Revelation of John 2

Anjam Jon a Efesus qure naŋgi qa qariŋyej qaji

Yesus a na e degsi merbsiqa olo endegsi merbej, “Efesus qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E ijo baŋ wo na bongar 7-pela ojejunum. E lam 7-pela gol na gereiyo qaji naŋgo ambleq di walweleqnum. E na anjam endi ni qa qariŋyonum. Ino kumbra ti ino wau ti di e qalieonum. E qalie, ni siŋgila na tigeloqnsimqa tamo uge naŋgi qa tulaŋ asgimeqnu. Tamo naŋgi di endegsib mermeqnub, “Iga dego Qotei aqa anjam marqajqa deqa qariŋgwo.” Di gisaŋ. Qotei na naŋgi qariŋnjrosai. Ni naŋgo anjam di tenemtosim ni qalieonum, naŋgi gisaŋ tamo. Ni keretsim qalieonum. Ni ijo ñam ojejunum deqa tamo qudei naŋgi na ni numoqnsib ugeugei-meqnub. Ariya e qalieonum, ni siŋgila na tigeloqnsimqa gulube di qoboiyeqnum. Ni asgimosaieqnu.

“‘Ariya ino kumbra uge qujai e ubtsiy mermqai. Nami ni e qa ino areqalo siŋgilatosim bati deqa ni na e tulaŋ qalaqalaiboqnem. Ariya bini ni kumbra di uratonum. Nami ni kumbra bole yoqnem. Ariya bini ni kumbra di uratonum deqa ni uloŋonum. Deqa ni que. Kumbra ni nami yoqnem qaji deqa olo are qalsimqa are bulyosim kumbra di olo daurye. Ni dauryqasai di e ni qa bosiy ino lam olo taqal atetmqai. Ariya ino kumbra bole bei agi ubtsiy mermqai. Nikolas aqa wau tamo naŋgi kumbra uge uge yeqnub. Naŋgo kumbra di ni tulaŋ urateqnum. Keretsim urateqnum. E dego urateqnum.

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di e na laŋ qure qa ŋam gei osiy anaiyit a uysim dena ŋambile gaigai sqas. Ŋam di agi Qotei aqa laŋ qureq di unu.’ O Jon, ni anjam degsim neŋgreŋyosim Efesus naŋgo laŋ aŋgro aqaq qariŋye.”

Anjam Jon a Smerna qure naŋgi qa qariŋyej qaji

Yesus a na e degsi merbsiqa olo endegsi merbej, “Smerna qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E segi qujai namoq di unum. E segi qujai bunuq di sqai. Nami e moiem. Bini e olo ŋambile unum. E na anjam endi ni qa qariŋyonum. Ni gulube ti jaqatiŋ ti ejunum di e qalie. Ni iŋgi tulaŋ saiqoji unum di dego e qalie. Di uŋgum. Ni laŋ qure qa iŋgi iŋgi koba eleŋejunum. E qalie, tamo qudei naŋgi na ni misiliŋmoqnsib anjam uge uge mermeqnub. Naŋgi segi qa mareqnub, “Iga Juda tamo.” Di gisaŋ. Naŋgi Satan aqa aŋgro. 10 Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.

11 “‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di a moio bunu qaji turqasai. Moio dena a ugetqa keresai. Sai bole sai.’ O Jon, ni anjam degsim neŋgreŋyosim Smerna naŋgo laŋ aŋgro aqaq qariŋye.”

Anjam Jon a Pergamum qure naŋgi qa qariŋyej qaji

12 Yesus a na e degsi merbsiqa olo endegsi merbej, “Pergamum qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E serie olekoba tulaŋ qala uge qala aiyel ojejunum. E na anjam endi ni qa qariŋyonum. 13 Qure ni di unum qaji naŋgo kumbra e geregere qalieonum. Qure di Satan a na taqatejunu. Aqa awo jaram koba qure dia unu. Ariya e qalie, ni ijo ñam siŋgila na ojesosim e qa ino areqalo siŋgilateqnum. Ino areqalo di ni na ulitosaieqnum. Nami ijo anjam palonto tamo Antipas a niŋgi koba na wauoqnej. Antipas a ijo anjam geregere dauryoqnej deqa jeu tamo naŋgi nuŋgo qureq dia a qalnab moiej. Moinaqa ni di unsimqa deqa ni e qoreibosai. Qure dia agi Satan a unu.

14 “‘Ariya ino kumbra uge qudei e ubtsiy mermqai. Tamo qudei Pergamum qureq di unub qaji naŋgi Balam aqa kumbra uge siŋgila na ojesonab ni na naŋgi saidnjrosaieqnum. Balam aqa kumbra agiende. Nami Balam na Balak gam osoryonaqa gilsiqa Israel tamo uŋgasari naŋgi gisa gisaŋnjroqnsiqa kumbra ugeq breinjroqnej. Breinjroqnsiqa areqalo tigeltetnjreqnaqa naŋgi qotei gisaŋ atrainjro qaji iŋgi uyoqnsib sambala kumbra yoqnsib laqneb. 15 Tamo qudei dego Pergamum qureq di unub qaji naŋgi Nikolas aqa wau tamo naŋgo anjam dauryeqnub. 16 Deqa ni are bulye. Ni are bulyqasai di e urur ni qa bosiy serie olekoba ijo medabuq di unu qaji dena tamo naŋgi di qoto itnjrqai.

