Luke 7

Yesus na Rom naŋgo qaja tamo gate bei aqa kaŋgal tamo boletej

Yesus a na tamo uŋgasari naŋgi anjam kalil degsi minjrnaq qunabqa a naŋgi uratnjrsiqa Kaperneam qureq aiej. Dia Rom naŋgo qaja tamo gate bei soqnej. Aqa kaŋgal tamo bei a tulaŋ qalaqalaiyoqnej qaji di makobaiysiqa moiqa laqnej. Deqa tamo qudei naŋgi na qaja tamo gate di minjeb, “Yesus a bqo Kaperneam qureq endi unu.” Degsi minjnab qusiqa are qalej, “E tamo qudei naŋgi qariŋnjritqa aisib Yesus minjib bosim ijo kaŋgal tamo boletqas.” Osiqa qariŋnjrnaq aieb. Aisib Yesus itosib siŋgila na pailyosib minjeb, “O Tamo Koba, ni iga uratgaim. Qaja tamo gate di a tamo boledamu. A Juda tamo uŋgasari kalil naŋgi qa tulaŋ boleoqnsiqa gaigai geregereinjreqnu. Agi a na gago Qotei tal gereiyetgej.”

Naŋgi degsib Yesus minjnab qusiqa tigelosiq naŋgi daurnjrsiq koba na gileb. Gilsib tal jojomyeqnabqa qaja tamo gate dena aqa was qudei naŋgi olo qariŋnjrnaq aisib gamq dia Yesus turosib minjeb, “O Tamo Koba, gago was a marqo, ‘Uŋgum, ni laŋa waukobaaim. E tamo bolesai deqa ni ijo talq baim. E segi dego ino areq bqa keresai. Deqa ni isaq na anjam segi marimqa dena ijo kaŋgal tamo a boleqas. E dego tamo kokba qudei naŋgo sorgomq di unum. Ijo qaja tamo naŋgi ijo sorgomq di unub. E bei minjqai, “Ni gile.” Yimqa a gilqas. Bei minjqai, “Ni au.” Yimqa a bqas. Ijo kaŋgal tamo bei minjqai, “Wau di ye.” Degsi minjitqa a ijo anjam dauryqas.’”

Onaqa Yesus a qaja tamo gate aqa anjam di qusiqa a tulaŋ prugugetej. Osiqa bulosiq tamo uŋgasari gargekoba a dauryoqneb qaji naŋgi minjrej, “Niŋgi quiye. Qaja tamo gate di a e qa aqa areqalo tulaŋ siŋgilatqo. Juda tamo bei nami e qa degsi aqa areqalo siŋgilato qaji bei unosai.” 10 Yesus a na tamo uŋgasari naŋgi anjam degsi minjrnaqa qaja tamo gate aqa was naŋgi a na qariŋnjrej qaji naŋgi qusibqa olo puluosib aqa talq gilsib kaŋgal tamo di a namo boleosiq sonaq uneb.

Yesus a Nain qureq dia uŋa qobul bei aqa ŋiri qujai nami moiej qaji di olo tigeltej

