Luke 21

Uŋa qobul bei aqa silali kiñala soqnej di kalil osiq Qotei yekritej

Bati bei Yesus a olo atra tal miligiq gilsiqa ŋam atej ñoro tamo naŋgi bosib silali ato qaji kulumq dia silali ateqnab unjroqnej. Onaqa uŋa qobul bei ñoro tulaŋ saiqoji soqnej qaji a dego bosiqa silali kiñilala aiyel segi waiyonaqa Yesus na unsiqa aqa aŋgro naŋgi minjrej, “Niŋgi quiye. E bole merŋgwai. Uŋa qobul endi a ñoro tulaŋ saiqoji. Aqa meniŋ silali kiñilala aiyel segi naj agi waiyekritqo. Aqa kumbra dena a na ñoro tamo kalil naŋgi buŋnjrsiqa silali kobaquja atqo. Ñoro tamo naŋgi silali koba ejunub. Naŋgi oto kiñala segi waiyonub. Ariya uŋa qobul endi a silali tulaŋ saibolesai. Aqa meniŋ silali kiñilala aiyel segi naj agi waiyekritqo.”

Bunuqna jeu tamo naŋgi na bosib atra tal tulaŋ niñaqyqab

Onaqa Yesus aqa aŋgro qudei naŋgi atra tal di koqyosibqa Yesus minjeb, “O Tamo Koba, ni une. Meniŋ na atra tal walato qaji di tulaŋ boledamu. Qotei atraiyo qaji iŋgi iŋgi dego meniŋ ti turtsib atra tal endi walateb.” Onaqa Yesus na kamba minjrej, “Atra tal niŋgi unonub endi bunuqna jeu tamo naŋgi na bosib tulaŋ niñaqyosib aqa meniŋ kalil paraparainjrsibqa taqal breinjrqab. Yimqa meniŋ bei meniŋ bei aqa quraq di sqasai. Meniŋ kalil segisegiqab.”

Gulube kobaquja bunuqna brantqas qaji deqa Yesus a anjam marej

Onaqa minjeb, “O Qalie Tamo Koba, bati gembu jeu tamo naŋgi bosib atra tal niñaqyqab? Niñaqyqa osibqa kumbra kie namoqna bamqa iga unsim poigwas, ‘Bati di jojomqo’?” Onaqa Yesus na minjrej, “Niŋgi geregere ŋam atsib soqniye. Tamo qudei naŋgi na niŋgi gisaŋgo uge. Bunuqna gisa gisaŋ tamo gargekoba naŋgi ijo ñam na boqnsib maroqnqab, ‘E Kristus.’ Qudei na maroqnqab, ‘Kristus bqajqa bati agi jojomqo.’ Degsib gisaŋosib maroqnibqa niŋgi naŋgi daurnjraib. Bunuqna niŋgi anjam endegsib quoqnqab, ‘Sawa bei beiq dia naŋgi aŋ na qotokobaiyeqnub.’ Ariya niŋgi anjam di qusib niŋgi deqa tulaŋ prugaib. Qotei a nami marej, ‘Kumbra di brantqas.’ Deqa branteme. Ariya kumbra di brantimqa diŋo bati urur brantqasai. Soboleiyosim brantqas.”

10 Yesus a naŋgi degsi minjrsiqa olo minjrej, “Bati deqa sawa bei ti sawa bei ti qoto tigeloqnsibqa segi segi qoteleŋoqnqab. Mandor kokba qudei naŋgi dego qoto tigeloqnsibqa mandor kokba qudei naŋgi qoto itnjroqnqab. 11 Sawa bei beiq dia mimiŋ kokba ti ma uge ti mam ti iŋgi saio bati dego branteleŋqas. Laŋ goge dia maŋwa bei bei brantoqnibqa tamo uŋgasari naŋgi unoqnsib ulaugetoqnqab.

