kalil dauryosim keretonum. Ariya kumbra qujai ni keretosai. Deqa e ni mermqai. Ni gilsim ino iŋgi iŋgi kalil qariŋyosim silali osim tamo iŋgi iŋgi saiqoji unub qaji naŋgi jeisi enjre. Degsim enjrsim bosim e daurbe. Osim bunuqna ni laŋ qureq dia awai bole itqam.” 23Yesus a na tamo di degsi minjnaq qusiqa aqa iŋgi iŋgi kalil qa are gulubekobaiyej.

24Onaqa Yesus na tamo di koqyosiqa minjej, “Tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqajqa baŋgi koba. 25Kamel a yumba miligiq gilqajqa tulaŋ baŋgi koba. Dego kere tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqajqa tulaŋ baŋgi koba.” 26Onaqa tamo uŋgasari naŋgi Yesus aqa anjam di qusib minjeb, “Ni anjam degsi mergonum deqa tamo yai naŋgi ŋambile gaigai sqa kere?” 27Onaqa Yesus na kamba minjrej, “Tamo naŋgi segi ŋambile sqa keresai. Ariya Qotei a kumbra kalil yqa kere.”

28Yesus a degsi minjrnaqa Pita na minjej, “O Tamo Koba, ni une. Iga gago iŋgi iŋgi kalil uratosimqa ni daurmonum.” 29Onaqa Yesus na minjrej, “Niŋgi quiye. E bole merŋgwai. Tamo bei a Qotei na taqatosim aqa Mandor Koba sqa marsimqa aqa segi qure uratosim aqa ŋauŋ, aqa was naŋgi, aqa ai wo abu wo naŋgi, aqa aŋgro naŋgi ti kalil uratnjrsim e daurbqas tamo di Qotei na iŋgi iŋgi gargekoba olo yeleŋqas. Yimqa mondoŋ a ŋambile gaigai sqas.”

Yesus a olo marej, “E moisiy olo subq na tigelqai.”

31Yesus a na aqa aŋgro 12-pela naŋgi anjam degsi minjrsiq koboonaqa naŋgi joqsiqa segitnjrsiqa endegsi minjrej, “Niŋgi quiye. Iga Jerusalem aieqnum. E Tamo Aŋgro deqa Jerusalem dia anjam kalil Qotei aqa medabu o tamo naŋgi nami e qa neŋgreŋyeb qaji di aqa damu brantqas. 32Agi jeu tamo naŋgi na e osib tamo naŋgi Qotei aqa ñam qaliesai qaji naŋgo baŋq di e atqab. Yimqa naŋgi na e ojsib misiliŋboqnsib miselboqnsib ugeugeiboqnqab. 33Osib e kumbaiŋbosib lubsib moiotbqab. Bati qalub koboamqa e olo subq na tigelqai.” 34Yesus a na aqa aŋgro naŋgi anjam degsi minjrnaq qusibqa anjam di aqa utru Qotei na ulitej deqa naŋgi geregere poinjrosai.

Yesus na tamo bei ŋamdamu geteŋyej qaji di boletej

35Onaqa Yesus a walwelosi aisiq Jeriko qure jojomyeqnaqa tamo bei ŋamdamu geteŋyej qaji a gam qalaq di awoosiqa tamo uŋgasari naŋgi silali qa ŋilnjroqnej. 36Tamo uŋgasari tulaŋ gargekoba naŋgi Yesus dauryosib qatroŋosib aieqnab tamo dena qusiqa nenemnjrej, “Niŋgi qabiteqnub?” 37Onaqa naŋgi na minjeb, “Yesus Nasaret qaji a aieqnu. Deqa iga a dauryosim aieqnum.” 38Degsi minjnabqa a tulaŋ koba leleŋosiqa marej, “O Yesus, Devit aqa Ŋiri, ni e qa are ugeimeme.” 39Onaqa tamo uŋgasari namoeb qaji naŋgi na tamo di ŋiriŋtosib minjeb, “Ni leleŋkobaaim. Kiri.” Degsi minjnabqa a naŋgo anjam quetnjrosai. A olo tulaŋ koba leleŋosiq Yesus minjoqnej, “O Devit aqa Ŋiri, ni e qa are ugeimeme.” 40Onaqa Yesus a tigelosiqa tamo uŋgasari naŋgi minjrej, “Tamo di osib ijo areq osi boiye.” Onaqa naŋgi na a osib Yesus aqa areq osi beb. Osi bonabqa nenemyej, 41“E ni kiermqajqa deqa ni e qa leleŋoqnam?” Onaqa minjej, “O Tamo Koba, e olo ŋam poibim sawa unqajqa deqa e ni qa leleŋoqnam.” 42Onaqa Yesus na minjej, “Ni e qa ino areqalo siŋgilatonum deqa e ni boletmqai. Deqa ino ŋamdamu olo poimeme.” 43Degsi minjnaqa aqa ŋamdamu poiyonaqa sawa unsiqa Qotei aqa ñam soqtosiqa tigelosiq Yesus dauryosiq aiej. Onaqa tamo uŋgasari kalil naŋgi Yesus aqa siŋgila di unsibqa naŋgi dego Qotei aqa ñam soqtoqneb.

Copyright information for `BOJ