11 Olo bati bei Yesus a qure beiq gilej. Qure di aqa ñam Nain. Yesus aqa aŋgro naŋgi ti tamo uŋgasari gargekoba dego Yesus dauryosib Nain qureq gileb. 12 Yesus a gilsiq qure polomq di branteqnaqa tamo bei nami moiej qaji a subq atqajqa qoboiyosib giloqneb. Tamo di aqa ai qobul. Aqa aŋgro qujai bole qujai agi a segi. Aŋgro di qoboiyosib gileqnabqa tamo uŋgasari tulaŋ gargekoba qure dia soqneb qaji naŋgi uŋa di koba na walwelosib giloqneb. 13 Onaqa Tamo Koba Yesus a uŋa di unsiqa a qa tulaŋ dulosiqa minjej, “Ni akamaim.” 14 Degsi minjsiq walwelosiqa baŋ waiysiq kulum aŋgro jigeb qaji di ojnaqa tamo naŋgi a qoboiyosib giloqneb qaji tigeleb. Onaqa Yesus na aŋgro moiej qaji di minjej, “O aŋgro, e ni mermqai, ni tigel.” 15 Degsi minjnaqa a tigelosiq awoosiq anjam maroqnej. Onaqa Yesus na a baŋ ojsiqa osi gilsiqa aqa aniqali yej. 16 Onaqa tamo uŋgasari kalil qure dia soqneb qaji naŋgi Yesus aqa siŋgila di unsibqa naŋgi tulaŋ prugeleŋosib Qotei aqa ñam soqtosib maroqneb, “Bole, bini Qotei aqa medabu o qaji tamo kobaquja gago ambleq endi brantqo. Qotei na aqa segi tamo uŋgasari naŋgi aqaryainjrqajqa deqa tamo di qariŋyqoqa gagoq bqo.” 17 Yesus a kumbra di yonaqa tamo naŋgi unsib deqa mare mare laqnab anjam di tulaŋ kobaonaqa tamo uŋgasari Judia sawaq di soqneb qaji naŋgi ti tamo uŋgasari sawa bei beiq di soqneb qaji naŋgi dego kalil quekriteb.

Jon yansnjro qaji a na aqa aŋgro aiyel naŋgi qariŋnjrnaqa Yesus aqa areq gileb

18 Onaqa Jon aqa aŋgro naŋgi dego anjam di qusib Jon minjnab qusiqa aqa aŋgro aiyel naŋgi metnjrnaq aqa areq bonabqa minjrej, “Niŋgi Tamo Koba Yesus aqa areq gilsib endegsib nenemyiye, ‘Kristus agi Qotei na nami qariŋyim bqajqa marej qaji di ni kio? Ni saiamqa iga tamo bei qa tariŋqom kio?’” 20 Jon na naŋgi aiyel degsi minjrsiq qariŋnjrnaqa Yesus aqa areq gilsib minjeb, “Jon yansnjro qaji tamo a na iga qariŋgwoqa agi inoq bonum. A ni endegsi nenemmqo, ‘Kristus agi Qotei na nami qariŋyim bqajqa marej qaji di ni kio? Ni saiamqa iga tamo bei qa tariŋqom kio?’”

21 Bati deqa Yesus a na tamo uŋgasari tulaŋ gargekoba ma utru segi segi so qaji naŋgi ti tamo naŋgo jejamu mondor uge uge na ojeleŋo qaji naŋgi ti boletnjroqnej. Tamo ŋam qandimo gargekoba dego boletnjreqnaqa ŋam poinjroqnej. 22 Deqa Yesus a na tamo aiyel Jon na qariŋnjrej qaji di minjrej, “Kumbra nuŋgo ŋamdamu na unonub qaji ti anjam nuŋgo dabkala na quonub qaji ti deqa aisib Jon geregere saiyosib minjiye. Endegsib minjiye, ‘Tamo ŋam qandimnjro qaji naŋgi olo ŋam poinjreqnaq sawa uneqnub. Tamo jejamu lainjro qaji naŋgi olo walweleqnub. Tamo naŋgo jejamu yu na ugeeleŋo qaji naŋgo yu kalil koboeqnu. Tamo dabkala geteŋnjro qaji naŋgi olo poinjreqnaqa anjam queqnub. Tamo moreŋo qaji naŋgi olo tigeleqnub. Tamo iŋgi iŋgi saiqoji unub qaji naŋgi Qotei aqa anjam bole queqnub.’ Niŋgi aisib Jon degsib saiyosib minjiye. 23 Ariya niŋgi quiye. Tamo naŋgi e nubsib e qa naŋgo areqalo siŋgilatosib olo ijo ñam ulontosaieqnub qaji naŋgi tulaŋ areboleboleinjrim sqab.”

