Matthew 18

Niŋgi aŋgro kiñala bulyibqa Qotei na niŋgi osim taqatŋgwas

Bati deqa Yesus aqa aŋgro naŋgi aqa areq bosib nenemyeb, “O Tamo Koba, mondoŋ Qotei na aqa segi tamo uŋgasari naŋgi taqatnjrsim naŋgo Mandor Koba soqnimqa bati deqa tamo yai a segi qujai tamo kalil buŋnjrsimqa tamo ñam ti tigelqas?”

Onaqa Yesus a aŋgro kiñala bei metonaq aqa areq bonaqa naŋgo ambleq di tigeltosiqa osornjrej. Osornjrsiqa minjrej, “Niŋgi quiye. E bole merŋgwai. Niŋgi are bulyosib aŋgro kiñala endego bulqasai di Qotei a niŋgi osim taqatŋgwasai. Deqa a nuŋgo Mandor Koba sqasai dego. Tamo bei na aqa segi ñam aguq atsim aŋgro kiñala endego bulqas di mondoŋ Qotei laŋ qureq di unu qaji a na tamo di aqa ñam olo soqtetimqa a na tamo kalil naŋgi buŋnjrsim tamo ñam ti tigelqas.

“Tamo bei a e qa are qalsimqa aŋgro kiñala endego bei osim geregereiyqas di a e dego osim geregereibqas.”

Niŋgi une torei uratiye

Osiqa Yesus a olo anjam endegsi minjrej, “Tamo bei na ijo aŋgro kiñala endego bei e qa aqa areqalo siŋgilatqo qaji di osim uneq waiyqas di uge. Tamo qudei naŋgi na tamo di ojsib meniŋ kobaquja osib sil na aqa kakoroq di tontosib waiyib ya robuq aisim moiqas di kere.

“Mandamq endia tamo qudei naŋgi na tamo qudei naŋgi kumbra ugeq breinjreqnub. Bole, kumbra di gaigai brantoqnqas. Ariya tamo naŋgi kumbra di yeqnub qaji naŋgi tulaŋ padalougetqab. Ino baŋ na kio ino siŋga na kio ni titmosim uneq waimqa laqnimqa di gentosim waiy. Ni baŋ geŋo sosimqa ino baŋ na une bei yqasai di kere. Ni siŋga geŋo sosimqa ino siŋga na une bei yqasai di kere. Di ni ŋambile gaigai sqam. Ariya ni baŋ aiyel ti sosimqa ino baŋ na une yqam di keresai. Di Qotei na ni ŋamyuoq waimqas. Ni siŋga aiyel ti sosimqa ino siŋga na une yqam di dego keresai. Di Qotei na ni ŋamyuoq waimqas. Ŋamyuo di gaigai yuoqnsim sqas. Ino ŋamdamu na ni titmosim uneq waimqa laqnimqa ŋamdamu di otorosim waiy. Ni ŋamdamu qujai ti sosimqa ino ŋamdamu na une bei yqasai di kere. Di ni ŋambile gaigai sqam. Ariya ni ŋamdamu aiyel ti sosimqa ino ŋamdamu na une yqam di keresai. Di Qotei na ni ŋamyuoq waimqas.

10 “Deqa niŋgi aŋgro kiñilala e qa naŋgo areqalo siŋgilateqnub qaji naŋgi qa ugeaib. E niŋgi endegsi merŋgwai. Naŋgo laŋ aŋgro naŋgi na naŋgi taqatnjroqnsibqa ijo Abu laŋ qureq di unu qaji aqa ulatamu bati gaigai unoqnsib naŋgi qa pailyeqnub. 11 E segi Tamo Aŋgro. E na tamo uŋgasari padalejunub qaji naŋgi oqajqa deqa marsim mandamq aiem.

Kaja du alelqo qaji aqa yawo anjam

12 “Niŋgi kiersib are qalonub? Tamo bei aqa kaja du du 100 unub. Ariya qujai bei alelamqa a kierqas? E merŋgwai. A na kaja du du 99 naŋgi manaq dia uratnjrsimqa qujai alelqo qaji di ŋamosim gilsim itqas. 13 Niŋgi quiye. E bole merŋgwai. A na kaja du qujai di itosim tulaŋ areboleboleiyqas. Kaja du du 99 alelosai qaji naŋgi qa tulaŋ areboleboleiyqasai. Ariya qujai alelqo qaji a qa tulaŋ areboleboleiyqas. 14 Dego kere aŋgro kiñala endego bei a padalqas di nuŋgo Abu laŋ qureq di unu qaji a deqa areboleboleiyqasai. A are ugeiyqas.”

Niŋgi nuŋgo was aqa une olo gereiyiye

15 Osiqa Yesus a olo anjam endegsi minjrej, “Ino was bei na ni une bei emimqa niŋgi segi aiyel ombla awoosib aqa une ni emqo qaji di minje. Minjimqa a ino anjam qusim are bulyqas di ni na ino was olo onum. 16 Ariya a ino anjam quetmosaiamqa ni tamo qujai kio tamo aiyel kio joqsim gilimqa naŋgi na ni taqmosib ino was aqa une di olo minjqab. 17 Ariya a naŋgo anjam dego quetnjrosaiamqa ni na Yesus aqa tamo uŋgasari kalil naŋgi metnjrim koroosib ni taqmosib ino was aqa une di olo minjqab. Ariya a naŋgo anjam dego quetnjrosaiamqa ni na a qoreiye. Une tamo ti takis o qaji tamo ti naŋgi qoreinjreqnub dego kere ni na ino was di qoreiye.