12 “Ariya kumbra kalil di brantosaisoqnibqa namoqna tamo qudei naŋgi na bosib niŋgi jeutŋgoqnsib ugeugeiŋgoqnsib ojeleŋoqnqab. Ojeleŋoqnsib Juda gate kokba naŋgo ulatamuq dia niŋgi tigeltŋgoqnibqa naŋgi na nuŋgo jejamuq di anjam gargekoba qametŋgoqnsib niŋgi tonto talq di breiŋgoqnqab. Niŋgi ijo ñam ejunub deqa naŋgi na niŋgi joqsib Rom naŋgo mandor kokba ti naŋgo gate kokba ti naŋgo ulatamuq dia niŋgi tigeltŋgoqnqab. 13 Bati deqa Qotei na gam waqtetŋgoqnimqa niŋgi aqa anjam geregere palontosib minjroqnqab. 14 Deqa niŋgi na kamba anjam kie minjrqajqa deqa nami are koba qalaib. 15 Di kiyaqa? E segi na nuŋgo medabu siŋgilatetŋgsiy areqalo eŋgitqa niŋgi kamba anjam minjroqnqab. Minjroqnibqa naŋgi na anjam bei nuŋgo jejamuq di qametŋgwa yoqnib ugeinjroqnqas.

16 “Bati deqa nuŋgo segi meani naŋgi ti nuŋgo segi was naŋgi ti nuŋgo segi leŋ naŋgi ti nuŋgo segi kadoi naŋgi ti tigelosib niŋgi ojeleŋosib jeu tamo naŋgo baŋq di ateleŋoqnqab. Osib niŋgi qudei luŋgoqnib moreŋoqnqab. 17 Niŋgi ijo ñam ejunub deqa tamo uŋgasari kalil naŋgi niŋgi qa tulaŋ ugeoqnsib jeutŋgoqnqab. 18 Ariya Qotei na niŋgi geregere taqatŋgoqnqas. Deqa ijo aŋgro bei padalqasai. Niŋgi kalil bole sqab. Nuŋgo gate baŋga bei ugeqasai dego. 19 Deqa niŋgi ijo ñam siŋgila na ojsib soqnib soqnib Qotei na niŋgi eleŋqas. Amqa niŋgi ŋambile gaigai sqab.

Qaja tamo naŋgi bunuqna Jerusalem qureq niñaqyqab

20 “Bunuqna qaja tamo naŋgi bosib Jerusalem qure agutosib soqnibqa niŋgi unsibqa endegsib marqab, ‘Bole, Jerusalem qure padalqa bati agi brantqo.’ 21 Bati deqa tamo uŋgasari Judia sawaq di unub qaji naŋgi jaraiosib manaq oqoqujatebe. Tamo naŋgi Jerusalem qureq di unub qaji naŋgi dego qure uratosib jaraioqujatebe. Tamo naŋgi wauq di unub qaji ti gamq di laqnub qaji naŋgi ti olo puluosib qureq baib. Naŋgi dena torei jaraioqujatebe. 22 Qotei a nami marej, ‘Bati deqa e na tamo uŋgasari naŋgo une qa peginjrsiy naŋgi ñumqai.’ Qotei a nami degsi marej. Deqa bati di brantimqa Qotei aqa anjam kalil nami neŋgreŋyeb qaji di aqa damu brantqas. 23 Bati deqa Qotei aqa minjiŋ mandamq aiimqa Juda tamo uŋgasari naŋgi gulube tulaŋ kobaquja oqab. Deqa uŋa gumaŋ ti unub qaji naŋgi jaraio baŋgioqnsib gulube koba oqnqab. Uŋa aŋgro mom ti unub qaji naŋgi dego jaraio baŋgioqnsib gulube koba oqnqab. 24 Jeu tamo naŋgi bosib Juda tamo uŋgasari naŋgi di serie na ñumoqnib moreŋoqnqab. Osib naŋgi ojeleŋosib joqsib sawa bei beiq dia uratnjroqnqab. Leŋ bei bei qaji tamo naŋgi bosib Jerusalem qure tulaŋ niñaqyosib taqatesqab. Taqatesoqnibqa bati Qotei a nami giltej qaji di brantimqa Qotei na naŋgi olo taqal wainjrqas.

