Revelation of John 4

Laŋ qureq dia naŋgi Qotei biŋiyoqnsib loueqnub

Onaqa e olo ŋam atsimqa laŋ goge dia siraŋ bei waqesonaq unem. Unsim koqyeqnamqa tamo nami tulaŋ koba leleŋonaq aqa kakoro gul anjamobulonaq quem qaji a na olo merbej, “Ni goge endeq au. Ni bamqa kumbra kalil bunuqna branteleŋqas qaji di osormqai.” Onaqa bati qujai deqa Qotei aqa Mondor Bole na e siŋgilatbonaqa e tarosimqa laŋ goge dia awo jaram kobaquja sonaq unem. Qotei a awo jaram kobaq di awesoqnej. E unem di Qotei aqa jejamu tulaŋ minjalej. Meniŋ jaspa tulaŋ minjaleqnu dego kere. Aqa jejamu meniŋ konilian bul tulaŋ lent. Tuembiŋ na awo jaram di kalilyesoqnej. Tuembiŋ aqa neŋgreŋ di tulaŋ minjalej. Meniŋ emeral tulaŋ minjaleqnu dego kere. Tuembiŋ di ŋam baŋga gesgi bul. Ariya e olo ŋam atsimqa awo jaram kokba 24 unjrem. Awo jaram kokba 24 dena Qotei aqa awo jaram ambletesoqneb. Gate kokba 24 naŋgi awo jaramq di awoeleŋesoqneb. Naŋgi gara qat olekokba jigeleŋosib mandor kokba naŋgo gate tatal wala ti gol na gereiyo qaji di ateleŋosib soqneb. Qotei aqa awo jaramq dena minjal branteqnaq unem. Qatroŋ ti kola anjam ti dego branteqnaq quem. Awo jaram namoq di ŋam puloŋ 7-pela pumbloŋeleŋeb. Ŋam puloŋ di agi Qotei aqa Mondor 7-pela naŋgi. Qotei aqa awo jaram namoq di iŋgi kobaquja bei sonaq unem. Iŋgi di yuwal baŋga bul. A qunuŋ bul dego. A tulaŋ jeqilo.

Ariya e olo ŋam atsimqa wagme ŋambile so qaji qolqe di unjrem. Naŋgi na Qotei aqa awo jaram agutosib tigelesoqneb. Naŋgo jejamu bile ti qore ti dia ŋamdamu gargekoba soqneb.
Wagme ŋambile so qaji namba 1 a laion bul. Wagme ŋambile so qaji namba 2 a bulmakau bul. Wagme ŋambile so qaji namba 3 aqa ulatamu tamo ulatamu bul. Wagme ŋambile so qaji namba 4 a baira kobaquja tiosi laqnu dego bul. Wagme qolqe ŋambile so qaji naŋgi segi segi bari 6-pela ti. Bileqsi qoreqsi bariqsi ŋamdamu gargekoba soqneb. Qanam ti qolo ti naŋgi gaigai louoqnsib endegsib mareqnub, “Qotei a siŋgila koba ti unu. Siŋgila kalil aqaq di unu. A nami soqnej. A bini unu. A bunuqna bqas.” Naŋgi degsib louoqnsib maroqnsib olo waiŋoqnsib mareqnub, “Qotei a getento koba. Qotei a getento koba. Qotei a getento koba.” Wagme qolqe naŋgi gaigai degsib louoqnsib mareqnub. Naŋgi aqaratosaieqnub.

Qotei awo jaram kobaq di awejunu qaji agi a segi qujai ŋambile gaigai sqajqa utru. Deqa wagme qolqe ŋambile so qaji naŋgi a qa tulaŋ areboleboleinjreqnaqa aqa ñam soqtoqnsibqa biŋiyeqnub. 10 Naŋgi kumbra degyeqnabqa Qotei ŋambile gaigai unu qaji aqa awo jaram namoq dia gate kokba 24 naŋgi siŋga pulutoqnsibqa a qa louoqnsibqa naŋgo gate tatal wala ti gol na gereiyo qaji di awo jaram koba namoq di breiyoqnsibqa endegsib loueqnub,

11 “O Tamo Koba, ni gago Qotei.
Ni segi qujai laŋ goge di unum.
Deqa tamo kalil naŋgi ni qa tulaŋ areboleboleinjreqnaqa ino ñam soqtoqnsibqa ino siŋgila biŋiyoqnsibqa ino sorgomq di geregere unub.
Naŋgi ni kumbra degmeqnub. Di kiyaqa? Ni na qujai marnam iŋgi iŋgi kalil branteb unub.
Ni ino segi areqalo na iŋgi iŋgi kalil gereiyem.
Dena qujai iŋgi iŋgi kalil branteb unub.”
Copyright information for `BOJ