Matthew 14

Herot a are qalej, “Yesus a Jon yansnjro qaji agi moisiq olo subq na tigelqo.”

1Bati deqa tamo uŋgasari naŋgi Yesus aqa kumbra qa saosib laqnabqa Mandor Koba Herot a quej. 2Qusiqa aqa wau tamo naŋgi minjrej, “Tamo di Jon yansnjro qaji tamo de kio? A moisiq olo subq na tigelqo. Dena a siŋgila osiqa maŋwa endeqaji babteleŋeqnu.”

3Herot a na nami aqa aube Filip aqa ŋauqali Herodias yaiysiq ej. Deqa Jon na Herot minjoqnej, “Ni ino segi was aqa uŋa em di kumbra bolesai. Ni kumbra ugetonum.” Jon a na Herot degsi minjoqnej. Deqa Herot a Jon qa minjiŋ oqetonaqa aqa qaja tamo qudei naŋgi qariŋnjrnaqa gilsib Jon ojsib sil na qosisib tonto talq waiyeb. 5Jon a tonto talq di sonaqa Herot a endegsi are qaloqnej, “E na Jon qalit moiqas.” Ariya tamo uŋgasari kalil naŋgi maroqneb, “Jon a tamo bole. A Qotei aqa medabu o qaji tamo.” Naŋgi degsib maroqneb deqa Herot a naŋgi ulainjrsiq Jon qalqa uratej.

6Ariya bati bei Herot aqa ŋambabo bationaqa Herot na maruro atsiqa tamo qudei naŋgi metnjrnaqa bosib aqa talq di koroeb. Koroosib iŋgi uyeqnabqa Herot aqa ŋauqali aqa asi a warum miligiq bosiqa naŋgi lou tuetnjroqnej. Onaqa Herot a di unsiqa tulaŋ areboleboleiyej. 7Deqa a na aŋgro sebiŋ di minjej, “Ni ijo iŋgi kie oqajqa merbqam emqai.” Osiqa aqa anjam di siŋgilatosiqa olo minjej, “Ijo anjam di e bole dauryqai. E uratqasai bolesai.” 8Onaqa aŋgro sebiŋ aqa aniqali na minjej, “Ni Jon aqa gate qa Herot minje.” Onaqa aqa asi na Herot minjej, “Ni Jon yansnjro qaji aqa gate tabirq di atsim ebe.”

9Onaqa Herot a aŋgro sebiŋ aqa anjam di qusiqa a Jon qalim moiqajqa are sosai deqa a are tulaŋ gulubekobaiyej. Aqa segi anjam tamo kalil naŋgo ulatamuq dia marsiq siŋgilatej qaji deqa ti are qalsiq are gulubekobaiyej. Aqa anjam di olo beltosim anjam bei marqas di a jemaiyqas. 10Deqa a na aqa qaja tamo naŋgi qariŋnjrnaqa gilsib tonto talq dia Jon aqa kakoro genteteb. 11Osib aqa gate tabirq di atsibqa osi bosib aŋgro sebiŋ di yonabqa a na osi gilsiqa aqa aniqali yej. 12Onaqa Jon aqa aŋgro naŋgi di qusibqa bosib Jon aqa qusa osi gilsib subq ateb. Osib Yesus aqa areq gilsib minjeb, “Herot na Jon qalqo moiqo.”

Yesus a na tamo 5,000 naŋgi iŋgi anainjrej

13Onaqa Yesus a anjam di qusiqa a sawa di uratosiq qobuŋ bei gogetosiqa wadau sawaq gilej. Aqa aŋgro naŋgi ti gileb. A gileqnaqa tamo uŋgasari kalil naŋgi di qusibqa naŋgo segi qure qureq dena tigelosibqa siŋga na gurgurosib Yesus ŋamqajqa gileb. 14Deqa Yesus a qobuŋ na gilsiq tiryosiqa ŋam atej tamo uŋgasari tulaŋ gargekoba nami tiryqa sawaq dia tariŋesonab unjrej. Unjrsiqa naŋgi qa are ugeiyej. Deqa a naŋgo areq aisiqa naŋgo ma tamo kalil boletnjroqnej.

15Ariya bilaq Yesus aqa aŋgro naŋgi aqa areq bosib minjeb, “O Tamo Koba, endi wadau sawa. Seŋ aieqnu. Qoloqas. Deqa ni na tamo uŋgasari naŋgi minjrimqa mati qure qureq gilsib di iŋgi awaiysib uyqab.” 16Onaqa Yesus na minjrej, “Naŋgi kiyaqa qure qureq gilqab? Niŋgi segi na iŋgi anainjriye.” 17Degsi minjrnaqa naŋgi na kamba minjeb, “Iga iŋgi sai. Iga bem 5-pela qe aiyela segi unu.” 18Onaqa Yesus na minjrej, “Bem ti qe ti di ijoq osi boiye.”

