Philippians 4

Niŋgi Tamo Koba Yesus qa areboleboleiŋgoqneme

Deqa ijo was bole, niŋgi Tamo Koba Yesus beteryosib siŋgila na tigelesoqniye. Agi e nami niŋgi degsi merŋgem. E niŋgi tulaŋ qalaqalaiŋgeqnum deqa e niŋgi qa are koba qaleqnum. Niŋgi segi ijo awai bole bul. Deqa e niŋgi oqajqa waukobaeqnum. E niŋgi qa tulaŋ areboleboleibeqnu.

Ariya Yuodia wo Sintike wo, niŋgi aiyel quiye. Niŋgi Tamo Koba Yesus beteryejunub deqa niŋgi aiyel are qujaitosib geregere soqniye. O was, e ni dego endegsi mermqai. Aqo ombla wau qujai deqa ni na uŋa aiyel naŋgi di aqaryainjrimqa naŋgi are qujaitosib sqab. Naŋgi aiyel uŋa bole. Naŋgi e daurbosib ombla na Yesus aqa anjam mare mare laqnub qaji. E na tamo qudei e koba na waueqnub qaji naŋgi ti Klemem ombla na naŋgi dego minjritqa naŋgi na uŋa aiyel naŋgi di aqaryainjrebe. Naŋgo ñam di agi Qotei na ŋambile qa buk miligiq di neŋgreŋyej unu.

O was qu, niŋgi bati gaigai Tamo Koba Yesus qa areboleboleiŋgoqneme. E olo merŋgwai. Niŋgi a qa tulaŋ areboleboleiŋgoqneme.

Niŋgi lawo kumbra dauryoqnibqa tamo kalil naŋgi nuŋgo kumbra bole di unoqnqab. Niŋgi are qaliye. Sokiñala Tamo Koba Yesus a olo bqas. Deqa niŋgi iŋgi bei qa areqalo kobaiyaib. Niŋgi gaigai nuŋgo gulube kalil qa Qotei pailyoqniye. Osib a biŋiyoqnsib minjoqniye, “O Abu, ni na iga aqaryaigoqne.” Niŋgi degyibqa Qotei aqa lawo kumbra na nuŋgo are miligi ti nuŋgo areqalo ti taqatetŋgimqa niŋgi geregere lawo na sqab. Kumbra dena niŋgi Kristus Yesus beteryesqab. Qotei aqa kumbra di tulaŋ bolequja. Deqa kumbra di aqa utru iga torei dauryosim itqa keresai.

Ariya was qu, e anjam qujai bei unu. Anjam agiende. Niŋgi gaigai kumbra endeqa are qaloqniye. Kumbra bole ti kumbra tiŋtiŋ ti kumbra jiga saiqoji deqa ti kumbra Qotei a tulaŋ qalaqalaiyeqnu qaji deqa ti kumbra tamo naŋgi yeqnab iga unoqnsim deqa areboleboleigeqnu qaji kumbra deqa ti kalil are qaloqnsib soqniye. Qotei aqa anjam kalil e nami niŋgi merŋgeqnam quoqneb qaji di niŋgi dauryosib soqniye. Ijo kumbra kalil e nami nuŋgo ambleq di yeqnam niŋgi unoqneb qaji di dego niŋgi dauryosib soqniye. Yimqa Qotei a niŋgi ti sqas. Agi Qotei a lawo kumbra qa utru.

Filipai naŋgi na Pol aqaryaiyeb deqa a naŋgi qa tulaŋ areboleboleiyej

10 O was qu, niŋgi nami e aqaryaibqajqa are qaloqneb. Ariya bini niŋgi olo e aqaryaibqajqa are qaleqnub deqa e Tamo Koba Qotei qa tulaŋ areboleboleibeqnu. Bole, nami niŋgi e qa are qaloqneb. Ariya bati di niŋgi e aqaryaibqa gam bei saiqoji. 11 Bole, e iŋgi bei qa truquosaieqnum. E deqa are qalsim anjam endi neŋgreŋyosai. E lawo kumbra qalieonum deqa kumbra kie ijoq di brantqas di uŋgum, e ulaqasai. 12 E iŋgi saiqoji sqai kio e iŋgi koba ti sqai kio di uŋgum, e are lawo na sqai. E lawo kumbra qalieonum deqa e iŋgi kere sqas kio e mambqas kio e iŋgi koba ti sqai kio e iŋgi qa truquoqnqai kio di uŋgum, e are lawo na sqai. Kumbra kie ijoq di brantqas di uŋgum, e are lawo na sqai. 13 Kristus a segi na e siŋgilatbeqnu deqa aqa siŋgila dena e kumbra kalil yqa kere.

14 Niŋgi e silali qa aqaryaibeqnub deqa e nuŋgo kumbra deqa tulaŋ areboleboleibeqnu. Di kiyaqa? E nami gulube ti sonamqa bati deqa niŋgi e beterbosib kumbra bole di e ebqajqa are qaloqneb. 15 O Filipai tamo uŋgasari, niŋgi qalie, e nami Yesus aqa anjam bole palontqajqa wau utru atsim Masedonia sawa dena tigelosim gilqa laqnamqa niŋgi segi na e beterbosib silali qa aqaryaiboqneb. Kristen tamo qudei naŋgi e silali qa aqaryaibosaioqneb. 16 Agi e Tesalonaika qureq di sonamqa niŋgi e silali qa aqaryaiboqneb. 17 Niŋgi na e silali ebqajqa e deqa are qalosaieqnum. Niŋgi kumbra bole bole yoqnibqa Qotei na olo kamba niŋgi kumbra bole eŋgwajqa e deqa are qaleqnum. 18 E silali iŋgi iŋgi kere unu. E iŋgi bei qa truquosaieqnum. Di kiyaqa? Niŋgi na silali di Epafroditus yonabqa a na osi bosiq ebej. Niŋgi silali qa e aqaryaibeb deqa niŋgi Qotei atraiyobuleb. Atraiyo iŋgi di quleq bole ti. Qotei a atraiyo iŋgi deqa tulaŋ areboleboleiyqo. 19 Iga Kristus Yesus aqa segi tamo uŋgasari unum deqa ijo Qotei na iŋgi bole bole iga egoqnqas. Deqa niŋgi iŋgi bei qa truquoqnibqa a na niŋgi eŋgoqnimqa niŋgi tulaŋ kere na sqab. 20 Qotei a gago Abu. A segi Qotei bole. Deqa iga bati gaigai aqa ñam soqtoqnqom. Bole.

Pol a Filipai naŋgi kaiyeinjrej

21 E na Kristus Yesus aqa tamo uŋgasari kalil naŋgi kaiyeinjronum. Kristen was qu e koba na endi unum qaji naŋgi na dego niŋgi kaiyeiŋgonub. 22 Qotei aqa tamo uŋgasari kalil qure endia unub qaji naŋgi na niŋgi kaiyeiŋgonub. Kristen tamo uŋgasari Sisar aqa talq di waueqnub qaji naŋgi dego niŋgi kaiyeiŋgonub.

23 Tamo Koba Yesus Kristus a niŋgi qa are tulaŋ boleiyosim nuŋgo qunuŋ geregere taqateme.

Copyright information for `BOJ