Matthew 19

Tamo bei aqa uŋa uratqajqa anjam deqa Yesus a marej

Yesus a anjam degsi marsiq koboonaqa a Galili sawa uratosiqa Judia sawaq gilsiq Jordan ya taqal beiq di soqnej. A di sonaqa tamo uŋgasari tulaŋ gargekoba naŋgi a dauryosib aqa areq di koroonabqa a na naŋgo ma tamo kalil naŋgi boletnjroqnej.

Onaqa Farisi naŋgi olo Yesus aqa areq bosibqa a anjam bei grotimqa qusib naŋgi a ojqajqa deqa laŋa gisaŋyosib endegsib nenemyeb, “Tamo bei aqa ŋauŋ aqa jejamuq di une kiñala bei soqnimqa a na uratqa kere e? Gago dal anjamq di degsi unu e?”

Onaqa Yesus na kamba minjrej, “Qotei aqa anjam bei nami neŋgreŋyeb qaji di niŋgi sisiyosai kio? Anjam endegsi unu, ‘Tulaŋ nami Qotei a mandam ti iŋgi iŋgi kalil ti gereiyosiqa bati deqa a tamo wo uŋa wo dego gereinjrej. Osiqa marej, “Tamo bei na aqa ai wo abu wo naŋgi uratnjrsimqa aqa ŋauqali wo beterosib jejamu qujaitosib sqab.” ’ Qotei a nami degsi marej. Deqa naŋgi olo jejamu aiyel sqasai. Naŋgi jejamu qujai sqab. Qotei na naŋgi aiyel turtnjrqo deqa tamo bei na olo potnjraiq.”

Onaqa Farisi naŋgi na kamba Yesus minjeb, “Ni anjam degsi mergonum deqa Moses a kiyaqa nami dal anjam endegsi marej, ‘Tamo bei na aqa uŋa uratqa osimqa pepa bei neŋgreŋyosim yosim di aqa uŋa uratqas’?”

Onaqa Yesus na kamba minjrej, “Niŋgi Qotei aqa anjam gotraŋyo qaji tamo deqa Moses a niŋgi uŋa uratqa merŋgej. Ariya tulaŋ nami kumbra degsi sosai. E niŋgi endegsi merŋgwai. Tamo bei aqa uŋa tamo bei ombla une atosai. Aqa gumbuluŋ na laŋa uratosiqa a gilsiq olo uŋa bei oqo. Deqa a kumbra uge yqo.”

10 Yesus a Farisi naŋgi anjam degsi minjrnaqa Yesus aqa aŋgro naŋgi anjam di qusib minjeb, “Tamo naŋgi kumbra degsib dauryosib uŋa ti sqab deqa uŋgum. Naŋgi uŋa aib. Naŋgi laŋa soqneb.”

11 Onaqa Yesus na kamba minjrej, “Nuŋgo anjam di tamo kalil naŋgi dauryqa keresai. Tamo qudei Qotei na siŋgila enjrqo qaji naŋgi segi anjam di dauryqa kere. 12 Ariya niŋgi quiye. Tamo qudei naŋgo jejamu bolesai. Naŋgi degsib ai miligiq na ŋambabeb. Deqa naŋgi uŋa oqa keresai. Tamo qudei naŋgi tamo qudei na welum etnjreb deqa naŋgi aŋgrotqa keresai. Deqa naŋgi dego uŋa oqa keresai. Naŋgi laŋa unub. Ariya tamo qudei naŋgi segi Qotei aqa wau ojqa marsibqa uŋa oqa urateqnub. Tamo qudei naŋgi kumbra di dauryqa kere deqa naŋgi kumbra degyeqnub.”

Tamo uŋgasari qudei naŋgi na naŋgo aŋgro du du naŋgi Yesus aqa areq joqsib beb

13 Onaqa tamo uŋgasari qudei naŋgo aŋgro du du naŋgi Yesus na aqa baŋ naŋgo gateq di atetnjrsim naŋgi qa Qotei pailyqajqa marsibqa joqsib Yesus aqa areq beb. Beqnabqa Yesus aqa aŋgro naŋgi na saidnjrsib minjreb, “Nuŋgo aŋgro du du joqsib endeq baib.” 14 Degsib saidnjreb deqa Yesus na aqa aŋgro naŋgi minjrej, “Aŋgro du du naŋgi metnjribqa ijo areq bebe. Naŋgi saidnjraib. Di kiyaqa? Tamo uŋgasari naŋgi aŋgro du du dego bul sqab di Qotei a naŋgo Mandor Koba sosim naŋgi taqatnjrqas.” 15 Yesus a na aqa aŋgro naŋgi anjam degsi minjrsiqa aŋgro du du naŋgo gateq di aqa baŋ atetnjrej. Osiqa sawa di uratosiq gilej.

