Matthew 11

Jon yansnjro qaji a na aqa aŋgro qudei naŋgi qariŋnjrnaq Yesus aqa areq gileb

Yesus a na aqa aŋgro 12-pela naŋgi anjam degsi minjrsiq koboonaqa a sawa di uratosiqa qure qureq giloqnsiqa tamo uŋgasari naŋgi Qotei aqa anjam plaltosiq minjroqnej.

Bati deqa Jon yansnjro qaji a tonto talq di soqnej. Sonaqa wau kalil Kristus na yoqnej qaji di tamo qudei naŋgi na unsib deqa mare mare laqnab Jon a qusiqa aqa aŋgro qudei naŋgi qariŋnjrnaq Yesus aqa areq gilsib nenemyeb, “Kristus agi Qotei na nami qariŋyim bqajqa marej qaji di ni kio? Ni saiamqa iga tamo bei qa tariŋqom kio?”

Onaqa Yesus na kamba minjrej, “Anjam nuŋgo dabkala na queqnub qaji ti kumbra nuŋgo ŋamdamu na uneqnub qaji ti deqa aisib Jon geregere saiyosib minjiye. Endegsib minjiye, ‘Tamo ŋam qandimnjro qaji naŋgi olo ŋam poinjreqnaq sawa uneqnub. Tamo jejamu lainjro qaji naŋgi olo walweleqnub. Tamo naŋgo jejamu yu na ugeeleŋo qaji naŋgo yu kalil koboeqnu. Tamo dabkala geteŋnjro qaji naŋgi olo poinjreqnaqa anjam queqnub. Tamo moreŋo qaji naŋgi olo tigeleqnub. Tamo iŋgi iŋgi saiqoji unub qaji naŋgi Qotei aqa anjam bole queqnub.’ Niŋgi aisib Jon degsib saiyosib minjiye. Ariya niŋgi quiye. Tamo naŋgi e nubsib e qa naŋgo areqalo siŋgilatosib olo ijo ñam ulontosaieqnub qaji naŋgi tulaŋ areboleboleinjrim sqab.”

Onaqa Jon aqa aŋgro naŋgi Yesus aqa anjam di qusibqa naŋgi olo puluosib Jon minjqajqa aieqnabqa Yesus a na tamo uŋgasari gargekoba naŋgi di Jon qa endegsi minjrej, “Niŋgi nami wadau sawaq gilsibqa niŋgi tamo kiero unqajqa gileb? Niŋgi tamo silai aqa baŋga bul jagwa na pileteqnaqa di unqajqa gileb kio? Sai. Jon a tamo deqaji sai. Deqa niŋgi tamo kiero unqajqa wadau sawaq gileb? Niŋgi tamo gara bole walaosi laqnu qaji di unqajqa gileb kio? Di dego sai. Tamo gara bole walaeqnub qaji naŋgi mandor kokba naŋgo talq di unub. Deqa niŋgi kiyaqa wadau sawaq gileb? Niŋgi Qotei aqa medabu o qaji tamo bei unqajqa gileb kio? Od. Agide. Niŋgi deqa unqa gileb. Deqa e niŋgi endegsi merŋgwai. Jon a Qotei aqa medabu o qaji tamo kobaquja. A na Qotei aqa medabu o qaji tamo kalil naŋgi tulaŋ buŋnjrejunu. 10 Agi nami e mandamq aiosaisonamqa Qotei a Jon qa endegsi merbej, ‘Ni que. E na tamo bei ijo anjam marqajqa qariŋyitqa a ni qa namoosim ino gam gereiyetmqas.’ Tamo di agi Jon. Anjam di agi Qotei aqa neŋgreŋq di unu. 11 Deqa niŋgi quiye. E bole merŋgwai. Jon yansnjro qaji a na tamo kalil mandamq endi unub qaji naŋgi tulaŋ buŋnjrejunu. Ariya tamo qudei ñam saiqoji unub qaji naŋgi Qotei na taqatnjroqnsiqa a naŋgo Mandor Koba unu. Deqa tamo naŋgi di Jon tulaŋ buŋyejunub.

12 “Jon yansnjro qaji a anjam marqajqa bati brantej dena bosi bosiq agi bini tamo naŋgi waukobaoqnsib tulaŋ siŋgilaeqnub. Agi naŋgi Qotei na taqatnjrsim naŋgo Mandor Koba sqa maroqnsib deqa naŋgi siŋgila na qotoqnsib waukobaoqnsib siŋgilaeqnub. 13 Agi nami Qotei aqa dal anjam ti Qotei aqa medabu o qaji tamo naŋgo anjam ti maroqneb dena bosi bosiq Jon aqa bati brantej. 14 Ariya niŋgi ijo anjam endi quqwa are soqnimqa quiye. Qotei a nami marej, ‘E na Elaija qariŋyit bosim ijo medabu osim anjam maroqnqas.’ Anjam di agi Qotei aqa neŋgreŋq di unu. Ariya niŋgi quiye. Elaija agi bej. E Jon qa marqa osimqa Elaija aqa ñam na yawo anjam mareqnum. 15 Tamo a dabkala ti sqas di a ijo anjam endi geregere quem.