24 Onaqa Jon aqa aŋgro aiyel naŋgi Yesus aqa anjam di qusibqa naŋgi olo puluosib Jon minjqajqa aieqnabqa Yesus a na tamo uŋgasari gargekoba naŋgi di Jon qa endegsi minjrej, “Niŋgi nami wadau sawaq gilsibqa niŋgi tamo kiero unqajqa gileb? Niŋgi tamo silai aqa baŋga bul jagwa na pileteqnaqa di unqajqa gileb kio? Sai. Jon a tamo deqaji sai. 25 Deqa niŋgi tamo kiero unqajqa wadau sawaq gileb? Niŋgi tamo gara bole walaosi laqnu qaji di unqajqa gileb kio? Di dego sai. Tamo gara bole walaoqnsib ñoro koba ti unub qaji naŋgi mandor kokba naŋgo talq di unub. 26 Deqa niŋgi tamo kiero unqajqa wadau sawaq gileb? Niŋgi Qotei aqa medabu o qaji tamo bei unqajqa gileb kio? Od. Agide. Niŋgi deqa unqa gileb. Deqa e niŋgi endegsi merŋgwai. Jon a Qotei aqa medabu o qaji tamo kobaquja. A na Qotei aqa medabu o qaji tamo kalil naŋgi tulaŋ buŋnjrejunu. 27 Agi nami e mandamq aiosaisonamqa Qotei a Jon qa endegsi merbej, ‘Ni que. E na tamo bei qariŋyitqa a ni qa namoosim ino gam gereiyetmqas.’ Tamo di agi Jon. Anjam di agi Qotei aqa neŋgreŋq di unu.

28 Deqa niŋgi quiye. E bole merŋgwai. Jon yansnjro qaji a na tamo kalil mandamq endi unub qaji naŋgi tulaŋ buŋnjrejunu. Ariya tamo qudei ñam saiqoji unub qaji naŋgi Qotei na taqatnjroqnsiqa a naŋgo Mandor Koba unu. Deqa tamo naŋgi dena kamba Jon tulaŋ buŋyejunub.”

29 Yesus a na tamo uŋgasari naŋgi anjam degsi minjrnaqa takis o qaji tamo qudei naŋgi dego anjam di qusib mareb, “Bole. Qotei aqa kumbra kalil a na yeqnu qaji di bolequja.” Naŋgi degsib mareb. Di kiyaqa? Naŋgi nami are bulyonab Jon na yansnjrej deqa. 30 Ariya Farisi naŋgi ti dal anjam qalie tamo naŋgi ti Jon na yansnjrqa urateb deqa naŋgi gam bole Qotei na osornjrej qaji di qoreiyeb.

31 Onaqa Yesus na olo tamo uŋgasari naŋgi endegsi minjrej, “Tamo uŋgasari bini bati endeqa unub qaji naŋgo kumbra qa e yawo anjam kiersiy marqai? Naŋgi tamo kiero? 32 E naŋgi qa endegsi marqai. Naŋgi aŋgro du du bul qure ambleq dia alaŋoqnsib aŋgro qudei na qudei minjreqnub, ‘Iga yumba anjamonumqa niŋgi lou tuosai. Iga are uge qa louonumqa niŋgi akamosai.’” 33 Osiqa Yesus a olo anjam endegsi minjrej, “Jon yansnjro qaji a bosiqa iŋgi ti wain ti uratosiq sonaqa niŋgi a qa mareqnub, ‘A mondor uge ti.’ 34 Ariya e Tamo Aŋgro bosimqa iŋgi ti wain ti uyeqnamqa niŋgi e nuboqnsib mareqnub, ‘Niŋgi uniye. Yesus a qunjaŋ ani. A wain uyo ani. A takis o qaji tamo ti une tamo ti naŋgi koba na walweleqnub.’ 35 Niŋgi e qa misiliŋ anjam degsib mareqnub. Ariya tamo uŋgasari qudei naŋgi Qotei aqa powo eqnub dena iga qalieonum, Qotei aqa powo di tulaŋ boledamu.”

