Mark 2

Yesus na tamo bei jejamu laiyej qaji di boletej

Ariya bati bei Yesus a olo Kaperneam qureq gilsiq di sonaqa qure deqaji tamo uŋgasari naŋgi endegsib queb, “Yesus a olo gago qureq bqo. A talq di unu.” Degsib qusib mare mare laqnabqa tamo uŋgasari tulaŋ gargekoba queb. Deqa naŋgi bosib siraŋme juŋonabqa Yesus na Qotei aqa anjam palontosiq minjroqnej. Onaqa tamo qolqe naŋgi na tamo bei jejamu laiyej qaji a saperaq di atsibqa qoboiyosib Yesus aqa talq osi beb. Osi bosib ŋam ateb tamo tulaŋ gargekoba naŋgi siraŋme juŋeb. Deqa naŋgi Yesus aqa areq gilqa keresaiinjrnaqa tal quraq oqsib goge na waqtosibqa tamo sapera qoji gulaintosib ura uratonab Yesus aqa areq aiej. Onaqa Yesus a naŋgo areqalo unej naŋgo areqalo qujai Yesus na tamo di boletqa kere. Degsi unsiq deqa tamo jejamu laiyej qaji di minjej, “O ijo aŋgro, ino une kalil e na kobotetmonum.”

Onaqa dal anjam qalie tamo qudei warum dia awesoqneb qaji naŋgi Yesus aqa anjam di qusibqa naŋgo areqalo na mareb, “Yesus a kiyaqa anjam degsi marqo? A Qotei misiliŋyqo. Yai na tamo naŋgo une kobotqa kere? Qotei a segi qujai.” Naŋgi degsib are qalsib sonabqa Yesus a naŋgo areqalo di qalieosiqa minjrej, “Niŋgi kiyaqa areqalo uge di onub? Anjam kie e na tamo jejamu laiyqo qaji di minjqajqa wau koba sai? ‘Ino une kalil e na kobotetmonum,’ anjam de kio, ‘Ni tigelosim ino sapera osim walwel,’ anjam de kio? 10 Ariya e Tamo Aŋgro e mandamq endia siŋgila ti unum deqa e na tamo naŋgo une kobotetnjrqa kere. Niŋgi degsib qalieqajqa deqa e na tamo di boletqai.” Yesus a na naŋgi degsi minjrsiqa tamo jejamu laiyej qaji di koqyosiqa minjej, 11 “E ni mermqai. Ni tigelosim ino sapera osim ino talq gile.” 12 Degsi minjnaqa aqa jejamu boleonaqa a tigelosiqa aqa sapera osiqa tamo uŋgasari kalil naŋgo ŋamdamuq na walwelosiq gilej. Onaqa tamo uŋgasari kalil naŋgi Yesus aqa siŋgila di unsibqa naŋgi tulaŋ prugeleŋosib Qotei aqa ñam soqtosib mareb, “Kumbra iga endego unonum di kumbra tulaŋ bei. Tamo bei na kumbra deqaji bei yeqnaq iga nami unosaioqnem.”

Yesus na Livai a dauryqajqa metej

13 Onaqa Yesus a olo alile ainaqa tamo uŋgasari tulaŋ gargekoba naŋgi bosib aqa areq di koroonabqa a na Qotei aqa anjam palontosiq minjroqnej. 14 Dena walwelosiq takis o qaji tamo bei aqa ñam Livai a takis o qaji talq di awesonaq gilsiq itej. A Alfias aqa ŋiri. A itosiqa minjej, “Ni e daurbe.” Degsi minjnaqa a tigelosiqa Yesus dauryej.

