Revelation of John 21

Laŋ bunuj ti mandam bunuj ti brantqas

Onaqa e olo ŋam atsimqa laŋ bunuj ti mandam bunuj ti unjrem. Laŋ namij ti mandam namij ti koboeb. Yuwal dego koboej. Onaqa e Qotei aqa segi qure koba Jerusalem bunuj di dego unem. Qure di Qotei aqaq di sosiqa laŋ goge dena mandamq aieqnaq unem. Qure di aqa wala tulaŋ boledamu. Duŋgeŋge tamo baŋ ojqa osim walaeqnu dego kere. Onaqa Qotei aqa awo jaram namoq dia tamo bei tigelosiq anjam marnaqa e aqa kakoro quem. A tulaŋ koba leleŋosiqa marej, “Niŋgi quiye. Bini Qotei aqa tal aisiq tamo uŋgasari naŋgoq di unu. Deqa Qotei a naŋgo ambleq di sqas. Naŋgi aqa segi tamo uŋgasari sqab. Od, Qotei a naŋgi koba na sqab. A naŋgo Qotei sqas. Sosimqa naŋgo ŋam ya kalil nuntetnjrqas. Deqa naŋgi olo akamqasai. Naŋgi olo bunu moreŋqasai. Naŋgi olo are gulubeinjrqasai. Naŋgi olo jaqatiŋ oqasai. Kumbra namij deqaji kalil koboqo.”

Onaqa Qotei a awo jaram kobaq di awesosiq marej, “Niŋgi quiye. E iŋgi iŋgi kalil bunuj atonum.” Osiqa merbej, “Ni anjam kalil endi neŋgreŋye. Anjam endi bole kalil. Tamo naŋgi qusib marqab, ‘Bole.’” Osiqa olo merbej, “Anjam kalil e nami maroq-nem qaji di aqa damu bini brantqo. E segi qujai namoq di unum. E segi qujai bunuq di sqai. E iŋgi iŋgi kalil qa utru. Wau kalil e yeqnum qaji di e olo koboteqnum. Tamo a ya qaryimqa e na ŋambile qa ya jumbumq dena tigsiy anaiyit uyqas. Ya di awai saiqoji. E na laŋa anaiyqai. Tamo a Satan ombla qotsim siŋgilaqas di e na iŋgi iŋgi kalil di laŋa yqai. E aqa Qotei sqai. A ijo aŋgro sqas.

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Jon a Jerusalem qure bunuj unej

Ariya laŋ aŋgro 7-pela tabir 7-pela ojesoqneb naŋgi deqaji bei bosiqa ijo areq di tigelej. Tabir 7-pela miligiq di agi nami iŋgi uge 7-pela jigsib bilentonab mandamq aisiq tamo uŋgasari naŋgi tulaŋ ugeugeinjrej. Bati di Qotei aqa minjiŋ koboej. Ariya laŋ aŋgro dena merbej, “Ni endeq au. Bamqa Kaja Du aqa uŋa bunuj walaqo qaji di osormit unqam.” 10 Onaqa Qotei aqa Mondor Bole na e siŋgilatbonaqa laŋ aŋgro dena e osiqa mana tulaŋ goge kobaq oqej. Oqsiq dia Qotei aqa segi qure koba Jerusalem bunuj osorbej. Qure di Qotei aqaq di sosiqa laŋ goge dena mandamq aieqnaq unem. 11 Qure di Qotei aqa riaŋ na tulaŋ suwaŋej. Aqa riaŋ di tulaŋ bolequja. A meniŋ boledamu bul. A tulaŋ suwaŋosiq meniŋ jaspa bulej. Osiqa tulaŋ jeqilosiq qunuŋ bulej. 12 Qure di dadaŋyeb di tulaŋ goge koba. Dadaŋ di aqa siraŋme 12-pela soqneb. Siraŋme jojomq dia laŋ aŋgro 12-pela tigelesoqneb. Siraŋmeq dia Israel tamo uŋgasari naŋgo moma utru 12-pela naŋgo ñam neŋgreŋyonab soqneb. 13 Dadaŋ guta qa di siraŋme qalub soqneb. Dadaŋ tauŋ qa di siraŋme qalub soqneb. Dadaŋ bebeŋ qa di siraŋme qalub soqneb. Dadaŋ guma qa di siraŋme qalub soqneb. 14 Meniŋ kokba 12-pela na dadaŋ aqa utru siŋgilateb. Meniŋ quraq di tamo 12-pela Kaja Du na qariŋnjrnaq aqa anjam marsib laqneb qaji naŋgo ñam atnab soqneb.

