Mark 4

Sago yago breiyqa yawo anjam

Onaqa Yesus a olo alile ainaqa tamo uŋgasari tulaŋ gargekoba bosib aqa areq di koroonabqa a sasalosiqa qobuŋ bei gogeq di awoej. Awoosiqa tamo uŋgasari kalil naŋgi alile di sonabqa a na yawo anjam gargekoba minjroqnej.

Ariya a na yawo anjam bei endegsi minjrej,
“Niŋgi quiye. Tamo bei a gilsiqa aqa iŋgi wauq di saga yago breiyeleŋej. Breiynaqa jagwa na saga yago qudei puyonaqa gam qalaq aieleŋeb. Onaqa qebari naŋgi bosib uyekriteb. Ariya saga yago qudei mandam lanjaq di aieleŋeb. Mandam di guma meniŋ ti. Gogeq di mandam kiñala. Deqa saga yago aieleŋosib urur oqoqujateb. Naŋgo jirim tulaŋ guma aiosai deqa seŋ oqsiq kaŋkaŋonaqa naŋgi laosib moreŋeb. Ariya saga yago qudei sil luwit ambleq di aieleŋeb. Dena oqeb qaji sil luwit na dego dauryosiq oqsiq kabutnjrnaq geitosai. Ariya saga yago qudei mol mandam boledamuq di aieb. Di aisib oqoboledamuysib gei tulaŋ gargekoba ateleŋeb. Qudei 30. Qudei 60. Qudei 100.” Yesus a na tamo uŋgasari naŋgi yawo anjam degsi minjrsiq koboonaqa olo endegsi minjrej, “Tamo a dabkala ti sqas di a ijo anjam endi geregere quem.”

Yesus a kiyaqa tamo uŋgasari naŋgi yawo anjam minjreqnu?

10 Onaqa Yesus a na tamo uŋgasari naŋgi uratnjrsiqa a kiñala qalaq gilsiqa a segi sonaqa aqa aŋgro 12-pela naŋgi ti tamo qudei a daurysib laqneb qaji naŋgi ti aqa areq bosibqa aqa yawo anjam di aqa utru geregere qalieqajqa deqa nenemyeb. 11 Nenemyonabqa a na kamba endegsi minjrej, “Yawo anjam di aqa utru agi merŋgwai. Niŋgi quiye. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya tamo uŋgasari qala qalaq di unub qaji naŋgi yawo anjam segi minjroqnqai. 12 Deqa naŋgi ŋam atsib ijo kumbra laŋa unoqnsib utru poinjrqasai. Naŋgo dabkala na ijo anjam laŋa quoqnsib di dego utru poinjrqasai. Deqa naŋgi are bulyosib Qotei aqaq bqa keresai. Deqa Qotei na naŋgo une kobotetnjrqasai.”

Sago yago qa yawo anjam aqa utru Yesus na aqa aŋgro naŋgi minjrej

13 Osiqa minjrej, “Saga yago qa yawo anjam maronum di aqa utru niŋgi poiŋgosai e? Dego di niŋgi kiersib ijo yawo anjam kalil qa poiŋgwas? 14 Tamo a saga yago breiyej di aqa utru endegsi unu. A Qotei aqa anjam mare mare laqnej. 15 Saga yago qudei gam qalaq ainabqa qebari naŋgi bosib uyekriteb qaji di aqa utru endegsi unu. Tamo qudei naŋgi Qotei aqa anjam qusib naŋgo are miligiq di esoqnibqa Satan a urur bosim anjam Qotei na naŋgo are miligiq di atej qaji di olo yainjrqas. 16 Saga yago qudei mandam lanjaq di aieb qaji di aqa utru endegsi unu. Tamo qudei naŋgi Qotei aqa anjam qusib tulaŋ areboleboleinjrimqa anjam di oqujatosib naŋgo areq atqab. 17 Ariya anjam di naŋgo are miligiq tulaŋ guma aiosai. Deqa naŋgi sokiñalayibqa bunuqna Qotei aqa anjam gotraŋyo qaji tamo qudei naŋgi bosib naŋgi gulube enjrsib ugeugeinjrqab. Yimqa naŋgo areqalo Yesus qa siŋgilateqnub qaji di olo ulonqab. 18 Saga yago qudei sil luwit ambleq aieb qaji di aqa utru endegsi unu. Tamo qudei naŋgi Qotei aqa anjam qusibqa naŋgo areqalo miligiq di esoqnibqa ariya bunuqna naŋgi olo mandam qa iŋgi iŋgi qa are koba qaloqnsibqa silali koba oqnqajqa are prugnjroqnqas. Yimqa naŋgo areqalo dena naŋgi wala walainjrsim Qotei aqa anjam naŋgo are miligiq di tentimqa di loumqas. Deqa a gei boletqasai. 20 Ariya saga yago qudei mol mandam boledamuq di aieb qaji di aqa utru endegsi unu. Tamo qudei naŋgi Qotei aqa anjam qusib naŋgo are miligiq di geregere ojsib siŋgilatqab. Deqa Qotei aqa anjam di naŋgo are miligiq di tulaŋ kobaqas. Qudei 30. Qudei 60. Qudei 100.”

