Mark 14

Atra tamo kokba ti dal anjam qalie tamo naŋgi ti Yesus ojsib moiotqajqa gam ŋamoqneb

1Onaqa Juda naŋgo yori bati koba jojomej. Yori bati di aqa ñam Bem Tiyosai Qaji Uyqajqa Bati. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej. Juda naŋgi deqa olo are qalqajqa bati agi jojomej. Bati aiyel soqnej. Deqa atra tamo kokba ti dal anjam qalie tamo naŋgi ti endegsib maroqneb, “Iga kiersim Yesus gisaŋyosim ojsim qalsim moiotqom?” 2Osib naŋgi mareb, “Iga yori bati qa Yesus ojqasai. Ojqom di tamo uŋgasari naŋgi iga nugsib ŋiriŋosib qoto tigelo uge.”

Uŋa bei a goreŋ quleq tulaŋ boledamu osiq Yesus aqa gateq di bilentej

3Onaqa Yesus a Betani qureq gilsiqa tamo bei nami jejamu yu na ugetej qaji aqa ñam Saimon aqa talq di soqnej. Sosiqa iŋgi uyeqnaqa uŋa bei a goreŋ quleq tulaŋ boledamu silali kobaquja na awaiyej qaji di jaliŋaq jigsiqa osi bosiqa aqa medabu paratosiqa Yesus aqa gateq di bilentej. 4Onaqa tamo qudei tal miligiq di awesoqneb qaji naŋgi kumbra di unsibqa naŋgi ŋiriŋosib segi segi maroqneb, “Uŋa di a kiyaqa goreŋ di laŋa ñaŋguiyqo? 5A goreŋ di osim tamo qudei enjrqo qamu meniŋ silali 300 yonub qamu gilsim tamo iŋgi iŋgi saiqoji unub qaji naŋgi jeisi enjrqo qamu di kere.” Osib uŋa di ŋiriŋteb. 6Onaqa Yesus a na naŋgi kamba minjrej, “Niŋgi uŋa di gulube yaib. A uratib kumbra degbem. A kumbra bole ebqo. 7Tamo iŋgi iŋgi saiqoji unub qaji naŋgi bati gaigai niŋgi ti sqab. Deqa niŋgi na naŋgi aqaryainjrqa are soqnimqa aqaryainjroqnqab. Ariya e bati gaigai niŋgi ti sqasai. 8E moiqai. Moiitqa e subq atqab. Uŋa a deqa are qalsiqa namoqna ijo jejamuq di goreŋ bilentsiq dena ijo jejamu subq atqa gereiyetbqo. A na kumbra degbqa kere agi degbqo. 9Niŋgi quiye. E bole merŋgwai. Bunuqna ijo wau tamo naŋgi sawa sawa kalilq dia ijo anjam bole mare mare laqnsibqa uŋa endi ijo jejamuq di goreŋ bilentqo qaji a qa are qaloqnsib maroqnqab.”

Judas a na Yesus osim atra tamo naŋgo baŋq di atqajqa deqa naŋgi minjrej

10Onaqa Judas Iskariot a tigelosiqa atra tamo kokba naŋgoq gilej. Judas a Yesus aqa aŋgro 12-pela naŋgi deqaji bei. A naŋgoq gilsiqa minjrej, “E Yesus osiy nuŋgo baŋq di atitqa niŋgi na qalqab.” 11Degsi minjrnaqa naŋgi qusib tulaŋ areboleboleinjrnaqa minjeb, “Ni Yesus osim gago baŋq di atimqa iga ni silali emqom.” Degsi minjnabqa a gilsiqa a Yesus osim naŋgo baŋq di atqajqa gam ŋamoqnej.

