Mark 7

Qotei aqa dal anjam a na moma naŋgo dal anjam tulaŋ buŋyejunu

Onaqa bati deqa Farisi naŋgi ti dal anjam qalie tamo naŋgi ti Jerusalem dena bosibqa Yesus aqa areq di koroeb. Koroosib ŋam ateb Yesus aqa aŋgro qudei naŋgi iŋgi uyqa osib mati baŋ yansosaisosib laŋa uyeqnab unjreb. Bati gaigai Farisi naŋgi iŋgi uyqa oqnsib mati baŋ yanseqnub. Naŋgi baŋ yansqasai di naŋgi mati iŋgi uyqasai. Juda tamo kalil naŋgi kumbra degyeqnub. Di naŋgo moma naŋgo kumbra dauryeqnub. Naŋgi maket dena boqnsibqa naŋgi iŋgi uyqa oqnsib mati naŋgo jejamu geregere yanseqnub. Naŋgi naŋgo jejamu yansqasai di naŋgi mati iŋgi uyqasai. Naŋgi kumbra deqaji gargekoba yeqnub. Naŋgo ya gambaŋ, ya nobu, web dego mati geregere yanseleŋoqnsib iŋgi uyeqnub. Kumbra di naŋgo moma naŋgoq dena eleŋosib dauryeqnub. Deqa bati di Farisi naŋgi ti dal anjam qalie tamo naŋgi ti Yesus nenemyeb, “Ino aŋgro naŋgi kiyaqa gago moma naŋgo dal anjam gotraŋyeqnub? Agi naŋgi iŋgi uyqa oqnsib mati baŋ yansosaisosib laŋa uyeqnub.” Onaqa Yesus na kamba minjrej, “Niŋgi gisaŋ tamo. Babaŋ na niŋgi tamo bole. Ariya nuŋgo are miligi uge. Agi Qotei aqa medabu o qaji tamo Aisaia a nami niŋgi qa anjam endegsi neŋgreŋyej unu, ‘Tamo naŋgi di naŋgo medabu na ijo ñam soqteqnub. Ariya naŋgo are miligi e qa sosai. Naŋgi laŋa babaŋ na e qa loueqnub. Naŋgi naŋgo segi anjam palontoqnsib olo beltoqnsib gisaŋosib mareqnub, “Gago anjam endi Qotei aqa anjam.” ’ Aisaia a niŋgi qa keretsiqa anjam degsi neŋgreŋyej. Aqa anjam di bole. Agi niŋgi kumbra degyeqnub. Niŋgi Qotei aqa dal anjam gotraŋyoqnsibqa olo mandam tamo naŋgo dal anjam dauryqajqa tulaŋ siŋgilaeqnub.”

Yesus a na Farisi naŋgi anjam degsi minjrsiqa olo minjrej, “Niŋgi Qotei aqa dal anjam gotraŋyoqnsibqa olo nuŋgo segi kumbra dauryeqnub. 10 Moses a nami marej, ‘Ni ino ai wo abu wo naŋgo sorgomq di geregere sosimqa naŋgo anjam dauryoqne. Tamo bei na aqa ai wo abu wo naŋgi misiliŋnjrimqa a qalib moiem.’ Moses a nami degsi marej. 11 Ariya niŋgi mareqnub, ‘Tamo bei aqa ai kio aqa abu kio iŋgi qa truquamqa a na minjqas, “Ijo iŋgi iŋgi ejunum endi e ni emqa kere. Eo. E ni emqasai. E nami Qotei atraiyqa giltem deqa e ni aqaryaimqasai.” ’ 12 A degsi minjqas di niŋgi marqab, ‘A keretqo. A na aqa ai wo abu wo naŋgi aqaryainjraiq.’ Niŋgi degsib marqab. 13 Nuŋgo kumbra dena niŋgi Qotei aqa anjam gotraŋyoqnsibqa nuŋgo segi moma naŋgo kumbra dauryeqnub. Niŋgi kumbra deqaji gargekoba yeqnub.”

Iŋgi bei kie na tamo jiga yqas? Yesus a anjam deqa marej

14 Yesus a na Farisi naŋgi anjam degsi minjrsiqa olo tamo uŋgasari kalil naŋgi metnjrnaqa aqa areq bonabqa minjrej, “Niŋgi kalil ijo anjam endi geregere qusib poiŋgem. 15 Tamo bei a iŋgi uyimqa aqa miligiq aiqas dena tamo jiga yqasai. Iŋgi iŋgi kalil tamo aqa miligiq na oqoqnsiq branteqnu qaji dena tamo jiga yeqnu. 16 Tamo a dabkala ti sqas di a ijo anjam endi geregere quem.”

