Luke 3

Jon yansnjro qaji a wadau sawaq gilsiqa dia Qotei aqa anjam palontoqnej

Sisar Taiberius a wausau 15 Rom naŋgo mandor koba sonaqa Pontius Pailat a Judia sawa naŋgo gate koba soqnej. Bati deqa Herot a Galili sawa naŋgo gate koba soqnej. Herot aqa aube Filip a na Ituria sawa ti Trakonitis sawa ti taqatoqnej. Lisanias a na Abilene sawa taqatoqnej. Anas wo Kaiafas wo naŋgi aiyel atra tamo gate soqneb. Bati deqa Sekaraia aqa ŋiri Jon a wadau sawaq di sonaqa Qotei na aqa anjam ubtsiq Jon minjej. Deqa Jon a sawa kalil Jordan ya qalaq di soqneb qaji naŋgoq giloqnsiqa Qotei aqa anjam palontosiq tamo uŋgasari naŋgi endegsi minjroqnej, “Niŋgi are bulyibqa e na niŋgi yansŋgwai. Amqa Qotei a nuŋgo une kalil kobotetŋgwas.” Nami Qotei aqa medabu o qaji tamo Aisaia a Jon qa anjam endegsi neŋgreŋyej, “Tamo bei a wadau sawaq di tigelosimqa a tulaŋ koba leleŋosim tamo uŋgasari naŋgi endegsi minjroqnqas, ‘Tamo Koba a bqajqa gam gereiyetiye. Gam tingitetiye. Botau kalil mororyiye. Mana kokba ti mana kiñilala ti kalil giŋgeŋnjrsib taqal atiye. Gam kaneŋo kalil tingitiye. Gam niñaqejunub qaji di dego gereiyiye. Yimqa Qotei na iga eleŋamqa tamo uŋgasari sawa sawa kalilq di unub qaji naŋgi Qotei aqa wau di unqab.’”

Tamo uŋgasari tulaŋ gargekoba naŋgi Jon na yansnjrqa marsibqa aqa areq beqnabqa siŋgila na endegsi minjroqnej, “Niŋgi amal uge bul. Niŋgi yai na anjam utru merŋgwoqa mondoŋ Qotei aqa minjiŋ nuŋgoq aiaim deqa ulaosib ijoq bonub? Niŋgi are bulyiye. Osib nuŋgo kumbra uge kalil uratosib kumbra bole bole yoqniye. Yimqa e unsiy marqai, ‘Bole, niŋgi are bulyonub.’ Osiy niŋgi yansŋgwai. Niŋgi endegsib are qalaib, ‘Iga Abraham aqa leŋ. Deqa iga Qotei aqa ŋamgalaq di tamo bole.’ Niŋgi degsib are qalaib. Niŋgi quiye. Niŋgi Abraham aqa leŋ di laŋa. Qotei na marimqa meniŋ kalil endi dego tamo bulyosib tigelosib Abraham aqa leŋ sqab. Tapor qalat agi Qotei na ojsiqa ŋam utruq di qomqajqa ojsiqa tigelejunu. Deqa ŋam kalil gei boletosaieqnub qaji di Qotei na tapor dena qomeleŋosim ŋamyuoq di breinjrqas.”

10 Jon na tamo uŋgasari naŋgi anjam degsi minjrnaqa naŋgi na kamba nenemyeb, “Ni anjam degsi mergonum deqa iga kumbra kieryqom?” 11 Onaqa Jon na minjrej, “Ni gara aiyel soqnimqa bei osim tamo gara saiqoji unu qaji di ye. Ni iŋgi koba ti soqnimqa iŋgi qudei osim tamo iŋgi saiqoji unu qaji di ye.” 12 Onaqa takis o qaji tamo qudei naŋgi dego Jon na yansnjrqa marsibqa aqa areq bosib nenemyeb, “O Qalie Tamo Koba, ni mare. Iga takis o qaji tamo. Deqa iga kumbra kieryqom?” 13 Onaqa Jon na kamba minjrej, “Nuŋgo gate kokba naŋgi takis silali gembub niŋgi oqajqa merŋgonub dego kere oqniye. Silali bei laŋa goge ataib.” 14 Onaqa qaja tamo qudei naŋgi Jon aqa areq gilsib nenemyeb, “Ni mare. Iga kumbra kieryqom?” Onaqa Jon na minjrej, “Niŋgi tamo qudei naŋgi ugeugeinjrsib silali laŋa yainjroqnaib. Niŋgi gisaŋosib tamo qudei naŋgo silali laŋa yainjrqa marsibqa naŋgo jejamuq di une bei bei atoqnaib. Niŋgi endegsib are qaloqniye, ‘Iga waueqnum deqa aqa awai di kere.’”

15 Ariya tamo kalil naŋgi Kristus bqajqa bati qa tariŋoqneb deqa naŋgi Jon aqa anjam di quoqnsib are qaloqneb, “Jon a Kristus kio?” 16 Onaqa Jon a naŋgo areqalo di qalieosiqa minjrej, “Tamo Koba a bunuqna ijo qoreq na bqas. A tamo siŋgila koba. Ijo siŋgila aqa siŋgila ti keresai. Deqa e a kaŋgalyqajqa e tamo bolesai. E ya na laŋa yansŋgeqnum. Ariya Tamo Koba a bosimqa Qotei aqa Mondor aqa siŋgila na ti ŋamyuo na ti niŋgi yansŋgwas. 17 Aqa baŋq di a savol ojejunu. A bosim savol dena wit ñoqoryosim damu eleŋosim aqa talq di atqas. Ariya a suwi olo eleŋosim ŋamyuo gaigai yuejunu qaji dia breinjrimqa yuekritqab.”