Ñoro tamo bei a Yesus ombla na anjam mareb

16 Onaqa tamo bei a Yesus aqa areq bosiqa nenemyej, “O Qalie Tamo Koba, e kumbra bole kie dauryosiy dena e ŋambile gaigai sqai?”

17 Onaqa Yesus na kamba minjej, “Ni kiyaqa e kumbra bole qa nenembonum? Qotei a segi qujai tamo bole. Ariya ni que. Ni ŋambile gaigai sqa osimqa ni Qotei aqa dal anjam daurye.”

18 Onaqa tamo dena olo Yesus nenemyej, “E dal anjam kie dauryqai?” Onaqa Yesus na minjej, “Ni dal anjam endeqaji daurye. ‘Ni tamo bei qalsim moiotaim. Ni tamo bei aqa uŋa jejamu ojetaim. Ni bajiŋaim. Ni tamo bei aqa jejamu laŋa gisaŋyaim. 19 Ni ino ai wo abu wo naŋgo sorgomq di geregere sosimqa naŋgo anjam dauryoqne. Ni ino segi jejamu gereiyeqnum dego kere ni ino was naŋgi dego degsim geregereinjroqne.’”

20 Onaqa aŋgro wala dena olo minjej, “E dal anjam di kalil nami dauryosim boqnem agi bini degsi unum. E Qotei aqa kumbra kie keretosaiunum?”

21 Onaqa Yesus na kamba minjej, “Ni Qotei aqa kumbra keretqa osimqa endegye. Ni gilsim ino iŋgi iŋgi kalil qariŋyosim silali osim tamo iŋgi iŋgi saiqoji unub qaji naŋgi jeisi enjre. Degsim enjrsim bosim e daurbe. Osim bunuqna ni laŋ qureq dia awai bole itqam.” 22 Yesus a na tamo di degsi minjnaq qusiqa aqa iŋgi iŋgi kalil qa are tulaŋ gulubeiyej. A iŋgi iŋgi koba ti soqnej deqa ulatamu ugeiyonaqa ulaŋej.

23 Onaqa Yesus na aqa aŋgro naŋgi minjrej, “Niŋgi quiye. E bole merŋgwai. Tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqa marsibqa laŋ qureq oqwajqa baŋgi koba. 24 E niŋgi olo merŋgwai. Kamel a yumba miligiq gilqajqa tulaŋ baŋgi koba. Dego kere tamo uŋgasari iŋgi iŋgi koba ti unub qaji naŋgi Qotei na taqatnjrsim naŋgo Mandor Koba sqa marsibqa laŋ qureq oqwajqa tulaŋ baŋgi koba.”

25 Onaqa Yesus aqa aŋgro naŋgi aqa anjam di qusibqa naŋgi tulaŋ prugeleŋosib minjeb, “Ni anjam degsi mergonum deqa tamo yai naŋgi ŋambile gaigai sqa kere?”

26 Onaqa Yesus a naŋgi koqnjrsiqa minjrej, “Tamo naŋgi segi ŋambile sqa keresai. Ariya Qotei a kumbra kalil yqa kere.”

27 Onaqa Pita na Yesus minjej, “O Tamo Koba, ni une. Iga gago iŋgi iŋgi kalil uratosimqa ni daurmonum. Deqa iga awai kie oqom?”

28 Onaqa Yesus na minjrej, “Niŋgi quiye. E bole merŋgwai. Mondoŋ Qotei a laŋ bunuj ti mandam bunuj ti atimqa bati deqa e Tamo Aŋgro ñam kobaquja osiy ijo segi awo jaram kobaq di awesqai. Sosiyqa niŋgi tamo uŋgasari e daurbeqnub qaji metŋgitqa niŋgi dego awo jaram kokba 12-pelaq di awoeleŋqab. Awoeleŋosib Israel naŋgo moma 12-pela naŋgo leŋ kalil naŋgi taqatnjroqnqab. 29 Deqa tamo uŋgasari naŋgi ijo ñam qa are qaloqnsib naŋgo segi tal uratosib naŋgo was naŋgi, naŋgo jaja naŋgi, naŋgo ai wo abu wo naŋgi, naŋgo aŋgro naŋgi ti naŋgo wau kalil dego uratnjrsib e daurbqab tamo uŋgasari naŋgi di Qotei na iŋgi bole bole tulaŋ gargekoba olo enjrqas. Yimqa mondoŋ naŋgi ŋambile gaigai sqab. 30 Ariya tamo gargekoba bini ñam koba ti unub qaji naŋgi mondoŋ ñam saiqoji sqab. Ariya tamo gargekoba bini ñam saiqoji unub qaji naŋgi mondoŋ ñam koba ti tigelqab.”

Copyright information for `BOJ