19Onaqa naŋgi na bem ti qe ti di osi bosib Yesus yonabqa a na tamo uŋgasari kalil naŋgi minjrej, “Niŋgi kalil ñiŋq di awoeleŋoiye.” Onaqa naŋgi kalil awoonabqa Yesus na bem 5-pela ti qe aiyel ti di osiqa laŋ goge tarosiq Qotei pailyej. Pailyo koboonaqa bem ti qe ti giŋgeŋyosiqa aqa aŋgro naŋgi enjrnaqa naŋgi na osi giloqnsibqa tamo uŋgasari naŋgi jeisib enjreqnab uyoqneb. 20Uynab kalil menetnjrej. Onaqa iŋgi oto urateleŋeb qaji di Yesus aqa aŋgro naŋgi na koroiyosib gumba kokba 12-pelaq di jignab maqeleŋej. 21Tamo kalil bem ti qe ti uyeb qaji naŋgi sisiyeb 5,000. Ariya uŋgasari ti aŋgro du du ti naŋgi sisiyosai.

Yesus a ya baŋgaq na walwelej

22Onaqa Yesus na aqa aŋgro naŋgi endegsi minjrej, “Niŋgi qobuŋ gogetosib namoosib gilsib ya agu taqal beiq di tiryosib soqniye. E na tamo uŋgasari naŋgi minjritqa naŋgo qure qureq jaraioqnib bqai.” 23Onaqa Yesus aqa aŋgro naŋgi namoosib gileqnabqa Yesus na tamo uŋgasari naŋgi minjrnaq jaraieqnabqa a segi Qotei pailyqa marsiq manaq oqej. Oqsiq a segi mana goge di sonaqa bilaqtej. 24Onaqa aqa aŋgro naŋgi qobuŋ suweiyosib isaq gilsib ya agu ambleq di gileqnabqa jagwa koba tigelosiqa ya korkortosiqa naŋgi pulutnjrej. 25Nobqolo ambru Yesus a aqa aŋgro naŋgi qa bosiqa ya baŋgaq na walwelosiqa naŋgi daurnjrsiq gilej. 26Onaqa naŋgi ŋam ateb Yesus a ya baŋgaq na walwelosiq naŋgo areq beqnaqa unsib mareb, “Di buga beqnu.” Osib naŋgi tulaŋ ulaugetosib leleŋkobayeb. 27Onaqa Yesus na minjrej, “Nuŋgo are siŋgilatiye. Endi e beqnum. Ulaaib.”

28Onaqa Pita na minjej, “O Tamo Koba, ni kio beqnum? Ni amqa e odbimqa e kamba ya baŋgaq na walwelosiy ino areq bqai.” 29Onaqa Yesus na Pita minjej, “Od. Endi e. Ni au.” Degsi minjnaqa Pita a qobuŋ uratosiqa ya baŋgaq na walwelosi gilsiq Yesus jojomyej. 30Yesus jojomyosiqa ŋam atej jagwa unej. Unsiq ulaej. Ulaosiq deqa tuqoqnsiq maosiq Yesus minjej, “O Tamo Koba, e tuqeqnum. Deqa ni na aqaryaibe.”

31Onaqa Yesus na aqa baŋ waiysiq Pita ojsiq soqtej. Osiqa minjej, “Kiyaqa ni areqalo aiyeltonum? Ni e qa ino areqalo siŋgilatqa yonum keresaiimqo deqa ni tuqonum.” 32Degsi minjsiqa naŋgi aiyel qobuŋ gogetonabqa jagwa laej. 33Onaqa tamo qobuŋq di soqneb qaji naŋgi Yesus aqa siŋgila di unsibqa naŋgi aqa ŋam soqtosib minjeb, “Bole, ni Qotei aqa Ŋiri.”

Genesaret sawaq dia tamo uŋgasari naŋgi Yesus aqa gara mutu ojeqnab naŋgo ma saieleŋoqnej

34Ariya Yesus aqa aŋgro naŋgi koba na qobuŋ na gilsib ya agu taqal beiq di brantosib Genesaret sawaq di tiryeb. 35Tiryonabqa qure deqaji tamo uŋgasari naŋgi Yesus unsibqa aqa ulatamu poinjrnaqa anjam qariŋyonab qure qure kalil jojomq di soqneb qaji dia tamo uŋgasari naŋgi quoqnsib naŋgo ma tamo naŋgi joqsib Yesus aqa areq osi beleŋoqneb. 36Beleŋoqnsib Yesus minjoqneb, “O Tamo Koba, naŋgi ino gara mutu segi ojibqa naŋgo ma saioqnqas.” Onaqa Yesus na odnjrnaqa ma tamo kalil naŋgi aqa areq boqnsib aqa gara mutu ojoqneb. Ojeqnab naŋgo ma kalil saieleŋoqnej.

Copyright information for `BOJ