18 Jon a tamo uŋgasari naŋgi anjam degsi minjroqnsiqa anjam gargekoba dego naŋgo are qametnjrqajqa deqa minjroqnej. A Qotei aqa anjam utru bole bole babtoqnsiqa naŋgi minjroqnej.

Herot na Jon ojsiqa tonto talq di waiyej

19 Ariya Jon a gate koba Herot aqa une bei babtosiqa deqa ŋiriŋtej. Aqa une agi aqa segi was aqa ŋauqali Herodias yaiysiq ej. Une deqa ti kumbra uge uge kalil Herot a yoqnej qaji deqa ti Jon na ŋiriŋtej. 20 Deqa Herot a olo kumbra uge bei yej. Agi a Jon ojsiqa tonto talq di waiyej.

21 Ariya Jon a na tamo uŋgasari kalil naŋgi yansnjreqnaqa Yesus a dego bonaqa Jon na yansonaqa bati di a tarosi laŋ goge koqyosiq Qotei pailyeqnaqa laŋ waqej. 22 Laŋ waqonaqa Qotei aqa Mondor binoŋ bulosiq laŋ goge dena aisiqa Yesus aqa jejamuq di awoej. Awoonaqa laŋ goge dena Qotei na Yesus metonaqa aqa kakoro quej. A na endegsi minjnaq quej, “Ni ijo segi aŋgro qujai. E na ni tulaŋ qalaqalaimeqnum. E ni qa tulaŋ areboleboleibqo.”

Yesus aqa moma naŋgo ñam kalil

23 Yesus aqa wausau 30 kereonaqa aqa wau utru atej. Naŋgi Yesus qa endegsib maroqneb, “A Josep aqa ŋiri.” Josep a Heli aqa ŋiri. 24 Heli a Matat aqa ŋiri. Matat a Livai aqa ŋiri. Livai a Melki aqa ŋiri. Melki a Janai aqa ŋiri. Janai a Josep aqa ŋiri. 25 Josep a Matatias aqa ŋiri. Matatias a Amos aqa ŋiri. Amos a Nahum aqa ŋiri. Nahum a Esli aqa ŋiri. Esli a Nagai aqa ŋiri. 26 Nagai a Mat aqa ŋiri. Mat a Matataias aqa ŋiri. Matataias a Semen aqa ŋiri. Semen a Josek aqa ŋiri. Josek a Joda aqa ŋiri. 27 Joda a Joanan aqa ŋiri. Joanan a Resa aqa ŋiri. Resa a Serubabel aqa ŋiri. Serubabel a Sealtiel aqa ŋiri. Sealtiel a Neri aqa ŋiri. 28 Neri a Melki aqa ŋiri. Melki a Adi aqa ŋiri. Adi a Kosam aqa ŋiri. Kosam a Elmadam aqa ŋiri. Elmadam a Er aqa ŋiri. 29 Er a Josua aqa ŋiri. Josua a Elieser aqa ŋiri. Elieser a Jorim aqa ŋiri. Jorim a Matat aqa ŋiri. Matat a Livai aqa ŋiri. 30 Livai a Simeon aqa ŋiri. Simeon a Juda aqa ŋiri. Juda a Josep aqa ŋiri. Josep a Jonam aqa ŋiri. Jonam a Eliakim aqa ŋiri. 31 Eliakim a Melea aqa ŋiri. Melea a Mena aqa ŋiri. Mena a Matata aqa ŋiri. Matata a Natan aqa ŋiri. Natan a Devit aqa ŋiri. 32 Devit a Jesi aqa ŋiri. Jesi a Obet aqa ŋiri. Obet a Boas aqa ŋiri. Boas a Salmon aqa ŋiri. Salmon a Nason aqa ŋiri. 33 Nason a Aminadap aqa ŋiri. Aminadap a Atmin aqa ŋiri. Atmin a Arni aqa ŋiri. Arni a Hesron aqa ŋiri. Hesron a Peres aqa ŋiri. Peres a Juda aqa ŋiri. 34 Juda a Jekop aqa ŋiri. Jekop a Aisak aqa ŋiri. Aisak a Abraham aqa ŋiri. Abraham a Tera aqa ŋiri. Tera a Nahor aqa ŋiri. 35 Nahor a Seruk aqa ŋiri. Seruk a Reu aqa ŋiri. Reu a Pelek aqa ŋiri. Pelek a Eber aqa ŋiri. Eber a Sela aqa ŋiri. 36 Sela a Kainan aqa ŋiri. Kainan a Arpaksat aqa ŋiri. Arpaksat a Siem aqa ŋiri. Siem a Noa aqa ŋiri. Noa a Lamek aqa ŋiri. 37 Lamek a Metusela aqa ŋiri. Metusela a Enok aqa ŋiri. Enok a Jaret aqa ŋiri. Jaret a Mahalalel aqa ŋiri. Mahalalel a Kenan aqa ŋiri. 38 Kenan a Enos aqa ŋiri. Enos a Set aqa ŋiri. Set a Adam aqa ŋiri. Adam a Qotei aqa ŋiri.

Copyright information for `BOJ