Luke 5

Yesus na Pita minjnaqa a kakaŋ waiyosiq qe ani ej

Bati bei Yesus a Genesaret ya aguq gilsiqa alile dia tigelesonaqa tamo uŋgasari tulaŋ gargekoba naŋgi Qotei aqa anjam quqwajqa are qalsibqa Yesus aqa areq bosib koroeb. Koroesonabqa Yesus a ŋam atsiqa qobuŋ aiyel alile di tiryosib sonab unjrej. Qe o qaji tamo naŋgi qobuŋ di tiryosib naŋgo kakaŋ yansoqneb. Qobuŋ bei Saimon aqa qobuŋ. Yesus a Saimon aqa qobuŋ goge di awoosiqa Saimon minjej, “Qobuŋ tututim kiñala sasalosim yaq aiem.” Onaqa Saimon na qobuŋ tututonaq sasalonaqa Yesus a qobuŋ miligiq dia awesosiqa tamo uŋgasari kalil naŋgi alile di sonabqa Qotei aqa anjam plaltosiq minjroqnej.

Anjam minjrsiq koboonaqa a na Saimon minjej, “Niŋgi qobuŋ oyoosib ya robuq oqsib nuŋgo kakaŋ waiyqab qe oqab.” Onaqa Saimon na kamba minjej, “O Tamo Koba, iga qolo waukobaonum gilsim nebeqo. Iga qe bei yala osai. Uŋgum. Ni maronum deqa e kakaŋ olo waiyqai.” Degsi Yesus minjsiqa naŋgi ya robuq oqsib kakaŋ olo waiysib qe tulaŋ koba eb. Qe koba onabqa naŋgo kakaŋ qe na maqej deqa braŋqa laqnaqa titqa keresaiinjrnaqa naŋgo was qudei qobuŋ beiq di soqneb qaji naŋgi metnjrnab bosib koba na kakaŋ titosib qe osib qobuŋ aiyel miligiq di jugonab maqosib tugwa laqneb. Onaqa Pita a Yesus aqa maŋwa di unsiqa Yesus aqa siŋgaq di siŋga pulutosiq minjej, “O Tamo Koba, e une tamo. Deqa ni e uratbosim gile.” Pita na Yesus degsi minjej. Di kiyaqa? Aqa was naŋgi ti qe tulaŋ koba eleŋosib prugeleŋeb deqa. 10 Sebedi aqa ŋiri aiyel Jems wo Jon wo naŋgi Pita ombla wau qujai. Naŋgi dego Yesus aqa maŋwa di unsibqa prugeleŋeb. Onaqa Yesus na Pita minjej, “Ni ulaaim. Ni qe o tamo deqa ni qe eqnum. Bunuqna ni degsim olo tamo oqnqam.” 11 Onaqa naŋgi naŋgo qobuŋ alile dia suweiyosib naŋgo ai wo abu wo naŋgi uratnjrsib naŋgo ñoro ti iŋgi iŋgi kalil dego uratosib Yesus dauryeb.

Yesus na tamo bei yu na aqa jejamu ugeeleŋej qaji di boletej

12 Naŋgi Yesus dauryosib bati bei koba na qure beiq gileb. Dia tamo bei yu na aqa jejamu ugeeleŋej qaji a Yesus unsiqa aqa areq bosiqa turuosiqa mandamq di ŋam quosiqa Yesus pailyosiq minjej, “O Tamo Koba, ni e boletbqa are soqnimqa e boletbe. E qalie, ni na e boletbqa kere deqa e inoq bonum.” 13 Degsi minjnaqa Yesus a baŋ waiysiq tamo di aqa jejamu ojej. Ojsiqa minjej, “E ni boletmqa are unu. Deqa ino jejamu olo boleeme.” Degsi minjnaqa bati qujai deqa aqa yu uge kalil mosoosiq aqa jejamu olo boleej. 14 Onaqa Yesus na minjej, “Ino jejamu boleqo deqa ni tigelosim gile. Ariya ni tamo qudei naŋgi ijo ñam ubtsim minjraim. Ni gilsim ino jejamu atra tamo osoryosim atraiyo qaji iŋgi iŋgi Moses nami marej qaji di osim Qotei atraiyime. Yimqa tamo uŋgasari naŋgi ni numsib marqab, ‘Bole, ino jejamu boleqo.’” 15 Onaqa a gilsiqa a Yesus aqa anjam di dauryosai. Yesus na a boletej deqa mare mare laqnaqa aqa anjam tulaŋ kobaonaqa sawa sawa kalilq dia tamo uŋgasari gargekoba quekriteb. Deqa tamo uŋgasari tulaŋ gargekoba naŋgi Yesus aqa anjam quqwajqa marsibqa boqnsib aqa areq di korooqneb. A na naŋgo ma boletetnjrqajqa deqa ti aqa areq di korooqneb. 16 Koroeqnab Yesus a bati gaigai naŋgi uratnjrsim a segi sqajqa maroqnsiq naŋgi alelnjroqnsiq wadau sawaq giloqnsiqa dia a segi sosiq Qotei pailyoqnej.