Yesus a aqa aŋgro naŋgi koba na iŋgi uyoqneb

12Ariya Bem Tiyosai Qaji Uyqajqa Bati brantej. Qotei na nami Israel naŋgi endegsi minjrej, “Niŋgi kaja du du naŋgi ñumeleŋosib siraŋmeq dia leŋ liyibqa e na unsiy niŋgi padaltŋgwasai.” Qotei a nami Israel naŋgi degsi minjrej. Kumbra deqa are qalqajqa yori bati agi brantej. Brantonaqa Juda naŋgi mareb, “Iga kaja du du naŋgi ñumeleŋosim Qotei atraiyqom.” Ariya bati deqa Yesus aqa aŋgro naŋgi na Yesus endegsib nenemyeb, “Ni iga merge. Iga aisim tal qabia yori bati aqa iŋgi iŋgi gereiyetmonamqa ni iŋgi uyqam?” 13Onaqa Yesus a na aqa aŋgro aiyel qariŋnjrsiqa minjrej, “Niŋgi aiyel aisib qure ambleq dia tamo bei ya nobu qoboiyosim giloqnim gamq dia itosib dauryiye. 14Niŋgi a dauryosib tal a gogetqas qaji di miligiq gilsib tal lanja endegsib minjiye, ‘Tamo Koba a marqo, “E ijo aŋgro naŋgi koba na awoosim yori bati aqa iŋgi uyqajqa warum a qabi unu?” ’ 15Niŋgi degsib minjibqa a na warum kobaquja bei gogeqsi unu di niŋgi osorŋgwas. Warum dia nami jar ti awo jaram ti ateleŋeb unu. Niŋgi aiyel aisib warum dia gago iŋgi iŋgi gereiye-leŋoiye.” 16Onaqa naŋgi aiyel qure miligiq aisib anjam kalil Yesus na minjrej qaji degsi brantonab unsibqa iŋgi iŋgi kalil warum dia gereiyeleŋeb.

17Onaqa bilaqtonaqa Yesus aqa aŋgro 12-pela naŋgi koba na aisib warum di miligiq gilsibqa awoosib iŋgi uyoqnsibqa Yesus a na naŋgi endegsi minjrej, “Niŋgi quiye. E bole merŋgwai. Niŋgi ijo aŋgro 12-pela. Nuŋgo ambleq dena ijo aŋgro bei tigelosimqa e ojsim jeu tamo naŋgo baŋq di e atqas. Aŋgro di a e ombla iŋgi uyeqnum.” 19Degsi minjrnaq qusibqa naŋgo are tulaŋ gulubekobainjrnaqa segi segi Yesus nenemyoqneb, “O Tamo Koba, ni e qa kio maronum?” 20Onaqa minjrej, “Aŋgro aqo ombla endego tabir qujaiq dia bem quiq di tuqtoqnsim uyeqnum aŋgro dena e ojsim jeu tamo naŋgo baŋq di atqas. A dego ijo aŋgro 12-pela niŋgi deqaji bei. 21Niŋgi quiye. E Tamo Aŋgro moiqai. Nami Qotei aqa anjam degsib neŋgreŋyeb unu. Deqa uŋgum. E anjam di dauryosiy moiqai. Ariya tamo e ojsim jeu tamo naŋgo baŋq di atqas qaji a tulaŋ padalougetqas. A nami ŋambabosai qamu di kere.”

Yesus a bem ti wain ti osiq aqa aŋgro naŋgi anainjrej

22Yesus a na aqa aŋgro naŋgi anjam degsi minjrsiqa naŋgi koba na iŋgi uyoqnsibqa Yesus a Qotei pailyosiqa bem bei osiq giŋgeŋyosiqa naŋgi enjrsiqa endegsi minjrej, “Endi ijo jejamu. Osib uyiye.” 23Osiqa wain osiqa gambaŋq di bilentosiqa Qotei pailyosiqa aqa aŋgro naŋgi enjrnaqa naŋgi kalil osib uyeb. 24Onaqa Yesus na minjrej, “Wain gambaŋ endi ijo leŋ. Tamo uŋgasari gargekoba naŋgo une kobotetnjrqajqa deqa ijo leŋ aisim Qotei aqa anjam bunuj nami gereiyej qaji di siŋgilatqas. 25Ariya niŋgi quiye. E bole merŋgwai. E wain endi olo uyqasai. Degsi gilsiy gilsiy mondoŋ diŋo bati qa Qotei a nuŋgo Mandor Koba soqnimqa bati deqa e olo wain bunuj uyqai.”