Tamo bei a lam qatrentsim puloŋamqa guwe na kabutqasai

21 Yesus a na naŋgi yawo anjam degsi minjrsiqa olo yawo anjam bei endegsi minjrej, “Tamo bei a lam qatrentsim puloŋamqa guwe na kabutqasai. Bijal surumq di atqasai. Boleq di gaintim sosimqa warum suwaŋqas. 22 Dego kere kumbra kalil uliejunu qaji di Qotei na boleq atimqa tamo kalil naŋgi unqab. Uli anjam kalil dego Qotei na babtimqa tamo kalil naŋgi qusib poinjrqas. 23 Tamo a dabkala ti sqas di a ijo anjam endi geregere quem.”

24 Osiqa minjrej, “Qotei aqa anjam niŋgi queqnub qaji endi geregere qusib dauryoqniye. Niŋgi dauryoqnqab dego kere Qotei a kamba powo koba eŋgoqnqas. Osim olo powo tulaŋ koba eŋgoqnsim sqas. 25 Tamo a powo ti sqas di Qotei na powo olo yimqa a powo koba oqas. Ariya tamo a powo ti sqasai di powo kiñala aqaq di unu qaji di Qotei na olo yaiyimqa a laŋa sqas.”

Sago yago naŋgi segi oqeleŋeqnub. Yesus a yawo anjam deqa marej

26 Osiqa olo yawo anjam bei endegsi minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo bei a saga yago breiyeqnu dego kere. 27 Tamo di a qolo ŋeioqnsiqa nobqolo a olo tigeloqnsiqa walweleqnu. A kumbra degyeqnaqa saga yago naŋgi segi kokitoqnsibqa oqeleŋeqnub. Saga yago naŋgi segi kiersib oqeleŋeqnub di tamo a qaliesai. 28 Mandam a segi waueqnaqa saga yago naŋgi kokitoqnsibqa baŋgateqnub. Dena sotoqnsibqa geiteleŋoqnsibqa melieqnub. 29 Amqa tamo di a bosim serie na giŋgeŋyosim oqas. Meli sau bqo deqa giŋgeŋyosim oqas.”

Sis yago qa yawo anjam

30 Yesus a na naŋgi yawo anjam degsi minjrsiq koboonaqa olo endegsi minjrej, “Qotei a tamo uŋgasari naŋgo Mandor koba sosiq naŋgi taqatnjreqnu kumbra di aqa utru niŋgi geregere poiŋgwajqa deqa yawo anjam bei endegsi merŋgwai. 31 Kumbra di tamo bei na sis yago osiq aqa wauq di yagej dego kere. Sis yago naŋgi tulaŋ kiñilala qas yago bul. Iŋgi iŋgi qudei naŋgo yago kokba yala. Sis yago naŋgi tulaŋ kiñilala. Ariya tamo bei na sis yago osiq aqa wauq di yagonaqa bunuqna a oqsiq tulaŋ kobaqujaej. Osiqa ŋam qudei buŋnjrsiq dani kokba ateleŋej. Onaqa qebari naŋgi bosib aqa waburq di awoeleŋeb.”

Yesus a na tamo uŋgasari naŋgi yawo anjam segi minjroqnej

33 Yesus a na tamo uŋgasari naŋgi yawo anjam gargekoba deqaji minjroqnej. Naŋgi aqa yawo anjam quqwa kere deqa degsi minjroqnej. 34 A anjam bei minjrosaioqnej. Yawo anjam segi minjroqnej. Olo segitoqnsiqa aqa segi aŋgro naŋgi yawo anjam aqa utru geregere plaltosiq minjroqnej.

Yesus a marnaqa jagwa a laej

35 Ariya bilaqtonaqa Yesus a segi qobuŋ goge di sosiqa aqa aŋgro naŋgi endegsi minjrej, “Niŋgi bosib qobuŋ endi gogetibqa iga gilsim ya agu taqal beiq di brantqom.” 36 Degsi minjrnaqa naŋgi qobuŋ gogetonabqa koba na tamo uŋgasari kalil uratnjrsibqa qobuŋ na gileqnabqa tamo qudei naŋgi dego naŋgo qobuŋ segi segi osib Yesus dauryosib gileb. 37 Yesus aqa aŋgro naŋgi ti qobuŋ na gileqnabqa jagwa tulaŋ koba tigelosiq ya korkortosiqa qobuŋ qaloqnsiqa mormaŋ miligiq ainaqa ya maqej. 38 Yesus a nami qobuŋ bunuq dia gate kuluŋ atsiqa ŋeisiq qambumtej. Deqa aqa aŋgro naŋgi tulaŋ ulaugetosib aqa areq bosib dudumyosib minjeb, “O Tamo Koba, iga padalqa laqnum. Ni deqa are qalosai kio?” 39 Onaqa Yesus a tigelosiqa jagwa ti ya ti siŋgila na minjrej, “Niŋgi laoiye.” Onaqa jagwa laej. Ya dego maninej. 40 Onaqa Yesus a na aqa aŋgro naŋgi endegsi minjrej, “Niŋgi kiyaqa ulaonub? Niŋgi e qa yala poiŋgosai. Deqa niŋgi ulaonub.” 41 Onaqa Yesus aqa aŋgro naŋgi aqa siŋgila di unsibqa naŋgi olo tulaŋ koba ulaugetosib segi segi maroqneb, “Yesus a tamo kiero deqa jagwa ti ya ti minjrqoqa aqa anjam qusib laonub? Yqoqa qobuŋ a bole urur ti gilqo.”

Copyright information for `BOJ