Philippians 1

E Pol. Aqo Timoti wo Kristus Yesus aqa wau tamo. Aqo aiyel na anjam endi neŋgreŋyosim niŋgi Kristus Yesus aqa segi tamo uŋgasari kalil Filipai qureq di unub qaji niŋgi ti nuŋgo gate ti nuŋgo wau tamo naŋgi qa ti qariŋyonum. Gago Abu Qotei wo Tamo Koba Yesus Kristus wo naŋgi aiyel niŋgi qa are boleinjrimqa niŋgi lawo na soqniye.

Pol a Filipai naŋgi qa are qaloqnsiq deqa a naŋgi qa Qotei pailyeqnu

E bati gaigai niŋgi qa are qaloqnsim deqa e ijo Qotei biŋiyeqnum. E niŋgi qa pailyoqnsimqa e bati gaigai arebolebole na pailyeqnum. E niŋgi qa tulaŋ areboleboleibeqnu. Di kiyaqa? Nami niŋgi are bulyeb bati deqa niŋgi iga betergosib Yesus aqa anjam bole mare mare laqneb agi bini niŋgi yeqnub. E endegsi qalieonum. Qotei a segi nuŋgo are miligiq di wau boledamu yeqnu. A nami wau di utru atej. Ariya bini a wau di yeqnu dena gilsi gilsim mondoŋ Kristus Yesus olo bqajqa batiamqa a na wau di kobotqas. Niŋgi ijo are miligiq di unub deqa e kere niŋgi qa degsim are qaleqnum. E tonto talq endi sqai kio e Kristus aqa anjam bole siŋgilatoqnsiy laqnqai kio di uŋgum. Qotei a e qa are tulaŋ boleiyosiq wau ebej deqa niŋgi kalil e beterbosib e ti koba na Qotei aqa wau ojeqnum. Qotei a segi qalie, Kristus Yesus a iga qa are tulaŋ boleiyeqnu aqa kumbra dena ijo are tigeltetbej deqa e niŋgi kalil qa bosiy nuŋgwajqa are koba qaleqnum.

E bati gaigai niŋgi qa endegsi Qotei pailyeqnum, “O Abu, ni na Filipai Kristen naŋgi aqaryainjrimqa qalaqalaiyo kumbra naŋgo are miligiq di tulaŋ siŋgilatoqnsib dauryoqnqab. Osib naŋgi powo koba osib areqalo bole ti sqab.” 10 O was qu, niŋgi kumbra kalil geregere pegiyosib kumbra tulaŋ boledamu dauryqajqa deqa e niŋgi qa pailyeqnum. Yimqa niŋgi kumbra bole bole yoqnsib une saiqoji soqnib diŋo bati bqas. Diŋo bati deqa Kristus a olo bosim tamo uŋgasari naŋgo une qa naŋgi peginjrqas. 11 O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Pol a tonto talq di unu

12 O was qu, niŋgi endegsib qalieoiye. Jeu tamo naŋgi na e tonto talq endia waibeb unum. Ariya naŋgo kumbra dena naŋgi Kristus aqa anjam bole getentosai. Kristus aqa anjam bole di olo tulaŋ siŋgilaeqnu. 13 Deqa tonto tal taqato tamo naŋgi ti tonto tamo kalil ti naŋgi qalieonub, e Kristus Yesus aqa wau ojeqnum deqa jeu tamo naŋgi na e tonto talq endia waibeb unum. 14 E tonto talq endia unum deqa Kristen was gargekoba naŋgi kamba siŋgilaoqnsib Tamo Koba Qotei qa naŋgo areqalo siŋgilateqnub. Osib deqa naŋgi ulaosaieqnub. Naŋgi Qotei aqa anjam siŋgila na mareqnub.