26Yesus a na aqa aŋgro naŋgi anjam degsi minjrsiqa naŋgi koba na louosib koboonaqa qure uratosib Oliv manaq oqeb.

Yesus na aqa aŋgro naŋgi minjrej, “Niŋgi kalil e uratbosib jaraiqab.”

27Naŋgi manaq oqoqnsibqa Yesus na minjrej, “Niŋgi kalil ijo ñam ulontosib e uratbosib jaraiqab. Nuŋgo kumbra deqa Qotei aqa anjam bei nami endegsib neŋgreŋyeb unu, ‘E na kaja naŋgo mandor qalitqa kaja naŋgi segi segi jaraiqab.’ Qotei aqa anjam nami degsib neŋgreŋyeb. 28Ariya bati qalub koboamqa e olo subq na tigelosiy niŋgi qa namoosiy Galili sawaq gilitqa niŋgi bunuqna e daurbosib dia e itbqab.” 29Onaqa Pita na minjej, “Aŋgro kalil naŋgi ino ñam ulontosib jaraiqab e segi ino ñam ulontqasai.” 30Onaqa Yesus na kamba Pita minjej, “Ni que. E bole mermqai. Qolo qujai endeqa tuwe anjamoaiyeltosaisoqnimqa ni gisaŋoqalubtsim marqam, ‘E Yesus qaliesai.’” 31Onaqa Pita a tulaŋ saidosiq minjej, “Sai. E ni ombla moiqa marimqa uŋgum e ino ñam ulitqasai bolesai.” Onaqa Yesus aqa aŋgro kalil naŋgi anjam qujai di minjoqneb.

Yesus a nañu agu bei aqa ñam Getsemani dia sosiq aqa Abu pailyej

32Ariya naŋgi koba na walwelosib manaq oqsib nañu agu beiq di branteb. Nañu agu di aqa ñam Getsemani. Dia brantosib Yesus na aqa aŋgro naŋgi minjrej, “Niŋgi endia awesoqniye. E kiñala sasalosiy ijo Abu pailyosiy bqai.” 33Degsi minjrsiqa aqa aŋgro qalub agi Pita na Jems na Jon na naŋgi segi joqsiqa pailyqajqa sasalej. Sasalosiqa pailyoqnsiqa a are tulaŋ gulubekobaiyej. 34Osiqa aqa aŋgro qalub naŋgi minjrej, “E are tulaŋ gulubekobaibqo. Gulube dena e moiepratonum. Deqa niŋgi e ombla endia sosimqa ŋam atoqniye.” 35Degsi minjrsiqa olo kiñala sasalosiqa mandamq di ŋam quosiqa Qotei pailyosiq minjej, “O Aba. (Di Hibru anjam. Aqa damu, “O Abu.”) Gam bei soqnimqa ni na marimqa gulube aqa bati bqo endi e buŋbosim gilem. Ni kumbra kalil yqa kere. Deqa ni na marimqa gulube endi e qa baiq. Uŋgum, ni ijo areqalo dauryaim. Ni ino segi areqalo dauryosim ye.”

37Yesus a na degsi Qotei pailyosiqa olo tigelosiqa aqa aŋgro naŋgo areq aisiq unjrej naŋgi are gulube na ŋereŋesoqneb. Deqa Yesus na Pita minjej, “O Saimon, ni ŋeiejunum e? Ni ŋam sokiñalayqa keresai e? 38Niŋgi ŋereŋaib. Niŋgi ŋam sosib pailyoqniye. Amqa gulube bei nuŋgoq bqas dena niŋgi uneq waiŋgwasai. Bole, nuŋgo areqalo kalil e daurbqajqa unu. Ariya niŋgi segi gulube di oqajqa niŋgi siŋgila saiqoji.”

39Degsi minjrsiqa olo puluosi sasalosiq aqa anjam nami pailyej qaji degsi olo pailyosiq bosiqa aqa aŋgro qalub naŋgi urŋamnjrnaqa ŋereŋesonab unjrej. Unjrnaqa naŋgi Yesus anjam bei minjqa keresaiinjrej.

