Revelation of John 3

Anjam Jon a Sardis qure naŋgi qa qariŋyej qaji

Yesus a na e degsi merbsiqa olo endegsi merbej, “Sardis qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa Mondor 7-pela ejunum. E bongar 7-pela dego ojejunum. E na anjam endi ni qa qariŋyonum. Kumbra kalil ni yeqnum qaji di e qalieonum. Ino kumbra di bolesai. Naŋgi ni qa mareqnub, “Ni ŋambile ti.” Di sai. Ni moiem. Deqa ni ŋam sirosim olo tigel. Ino kumbra qudei moiosaiunu qaji di ni na olo osim siŋgilatime. Di kiyaqa? E ino kumbra unonum ijo Qotei aqa ŋamgalaq di keresai. Anjam bole ni nami qusim dauryem qaji deqa olo are qale. Are qalsim anjam di geregere dauryosim are bulye. Ni ŋam sirosim tigelqasai di e bajiŋ tamo bul ni qa boqujatqai. Bati gembu e inoq bqai di ni qalieqa keresai.

“‘Ariya tamo uŋgasari qudei Sardis qureq di unub qaji naŋgo kumbra bolequja. Naŋgo gara jigatosai deqa naŋgi gara qat jigsib e ombla walweloqnqab.

“‘Tamo a Satan ombla qotsim siŋgilas di e na gara qat jigetqai. Aqa ñam Qotei a nami ŋambile qa buk miligiq di neŋgreŋyej qaji di e na olo nuntqasai. E ijo Abu aqa laŋ aŋgro naŋgi ti naŋgo ulatamuq dia aqa ñam ubtqai. Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsi neŋgreŋyosim Sardis naŋgo laŋ aŋgro aqaq qariŋye.”

Anjam Jon a Filadelfia qure naŋgi qa qariŋyej qaji

Yesus a na e degsi merbsiqa olo endegsi merbej, “Filadelfia qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa tamo bole tiŋtiŋ. E kumbra bole qa utru. Devit a nami mandor koba soqnej dego kere e kamba aqa wau osim Qotei aqa tamo uŋgasari naŋgi taqatnjreqnum. E siraŋ bei waqtqai di tamo bei na getentqa keresai. E getentqai di tamo bei na waqtqa keresai. E na anjam endi ni qa qariŋyonum. Kumbra bole kalil ni yeqnum qaji di e qalieonum. Deqa ni unime. Ino ulatamuq dia e siraŋ bei waqtetmonum. Di tamo bei na getentqa keresai. E qalie, siŋgila kiñala inoq di unu. Ni ijo anjam geregere ojsim dauryeqnum. Ni ijo ñam uratosaieqnum. Deqa ni que. E na maritqa Satan aqa wau tamo naŋgi bosib ino siŋgaq di siŋga pulutosib endegsib qalieqab, e ni tulaŋ qalaqalaimeqnum. Ni qalie, Satan aqa wau tamo naŋgi di mareqnub, “Iga Juda tamo.” Di gisaŋ. Naŋgi Juda tamo sai. 10 Ni ijo anjam geregere dauryoqnsimqa gulube kalil qoboiyoqnsim siŋgila na tigelejunum deqa e ni taqatmesoqnitqa Satan a bosim tamo uŋgasari kalil sawa sawa kalilq di unub qaji naŋgi gulube enjrqa batiamqa gulube di ni qa bqasai. 11 E ni qa boqujatqai. Deqa anjam ni ojejunum qaji di siŋgila na ojesoqne. Amqa tamo bei na ino awai bole yaimqasai.

12 “‘Tamo a Satan ombla qotsim siŋgilaqas di e na a osiy ijo Qotei aqa tal aqa tamo bul namoq di tigeltit sqas. Deqa a olo bunu Qotei aqa talq dena oqedqasai. Aqa jejamuq di e na ijo Qotei aqa ñam ti ijo Qotei aqa qure koba agi Jerusalem bunuj aqa ñam ti ijo segi ñam bunuj ti neŋgreŋyqai. Jerusalem bunuj agi laŋ qureq di unu. Qure di ijo Qotei aqaq dena mandamq aiqas. 13 Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsim neŋgreŋyosim Filadelfia naŋgo laŋ aŋgro aqaq qariŋye.”

Anjam Jon a Laodisia qure naŋgi qa qariŋyej qaji

14 Yesus a na e degsi merbsiqa olo endegsi merbej, “Laodisia qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa anjam maro qaji tamo. E endegsi mareqnum, “Qotei aqa anjam kalil bole.” Anjam kalil Qotei a nami marej qaji di e olo geregere palontoqnsim mareqnum. Iŋgi iŋgi kalil Qotei na gereiyej qaji di aqa utru agi e segi qujai. Deqa e na anjam endi ni qa qariŋyonum. 15 Kumbra kalil ni yeqnum qaji di e qalieonum. E qalie, ni ulili sai. Ni kaŋkaŋ sai. Ni ulili sqam di kere. Ni kaŋkaŋ sqam di kere. 16 Ni tulaŋ kaŋkaŋ sai. Ni tulaŋ ulili sai. Ni kaŋkaŋ kiñala segi. Deqa e ni iŋgi qusa bul ijo miligiq na oqsim ijo medabuq na beqmqai. 17 Ni ino segi ñam soqtoqnsim mareqnum, “E silali koba ti. E ñoro koba ejunum. E iŋgi bei qa truquosai.” Ni degsi maraim. Di ni gisaŋonum. Ni laŋ qure qa iŋgi iŋgi tulaŋ saiqoji. Ni tulaŋ sougetejunum. Ni ŋam qandimo unum. Ni yosi laqnum. Di ni segi poimosai. 18 Deqa e ni endegsi mermqai. Ni ijoq dena gol ŋamyuo na yusiq milalej qaji di awaiyosim dena ni laŋ qure qa ñoro koba ti sqam. Gara qat dego awaiyosim jugwam dena ino jejamu kabutim tamo bei na ino yosi unqasai. Amqa ni jemaimqasai. Goreŋ dego awaiyosim dena ino ŋamdamu piyim ŋam poimqas. 19 Tamo naŋgi e qalaqalainjreqnum qaji di e na olo ŋiriŋtnjroqnsim gereinjreqnum. Deqa ni are siŋgilatosim ino segi kumbra gereiyosim are bulye.

20 “‘Ni e nube. E siraŋmeq di tigelesosimqa kindokindoŋeqnum. Tamo bei a ijo kakoro qusimqa siraŋ waqtetbqas e miligiq gilsiy aqo ombla iŋgi uyqom. 21 Tamo a Satan ombla qotsim siŋgilaqas di e na minjitqa aqo ombla ijo awo jaram kobaq di awoqom. Nami e segi qoto siŋgilaosimqa aqo ijo Abu wo aqa awo jaram kobaq di awoem dego kere. 22 Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsim neŋgreŋyosim Laodisia naŋgo laŋ aŋgro aqaq qariŋye.” Yesus a na e degsi merbej.

Copyright information for `BOJ