17 Yesus a na tamo uŋgasari naŋgi anjam degsi minjrsiq koboonaqa a naŋgi uratnjrsiqa tal miligiq gilej. A tal miligiq gilsiq di sonaqa aqa aŋgro naŋgi bosib aqa yawo anjam di aqa utru qa nenemyeb. 18 Nenemyonabqa minjrej, “Niŋgi dego ijo yawo anjam di aqa utru poiŋgosaiunu e? Tamo naŋgi iŋgi uyeqnabqa aisiq meneq di unu. Meneq dena bi talq di waiyeqnub. Dena tamo jiga yqa keresai. Di kiyaqa? Iŋgi di tamo aqa are miligiq aiosai. Aqa bi aniq aiqo koboqo. Deqa Qotei aqa ŋamdamuq di iŋgi uyo kalil jiga saiqoji.” 20 Osiqa minjrej, “Iŋgi iŋgi kalil tamo naŋgo are miligiq na oqoqnsiq branteqnu qaji dena tamo jiga yeqnu. 21 Iŋgi iŋgi tamo naŋgo are miligiq na branteqnu qaji agi ubtsiy merŋgwai. Areqalo uge uge, uŋa qa laoqa, bajiŋoqa, tamo qaloqa, 22 was aqa ŋauŋ anjamyoqa, was bei aqa ñoro qa maulyoqa, kumbra uge uge yoqa, gisaŋoqa, laŋa laŋa laoqa, was bei qa ugeoqa, was yomuiyoqa, naŋgo segi ñam soqtoqa, nanari kumbra yoqa. 23 Kumbra uge uge deqaji tamo naŋgo are miligiq na brantoqnsiq dena tamo jiga yeqnu.”

Fonisia qaji uŋa a Yesus qa aqa areqalo siŋgilatej

24 Onaqa Yesus a sawa di uratosiqa walwelosiq Tair qure naŋgo sawaq gilej. Tamo naŋgi a qa qalieaib deqa a uliosiq gilej. Gilsiq tal bei gogetosiq sosiqa a talq dia uliesqa keresaiiyej. Di kiyaqa? Tamo qudei naŋgi a uneb deqa. Unsibqa mareb, “Yesus a gago sawaq bqo. A talq di unu.” 25 Degsib marnabqa uŋa bei a qusiqa aqa aŋgro sebiŋ a mondor uge ti soqnej deqa a Yesus aqa talq giloqujatosiqa aqa areq di siŋga pulutej. 26 Uŋa di a Grik qaji. A Juda uŋa sai. A Siria sawaq dia ŋambabej. A Finisia qure qaji. A na Yesus waiŋyoqnsiqa minjoqnej, “Ni na mondor uge di wiyimqa a na ijo aŋgro uratosim ulaŋqas.” 27 Onaqa Yesus a uŋa di aqa anjam qusiqa yawo anjam bei endegsi minjej, “Iga aŋgro du du naŋgi mati iŋgi anainjrim uyib menetnjrimqa di bauŋ naŋgi iŋgi uyqab. Iga aŋgro du du naŋgo iŋgi yainjrsim olo bauŋ naŋgi anainjrqom di kumbra bolesai.”

28 Onaqa uŋa dena olo Yesus minjej, “O Tamo Koba, ni kere maronum. Ariya e kamba anjam bei mermit ni que. Aŋgro du du naŋgi iŋgi uyeqnabqa iŋgi ñeŋgi ululoŋeqnaqa bauŋ naŋgi dego uyeqnub.”

29 Onaqa Yesus na minjej, “O uŋa, ni kere maronum. Ni degsi maronum deqa ni gilime. Mondor uge na ino aŋgro uratosiq ulaŋqo.” 30 Degsi minjnaqa a aqa talq gilsiqa ŋam atej mondor uge na nami aqa aŋgro uratonaqa a bijalq di ŋeiesonaq unej.

Tamo bei dabkala geteŋo meŋ siŋgilaej qaji di Yesus na boletej

31 Onaqa Yesus a Tair qure naŋgo sawa uratosiqa Saidon qure ambleq na walwelosiqa Dekapolis sawaq gilsiqa Galili ya aguq di brantej. 32 Di brantosiq sonaqa tamo qudei naŋgi na tamo bei dabkala geteŋo meŋ siŋgilaej qaji a osi bosibqa Yesus pailyosib minjeb, “O Tamo Koba, ni na ino baŋ aqa gateq di atimqa a boleqas.” 33 Onaqa Yesus na tamo di osiqa tamo uŋgasari naŋgi uratnjrsiq a segi sosiqa aqa baŋ gei aiyel tamo di aqa dabkalaq jigej. Jigsiqa aqa segi maul osiqa tamo di aqa meŋ toŋyetej. 34 Osiqa laŋ tarosiqa are tulaŋ gulubekobaiyonaqa jagwa titsiqa marej, “Efata.” Di Hibru anjam. Anjam di aqa damu, “Dabkala waqeme.” 35 A degsi marnaqa tamo di aqa dabkala waqej. Aqa meŋ dego boleej. Onaqa a anjam bole maroqnej. 36 Onaqa Yesus a na tamo uŋgasari naŋgi endegsi minjrej, “Niŋgi kumbra unonub endi tamo qudei naŋgi ubtsib minjraib.” Degsi minjrnaqa naŋgi aqa anjam di quetosai. Naŋgi giloqnsibqa Yesus aqa kumbra deqa mare mare laqneb. 37 Mare mare laqnabqa tamo gargekoba quoqnsibqa naŋgi tulaŋ prugeleŋoqnsib maroqneb, “Kumbra kalil Yesus a yeqnu qaji di a geregere yeqnu. Agi a na tamo dabkala geteŋnjro qaji naŋgi boletnjreqnaqa naŋgo dabkala olo waqeqnaqa naŋgi anjam queqnub. Tamo meŋ siŋgilainjro qaji naŋgi dego gereinjreqnaqa naŋgi anjam bole mareqnub.”

Copyright information for `BOJ