41Olo gilsiq Qotei pailyosiq bosiq naŋgi itnjrsiq minjrej, “Niŋgi aqaratosib geregere ŋereŋejunub e? Uŋgum. Bati koboqo. Niŋgi ŋam atsib uniye. E Tamo Aŋgro ojsib une tamo naŋgo baŋq di atqajqa bati agi bqo. 42Niŋgi tigelab gilqom. Tamo e ojsim jeu tamo naŋgo baŋq di atqajqa agi brantqo.”

Judas na Yesus osiq jeu tamo naŋgo baŋq di atej

43Onaqa Yesus aqa aŋgro 12-pela naŋgi deqaji bei agi Judas a na qaja tamo gargekoba naŋgi sebru ti torom ti eleŋonab joqsiqa Yesus aqa areq di branteb. Atra tamo kokba ti dal anjam qalie tamo naŋgi ti Juda gate kokba ti naŋgi na naŋgi qariŋnjrnab Yesus ojqa beb. 44Tamo Yesus osim jeu tamo naŋgo baŋq di atqas qaji a nami naŋgi ti anjam gereiyosib minjrej, “E na tamo kundoqyqai agide. A ojsib geregere taqatosib osib giliye.”

45Onaqa Judas a Yesus aqa areq bosiq minjej, “O Tamo Koba.” Degsi minjsiq kundoqyej. 46Kundoqyonaqa qaja tamo naŋgi brantosib baŋ waiyosib Yesus ojeb.

47Onaqa Yesus aqa aŋgro bei jojom di tigelesoqnej qaji a na aqa sebru osiqa atra tamo gate aqa kaŋgal tamo bei gateq di qalqajqa waiyej grotosiqa dabkala segi gentetej. 48Onaqa Yesus na qaja tamo naŋgi minjrej, “E leŋ ojo tamo deqa kio niŋgi sebru ti torom ti eleŋosib e ojqa bonub? 49E bati gaigai atra tal miligiq dia niŋgi koba na sosimqa tamo uŋgasari naŋgi Qotei aqa anjam palontsim minjroqnem. Bati deqa niŋgi yala baŋ waiysib e ojosai. Niŋgi kumbra di yonubqa Qotei aqa anjam kalil nami neŋgreŋyeleŋeb qaji di aqa damu agi brantqo.” 50Yesus a na naŋgi degsi minjrej. Onaqa aqa aŋgro kalil naŋgi a uratosib jaraieb.

Aŋgro wala bei a yosi ulaŋej

51Bati deqa aŋgro wala bei a ŋeio gara segi na kabuosiq Yesus dauryonab a ojeb. 52Ojnabqa ŋeio gara segi naŋgo baŋq di uratosiqa a yosi ulaŋej.

Atra tamo kokba ti Juda gate kokba ti naŋgi Yesus aqa jejamuq di anjam qamqajqa marsib koroesoqneb

53Onaqa qaja tamo naŋgi na Yesus osib atra tamo gate aqa talq osi gileb. Osi gilsib atra tamo kokba ti Juda gate kokba ti dal anjam qalie tamo naŋgi ti kalil koroesonab naŋgo ulatamuq dia tigelteb. 54Ariya naŋgi Yesus osi gileqnabqa Pita a kiñala isa isaq na Yesus dauryosiq uli uliosiq gilsiq torei atra tamo gate aqa tal meq di brantej. Brantosiqa naŋgi Yesus kieryib unqajqa deqa qaja tamo qudei naŋgi tal meq dia ŋam tuŋguyosib awesonabqa bosiq naŋgi koba na ŋam yoroqnej.