15 Yesus dauryosiq giloqnsiqa Yesus aqa aŋgro naŋgi ti minjrej, “Niŋgi ijo talq bosib iŋgi uyiye.” Degsi minjrnaqa naŋgi Livai aqa talq gilsibqa awoosib iŋgi uyoqneb. Naŋgi segi sai. Une tamo ti takis o qaji tamo ti tulaŋ gargekoba naŋgi dego koba na Yesus dauryosib Livai aqa talq di awoosib Yesus aqa aŋgro naŋgi ti iŋgi uyoqneb. 16 Onaqa Farisi tamo qudei naŋgi bosib Yesus a une tamo ti takis o qaji tamo ti naŋgi koba na iŋgi uyeqnab unjrsibqa Yesus aqa aŋgro naŋgi minjreb, “Yesus a kiyaqa une tamo ti takis o qaji tamo ti naŋgi koba na iŋgi uyeqnub?” 17 Onaqa Yesus a Farisi naŋgo anjam di qusiqa minjrej, “Tamo ma saiqoji naŋgi ma gereiyo tamo aqaq gilosaieqnub. Tamo ma ti naŋgi segi ma gereiyo tamo aqaq gileqnub. Tamo bei a marqas, ‘E tamo bole. E une saiqoji.’ E tamo deqaji naŋgi metnjrit ijoq bqajqa e deqa bosai. Tamo a marqas, ‘E une ti.’ E tamo deqaji naŋgi metnjrit ijoq bqajqa e deqa bem.”

Yesus a qurieŋ kumbra qa anjam marej

18 Bati bei Jon aqa aŋgro naŋgi ti Farisi naŋgi ti ya uratoqnsib qurieŋoqneb. Deqa naŋgi Yesus aqa areq bosib minjeb, “Jon aqa aŋgro naŋgi iŋgi uratoqnsib qurieŋeqnub. Farisi naŋgo aŋgro naŋgi dego iŋgi uratoqnsib qurieŋeqnub. Ariya ino aŋgro naŋgi kiyaqa qurieŋosaieqnub?” 19 Onaqa Yesus a na kamba minjrej, “Tamo bei a uŋa baŋ ojqa bati qa a aqa was naŋgi ti soqnimqa naŋgi are gulubeinjrqas e? Sai. 20 Ariya bunuqna naŋgo was yainjribqa bati deqa naŋgi are gulubeinjrimqa qurieŋosib sqab.

21 Tamo bei a gara jugo bunuj osim dena mutu gentosim gara jugo sari braŋoq di qandimqa keresai. Degsi qandimqas di bunuqna a na gara jugo sari di yansimqa gara mutu bunuj a kiñalaosim gara jugo sari di uratim braŋ qelikobaqas. Gara mutu bunuj osim gara jugo bunuj braŋoq di qandimqab di kere. 22 Tamo bei a wain bunuj osim ya nobu kaja aqa jegara na gereiyo qaji sariq di qamqa keresai. Ya nobu sari di nami kaŋgraŋosiq siŋgilaej. Deqa a wain bunuj qamimqa wain a didiqosim ya nobu sari paratosimqa wain bileŋosim mandamq aiqas. Ya nobu a dego ugeqas. A wain bunuj osim ya nobu bunujq di qamqas di kere.”

Yesus a yori bati qa anjam marej

23 Onaqa Juda naŋgo yori bati bei Yesus aqa aŋgro naŋgi ti wau ambleq na giloqnsibqa aqa aŋgro naŋgi wit gei eleŋoqnsib uye uye giloqneb. 24 Naŋgi degsib gileqnabqa Farisi tamo qudei naŋgi bosib unjrsibqa Yesus minjeb, “Ino aŋgro naŋgi kiyaqa kumbra degyeqnub? Yori bati qa kumbra degyo di getento koba.”

25 Onaqa Yesus na kamba Farisi naŋgi minjrej, “Nami Devit aqa wau tamo ti naŋgi mamnjrnaqa kumbra yeb qaji di niŋgi buk miligiq di sisiyosai kio? 26 Nami Abiatar a atra tamo koba sonaqa bati deqa Devit a atra tal miligiq gilsiqa Qotei atraiyqajqa bem nami atnab soqnej qaji di osiqa giŋgeŋyosiqa aqa wau tamo naŋgi koba na uyeb. Bem di atra tamo naŋgo segi uyqajqa bem. Niŋgi quiye. Devit a degsi yej di a dal anjam grotej. Ariya a Qotei aqa ŋamdamuq di une saiqoji. Niŋgi anjam di sisiyosai kio?”

27 Osiqa minjrej, “Qotei a tamo naŋgi qa are qalsiqa deqa yori bati atej. A yori bati qa are qalsiqa deqa tamo naŋgi atosai. 28 E Tamo Aŋgro. Deqa e segi na yori bati taqatejunum. E segi yori bati aqa Tamo Koba.”

Copyright information for `BOJ