Matthew 25

Duŋgeŋge 10-pela naŋgo yawo anjam

Osiqa Yesus a olo anjam endegsi minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu kumbra di duŋgeŋge 10-pela naŋgo anjam sa dego bul. E deqa niŋgi saiŋgwai. Tamo bei a uŋa baŋ ojej. A uŋa baŋ ojqa sawaq gilqa laqnaqa duŋgeŋge 10-pela naŋgi di a ombla gilqa marsib naŋgo segi segi lam osib walwelosi aisib gamq dia a qa tariŋoqneb. Duŋgeŋge 5-pela naŋgi nanari. Duŋgeŋge 5-pela naŋgi powo ti. Duŋgeŋge nanari naŋgo lam miligiq dia ya kiñala segi soqnej. Deqa lam puloŋeqnaqa osi aieb. Naŋgi lam ya bei o ti aiosai. Ariya duŋgeŋge 5-pela naŋgi powo ti deqa naŋgi naŋgo lam osibqa lam ya dego jaliŋaq di qamsib osi aieb. Ariya tamo a uŋa baŋ ojqa sawaq urur gilosai. Deqa duŋgeŋge 10-pela naŋgi a qa gamq dia tariŋosib sonabqa urŋamnjrnaqa ŋereŋeb.

“Ŋereŋesonabqa qolo jige tamo qudei naŋgi maosib mareb, ‘Tamo uŋa baŋ ojqas qaji agi gileqnu. Deqa niŋgi tigelosib walwelosib gamq dia a turoiye.’ Onaqa duŋgeŋge 10-pela naŋgi tigelosib naŋgo lam gereiyeb. Gereiyoqnsibqa duŋgeŋge nanari naŋgo lam unnabqa puloŋkiñalaej. Deqa naŋgi na duŋgeŋge powo ti naŋgi minjreb, ‘Niŋgi lam ya kiñala egiye. Gago lam ya saiqo deqa mosoqa laqnu.’ Onaqa duŋgeŋge powo ti naŋgi na kamba minjreb, ‘Lam ya endi gago segi qa kere. Iga ti niŋgi qa ti keresai. Deqa niŋgi olo sumsib nuŋgo segi lam ya awaiyiye.’ 10 Onaqa duŋgeŋge nanari 5-pela naŋgi tigelosib lam ya awaiyqajqa sumeqnabqa tamo di a uŋa baŋ ojqa sawaq giloqnej. Gileqnaqa duŋgeŋge powo ti naŋgi nami naŋgo lam gereiysib soqneb deqa naŋgi na tamo di dauryosib uŋa baŋ ojqa sawaq gileb. Gilsib tal miligiq gilekritsib siraŋ kabuteb.

11 “Sokiñalaynaq duŋgeŋge nanari 5-pela naŋgi tal meq di brantosib maosib tamo di minjeb, ‘O Tamo Koba, iga bonum. Ni na siraŋme waqtetgime.’ 12 Onaqa a na kamba minjrej, ‘Niŋgi quiye. E bole merŋgwai. E niŋgi qaliesai.’”

13 Yesus a na aqa aŋgro naŋgi yawo anjam degsi minjrsiqa olo minjrej, “Dego kere niŋgi geregere ŋam atsib soqniye. Di kiyaqa? Ijo bqajqa bati niŋgi qaliesai deqa.”

Tamo kobaquja aqa kaŋgal tamo naŋgi aqa silali taqatqajqa yawo anjam

14 Osiqa Yesus a olo anjam endegsi minjrej “Qotei a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo kobaquja bei a sawa isaq gilsiq di soqnej dego kere. A gilqa osiqa aqa kaŋgal tamo naŋgi koroinjrsiqa aqa silali naŋgi na taqatqajqa deqa naŋgo baŋq di uratetnjrej. 15 Aqa kaŋgal tamo naŋgi wau yqa kere dego silali pupoiyosiqa segi segi enjrej. Bei 5,000 kina yej. Bei 2,000 kina yej. Bei 1,000 kina yej. Osiqa a sawa isaq gilsiq di soqnej. 16 Sonaqa kaŋgal tamo 5,000 kina ej qaji a silali dena wauosiqa olo 5,000 kina bei ej. 17 Kaŋgal tamo 2,000 kina ej qaji a dego silali dena wauosiqa olo 2,000 kina bei ej. 18 Ariya kaŋgal tamo 1,000 kina ej qaji a silali dena wauosai. A silali di osi gilsiqa mandamq di sub bogsiqa sub miligiq di ulitonaq soqnej.

