Revelation of John 17

Qotei na sambala uŋa kobaquja a awai ugedamu yqas

Onaqa laŋ aŋgro 7-pela tabir 7-pela ojesoqneb deqaji bei na bosiqa merbej, “Ni endeq au. Bamqa Qotei na sambala uŋa kobaquja aqa une qa pegiyosim a awai uge yim ni osormit unqam. Sambala uŋa di agi ya kokbaq di awejunu. Mandor kokba kalil mandamq di unub qaji naŋgi a ombla na sambalaosib laqnub. Tamo kalil mandamq di unub qaji naŋgi dego a ti sambalaosib laqnub. Naŋgo kumbra di naŋgi wain uyoqnsib nanarieqnub dego bul.”

Laŋ aŋgro na e degsi merbonaqa Qotei aqa Mondor Bole a bosiqa e siŋgilatbosiqa e wadau sawaq osi gilej. Onaqa e ŋam atsim uŋa bei sonaq unem. Uŋa di a wagme juwaŋ lent aqa quraq di awesoqnej. Wagme juwaŋ di aqa jejamuqsi ñam gargekoba neŋgreŋyonab soqneb. Ñam di Qotei misiliŋyo qaji ñam. Wagme juwaŋ di aqa gate 7-pela. Aqa gateq di qala 10-pela soqneb. Uŋa di gara lent utru aiyela dena kabuosiq soqnej. Gol ti meniŋ naimyo ti kolilei boledamu dena ti walaosiq awesoqnej. Aqa baŋq di gambaŋ gol na gereiyo qaji ojesoqnej. Aqa kumbra uge uge na ti aqa sambala kumbra jigat dena ti gambaŋ miligiq di maqeleŋesoqnej. Aqa kumbra di Qotei aqa ŋamgalaq di tulaŋ ugedamu. Uŋa di aqa ñam aqa lanjaqsi neŋgreŋyonab soqnej. Ñam di sasir anjam. Aqa ñam bole agiende, “Babilon qure kobaquja. A sambala uŋa kalil naŋgo ai. Kumbra uge uge kalil mandamq di so qaji naŋgo ai agi a segi.” Aqa ñam bole agide. Uŋa dena Qotei aqa segi tamo uŋgasari naŋgi ugeugeinjroqnsiqa ñumeleŋeqnaq naŋgi moreŋoqneb. Tamo uŋgasari naŋgi di Yesus qa naŋgo areqalo siŋgilatosib aqa ñam marsib laqneb qaji. Uŋa dena naŋgi ñumeqnaq naŋgi moreŋosib naŋgo leŋ aieqnaqa a leŋ di wain bul uyoqnsiq nanarieqnaq e degsi unsimqa tulaŋ koba prugugetosim are koba qaloqnem.

Onaqa laŋ aŋgro dena e merbej, “Ni kiyaqa are koba qaleqnum? Uŋa de wo wagme juwaŋ wo naŋgo kumbra di sasir anjam. Wagme juwaŋ agi gate 7-pela ti qala 10-pela ti unu. A na uŋa di qolaiyejunu. Naŋgo aiyel sasir anjam di aqa utru uliejunu. Di e na babtitqa ni que. Wagme juwaŋ ni unonum qaji di a nami soqnej. Ariya a bini sosai. Bunuqna a olo sub guma kobaq dena brantosim torei padalqas. Amqa tamo uŋgasari kalil mandamq di unub qaji naŋgi na wagme juwaŋ di unsibqa naŋgi prugugetqab. Wagme juwaŋ di agi a nami soqnej. A bini sosai. A olo bunuqna brantqas. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai.

“Tamo a areqalo bole ti sqas di a anjam endi geregere poiyeme. Wagme juwaŋ aqa gate 7-pela naŋgi di mana 7-pela. Uŋa di a mana 7-pela goge quraq di awejunu. 10 Gate 7-pela di naŋgi mandor kokba 7-pela. Mandor 5-pela naŋgi nami padaleb. Qujai unu. Qujai a mandor sosaiunu. A mandor sqajqa tariŋeqnu. A bunuqna mandor sosim sokiñalayosim padalqas. 11 Wagme juwaŋ nami soqnej bini sosai qaji a dego mandor koba bei. A mandor kokba 7-pela naŋgo ambleq di unu. A mandor koba namba 8. A dego torei padalqas.

12 “Ariya qala 10-pela ni unjronum qaji di naŋgo utru e na ubtit ni quqwam. Naŋgi mandor kokba 10-pela. Naŋgi dego mandor sosaiunub. Naŋgi bunuqna wagme juwaŋ a ombla na siŋgila osib mandor kokba sqab. Sokiñalayosib olo padalqab. 13 Naŋgi mandor kokba sosibqa naŋgi areqalo qujaitosib naŋgo segi siŋgila ti ñam ti kalil wagme juwaŋ di yqab. 14 Osib Kaja Du qa ŋiriŋosib qoto itqab. Amqa Kaja Du a qoto siŋgilaosimqa naŋgi ñumqas. Kaja Du a tamo kokba kalil naŋgo Tamo Koba. A mandor kokba kalil naŋgo Mandor Koba. Tamo kalil a ombla unub qaji naŋgi a ti qoto siŋgilaqab. Naŋgi di Kaja Du na metnjrsiq aqa segi tamo uŋgasari sqajqa giltnjrej qaji. Deqa naŋgi aqa anjam bole dauryeqnub.”

15 Onaqa laŋ aŋgro dena olo merbej, “Ya kokba sambala uŋa a di awesonaq ni unonum qaji di aqa utru e na ubtit ni quqwam. Ya kokba di tamo uŋgasari tulaŋ gargekoba leŋ segi segi qaji, jejamu segi segi qaji, anjam maro segi segi qaji naŋgi. 16 Qala 10-pela ni unjronum qaji naŋgi ti wagme juwaŋ a ti naŋgi na sambala uŋa di jeutosib a tulaŋ ugeugeiyosib gara bumbraŋye-tosib aqa damu uyekritosib tanu ŋamyuo na koitqab. 17 Qotei a segi na mandor kokba naŋgi di areqalo enjrimqa naŋgi na uŋa di degsib ugeugeiyqab. Qotei a segi nami marej, ‘E na areqalo enjritqa naŋgi kumbra di yqab.’ Qotei a nami degsi marej. Deqa bati brantimqa Qotei na areqalo enjrimqa naŋgi areqalo qujaitosib naŋgo segi siŋgila ti ñam ti kalil wagme juwaŋ di yqab. Naŋgi kumbra degyibqa Qotei aqa anjam kalil nami marej qaji di aqa damu brantqas. 18 Uŋa ni unonum qaji di aqa utru e na ubtit ni quqwam. Uŋa di a qure kobaquja. A mandor kokba kalil mandamq di unub qaji naŋgo mandor koba sosiqa naŋgi taqatnjreqnu.”

Copyright information for `BOJ