Revelation of John 10

Laŋ aŋgro a buk kiñala Jon yonaqa a uyej

Onaqa e olo ŋam atsimqa laŋ aŋgro bei laŋ goge dena aieqnaq unem. A laŋ aŋgro siŋgila koba. A laŋbi na kabuosiqa aqa gateq di tuembiŋ atesoqnej. Aqa ulatamu seŋ bul suwaŋoqnej. Aqa siŋga tal aqa ai yusiq ñaŋgao bul. Laŋ aŋgro aqa baŋq di buk kiñala bei waqesonaq ojesoqnej. Aqa siŋga wo yuwalq di atej. Siŋga qonaŋ mandamq di atej. A tulaŋ koba leleŋej. Laion anjameqnu dego kere. Leleŋonaqa kola 7-pela naŋgi anjam ateb. Kola 7-pela naŋgi anjam atnabqa e naŋgo anjam qusim neŋgreŋyqa laqnamqa laŋ goge dia tamo bei anjam marnaqa e aqa kakoro quem. A na merbej, “Kola 7-pela naŋgo anjam di qusim tent. Neŋgreŋyaim.”

Ariya laŋ aŋgro yuwalqsi mandamqsi siŋga atsiq tigelesonaq unem qaji a na aqa baŋ wo soqtonaqa laŋq oqej. Osiqa Qotei laŋ ti mandam ti yuwal ti iŋgi iŋgi kalil ti ateleŋej qaji aqa ñam na endegsi marej, “Niŋgi quiye. E bole marqai. Diŋo bati jojomqo. Deqa Qotei a tariŋsokobaiyqasai. Laŋ aŋgro namba 7 na aqa gul anjamamqa Qotei aqa uli anjam nami aqa medabu o tamo naŋgi minjroqnej qaji di a na babtekritqas.” Laŋ aŋgro dena Qotei ŋambile gaigai unu qaji aqa ñam na degsi marej.

Onaqa tamo nami laŋ goge dia anjam merbonaq aqa kakoro quem qaji a na olo merbej, “Ni gilsim laŋ aŋgro aqa siŋga yuwalqsi mandamqsi atsiq tigelejunu qaji aqa baŋq di buk waqejunu di yaiyosim am.” Onaqa e laŋ aŋgro di aqa areq gilsim minjem, “Ni buk kiñala ino baŋ na ojejunum qaji di e ebe.” Onaqa merbej, “Ni am. Osim uye. Uyimqa ino medabuq di bisim qaq bul tulaŋ qaqatiŋmqas. Aisim ino bi aniq di isakobaimqas.” 10 A degsi merbonaqa e aqa baŋq dena buk kiñala di yaiyosim uyem. E uynamqa ijo medabuq di bisim qaq bul tulaŋ qaqatiŋbej. Aisiq ijo bi aniq di isakobaibej.

11 Onaqa naŋgi na olo merbeb, “Ni Qotei aqa medabu osimqa anjam palontoqnqam. Tamo uŋgasari leŋ segi segi qaji, sawa segi segi qaji, anjam maro segi segi qaji naŋgo kumbra qa ni anjam palontoqnqam. Mandor kokba gargekoba naŋgo kumbra qa dego ni anjam palontoqnqam.”

Copyright information for `BOJ