Uŋa bei a goreŋ quleq ti dena Yesus aqa siŋga liyoqnej

36 Bati bei Farisi tamo bei aqa ñam Saimon a Yesus minjej, “Ni ijo talq bamqa aqo ombla iŋgi uyqom.” Onaqa Yesus a Saimon odyosiqa aqa talq gilsiqa Saimon ombla awoosib iŋgi uyoqneb. 37 Onaqa sambala uŋa bei qure dia soqnej qaji a anjam endegsi quej, “Yesus a Saimon aqa talq di unu. A di sosiqa iŋgi uyeqnu.” A anjam degsi qusiqa goreŋ jaliŋa quleq ti osiqa Saimon aqa tal miligiq gilsiq Yesus aqa qoreq na bosiqa aqa siŋga jojomq di tigelosiq akamej. Akamonaqa aqa ŋam ya Yesus aqa siŋgaq ainaqa siŋga tombol na awoosiq aqa ŋam ya siŋgaq aiej qaji di aqa segi gate baŋga na piyoqnsiqa Yesus aqa siŋga kundoqyoqnsiqa goreŋ quleq ti dena olo Yesus aqa siŋga liyoqnej.

39 Uŋa a kumbra di yonaqa Saimon a unsiqa are qalej, “Yesus a Qotei aqa medabu o qaji tamo bole qamu uŋa endi bosiq aqa jejamu ojqo qaji di sambala uŋa degsi qalieqo qamu.”

40 Onaqa Yesus a Saimon aqa areqalo di qalieosiqa minjej, “Saimon, e ni anjam bei mermqai.” Onaqa Saimon na minjej, “O Tamo Koba, ni mare.” 41 Onaqa Yesus na yawo anjam endegsi Saimon minjej, “Tamo aiyel na tamo bei silali yaiyeb. Bei na 100 kina yaiyej. Bei na 10 kina yaiyej. Yaiyonabqa minjrej, ‘Bunuqna niŋgi na kamba silali di olo ebqab.’ 42 Ariya bunuqna naŋgi aiyel na kamba silali di a olo yqa keresai deqa a na naŋgi aiyel minjrej, ‘Uŋgum, niŋgi na silali di olo ebaib. Uratiye.’ Degsi minjrej. Deqa Saimon, ni merbe, tamo yai a tamo deqa tulaŋ are boledamuiyqas? Tamo 100 kina yaiyej qaji a kio tamo 10 kina yaiyej qaji a kio?”

43 Onaqa Saimon na minjej, “E are qalonum, tamo 100 kina ej qaji a tamo deqa tulaŋ are boledamuiyqas. Tamo 10 kina ej qaji a tamo deqa tulaŋ are boledamuiyqasai.” Onaqa Yesus na Saimon minjej, “Ni kere maronum.”

44 Osiq bulosiqa sambala uŋa di areiyosiq Saimon minjej, “Ni uŋa endi unime. E ino tal miligiq gilnumqa ni ijo siŋga yansetbosai. Ariya uŋa endi bosiqa aqa ŋam ya na ijo siŋga yansetbosiqa aqa gate baŋga na ijo siŋga piyqo. 45 E ino tal miligiq gilnumqa ni e kundoqbosai. Ariya uŋa endi bosiqa ijo siŋga kundoqyoqnaj agi kundoqyoqnsiq unu. 46 Ni na ijo gate goreŋ na liyosai. Ariya uŋa endena goreŋ boledamu quleq ti osi bosiqa dena ijo siŋga liyqo. 47 Deqa Saimon, e ni mermqai. Sambala uŋa endi aqa une tulaŋ gargekoba. E na aqa une kalil kobotetonum deqa a e qa are tulaŋ boledamuiyqo. Ariya tamo a une quja quja segi atimqa e na kobotetqai di a e qa are bolekiñalaiyqas.” 48 Osiqa uŋa di minjej, “Ino une kalil e na kobotetmonum.” 49 Onaqa tamo naŋgi Yesus koba na awoosib iŋgi uyoqneb qaji naŋgi aqa anjam di qusibqa segi segi maroqneb, “Yesus a tamo kiero deqa a na tamo naŋgo une kobotetnjreqnu?” 50 Onaqa Yesus na uŋa di minjej, “Ni ino areqalo e qa siŋgilatonum deqa ino une kalil e na kobotetmonum. Deqa ni are lawo na gilime.”

Copyright information for `BOJ