19 “Bati olekoba yala koboonaqa tamo koba di a olo puluosi bosiqa aqa kaŋgal tamo naŋgi wauqa silali enjrej qaji naŋgi metnjrej. Metnjrnaqa naŋgi aqa areq bonabqa a na minjrej, ‘E nami silali eŋgem qaji dena waueb olo silali di osorbiye.’ 20 Onaqa kaŋgal tamo 5,000 kina ej qaji a na 5,000 kina bei olo osi bosiqa aqa tamo koba minjej, ‘O Tamo Koba, ni unime. Ino 5,000 kina nami ebem qaji dena wauonamqa olo 5,000 kina bei brantej agiende.’ 21 Onaqa aqa tamo koba na minjej, ‘Ni kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

22 “Onaqa kaŋgal tamo 2,000 kina ej qaji a bosiqa aqa tamo koba minjej, ‘O Tamo Koba, ni unime. Ino 2,000 kina ebem qaji dena wauonamqa olo 2,000 kina bei brantej agiende.’ 23 Onaqa aqa tamo koba na minjej, ‘Ni dego kaŋgal tamo bolequja. Ni wau kiñala geregere taqatonum deqa e na wau gargekoba olo ino baŋq di uratitqa ni na taqatoqnqam. Deqa ni bosim e ombla areboleboleigim sqom.’

24 “Onaqa kaŋgal tamo 1,000 kina ej qaji a bosiqa aqa tamo koba minjej, ‘O Tamo Koba, ni que. E nami qalieem, ni tamo ŋiriŋ ani. Tamo qudei naŋgi iŋgi yageqnab melieqnaqa ni segi na otorosim uyeqnum. Tamo qudei naŋgi saga yago breiyeqnab boleeqnaq ni segi na gei koroiyosim uyeqnum. 25 Deqa e ni qa ulaosim ino 1,000 kina ebem qaji di osi gilsimqa mandamq di sub bogsim sub miligiq di ulitonam soqnej agiende.’

26 “Onaqa aqa tamo koba na minjej, ‘Ni wau tamo uge. Ni lola ani. Ni nami qalieem, tamo qudei naŋgi iŋgi yageqnab melieqnaqa e segi na otorosim uyeqnum. Tamo qudei naŋgi saga yago breiyeqnab boleeqnaq e segi na gei koroiyosim uyeqnum. Ni nami e qa degsim qalieem. 27 Deqa ni kiyaqa ijo silali di osi gilsim silali talq di atosai? Ni di atem qamu e bosimqa silali talq dena ijo silali aqa oto kobaqo qamu turtsim onum qamu.’ 28 Degsi minjsiqa aqa kaŋgal tamo qudei naŋgi minjrej, ‘Niŋgi 1,000 kina di yaiyosibqa kaŋgal tamo nami wauosiqa 10,000 kina ejunu qaji di olo yiye. 29 Niŋgi degyiye. Di kiyaqa? Tamo a wau geregere taqatoqnqas di Qotei na wau gargekoba olo yimqa a na taqatoqnqas. Ariya tamo a wau geregere taqatqasai di wau kiñala a na taqatejunu qaji di Qotei na olo yaiyimqa a laŋa sqas. A olo wau bei taqatqasai. 30 Deqa niŋgi na kaŋgal tamo uge di qalaq di waiyibqa sawa ambruq di soqnem. Sawa dia naŋgi akamkobayoqnsib pailoqnsib naŋgo jaqatiŋ qa qalagei anjam atoqnqas.’ Tamo koba dena aqa kaŋgal tamo naŋgi degsi minjrej.”

