Romans 1

Pol a Kristus aqa wau tamo

E Pol. E Kristus Yesus aqa wau tamo. E aqa anjam maro tamo sqajqa deqa metbej. Osiqa e Qotei aqa anjam bole marsim laqajqa deqa giltbej.

Tulaŋ nami Qotei na aqa medabu o qaji tamo naŋgi minjrnaqa naŋgi aqa anjam bole di osib neŋgreŋyeb unu. Neŋgreŋ di Qotei aqa segi neŋgreŋ. Qotei aqa anjam bole di aqa segi Ŋiri aqa anjam. Aqa Ŋiri a tamo bulyosiqa Devit aqa leŋ dena ŋambabej. Ariya bunuqna Qotei na a olo subq na tigeltonaqa bati deqa Qotei aqa Mondor na iga endegsi osorgej, Yesus a Qotei aqa Ŋiri siŋgila koba. O was qu, a gago Tamo Koba Yesus Kristus. Yesus Kristus aqa wau na Qotei a iga qa are tulaŋ boleiyosiqa aqa ñam na iga aqa anjam maro tamo sqajqa deqa wau egej. Tamo uŋgasari sawa sawa kalilq di unub qaji naŋgi Yesus qa naŋgo areqalo siŋgilatosib aqa anjam dauryqajqa deqa are qalsiq wau egej. Niŋgi dego Yesus Kristus aqa tamo uŋgasari unub. A na niŋgi metŋgej deqa niŋgi aqa anjam qusib dauryeqnub.

Qotei a na niŋgi tamo uŋgasari Rom qureq di unub qaji niŋgi tulaŋ qalaqalaiŋgeqnu. A na niŋgi metŋgej deqa niŋgi aqa segi tamo uŋgasari unub. O was qu, e anjam endi neŋgreŋyosim niŋgi qa qariŋyonum. Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

Pol a Rom naŋgi unjrqaja marej

Mati e niŋgi anjam endegsi merŋgwai. Niŋgi Yesus Kristus qa nuŋgo areqalo siŋgilatejunub deqa tamo uŋgasari naŋgi niŋgi qa saosib laqnabqa sawa sawa kalilq dia tamo naŋgi queqnub. E deqa are qaloqnsim deqa Yesus Kristus aqa ñam na ijo Qotei biŋiyeqnum. E ijo are miligi siŋgilatsim deqa e Qotei aqa wau ojoqnsim aqa Ŋiri aqa anjam bole palontosim laqnum. Qotei a segi qalie, bati gaigai e pailyqa oqnsim niŋgi qa are qaleqnum. 10 E gaigai niŋgi qa endegsi Qotei pailyeqnum, “O Abu, ni na merbimqa e gam itosiy aisiy naŋgi unjrqai.” 11 O was qu, e niŋgi nuŋgwajqa are koba qaleqnum. Di kiyaqa? E Mondor Bole aqa anjam niŋgi merŋgitqa dena nuŋgo are siŋgilatetŋgwajqa deqa. 12 Ijo areqalo agiende. E niŋgi qa bosiy niŋgi Yesus qa nuŋgo areqalo siŋgilateqnub qaji di unsiyqa dena ijo are siŋgilatqai. Ariya niŋgi dego e Yesus qa ijo areqalo siŋgilateqnum qaji di unsibqa dena nuŋgo are siŋgilatqab. Gam dena e ti niŋgi ti are siŋgilatosim sqom.

13 O was qu, niŋgi endegsib qalieoiye. Bati gargekoba e bosiy niŋgi nuŋgwajqa are qaleqnum. Ijo areqalo agiende. Tamo uŋgasari sawa bei beiq di unub qaji naŋgo ambleq dia e waueqnamqa naŋgi are bulyoqnsib Yesus qa naŋgo areqalo siŋgilateqnub dego kere nuŋgo ambleq dia dego wauoqnitqa niŋgi qudei are bulyoqnsib Yesus qa nuŋgo areqalo siŋgilatoqnqab. Ariya wau gargekoba na gam getentetbeqnu deqa agi unum. 14 E na Grik tamo naŋgi ti yauŋ tamo naŋgi ti powo tamo ti nanari tamo naŋgi ti Yesus aqa anjam minjroqnit quqwajqa deqa Qotei na e wau ebej. 15 Deqa niŋgi Rom qureq di unub qaji niŋgi dego Yesus aqa anjam bole merŋgoqnit quqwajqa deqa are prugbeqnu.