18 “Niŋgi quiye. E bole merŋgwai. Niŋgi mandamq endia tamo uŋgasari naŋgi getentnjrqab di Qotei a dego laŋ qureq dia naŋgi getentnjrqas. Ariya niŋgi mandamq endia tamo uŋgasari naŋgi gam waqtetnjrqab di Qotei a dego laŋ qureq dia naŋgi gam waqtetnjrqas.

19 “Niŋgi quiye. E bole merŋgwai. Mandamq endia nuŋgo ambleq di tamo aiyel naŋgi iŋgi bei oqa marsibqa naŋgi ombla na areqalo qujaitosib ijo Abu laŋ qureq di unu qaji a pailyqab di a na naŋgi iŋgi di enjrqas. 20 Tamo aiyel kio tamo qalub kio ijo ñam qa are qalsib koroqab di e naŋgo ambleq di sqai.”

Nuŋgo was aqa une kobotqajqa yawo anjam

21 Onaqa bati deqa Pita a Yesus aqa areq bosiq nenemyej, “O Tamo Koba, ijo was bei na e une gombub ebimqa e aqa une di moiotqai? A na une 7-pela ebimqa aqa une di moiotqai. Ariya olo une bei ebimqa e aqa une di moiotqasai. Degyqai kio?”

22 Onaqa Yesus na kamba minjej, “Ino was bei na ni une 7-pela emimqa aqa une di segi moiotqam di keresai. A na une gargekoba emoqnsim soqnimqa ni aqa une kalil di moiotoqne. A ni une 7-pela emoqnim une di moiotoqne. Olo une 7-pela emoqnim moiotoqne. Degsim giloqnem.

23 “Niŋgi quiye. Qotei a tamo uŋgasari naŋgo Mandor Koba sosiq naŋgi taqatnjreqnu. Qotei aqa kumbra di mandor koba bei aqa kaŋgal tamo qudei naŋgi na silali nami yaiyeb qaji di kamba olo yqajqa minjrej dego kere. 24 Aqa kaŋgal tamo bei nami 10 milion kina yaiyej qaji di naŋgi na osib aqa ulatamuq dia tigelteb. 25 Tigeltonabqa a na silali di kamba olo yqajqa keresaiiyej. Deqa mandor koba a na minjej, ‘Ni silali di kamba olo ebqa keresaiimqo deqa e ni ti ino ŋauŋ ti ino aŋgro naŋgi ti osiy tamo bei aqa baŋq di uratŋgitqa tamo dena silali ebimqa niŋgi a laŋa wauetoqnqab. Ino iŋgi iŋgi kalil dego e ni yaimosiy tamo qudei naŋgi enjritqa naŋgi na kamba silali ebqab. Gam dena ni silali nami yaibem qaji di kobotqam.’ 26 Degsi minjnaq qusiqa aqa areq di siŋga pulutosiqa pailyosiq minjej, ‘O Tamo Koba, ni e kumbra degbaim. Ni e qa are ugeimimqa mati e qa tariŋoqnime. E silali nami yaimem qaji di kalil itosiy e kamba emekritqai.’ 27 Onaqa a aqa kaŋgal tamo aqa anjam di qusiqa a qa are ugeiyej. Deqa silali kalil nami yaiyej qaji di laŋa kobotetej. Osiqa aqa kaŋgal tamo di uratonaq gilej.

28 “Ariya kaŋgal tamo di a gilsiqa kaŋgal tamo bei ombla wauo qaji a itosiqa ojsiq kakoro apiyetosiq minjej, ‘Ni nami 10 kina yaibem qaji di kamba olo ebe.’

29 “Degsi minjnaq qusiqa aqa areq di siŋga pulutosiqa pailyosiq minjej, ‘Ni e qa are ugeimimqa mati e qa tariŋoqnime. E silali 10 kina nami yaimem qaji di itosiy e kamba emekritqai.’ 30 Degsi minjnaqa a aqa anjam di quetqa uratosiqa a osi gilsiqa tonto talq waiyosiq minjej, ‘Ni tonto talq di soqne. Bunuqna ni silali 10 kina nami yaibem qaji di kamba ebekritimqa di e ni olo uratmit oqedqam.’

31 “A kumbra degyonaqa aqa wau qujai naŋgi unsibqa are ugeinjrnaqa gilsib naŋgo tamo kobaquja deqa saiyosib minjeb. 32 Minjnab qusiqa kaŋgal tamo di metonaq bonaqa minjej, ‘Ni kaŋgal tamo uge. Ni e pailbonumqa silali ni nami yaibem qaji di e na kobotonum. 33 E ni qa are ugeibqoqa silali di kobotonum. Ariya kiyaqa ni olo gilsim ino wau qujai a qa are ugeimosaiqoqa silali a na nami yaimej qaji di ni kobotosai?’ 34 Degsi minjsiqa a qa tulaŋ minjiŋ oqetonaqa osiq qaja tamo naŋgo baŋq di atsiqa minjrej, ‘Niŋgi a wau koba yibqa a jaqatiŋ ti wauosim gilsim gilsim silali kalil nami yaibej qaji di kamba ebekritimqa niŋgi a olo uratib gilqas.’

35 “Dego kere niŋgi nuŋgo was naŋgo une kobotetnjrqasai di ijo Abu laŋ qureq di unu qaji a dego nuŋgo une kobotetŋgwasai.”

Copyright information for `BOJ