Mondoŋ Tamo Aŋgro a bosim tamo uŋgasari kalil naŋgi peginjrqas

31 Yesus a na aqa aŋgro naŋgi yawo anjam degsi minjrsiq koboonaqa olo anjam bei endegsi minjrej, “Mondoŋ e Tamo Aŋgro ñam kobaquja oqai. Osiy Qotei aqa laŋ aŋgro kalil naŋgi joqsiy olo mandamq aisiy ijo segi awo jaram kobaq di awesqai. 32 Awesosiy laŋ aŋgro naŋgi di qariŋnjritqa naŋgi sawa sawa kalilq giloqnsib tamo uŋgasari kalil naŋgi eleŋosib joqsib bosib ijo ulatamuq dia koroinjrqab. Yimqa e na tamo uŋgasari naŋgi di peginjrsiy tamo bole naŋgi ijo baŋ woq di ateleŋosiy tamo uge naŋgi ijo baŋ qonaŋq di ateleŋqai. Kaja naŋgo mandor na kaja ti meme ti naŋgi peginjreqnu dego kere. 34 Osiyqa tamo bole ijo baŋ woq di unub qaji naŋgi endegsi minjrqai, ‘Ijo Abu a niŋgi qa tulaŋ areboleboleiyqo. Nami a mandam atej bati deqa a nuŋgo Mandor Koba sosim niŋgi taqatŋgwajqa marej. Deqa niŋgi ijoq boiye. Babqa ijo Abu a nuŋgo Mandor Koba sosim niŋgi taqatŋgwas. 35 Di kiyaqa? E mambonaqa niŋgi na e iŋgi anaibeb. E ya qarbonaqa niŋgi na e ya anaibeb. E yauŋ tamo sonamqa niŋgi na e osib nuŋgo talq di geregereibeb. 36 E gara saiqoji sonamqa niŋgi na gara tigetbeb. E maibonaqa niŋgi na e taqatbeb. E tonto talq di sonamqa niŋgi na bosib e gereibeb.’

37 “E na tamo bole ijo baŋ woq di unub qaji naŋgi degsi minjrqai. Minjritqa naŋgi na kamba nenembqab, ‘O Tamo Koba, bati gembu ni mammonaqa iga na ni iŋgi anaimem? Bati gembu ni ya qarmonaqa iga na ni ya anaimem? 38 Bati gembu ni yauŋ tamo sonamqa iga na ni osim gago talq di geregereimem? Bati gembu ni gara saiqoji sonamqa iga na gara tigetmem? 39 Bati gembu ni maimonaqa iga na ni taqatmem? Bati gembu ni tonto talq di sonamqa iga na bosim ni gereimem?’

40 “Naŋgi na e degsib nenembibqa e na kamba minjrqai, ‘Niŋgi quiye. E bole merŋgwai. Niŋgi na ijo was naŋgi sougetejunub qaji geregereinjroqneb di agi niŋgi e dego gereiboqneb.’

41 “Ariya tamo uge ijo baŋ qonaŋq di unub qaji naŋgi endegsi minjrqai, ‘Niŋgi tamo tulaŋ ugedamu. Deqa niŋgi jaraiiye. Jaraiosib aisib ŋamyuo gaigai yuejunu qaji dia soqniye. Satan aqa laŋ aŋgro naŋgi ti dia sqab. Naŋgi dia sqajqa deqa Qotei a nami ŋamyuo di gereiyej. 42 Deqa niŋgi ŋamyuo deq aiiye. Di kiyaqa? E mambonaqa niŋgi na e iŋgi anaibosai. E ya qarbonaqa niŋgi na e ya anaibosai. 43 E yauŋ tamo sonamqa niŋgi na e osib nuŋgo talq di geregereibosai. E gara saiqoji sonamqa niŋgi na gara tigetbosai. E maibonaqa niŋgi na e taqatbosai. E tonto talq di sonamqa niŋgi na bosib e gereibosai.’

44 “E na tamo uge ijo baŋ qonaŋq di unub qaji naŋgi degsi minjritqa naŋgi na kamba nenembqab, ‘O Tamo Koba, bati gembu ni mammej? Bati gembu ni ya qarmej? Bati gembu ni yauŋ tamo soqnem? Bati gembu ni gara saiqoji soqnem? Bati gembu ni maimej? Bati gembu ni tonto talq di soqnem? O Tamo Koba, bati gembu ni degsi sonamqa iga ni numsim gereimosai?’

45 “Naŋgi na e degsib nenembibqa e na kamba minjrqai, ‘Niŋgi quiye. E bole merŋgwai. Niŋgi na ijo was naŋgi sougetejunub qaji geregereinjrosaioqneb di agi niŋgi e dego gereibosaioqneb.’ 46 E na tamo uge ijo baŋ qonaŋq di unub qaji naŋgi degsi minjrsiyqa naŋgo awai uge enjrsiy breinjrit ŋamyuoq aiqab. Dia naŋgi bati gaigai jaqatiŋ oqnsib sqab. Ariya tamo bole ijo baŋ woq di unub qaji naŋgi ŋambile gaigai sqab.”

Copyright information for `BOJ