Tamo Aŋgro a siŋgila ti riaŋ ti laŋbiq na mandam aiqas

25 “Bati deqa seŋ ambruqas. Bai dego suwaŋqasai. Bongar naŋgi ululoŋosib mandamq aieleŋqab. Yuwal dego korkortosim anjam atoqnimqa tamo uŋgasari sawa sawa kalilq di so qaji naŋgi quoqnib dena naŋgo areqalo niñaqyetnjroqnimqa naŋgi tulaŋ ulaugetoqnqab. 26 Laŋ goge dia iŋgi iŋgi kalil reŋgiŋyeleŋamqa tamo uŋgasari naŋgi di unsib maroqnqab, ‘Bole, gulube oqa batiqo.’ Naŋgi degsib maroqnsib ulaugetosib ŋam eririqnjroqnqas. 27 Bati deqa e Tamo Aŋgro siŋgila ti riaŋ koba ti laŋbiq na mandamq aioqnit tamo uŋgasari naŋgi tarosib e nubqab. 28 Ariya kumbra kalil di brantqa utru atoqnimqa niŋgi ulaaib. Niŋgi tigelosib tarosib ŋam atoqniye. Di kiyaqa? Qotei a niŋgi eleŋqajqa bati agi jojomqo.”

Niŋgi qayu qa yawo anjam dena poiŋgem

29 Yesus a na naŋgi anjam degsi minjrekritosiqa olo yawo anjam bei endegsi minjrej, “Niŋgi qayu ti ŋamtaŋ kalil ti unjriye. 30 Qayu baŋga qalsim olo ñalguyoqnimqa niŋgi unsib endegsib marqab, ‘Seŋ aqa bati jojomqo.’ 31 Dego kere kumbra kalil e na merŋgonum qaji endi brantimqa niŋgi unsibqa endegsi poiŋgem, ‘Bole, Qotei na aqa segi tamo uŋgasari naŋgi taqatnjrsim naŋgo Mandor Koba sqajqa bati agi jojomqo.’

32 “Niŋgi quiye. E bole merŋgwai. Tamo uŋgasari bini bati endeqa unub qaji naŋgi kalil moreŋosaisoqnibqa kumbra kalil e na merŋgonum qaji endi branteleŋqas. 33 Laŋ ti mandam ti koboqab. Ariya ijo anjam koboqa keresai.”

Niŋgi ŋam atsib soqniye

34 Osiqa Yesus a olo anjam endegsi minjrej, “Niŋgi geregere ŋam atsib soqniye. Niŋgi ya uge uyoqnsib nanarioqnqajqa are prugŋgoqnaiq. Nuŋgo segi jejamu qa iŋgi iŋgi qa areqalo kobaiyoqnaib. Niŋgi kumbra uge kalil deqaji yoqnibqa e urur mandamq aisiy niŋgi pruqtŋgo uge. 35 Agi aliem urur bel qaleqnu dego kere. Bati deqa e bosiy tamo uŋgasari sawa sawa kalilq di unub qaji naŋgoq di brantoqujatqai. 36 Deqa niŋgi bati gaigai ŋam atoqnsib Qotei pailyoqnsib soqniye. Qotei pailyoqnsib soqnibqa Qotei na niŋgi siŋgila eŋgoqnimqa kumbra kalil bumbraŋyeleŋqab qaji di nuŋgoq bqasai. Bati deqa e Tamo Aŋgro nuŋgoq botqa niŋgi ijo ulatamuq dia tigelqab.” Yesus a na aqa aŋgro naŋgi anjam degsi minjrej.

37 Bati gaigai qanam Yesus a atra tal miligiq di sosiqa tamo uŋgasari naŋgi Qotei aqa anjam palontosiq minjroqnej. Qoloeqnaqa a olo qure uratoqnsiqa mana ñam Oliv dia ŋeioqnej. 38 Nebeeqnaqa a olo tigeloqnsiqa atra tal miligiq dia Qotei aqa anjam palontoqnej. Deqa tamo uŋgasari kalil naŋgi aqa anjam quqwa maroqnsib nobqolo ambru tigeloqnsibqa atra tal miligiq giloqneb.

Copyright information for `BOJ