Yesus na tamo bei jejamu laiyej qaji di boletej

17 Bati bei tamo uŋgasari naŋgi olo koroesonabqa Yesus a na Qotei aqa anjam palontosiq minjroqnej. Minjreqnaqa bati di Farisi naŋgi ti dal anjam qalie tamo naŋgi ti tigelosib bosib Yesus aqa areq di awoeleŋesoqneb. Naŋgi Galili sawa naŋgo qure qureq dena ti Judia sawa naŋgo qure qureq dena ti Jerusalem qureq dena dego tigelosib bosib Yesus aqa areq di awoeleŋesoqneb. Bati di Tamo Koba Qotei aqa siŋgila Yesus aqa jejamuq di soqnej. Deqa a na tamo naŋgo ma gereiyetnjrqa marnaqa tamo qudei naŋgi na tamo bei jejamu laiyej qaji a saperaq di atsib Yesus aqa areq di atibqa Yesus na boletqajqa deqa qoboiyosib beb. 19 Bosib ŋam ateb tamo tulaŋ gargekoba siraŋme juŋeb. Deqa naŋgi Yesus aqa areq gilqa keresaiinjrnaqa tal quraq oqsib goge na waqtosibqa tamo sapera qoji gulaintosib ura uratonab Yesus aqa areq aiej. 20 Onaqa Yesus a tamo naŋgi di naŋgo areqalo unej naŋgo areqalo qujai Yesus na tamo di boletqa kere. Deqa a na tamo jejamu laiyej qaji di minjej, “O ijo was, ino une kalil e na kobotetmonum.” 21 Onaqa dal anjam qalie tamo naŋgi ti Farisi naŋgi ti tal dia awesoqneb qaji naŋgi Yesus aqa anjam di qusibqa naŋgo areqalo na mareb, “Yesus a Qotei misiliŋyqo. Yai na tamo naŋgo une kobotqa kere? Qotei a segi qujai.” 22 Naŋgi degsib are qalsib sonabqa Yesus a naŋgo areqalo di qalieosiqa minjrej, “Niŋgi kiyaqa degsib are qaleqnub? 23 Anjam kie e na tamo jejamu laiyqo qaji di minjqajqa wau koba sai? ‘Ino une kalil e na kobotetmonum,’ anjam de kio, ‘Ni tigelosim walwel,’ anjam de kio? 24 Ariya e Tamo Aŋgro e mandamq endia siŋgila ti unum deqa e na tamo naŋgo une kobotetnjrqa kere. Niŋgi degsib qalieqajqa deqa e na tamo di boletqai.” Yesus a na naŋgi degsi minjrsiqa tamo jejamu laiyej qaji di koqyosiqa minjej, “E ni mermqai. Ni tigelosim ino sapera osim ino talq gile.” 25 Degsi minjnaqa tamo di a tamo uŋgasari kalil naŋgo ŋamdamuq na tigelosiqa aqa sapera ŋeiesoqnej qaji di qoboiyosiqa Qotei aqa ñam soqtosiqa walwelosiq aqa qureq gilej. 26 Onaqa tamo uŋgasari kalil naŋgi Yesus aqa siŋgila di unsibqa naŋgi tulaŋ prugeleŋosib Qotei aqa ñam soqtosib a biŋiyeb. Osib naŋgi ulaosib mareb, “Kumbra iga endego unonum di kumbra bei. Tamo bei na kumbra deqaji bei yeqnaq iga nami unosaioqnem.”

