Revelation of John 7

Israel tamo 144,000 naŋgi Qotei aqa toqor eb

1Onaqa e olo ŋam atsimqa laŋ aŋgro qolqe naŋgi laŋ utru qolqeq di tigelesonab unjrem. Jagwa qolqe naŋgi na mandam ti yuwal ti ŋam baŋga ti puynjraib deqa laŋ aŋgro qolqe naŋgi na jagwa qolqe di getentnjresoqneb. 2Onaqa laŋ aŋgro bei seŋ oqo sawaq dena brantonaq unem. A na Qotei ŋambile gaigai unu qaji aqa toqor ojesonaq unem. Ojesosiqa tulaŋ koba leleŋosiqa laŋ aŋgro qolqe mandam ti yuwal ti niñaqnjrqajqa Qotei na siŋgila enjrej qaji naŋgi minjrej, 3“Niŋgi mandam ti yuwal ti ŋam baŋga ti nami niñaqnjraib. Iga mati gago Qotei aqa wau tamo naŋgo lanjaq di toqor atnam soqnimqa di niŋgi na iŋgi iŋgi kalil di niñaqnjriye.” 4Onaqa tamo gembub naŋgi toqor eleŋeb di marnab quem. Tamo 144,000 naŋgo lanjaq di toqor ateleŋonab e unem. Tamo naŋgi di Israel naŋgo moma utru 12-pela naŋgo leŋ deqaji. 5Juda aqa leŋq dena tamo 12,000 naŋgi toqor eleŋeb. Ruben aqa leŋq dena tamo 12,000 naŋgi toqor eleŋeb. Gat aqa leŋq dena tamo 12,000 naŋgi toqor eleŋeb. 6Aser aqa leŋq dena tamo 12,000 naŋgi toqor eleŋeb. Naptali aqa leŋq dena tamo 12,000 naŋgi toqor eleŋeb. Manase aqa leŋq dena tamo 12,000 naŋgi toqor eleŋeb. 7Simeon aqa leŋq dena tamo 12,000 naŋgi toqor eleŋeb. Livai aqa leŋq dena tamo 12,000 naŋgi toqor eleŋeb. Isakar aqa leŋq dena tamo 12,000 naŋgi toqor eleŋeb. 8Sebulun aqa leŋq dena tamo 12,000 naŋgi toqor eleŋeb. Josep aqa leŋq dena tamo 12,000 naŋgi toqor eleŋeb. Benjamin aqa leŋq dena tamo 12,000 naŋgi toqor eleŋeb. Tamo kalil naŋgi di agi Qotei aqa toqor eleŋeb.

Tamo uŋgasari tulaŋ gargekoba naŋgi koroesosibqa Qotei qa louoqnsib biŋiyoqneb

9Onaqa bunuqna e olo ŋam atsimqa tamo uŋgasari tulaŋ gargekoba koroesonab unjrem. Tamo uŋgasari naŋgi di tamo bei na sisiyqa keresai. Naŋgi tulaŋ gargekoba. Naŋgi di kalil leŋ segi segi qaji, sawa segi segi qaji, jejamu segi segi qaji, anjam maro segi segi qaji. Naŋgi Qotei aqa awo jaram ti Kaja Du ti naŋgo areq di tigelosibqa gara jugo qat olekokba jigeleŋosib naŋgo baŋ na tuwom baŋga ojeleŋesoqneb. 10Osib naŋgi siŋgila na endegsib maroqneb, “Iga padalqa laqnamqa gago Qotei awo jaram kobaq di awejunu qaji naŋgi Kaja Du wo na iga eleŋosib boletgeb.”

11Onaqa laŋ aŋgro kalil naŋgi Qotei aqa awo jaram ti gate kokba naŋgi ti wagme qolqe ŋambile so qaji naŋgi ti agutnjrosib tigelesoqneb. Tigelesosibqa Qotei aqa awo jaram namoq di siŋga pulutoqnsib Qotei qa endegsib louoqneb, 12“Bole. Iga gago Qotei qa tulaŋ areboleboleigoqnimqa aqa ñam soqtoqnqom. A powo bole ti unu. Deqa iga a biŋiyoqnsim aqa ñam soqtoqnqom. A siŋgila koba ti unu. Od, siŋgila kalil aqaq di unu. A bati gaigai degesqas. Bole.”

Qotei a naŋgo gulube kalil kobotetnjrqas

13Onaqa gate koba bei na nenembej, “Tamo uŋgasari naŋgi gara qat olekokba jigejunub qaji di yai naŋgi? Naŋgi qure qabe qaji?” 14Onaqa e na kamba minjem, “O tamo koba, ni segi qalie.” Onaqa merbej, “Tamo uŋgasari naŋgi di jeu tamo naŋgi na tulaŋ ugeugeinjrsib gulube ti jaqatiŋ ti enjreb. Enjreb deqa naŋgi na Kaja Du aqa leŋ na naŋgo gara yanseleŋonab tulaŋ qatej. 15Deqa naŋgi Qotei aqa awo jaram koba namoq di tigelesosibqa naŋgi bati gaigai qanam ti qolo ti Qotei aqa atra tal miligiq di sosibqa a waueteqnub. Qotei awo jaram kobaq di awejunu qaji a segi naŋgi koba na sosimqa taqatnjroqnqas. 16Deqa naŋgi olo bunu mamnjrqasai. Naŋgi bunu ya qarnjrqasai. Seŋ na olo naŋgi kaŋkaŋnjrqasai. Iŋgi bei na dego naŋgi kaŋkaŋnjrqasai. 17Di kiyaqa? Kaja Du awo jaram koba jojomq di unu qaji a naŋgo Mandor Koba sqas deqa. A naŋgi joqsimqa ŋambile gaigai sqajqa ya jumbumq giloqnqas. Qotei a na naŋgo ŋam ya kalil nuntetnjrimqa naŋgi olo bunu akamqasai.”

Copyright information for `BOJ