Revelation of John 22

Jon a ŋambile gaigai sqajqa ya ti ŋambile gaigai sqajqa ŋamtaŋ ti unej

Ariya laŋ aŋgro dena ya bei osorbej. Ya di ŋambile qa ya. Ya di tulaŋ riaŋosiq qunuŋ bulej. Ya di Qotei wo Kaja Du wo naŋgo awo jaram kobaq dena bosiq qure aqa gam koba dauryosiq sumoqnej. Ya qalaqsi ŋambile qa ŋamtaŋ bei tigelesoqnej. Ŋam di bai segi segi qa gei utru segi segi yoqnqas. Bai bei gei utru bei yqas. Bai bei gei utru bei yqas. Degsim gilsim gei utru 12-pelatqas. Aqa baŋga na tamo uŋgasari sawa sawa kalilq di unub qaji naŋgo ma kobotetnjroqnqas. Iŋgi iŋgi kalil Qotei a uge qa marqo qaji naŋgi qure dia sqasai.

Qure dia Qotei wo Kaja Du wo naŋgo awo jaram kobaquja sqas. Qotei aqa wau tamo naŋgi a qa louoqnqab.
Osib aqa ulatamu unoqnqab. A na aqa ñam naŋgo lanjaq dia neŋgreŋyim sqas. Qure dia ambruoqnqasai. Deqa lam qatrentqasai. Seŋ suwaŋoqnqasai. Tamo Koba Qotei a segi na tamo uŋgasari naŋgi suwantnjroqnqas. Yim naŋgi bati gaigai mandor kokba sqab.

Yesus a boqujatqas

Onaqa laŋ aŋgro dena olo merbej, “Anjam endi bole kalil. Tamo kalil naŋgi qusib marqab, ‘Bole.’ Tamo Koba Qotei a na aqa medabu o qaji tamo naŋgi are tigeltetnjreqnaqa naŋgi aqa anjam marsib laqnub. Ariya bini Qotei na aqa laŋ aŋgro qariŋy-qoqa bosiq aqa wau tamo kalil naŋgi kumbra urur brantqas qaji endi osornjrqo. Niŋgi quiye. Yesus a marqo, ‘E niŋgi qa boqujatqai.’”

Qotei aqa anjam e na buk endia neŋgreŋyonum qaji di tamo uŋgasari naŋgi dauryqab naŋgi tulaŋ areboleboleinjrqas.

E Jon. E ijo dabkala na anjam kalil endi quem. E ijo ŋamdamu na kumbra kalil endi unem. Unsimqa laŋ aŋgro kumbra endi osorbej qaji aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti ino was naŋgi ti Qotei aqa medabu o qaji tamo naŋgi ti iga koba na wau qujai. Tamo kalil anjam ni buk endia neŋgreŋyonum di dauryeqnub qaji naŋgi dego iga ti koba na wau qujai. Deqa ni Qotei segi biŋiyoqnime.” 10 Osiqa merbej, “Qotei aqa anjam ni buk endia neŋgreŋyonum qaji di tentaim. Ni mare mare laqne. Di kiyaqa? Kumbra kalil endi brantqa bati jojomqo. 11 Bati jojomqo deqa uŋgum. Tamo uŋgasari kumbra uge uge yeqnub qaji naŋgi olo kumbra uge uge yoqnebe. Tamo uŋgasari kumbra jigat yeqnub qaji naŋgi olo kumbra jigat yoqnebe. Tamo uŋgasari kumbra bole bole yeqnub qaji naŋgi olo kumbra bole bole yoqnebe. Tamo uŋgasari Qotei na aqa segi kumbra boleq di sqajqa giltnjrej qaji naŋgi olo aqa kumbra bole di yoqnebe.”

12 Yesus a marqo, “Niŋgi quiye. E urur boqujatqai. Bosiy tamo naŋgo kumbra segi segi pegiysiy awai enjrqai. 13 E segi qujai namoq di unum. E segi qujai bunuq di sqai. E segi namo qaji. E segi bunuq di dego sqai. E iŋgi iŋgi kalil qa utru. Wau kalil e yeqnum qaji di e olo koboteqnum.

14 “Tamo uŋgasari naŋgo gara yansonub qatqo qaji naŋgi tulaŋ areboleboleinjrim sqab. Naŋgi ŋambile qa ŋam gei osib uyqa kere. Naŋgi Qotei aqa qure koba dego miligiq gilqa kere. 15 Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab. 16 E Yesus. E na ijo laŋ aŋgro qariŋyo-numqa niŋgi e qa loueqnub qaji niŋgi qa aisiq anjam endi palontosiq merŋgwo. E Mandor Koba Devit aqa leŋq dena ŋambabem qaji. E Devit aqa Aŋgro. Nebeqa laqnaqa burbas bunuj oqeqnu dego kere e minjaleqnum.”

17 Qotei aqa Mondor Bole wo Kaja Du aqa uŋa bunuj wo naŋgi aiyel na maronub, “Yesus, ni aue.” Anjam e neŋgreŋyo-num qaji endi niŋgi kalil qusib mariye, “Yesus, ni aue.” Tamo a ya qaryimqa bosim ŋambile qa ya di osim uyem. Ya di awai saiqoji. Qotei na laŋa anaiyqas.

Tamo uŋgasari anjam endi queqnub qaji naŋgi Jon na anjam siŋgila bei minjrej

18 Tamo kalil Qotei aqa anjam e buk endia neŋgreŋyonum di queqnub qaji naŋgi e siŋgila na endegsi minjrqai. Tamo bei a mandam qa anjam bei osim Qotei aqa anjam ende ti turtqas di gulube uge uge kalil buk endia neŋgreŋyonum qaji di Qotei na kamba tamo di yqas. 19 Ariya tamo bei a Qotei aqa anjam e buk endia neŋgreŋyonum qaji mutu bei osim taqal waiyqas di Qotei na kamba tamo di taqal waiyimqa a ŋambile qa ŋam gei osim uyqasai. A Qotei aqa qure koba dego miligiq gilqasai.

20 Tamo a kumbra endi kalil babtqo qaji a endegsi marqo, “Bole, e boqujatqai.”

Anjam endi bole. O Tamo Koba Yesus, ni aue.

21 Tamo Koba Yesus a tamo uŋgasari kalil naŋgi qa are tulaŋ boleiyeme.

Copyright information for `BOJ