Yesus aqa anjam bole a Qotei aqa siŋgila ti unu

16 E Yesus aqa anjam bole di marqajqa jemaibosaieqnu. Di kiyaqa? Anjam bole di Qotei aqa siŋgila ti unu. Siŋgila dena Qotei na tamo kalil Yesus qa naŋgo areqalo siŋgilateqnub qaji naŋgi padalqa gamq dena olo eleŋeqnu. A namoqna Juda naŋgi eleŋej. Ariya a na olo tamo uŋgasari sawa bei beiq di unub qaji naŋgi dego eleŋqas. 17 Anjam bole dena Qotei na aqa kumbra iga osorgej. Aqa kumbra agiende. A na iga tamo bole une saiqoji qa mergej. Iga Yesus qa gago areqalo siŋgilatem dena a na iga tamo bole une saiqoji qa mergej. Di kiyaqa? Iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Agi Qotei aqa anjam bei nami endegsib neŋgreŋyeb unu, “Qotei na tamo uŋgasari a qa naŋgo areqalo siŋgilateqnub qaji naŋgi tamo bole une saiqoji qa minjrqas. Yim deqa naŋgi ŋambile gaigai sqab.”

Tamo uŋgasari kalil naŋgi na Qotei qoreiyeb

18 Iga qalie, Qotei a laŋ goge di sosiqa aqa minjiŋ boleq ateqnu. A na tamo uŋgasari a qoreiyoqnsib kumbra uge uge yeqnub qaji naŋgi awai uge enjreqnu. Naŋgo kumbra uge dena naŋgi Qotei aqa anjam bole olo tenteqnub. 19 Tamo naŋgi di Qotei aqa kumbra qalie unub. Qotei a segi na naŋgi osornjreqnu. Ariya naŋgi olo Qotei qoreiyeqnub deqa a na naŋgi awai uge enjreqnu. 20 Qotei a nami iŋgi iŋgi kalil gereiyonaq sonaqa tamo naŋgi di unoqneb dena bosi bosiq agi bini naŋgi uneqnub. Gam dena naŋgi Qotei aqa kumbra uliejunu qaji di qalie unub. Aqa kumbra utru ti aqa siŋgila gaigai sqas qaji deqa ti naŋgi qalie unub. Deqa tamo bei a endegsi marqa keresai, “E Qotei qaliesai deqa e une saiqoji.”

21 Naŋgi Qotei qa qalie unub. Ariya a segi Qotei bole naŋgi degsib marosaieqnub. Deqa naŋgi aqa ñam soqtosib a biŋiyosaieqnub. Naŋgo kumbra dena naŋgi nanaritnjroqnsiq naŋgo areqalo getentetnjreqnaqa naŋgi ambruq di laqnub. 22 Naŋgi diqoqnsib mareqnub, “Iga powo koba ti unum.” Di sai. Naŋgi tulaŋ nanarioqnsib laqnub. 23 Osib naŋgi Qotei ŋambile gaigai unu qaji a qoreiyoqnsib a qa louqajqa uratoqnsibqa olo beloqnsib mandam tamo ti qebari ti wagme ti amal ti naŋgo sulum gereiyoqnsib naŋgi qa loueqnub.