15 Bole, tamo qudei naŋgi na ijo ñam tentib aguq aiqajqa deqa are qaloqnsib naŋgo are uge na Kristus aqa anjam mare mare laqnub. Ariya tamo qudei naŋgi are bole na Kristus aqa anjam mare mare laqnub. 16 Tamo naŋgi di naŋgi qalie, e tonto talq endi unum di Kristus aqa anjam bole siŋgilatqajqa deqa. Tamo naŋgi di degsib qalieosib deqa naŋgi na e tulaŋ qalaqalaiboqnsib Kristus aqa anjam mare mare laqnub. 17 Ariya tamo qudei naŋgi naŋgo segi ñam soqtqajqa deqa are qaloqnsib Kristus aqa anjam mare mare laqnub. Naŋgi tamo aqaryainjrqajqa deqa are qalosaieqnub. E tonto talq endi soqnit naŋgi ijo are olo ugetetbqajqa deqa are qaloqnsib anjam mare mare laqnub. 18 Ariya tamo naŋgi areqalo bole na Kristus aqa anjam mare mare laqnub kio naŋgi areqalo uge na mare mare laqnub kio di uŋgum. Naŋgi kalil Kristus aqa anjam mare mare laqnub deqa e tulaŋ areboleboleibeqnu.

Pol a are qalej, “E mati moiqasai. E ŋambile sqai. Sosiy Filipai naŋgi aqaryainjroqnqai.”

19 Deqa was qu, e tulaŋ areboleboleiboqnim sqai. Di kiyaqa? E endegsi qalieonum. Niŋgi bati gaigai e qa Qotei pailyeqnub deqa Yesus Kristus aqa Mondor na e siŋgilatbeqnu. Gam dena Qotei na e aqaryaibosim tonto talq endena oqeq atim e bole sqai. 20 Deqa ijo areqalo kobaquja agiende. E kumbra uge bei yqasai. Yim deqa e jemaibqasai. E endegsi are qalonum. Bini bati endeqa ti bunuq qa ti e siŋgila na tigeloqnsiy kumbra bole segi dauryoqnqai. Agi e kumbra degyeqnum. Deqa e moiqai kio e sqai kio di uŋgum. E ijo kumbra kalil qa Kristus aqa ñam soqtoqnqai. 21 Ijo areqalo agiende. E sqai di e Kristus ombla sqai. Ariya e moiqai di e olo iŋgi tulaŋ boledamu oqai. 22 E mandamq endia sosiyqa e tamo uŋgasari gargekoba naŋgi aqaryainjroqnqai. Ariya e gam kie dauryqai? Di e qaliesai. 23 E areqalo aiyeltejunum. E oqsiy Kristus ombla sqajqa are qaleqnum. E degyqai di tulaŋ bolequja. 24 Ariya e mandamq endi sosiy niŋgi aqaryaiŋgoqnqai di dego bolequja. 25 E are siŋgilatosim maronum, e niŋgi aqaryaiŋgwajqa wau ti. Deqa e qalieonum, e urur moiqasai. E mati sosiy niŋgi koba na wauoqnqai. Yim niŋgi Yesus qa nuŋgo areqalo siŋgilatoqnsib tulaŋ areboleboleiŋgoqnim sqab. 26 Deqa bati e olo niŋgi qa bosiy niŋgitqa bati deqa niŋgi e qa tulaŋ areboleboleiŋgim Kristus Yesus aqa ñam soqtoqnsib sqab.

Niŋgi Kristus aqa ñam qa jaqatiŋ oqab

27 Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub. 28 E endegsi qalieqai. Niŋgi nuŋgo jeu tamo naŋgi qa ulaosaieqnub. Niŋgi siŋgila na Yesus aqa wau ojeqnub. Nuŋgo jeu tamo naŋgi nuŋgo kumbra di unsibqa naŋgi endegsib qalieqab, “Bole, iga padalqom.” Ariya niŋgi padalqasai. Qotei na niŋgi olo eleŋam niŋgi so bole gaigai sqab. 29 Niŋgi quiye. Qotei na niŋgi giltŋgej deqa niŋgi Kristus aqa wau ojeqnub. Niŋgi a qa nuŋgo areqalo siŋgilatqajqa deqa segi niŋgi giltŋgosai. Niŋgi aqa ñam qa jaqatiŋ oqajqa deqa ti niŋgi giltŋgej. 30 Nami e aqa anjam qa qoteqnam niŋgi e nuboqneb. Agi bini e qoteqnam niŋgi deqa queqnub. Ariya bini niŋgi jaqatiŋ oqnsib unub. Di kiyaqa? Niŋgi e ti beterosib qoteqnum deqa.

Copyright information for `BOJ