Mark 11

Yesus a donki aqa quraq di awoosiq walwelosiq Jerusalem qureq aiej

Ariya Yesus aqa aŋgro naŋgi koba na walwelosib aisib Jerusalem qure jojomyosib Betfage qure ti Betani qure ti dia branteb. Qure aiyel di agi Oliv mana utruq di unu. Di brantosib Yesus na aqa aŋgro aiyel qariŋnjrsiqa minjrej, “Niŋgi aisib qure bei agi jojomq di unu di brantosib donki bei tontonub unu di unqab. Donki di bunuj tamo bei nami aqa quraq di awoosaioqnej qaji. Niŋgi donki di unsib sil palontosib titosib osi boiye. Niŋgi sil palontoqnibqa tamo qudei naŋgi na nenemŋgwab, ‘Niŋgi kiyaqa donki aqa sil palonteqnub?’ Degsib nenemŋgibqa niŋgi na endegsib minjriye, ‘Tamo Koba a wau ti deqa iga donki sil palontsim osi gilqom. Yaintim aqa wau koboamqa a na olo qariŋyim bqas.’” Yesus a na naŋgi aiyel degsi minjrsiqa qariŋnjrnaqa aisib gam jojomq di donki di uneb. Donki di nami tal meq di tontonab sonaq uneb. Unsib sil palonteqnabqa tamo qudei gamq di tigelesoqneb qaji naŋgi na naŋgi aiyel nenemnjreb, “Niŋgi kiyaqa donki aqa sil palonteqnub?” Onaqa naŋgi aiyel na anjam Yesus a nami minjrej qaji di olo minjreb. Minjrnab odnjrnabqa donki di osib Yesus aqa areq osi beb. Bosib naŋgo aiyel gara jugo piqtosib donki aqa quraq di tunabqa Yesus a segi donki gogetosiqa quraq di awoej. Awoonaqa donki a walwelosi aieqnaqa tamo uŋgasari tulaŋ gargekoba naŋgi beleŋosib naŋgo segi gara jugo piqteleŋosib gamq dia tueleŋoqneb. Tamo qudei naŋgi nañuq dena ŋam baŋga ti tuwom baŋga ti giŋgeŋyosibqa osi bosib di dego gamq dia tueleŋoqneb. Onaqa Yesus a donki quraq di awoosiq walweleqnaqa tamo uŋgasari namooqneb qaji naŋgi ti bunuoqneb qaji naŋgi ti tulaŋ koba leleŋoqnsibqa maroqneb, “O Tamo Koba Qotei, iga ni qa tulaŋ areboleboleigwo. Tamo a bqo endi ino ñam na bqo. Deqa ni na a osim tulaŋ geregereiyime. 10 A na gago moma qeli Devit aqa wau osimqa a kamba gago Mandor Koba sosim iga taqatgwajqa bqo. Deqa ni na a tulaŋ geregereiyime. O Qotei laŋ goge di unum qaji, iga ino ñam soqtoqnqom!” Tamo uŋgasari naŋgi degoqnsib leleŋ ti Yesus dauryoqneb.

11 Onaqa Yesus a walwelosi gilsiq Jerusalem qureq di brantosiqa atra tal koba miligiq gilej. Gilsiq iŋgi iŋgi kalil atra tal miligiq di soqnej qaji di koqyoqnsiq laqnej. Bilaqtonaqa a olo atra tal koba uratosiq aqa segi aŋgro 12-pela naŋgi joqsiqa koba na puluosib Betani qureq aieb.

Yesus a qura minjej, “Ni olo bunu geitqasai.”

12 Nebeonaqa naŋgi olo tigelosib Betani qure uratosib gileb. Naŋgi giloqnsibqa gamq di Yesus a mamyej. 13 Onaqa a isaq na ŋam atsiqa qura baŋga ti sonaq unsiqa aqa gei unqajqa utruq gilej. Gilsiq unej qura gei bei saiqoji. Geitqa bati sai deqa baŋga segi sonab unej. 14 Unsiqa qura di minjej, “Ni olo bunu geitqasai. Tamo bei a bosim ino gei bei oqasai.” Degsi minjnaqa aqa aŋgro naŋgi queb.

Yesus a na tamo uŋgasari iŋgi iŋgi qariŋyeleŋeb qaji naŋgi atra talq dena winjrej

15 Onaqa naŋgi walwelosi gilsib Jerusalem qureq di brantosib Yesus a atra tal koba miligiq gilsiqa ŋam atej tamo uŋgasari gargekoba naŋgi iŋgi iŋgi qariŋyeleŋoqnsibqa dena silali eqnab unjrsiqa naŋgi winjrnaq jaraieb. Tamo uŋgasari silali piloqneb qaji naŋgi ti tamo uŋgasari binoŋ qariŋysib dena silali oqneb qaji naŋgi ti naŋgo jar ti jaram ti bilbelyosiqa naŋgi dego winjrnaq jaraieb. 16 Osiqa tamo uŋgasari atra tal miligiq na iŋgi iŋgi osi laqneb qaji naŋgi dego saidnjrsiqa winjrnaq jaraieb. 17 Ariya naŋgi kalil jaraieqnabqa Yesus na minjrej, “Qotei aqa anjam bei nami endegsib neŋgreŋyeb unu, ‘Ijo tal endi tamo uŋgasari kalil naŋgo pailyqajqa tal.’ Qotei aqa anjam degsi unu. Ariya niŋgi olo tal endi ugetonubqa a bajiŋ tamo naŋgo tal bulqo.”