Yesus na Livai minjej, “Ni e daurbe.”

27 Yesus a dena walwelosiqa takis o qaji tamo bei aqa ñam Livai a takis o talq di awesonaq gilsiq itej. Osiqa minjej, “Ni e daurbe.” 28 Onaqa aqa iŋgi iŋgi kalil uratosiqa tigelosiq Yesus dauryej. 29 Yesus dauryosiqa giloqnsiq Yesus minjej, “Ni ijo talq bosim iŋgi uye.” Degsi minjsiqa aqa segi talq osi gilsiqa maruro atsiqa iŋgi goietej. A segi sai. Takis o qaji tamo tulaŋ gargekoba naŋgi ti Yesus aqa segi aŋgro naŋgi ti tamo laŋa laŋaj naŋgi ti dego metnjrnaq bosib koba na awoosib iŋgi uyoqneb. 30 Onaqa Farisi naŋgi ti dal anjam qalie tamo naŋgi ti bosib di unsibqa Yesus aqa aŋgro naŋgi minjreb, “Niŋgi kiyaqa takis o qaji tamo ti une tamo ti naŋgi koba na awoosib iŋgi ti ya ti uyeqnub?” 31 Onaqa Yesus a Farisi naŋgo anjam di qusiqa minjrej, “Tamo ma saiqoji naŋgi ma gereiyo tamo aqaq gilosaieqnub. Tamo ma ti naŋgi segi ma gereiyo tamo aqaq gileqnub. 32 Tamo bei a marqas, ‘E tamo bole. E une saiqoji.’ E tamo deqaji metit ijoq bqajqa e deqa bosai. Tamo a marqas, ‘E une ti.’ E tamo deqaji metit ijoq bqajqa e deqa bem.”

Yesus a qurieŋ qa anjam marej

33 Onaqa Farisi naŋgi na Yesus olo minjeb, “Jon aqa aŋgro naŋgi bati gaigai iŋgi uratoqnsib qurieŋoqnsib Qotei pailyoqnsib unub. Farisi naŋgo aŋgro naŋgi dego kumbra degyeqnub. Ariya ino aŋgro naŋgi kiyaqa qurieŋosaieqnub? Agi naŋgi bati gaigai iŋgi ti ya ti uyoqnsib unub.” 34 Onaqa Yesus a naŋgo anjam di qusiqa a kamba yawo anjam bei endegsi minjrej, “Tamo bei a uŋa baŋ ojqa bati qa a aqa was naŋgi ti soqnimqa naŋgi are gulubeinjrqas e? Sai. 35 Ariya bunuqna naŋgo was yainjribqa bati deqa naŋgi are gulubeinjrimqa qurieŋosib sqab.

36 Tamo bei a gara jugo bunuj osim dena mutu gentosim gara jugo sari braŋoq di qandimqa keresai. Degsi qandimqas di a na gara jugo bunuj di ugeugeiyqas. Gara jugo bunujq dena mutu osim gara jugo sariq di qandimesqas di aqa uno bolesaiqas. Di kiyaqa? Gara sari ti gara bunuj ti kerekereqasai. 37 Tamo bei a wain bunuj osim ya nobu kaja aqa jegara na gereiyo qaji sariq di qamqa keresai. Ya nobu sari di nami kaŋgraŋosiq siŋgilaej. Deqa a wain bunuj qamimqa wain a didiqosim ya nobu sari paratosimqa wain bileŋosim mandamq aiqas. Ya nobu a dego ugeqas. 38 Ariya a ya nobu kaja aqa jegara na gereiyo qaji bunujq di wain bunuj qamimqa ombla bole sqab. 39 Tamo bei a wain namij uysimqa a olo wain bunuj uyqa marqasai. Di kiyaqa? A marqas, “Namij di bole.”

Copyright information for `BOJ