15 Laŋ aŋgro e anjam merboqnej qaji a na toqoŋ bei gol na gereiyo qaji di ojesoqnej. Ojsiqa qure ti qure aqa dadaŋ ti dadaŋ aqa siraŋme ti naŋgo ole keretej. 16 Qure aqa par ti ole ti kerekere. Laŋ aŋgro dena toqoŋ di osiqa qure keretej di aqa par ti ole ti goge ti 2,200 kilomita. Qure di aqa par ti ole ti goge ti kerekere. 17 Laŋ aŋgro na qure aqa dadaŋ keretej di aqa goge 144 meta. Toqoŋ laŋ aŋgro na ojesoqnej qaji di mandam qaji toqoŋ. Mandam aqa kereto na laŋ aŋgro na iŋgi iŋgi kalil keretoqnej. Kereto dena a na dadaŋ keretej.

18 Qure aqa dadaŋ di Qotei na meniŋ jaspa na gereiyej. Qure di gol na gereiyej. Qure di tulaŋ riaŋosiq qunuŋ bulej. 19 Meniŋ boledamu segi segi na dadaŋ aqa utru walatej. Meniŋ boledamu namba 1 aqa ñam jaspa. Meniŋ namba 2 aqa ñam sapaia. A qenjent. Meniŋ namba 3 aqa ñam aget. Meniŋ namba 4 aqa ñam emeral. A ŋam baŋga gesgi bul. 20 Meniŋ namba 5 aqa ñam sadonikis. A lentosiq qat dego. Meniŋ namba 6 aqa ñam konilian. A lent. Meniŋ namba 7 aqa ñam krisolait. A merient. Meniŋ namba 8 aqa ñam beril. A ŋam baŋga gesgi bul. Meniŋ namba 9 aqa ñam topas. A merient. Meniŋ namba 10 aqa ñam krisopres. Meniŋ namba 11 aqa ñam haiasin. Meniŋ namba 12 aqa ñam ametis. A lent. 21 Dadaŋ aqa siraŋ 12-pela di meniŋ qat kokba 12-pela. Meniŋ kokba di kolilei tanu bul. Siraŋ segi segi di meniŋ qat qujai deqaji. Ariya qure aqa gam kalil gol na gereiyeb. Gam di tulaŋ jeqilosiq qunuŋ bulej.

22 Qure dia e atra tal bei unosai. Tamo Koba Qotei siŋgila kalil ti unu qaji naŋgi Kaja Du wo naŋgi segi aiyel qure di aqa atra tal. 23 Qure di seŋ ti bai ti na suwantosai. Qotei aqa segi riaŋ na qure di suwantoqnqas. Kaja Du a segi qure di aqa puloŋ. 24 Tamo uŋgasari sawa sawa kalilq di unub qaji naŋgi qure di aqa riaŋ na walweloqnqab. Mandor kokba sawa sawa kalil taqatejunub qaji naŋgi na naŋgo ñoro bole bole oqnsib qure miligiq osi boqnqab. 25 Dadaŋ aqa siraŋme kalil waqesqab. Olo kabutqasai. Bati gaigai waqesqab. Di kiyaqa? Qure dia qolooqnqasai. Gaigai suwaŋo sqas. 26 Tamo uŋgasari sawa sawa kalilq di unub qaji naŋgi na naŋgo wala ti naŋgo ñoro bole bole ti Qotei aqa qure koba di miligiq osi boqnqab. 27 Ariya iŋgi jiga ti tamo naŋgi kumbra uge uge yeqnub qaji naŋgi ti tamo naŋgi gisaŋ anjam mareqnub qaji naŋgi ti qure di miligiq gilqa keresai. Tamo uŋgasari naŋgo ñam ŋambile qa buk miligiq di Qotei na neŋgreŋyej qaji naŋgi segi qure di miligiq gilqa kere. Ŋambile qa buk di agi Kaja Du aqa segi buk.

Copyright information for `BOJ