18 Onaqa atra tamo kokba ti dal anjam qalie tamo naŋgi ti Yesus aqa anjam di qusibqa naŋgi a qa ulaosib a qalib moiqajqa gam ŋamoqneb. Di kiyaqa? Tamo uŋgasari kalil naŋgi Yesus aqa anjam quqwajqa tulaŋ arearetnjroqnej deqa. 19 Ariya bilaqtonaqa Yesus aqa aŋgro naŋgi koba na olo Jerusalem qure uratosib aieb.

Niŋgi iŋgi bei qa Qotei pailyqa osibqa endegsib are qaliye, “Iŋgi di Qotei na ebqas.”

20 Nebeonaqa naŋgi olo tigelosib gam dauryosib giloqnsib qura di olo uneb utru ti kalil laosiq moiej. 21 Onaqa Pita a anjam Yesus na nami qura minjej qaji deqa olo are qalsiqa Yesus minjej, “O Tamo Koba, ni unime. Qura ni ya ŋiriŋtem qaji agi laosiq moiqo.” 22 Onaqa Yesus na aqa aŋgro naŋgi endegsi minjrej, “Niŋgi Qotei qa nuŋgo areqalo siŋgilatoqniye. 23 Niŋgi quiye. E bole merŋgwai. Tamo bei na mana kobaquja endi minjqas, ‘Ni tigelosim yuwalq aie.’ A Qotei qa aqa areqalo siŋgilatosimqa a mana degsi minjsim endegsi are qalqas, ‘Bole, mana a na ijo anjam dauryqas.’ Degsi are qalsim minjqas mana a aqa anjam di dauryosim tigelosim yuwalq aiqas. 24 Deqa niŋgi quiye. Niŋgi iŋgi bei qa Qotei pailyqa osibqa endegsib are qaliye, ‘Iŋgi di Qotei na ebqas.’ Degsib are qalsib pailyqab di a eŋgwas. 25 Deqa niŋgi Qotei pailyqa osibqa tamo bei qa ŋiriŋ ti soqnimqa mati aqa une di kobotosim ariya niŋgi Qotei pailyiye. Yimqa nuŋgo Abu laŋ qureq di unu qaji a kamba nuŋgo une kalil kobotetŋgwas. 26 Ariya niŋgi tamo di aqa une kobotetqasai di nuŋgo Abu laŋ qureq di unu qaji a dego nuŋgo une kobotetŋgwasai.”

Gate naŋgi na Yesus nenemyeb, “Ni siŋgila qabe na osim kumbra endi yeqnum?”

27 Yesus a na aqa aŋgro naŋgi anjam degsi minjrsiq koboonaqa naŋgi koba na walwelosib gilsib olo Jerusalem qureq di branteb. Brantosib Yesus a olo atra tal koba miligiq gilsiqa dia walweleqnaqa atra tamo kokba ti dal anjam qalie tamo naŋgi ti Juda gate naŋgi ti Yesus aqa areq bosib nenemyeb, 28 “Ni iga merge. Ni siŋgila qabe na osimqa kumbra endi yeqnum? Yai na ni qariŋmej deqa ni bosim wau endi yeqnum?”

29 Onaqa Yesus na kamba minjrej, “E kamba anjam bei niŋgi nenemŋgwai. Nenemŋgitqa niŋgi e merbibqa e yai na qariŋbonaq bosim wau endi yeqnum di ubtsiy merŋgwai. 30 Niŋgi na merbiye. Yai na Jon qariŋyonaqa bosiqa tamo uŋgasari naŋgi yansnjroqnej? Qotei na kio? Tamo bei na kio?”

31 Onaqa naŋgi Yesus aqa anjam di qusibqa naŋgi segi segi qairosib maroqneb, “Iga Yesus minjqom, ‘Qotei na Jon qariŋyej,’ degsi minjqom di a na iga mergwas, ‘Kiyaqa niŋgi Jon aqa anjam quetosai?’ 32 Ariya iga minjqom, ‘Tamo bei na Jon qariŋyej,’ degsi minjqom di tamo uŋgasari naŋgi ŋiriŋosib bosib iga lugwab. Di kiyaqa? Naŋgi mareqnub, ‘Jon a Qotei aqa medabu o qaji tamo bole.’” 33 Naŋgi degsib marsib deqa olo Yesus minjeb, “Yai na kio Jon qariŋyej di iga qaliesai.” Onaqa Yesus na kamba minjrej, “Niŋgi degsib merbonub deqa e dego yai na qariŋbonaq bosim wau endi yeqnum di niŋgi merŋgwasai.”

Copyright information for `BOJ