55Onaqa atra tamo kokba ti Juda gate kokba ti naŋgi kalil koroosibqa Yesus aqa jejamuq di anjam kie qametosib dena a qalib moiqajqa deqa qairoqneb. Anjam ŋamonab ŋamonab ugeinjrej. Naŋgi Yesus aqa une bei itosai. 56Deqa naŋgi tamo gargekoba metnjrnab bosibqa gisa gisaŋ anjam Yesus aqa jejamuq di qameleŋoqneb. Naŋgi anjam laŋa laŋa na qamoqneb. Naŋgi anjam qujai na qamosai. 57Onaqa naŋgo ambleq dena tamo qudei naŋgi tigelosibqa Yesus aqa jejamu laŋa gisaŋyosib mareb, 58“Yesus a endegsi marnaq iga quem, ‘E atra tal kobaquja endi tamo na gereiyo qaji di koŋgrontosiyqa bati qalub qa olo atra tal bei tamo na gereiyosai qaji di tigeltqai.’” 59Ariya naŋgo anjam di dego qujaiosai. Naŋgi anjam laŋa laŋa maroqneb.

60Onaqa atra tamo gate a naŋgo anjam di qusiqa a tigelosiqa Yesus aqa areq bosiq nenemyej, “Tamo naŋgi di anjam gargekoba ni qa mareqnub. Di ni kamba anjam bei marqasai e?” 61Onaqa Yesus a torei mequmej. A anjam bei yala marosai.

Deqa atra tamo gate a na olo nenemyej, “Ni Kristus e? Ni Qotei Goge Koba aqa Ŋiri e? Ni e merbe.”
62Onaqa Yesus na minjej, “Od. Agi e segi. Ni que. Bunuqna e Tamo Aŋgro laŋ qureq oqsiy Qotei siŋgila koba ti unu qaji aqa baŋ woq di awesosiy olo laŋbiq na boqnit niŋgi e nubqab.” 63Onaqa atra tamo gate a Yesus aqa anjam di qusiqa a tulaŋ minjiŋ oqetonaqa aqa segi gara jugo bumbraŋyosiqa marej, “Aqa une agi a segi na babtqo iga quonum. Deqa kiyaqa tamo bei olo metonam bosim aqa une marqas? 64Aqa misiliŋ anjam agi niŋgi quonub. Deqa niŋgi kiersib marqab?” Onaqa naŋgi kalil mareb, “A bole une ti. Deqa qalib moiem.”

65Naŋgi kalil degsib marnabqa naŋgo ambleq dena tamo qudei naŋgi tigelosib Yesus miselyoqneb. Osib aqa ŋamdamu gara na qosetosib baŋ na qaloqnsib minjoqneb, “Ni Kristus amqa ni ubtsim mare, yai na ni lumqo?” Onaqa qaja tamo qudei naŋgi Yesus aqa areq bosib a ula poŋyoqneb.

Pita a marej, “E Yesus qaliesai.”

66Ariya Pita a tal meq di awesosiq ŋam yoreqnaqa atra tamo gate aqa kaŋgal uŋa bei a bosiqa Pita unsiqa koqyosiq minjej, “Ni dego Yesus Nasaret qaji aqa aŋgro bei. Ni nami a daurysi laqnem.” 68Onaqa Pita a tulaŋ saidosiq minjej, “Ni anjam merbonum di e qaliesai.” Degsi minjsiqa tigelosiq tal qala beiq gilsiq di soqnej. 69Sonaqa kaŋgal uŋa dena olo Pita unsiqa tamo naŋgi jojom di tigelesoqneb qaji naŋgi minjrej, “Tamo di a dego Yesus aqa aŋgro bei.” 70Onaqa Pita a olo tulaŋ saidej.

Olo kiñala soboleiyonaq tamo qudei Pita aqa areq di tigelesoqneb qaji naŋgi Pita koqyosib minjeb, “Ni Galili qaji tamo. Deqa iga qalieonum, ni Yesus aqa aŋgro bei.”
71Onaqa Pita a olo tulaŋ siŋgila na saidosiq marej, “E tamo di qaliesai bolesai. E bole maronum. E gisaŋot Qotei na e lubem.” 72A degsi marnaqa tuwe anjamej. Tuwe anjamonaqa Pita a qusiqa anjam nami Yesus na minjej qaji, “Tuwe anjamoaiyeltosaisoqnimqa ni gisaŋoqalubtsim marqam, ‘E Yesus qaliesai,’” anjam deqa olo are qalsiqa poiyonaqa tulaŋ akamugetej.

Copyright information for `BOJ