Tamo uŋgasari kalil naŋgi kumbra uge uge yeqnub

24 Naŋgi Qotei qoreiyeqnub deqa a na kamba naŋgi uratnjreqnaqa naŋgi kumbra tulaŋ uge uge jigat yoqnqajqa are prugnjreqnu. Kumbra dena naŋgi na naŋgo segi jejamu tulaŋ ugeugeiyeqnub. 25 Tamo uŋgasari deqaji naŋgi Qotei aqa anjam bole uratoqnsib olo beloqnsib gisaŋ anjam segi dauryeqnub. Deqa naŋgi Qotei bole iŋgi iŋgi kalil gereiyej qaji a qoreiyoqnsibqa iŋgi iŋgi kalil a na gereiyej qaji naŋgi di biŋinjroqnsib naŋgo sorgomq di unub. Ariya Qotei a iŋgi iŋgi kalil qa utru deqa iga bati gaigai aqa ñam soqtoqnqom. Bole.

26 Tamo uŋgasari naŋgi di Qotei qoreiyeqnub deqa a na kamba naŋgi uratnjreqnaqa naŋgi kumbra tulaŋ uge uge jigat yoqnqajqa are prugnjreqnu. Naŋgo kumbra jigat agiende. Uŋgasari naŋgi tamo ti ŋereŋqajqa uratoqnsibqa uŋa bei wo bei wo ŋereŋoqnsib sambala kumbra yeqnub. 27 Tamo naŋgi dego uŋa ti ŋereŋqajqa uratoqnsibqa tamo bei wo bei wo ŋereŋoqnsib sambala kumbra yqajqa are tulaŋ prugnjreqnu. Naŋgi jemai kumbra di yeqnub deqa Qotei a naŋgo kumbra di keretoqnsiq naŋgo segi jejamuq di awai tulaŋ ugedamu enjreqnu.

28 Naŋgi Qotei aqa sorgomq di sqajqa are qalosaieqnub deqa Qotei a na naŋgi uratnjreqnaqa naŋgi naŋgo segi areqalo uge uge dauryoqnsib kumbra uge uge yeqnub. 29 Naŋgo kumbra uge agiende. Naŋgi kumbra bole tiŋtiŋ yqajqa torei urateqnub. Naŋgi ñoro koba oqajqa mamaulnjreqnu. Naŋgi tamo naŋgi jeutnjreqnub. Naŋgi tamo qudei iŋgi koba ti unub qaji naŋgi qa are ugeinjreqnu. Naŋgi tamo naŋgi ñumsib moiotnjreqnub. Naŋgi laŋa laŋa ŋiriŋoqnsib gisaŋ anjam mareqnub. Naŋgi tamo qudei naŋgo iŋgi iŋgi laŋa yainjreqnub. Naŋgi tamo qudei naŋgi ugeugeinjreqnub. Kumbra di naŋgoq di tulaŋ koba unu. Naŋgi yomueqnub. 30 Naŋgi gisaŋ na tamo naŋgo ñam ugetetnjreqnub. Naŋgi Qotei jeuteqnub. Naŋgi diqoqnsib laqnsib naŋgo segi ñam soqteqnub. Naŋgi kumbra uge uge bunuj babteleŋeqnub. Naŋgi naŋgo ai wo abu wo naŋgo medabu gotraŋyeqnub. 31 Naŋgi areqalo bole ti sosaieqnub. Naŋgi anjam bei maroqnsib olo dauryqa urateqnub. Naŋgi naŋgo segi was naŋgi qalaqalainjrosaieqnub. Naŋgi tamo qudei naŋgi qa dulosaieqnub. 32 Qotei aqa dal anjam endegsi unu, “Tamo naŋgi kumbra uge deqaji yeqnub qaji naŋgi ñumib moreŋeb.” Dal anjam degsi unu. Tamo naŋgi di dal anjam di qalie. Ariya naŋgi olo gotraŋyoqnsib kumbra uge uge yeqnub. Di segi sai. Naŋgi na tamo qudei naŋgi kumbra uge uge deqaji yeqnab unoqnsib bole qa maroqnsib naŋgo ñam soqtetnjroqnsib minjreqnub, “Keretonub. Niŋgi kumbra degyoqniye.”

Copyright information for `BOJ