17 “‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di e na laŋ qure qa iŋgi uliejunu qaji di anaiyit uyqas. Meniŋ qat dego yqai. Osiy meniŋ quraq di ñam bunuj neŋgreŋyqai. Ñam di tamo bei a qalieqasai. Tamo meniŋ oqas qaji a segi qalieqas.’ O Jon, ni anjam degsi neŋgreŋyosim Pergamum naŋgo laŋ aŋgro aqaq qariŋye.”

Anjam Jon a Taiataira qure naŋgi qa qariŋyej qaji

18 Yesus a na e degsi merbsiqa olo endegsi merbej, “Taiataira qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E Qotei aqa Ŋiri. Ijo ŋamdamu ŋam puloŋ bul puloŋeqnu. Ijo siŋga minjaleqnu. Bras geregere ñomyeqnab minjaleqnu dego kere. E na anjam endi ni qa qariŋyonum. 19 Kumbra bole kalil ni yeqnum qaji di e qalieonum. E qalie, ni gaigai ijo tamo uŋgasari naŋgi qalaqalainjreqnum. Ni e qa ino areqalo siŋgilatoqnsimqa wau koba yoqnsimqa ijo tamo uŋgasari naŋgi aqaryainjreqnum. Gulube kalil ni qoboiyeqnum qaji di ni geregere qoboiyoqnsimqa siŋgila na tigelejunum. Kumbra ni nami yoqnem qaji di bolequja. Ariya kumbra ni bini yeqnum qaji di olo tulaŋ boledamu. Kumbra dena ino kumbra nami yoqnem qaji di tulaŋ buŋyejunu. Di e qalie.

20 “‘Ariya ino kumbra uge qujai agi ubtsiy mermqai. Uŋa Jesebel a ni ombla sosiq waueqnaqa ni na a wiyosaieqnum. A segi qa mareqnu, “E Qotei aqa medabu o qaji uŋa.” Di gisaŋ. A Qotei aqa medabu o qaji uŋa sai. A na ijo wau tamo naŋgi gisa gisaŋnjroqnsiqa gam osornjreqnaqa naŋgi na sambala kumbra yoqnsibqa qotei gisaŋ atrainjro qaji iŋgi uyeqnub. 21 A are bulyqajqa bati yem di a are bulyosim aqa sambala kumbra uratqajqa saidej. 22 Deqa ni que. E na uŋa di jaqatiŋ koba yitqa a makobaiyqas. Tamo naŋgi a ombla na sambalaosib laqnub qaji naŋgi aqa kumbra uge uge uratosib are bulyqasai di e naŋgi dego jaqatiŋ ti gulube koba ti enjrqai. 23 Aqa aŋgro naŋgi dego ñumit moreŋqab. Amqa tamo uŋgasari qure kalilq dia ijo ñam qa koroosib loueqnub qaji naŋgi qalieqab, e tamo kalil naŋgo are miligi ti areqalo ti geregere unsim peleiyeqnum. Deqa niŋgi quiye. E na nuŋgo kumbra kalil geregere keretosiy nuŋgo awai dego segi segi eŋgwai.

24 “‘Ariya niŋgi qudei Taiataira qureq di unub qaji nuŋgo kumbra bole agi ubtsiy merŋgwai. Niŋgi uŋa Jesebel aqa anjam dauryosaieqnub. Satan aqa kumbra dego niŋgi qaliesai. Satan aqa kumbra di tamo naŋgi ulioqnsib yeqnub. Osib mareqnub, “Di Satan aqa uli anjam.” Ariya kumbra di niŋgi qaliesai. Deqa e niŋgi gulube bei eŋgwasai. 25 Kumbra kalil niŋgi ojejunub qaji di siŋgila na ojesoqnib e bqai.

26 “‘Tamo a Satan ombla qotsim siŋgilaosim ijo kumbra dauryosim gilsim gilsim diŋo bati itqas di e na a siŋgila yitqa a na tamo uŋgasari sawa sawa kalilq di unub qaji naŋgi taqatnjroqnqas. 27 A na naŋgi tulaŋ siŋgila na taqatnjroqnqas. Taqatnjresoqnimqa naŋgi na aqa anjam gotraŋyoqnibqa naŋgi ñumoqnim moreŋoqnqab. Tamo naŋgi web paraparainjreqnub dego kere. Wau di e na tamo di yqai. Ijo Abu na e wau ebej dego kere a wau yqai. 28 Nebeqa laqnaqa burbas bunuj oqeqnu qaji di dego a yqai. 29 Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsi neŋgreŋyosim Taiataira naŋgo laŋ aŋgro aqaq qariŋye.”

Copyright information for `BOJ