16 “Tamo uŋgasari bini bati endeqa unub qaji naŋgo kumbra qa e yawo anjam kiersiy marqai? Naŋgi tamo kiero? E naŋgi qa endegsi marqai. Naŋgi aŋgro du du bul qure ambleq dia alaŋoqnsib aŋgro qudei na qudei minjreqnub, 17 ‘Iga yumba anjamonumqa niŋgi lou tuosai. Iga are uge qa louonumqa niŋgi akamosai.’” 18 Osiqa Yesus a olo anjam endegsi minjrej, “Jon a bosiqa iŋgi ti wain ti uratosiq sonaqa tamo naŋgi a qa maroqneb, ‘A mondor uge ti.’ 19 Ariya e Tamo Aŋgro bosimqa iŋgi ti wain ti uyeqnamqa tamo naŋgi e nuboqnsib mareqnub, ‘Niŋgi uniye. Yesus a qunjaŋ ani. A wain uyo ani. A takis o qaji tamo ti une tamo ti naŋgi koba na walweleqnub.’ Tamo naŋgi e qa misiliŋ anjam degsib mareqnub. Ariya niŋgi Qotei aqa wau unqab di niŋgi poiŋgwas, Qotei a qalie bole.”

Yesus a na tamo uŋgasari are bulyosai qaji naŋgi ŋiriŋtnjrej

20 Yesus a qure qudeiq di maŋwa gargekoba yeleŋoqnej. Ariya naŋgi are bulyosai. Deqa a qure deqaji tamo uŋgasari naŋgi qa ŋiriŋej. 21 Osiqa minjrej, “O tamo uŋgasari Korasin qure ti Betsaida qure ti di unub qaji, niŋgi tulaŋ padalougetqab. Tamo bei a Tair qure ti Saidon qure ti deq gilsiq maŋwa e nuŋgoq di yoqnem qaji di naŋgoq di yo qamu naŋgi nami are bulyosib naŋgo une qa are ugeinjrnaq are uge qa gara jigsib ŋam sumq di awoeb qamu. 22 Deqa e niŋgi endegsi merŋgwai. Mondoŋ Qotei na tamo uŋgasari naŋgo une qa peginjrqa batiamqa a na niŋgi tulaŋ padaltŋgougetqas. Ariya Qotei na Tair qure ti Saidon qure ti naŋgi degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa. 23 O Kaperneam tamo uŋgasari, niŋgi laŋ qureq oqwa kere e? Keresai. Niŋgi moio qureq aiqab. Tamo bei a Sodom qureq gilsiq maŋwa e nuŋgoq di yoqnem qaji di Sodom qure naŋgoq di yo qamu naŋgi nami are bulyosib bini unub qamu. Naŋgi padalosai qamu. 24 Deqa e niŋgi endegsi merŋgwai. Mondoŋ Qotei na tamo uŋgasari naŋgo une qa peginjrqa batiamqa a na niŋgi tulaŋ padaltŋgougetqas. Ariya Qotei na Sodom qure naŋgi degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa.”

Niŋgi Yesus aqa areq babqa a na niŋgi aqaryaiŋgimqa niŋgi aqaratqab

25 Bati deqa Yesus a endegsi Qotei pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Di kiyaqa? Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu. 26 Od, Abu, ni ino segi areqalo dauryosim agi degyeqnum.” 27 Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qa qaliesai dego. E segi ijo Abu qa qalie. Ariya e na tamo qudei naŋgi ijo Abu osornjreqnum. Naŋgi dego ijo Abu qa qalie.

28 “Niŋgi gulube qoboiyoqnsib waukobaeqnub qaji niŋgi kalil ijoq babqa e na aqaryaiŋgitqa niŋgi aqaratqab. 29 Niŋgi e qa geregere qalieosib ijo anjam aqa sorgomq di soqniye. Di kiyaqa? E na tamo naŋgi lawo kumbra enjroqnsim ijo segi ñam aguq ateqnum. Deqa niŋgi e qa qalieabqa iŋgi bei na niŋgi gulube eŋgwasai. Niŋgi aqaratqab. 30 E na niŋgi are otetŋgeqnum deqa niŋgi are gulube saiqoji unub. Wau e na niŋgi eŋgeqnum qaji di gulube sai. Di oto.”

Copyright information for `BOJ