Philippians 3

Tamo a Kristus qa aqa areqalo siŋgilatqas di a Qotei aqa ŋamgalaq di tamo bole sqas

Ariya was qu, e ijo anjam getentqai. E anjam qujai bei unu. Anjam agiende. Niŋgi Tamo Koba Yesus qa tulaŋ areboleboleiŋgim soqniye. E anjam di olo neŋgreŋyosiy niŋgi qa qariŋyqa asgibosaieqnu. Di kiyaqa? E are qalonum, anjam dena niŋgi aqaryaiŋgwas.

Niŋgi geregere ŋam atsib soqniye. Tamo qudei naŋgi bauŋ juwaŋ bul sosib kumbra uge uge yoqnsib laqnub. Tamo deqaji naŋgi Israel naŋgo kumbra dauryqajqa tulaŋ siŋgilaoqnsib deqa naŋgi na iga kalil muluŋ waigwajqa mareqnub. Naŋgo muluŋ di bolesai. Ariya iga Israel tamo tiŋtiŋo unum. Agi iga Qotei aqa aŋgro unum. Iga muluŋ bole aio qaji. Deqa iga Qotei aqa Mondor aqa siŋgila na Qotei qa louoqnsim Kristus Yesus aqa ñam soqteqnum. Iga qalie, tamo naŋgo jejamu na kumbra dauryqab kumbra dena naŋgi aqaryainjrqa keresai bolesai. Bole, gago jejamu na iga aqaryaigwa kere qamu bini e tulaŋ bole unum qamu. Tamo qudei naŋgi naŋgo segi jejamu aqa kumbra qa tulaŋ areboleboleinjreqnaqa mareqnub, “Gago jejamu na iga aqaryaigwa kere.” Ariya e na tamo naŋgi di tulaŋ buŋnjroqnem. Agi ijo ai na e ŋambabtonaqa bati 8-pela onaqa naŋgi na e muluŋ waibeb. E Israel tamo. Ijo moma utru Benjamin. E Hibru naŋgo anjam qalie bole. E Farisi naŋgo kumbra na dal anjam siŋgila na dauryoqnem. Osimqa e Qotei aqa wau ojqajqa tulaŋ siŋgilaoqnem. Deqa e na Kristen tamo uŋgasari naŋgi ugeugeinjroqnem. E dal anjam kalil dauryekritem deqa tamo kalil naŋgi e nuboqnsib ijo une bei babtosaioqneb. Deqa e maroqnem, “E ijo jejamu qa kumbra di dauryoqnqai di e na tamo kalil naŋgi tulaŋ buŋnjrqai.” E degsi marsimqa ariya bunuqna e olo are bulyosim ijo jejamu qa kumbra kalil di unem kumbra di bolesai. Degsi unsimqa e kumbra di uratosim olo Kristus aqa gam dauryoqnem. E Juda naŋgo kumbra uratqa segi marosai. E mandam qa kumbra kalil dego uratqa maronum. E ijo Tamo Koba Kristus Yesus qa bole qalieonum. Ijo qalie di tulaŋ bolequja e degsi unonum. Deqa e qalieonum, mandam qa kumbra kalil di qalam jiri bul. Deqa e Kristus segi dauryqajqa are unu. E mandam qa kumbra kalil di uratekritosiy Kristus segi ojqai. Osiy a segi beteryesqai. E dal anjam dauryqai gam dena e Qotei aqa ŋamgalaq di tamo bole sqa keresai. Gam bei na e tamo bole sqai. Gam agiende. E Kristus qa ijo areqalo siŋgilatqai. Od, iga Kristus qa gago areqalo siŋgilatqom gam dena qujai Qotei na iga mergwas, “Niŋgi ijo ŋamgalaq di tamo bole une saiqoji unub.” 10 Deqa e Kristus qa bole qalieqajqa are koba unu. A subq na tigelej deqa a siŋgila ti unu. E siŋgila deqa qalieqajqa are koba unu. A jaqatiŋ osiq moiej deqa e a beteryosiy a ombla jaqatiŋ osiy moiobulqai. E a ombla areqalo qujaitosiy moiobulqajqa are qaleqnum. 11 Yim deqa mondoŋ e olo subq na tigelqai.

Pol a Kristus aqa kumbra dauryqajqa deqa siŋgila na waueqnu

12 Bole, e Kristus aqa kumbra di torei dauryekritosaiunum. Ariya e gaigai kumbra di ojqajqa siŋgila na waueqnum. Nami Kristus a na e osiqa giltbej deqa bini e kamba Kristus aqa kumbra di ojqajqa siŋgila na waueqnum. 13 O was qu, e Kristus aqa kumbra di torei ojekritosaiunum. Ariya ijo areqalo qujai agi merŋgwai. Ijo kumbra kalil e nami dauryoqnem qaji di e uratekritosiy awai bole Qotei na mondoŋ ebqas qaji di oqajqa siŋgila na waueqnum. 14 Tamo naŋgi gurguroqnsib bubuŋeqnub di naŋgi awai oqajqa. Dego kere e awai oqa maroqnsim siŋgila na urureqnum. Awai agiende. Kristus Yesus aqa wau na Qotei na e metbimqa e laŋ qureq oqsiy dia a ombla bole gaigai sqai.

15 Niŋgi areqalo bole ti unub qaji niŋgi ijo areqalo di dauryoqniye. Ariya niŋgi qudei areqalo bei ejunub kio? Soqnim Qotei na nuŋgo areqalo di olo gereiyetŋgwas. 16 Ariya kumbra bole iga ojsim dauryeqnum qaji di iga siŋgila na ojesqom.

17 O was qu, niŋgi kalil gaigai ijo kumbra unoqnsib dauryoqniye. Osib tamo naŋgi ijo kumbra dauryeqnub qaji naŋgi dego unjroqnsib degsib daurnjroqniye. 18 Kristus a ŋamburbasq di moiej anjam di tamo gargekoba naŋgi na jeuteqnub. E naŋgo kumbra deqa bati gargekoba niŋgi saiŋgoqnem. Deqa bini e akam ti olo niŋgi saiŋgeqnum. 19 Tamo naŋgi di naŋgo segi jejamu qa are qaloqnsib dauryeqnub. Naŋgo areqalo di naŋgo gisaŋ qotei bul ateqnub. Naŋgi bati gaigai mandam qa iŋgi iŋgi oqajqa are tulaŋ prugnjreqnu. Naŋgi jemai kumbra yqajqa tulaŋ areboleboleinjreqnu. Deqa mondoŋ tamo naŋgi di ŋamyuoq di torei padalqab. 20 Ariya iga laŋ goge qaji tamo unum deqa mondoŋ Tamo Koba Yesus Kristus a laŋ qureq dena mandamq aisim iga oqas. Deqa bini iga a qa tariŋoqnsim unum. 21 Yesus aqa segi siŋgila na a na iŋgi iŋgi kalil eleŋosim aqa segi sorgomq di atim sqas. Aqa siŋgila dena a na gago jejamu bulyetgimqa gago jejamu di Yesus aqa jejamu bulosim so bole gaigai sqas. Gago jejamu di agi bini gulube ti jaqatiŋ ti unu.

Copyright information for `BOJ