Romans 11

Qotei a Israel tamo quja quja segi elenej

Deqa e niŋgi endegsi nenemŋgwai. Qotei na aqa segi tamo uŋgasari agi Israel naŋgi qoreinjrsiq torei walinjrej e? Sai. E dego Israel tamo. E Abraham aqa moma. E Benjamin aqa leŋ. Qotei a na aqa segi tamo uŋgasari nami giltnjrej qaji naŋgi olo qoreinjrosai. Agi Elaija aqa anjam bei neŋgreŋq di unu. Aqa anjam di niŋgi qaliesai kio? Elaija a Israel naŋgo une qa marsiq endegsi Qotei pailyej, “O Tamo Koba, Israel naŋgi na ino medabu o qaji tamo naŋgi ñumeleŋoqnsib ino atra bijal giŋgeŋyeqnub. E segi qujai ni daurmeqnum. Ariya naŋgi ijo kumbra di unoqnsib deqa e lubqa laqnub.” Elaija a Qotei degsi pailyej. Ariya Qotei na kamba Elaija kiersi minjej? A endegsi minjej, “Ni segi e daurbosai. Ijo tamo 7,000 naŋgi dego e daurbeqnub. Naŋgi siŋga pulutosib gisaŋ qotei Bal a qa louosaieqnub.” Qotei na Elaija degsi minjej.

Dego kere bini Qotei a tamo quja quja segi eleŋej unub. A naŋgi qa are boleiyonaq kumbra dena a na naŋgi giltnjrej. A naŋgo wau qa are qalsiq naŋgi giltnjrosai. A naŋgi qa are boleiyonaq dena a na naŋgi giltnjrej. Naŋgi wau bei yib Qotei a deqa are qalsiq naŋgi giltnjrej qamu a naŋgi qa are boleiyej kumbra di laŋa uloŋej qamu.

Deqa iga kiersi marqom? Iga endegsi marqom. Israel naŋgi tamo bole une saiqoji sqajqa waukobaeqnab ugeinjroqnej. Ariya naŋgi qudei Qotei na aqa segi qa marsiq giltnjrej deqa naŋgi aqa ŋamgalaq di tamo bole une saiqoji unub. Ariya naŋgi qudei naŋgo areqalo geteŋnjrejunu. Agi Qotei aqa anjam bei naŋgi qa nami endegsib neŋgreŋyeb unu, “Qotei na naŋgi nanaritnjrsiqa naŋgo ŋamdamu ti naŋgo dabkala ti torei getentetnjrej. Naŋgi nami degsi soqneb bosi bosiq agi bini degsib unub.” Devit a dego naŋgi qa osiqa endegsi marej,

“Naŋgi iŋgi uyqa korooqnibqa gulube gargekoba naŋgoq di brantoqnsim kakaŋ bul naŋgi kabutnjroqnqas.
Osim sil bul naŋgo kakoro qaiŋyetnjrim naŋgo siŋga meniŋq di taŋyosib ululoŋosib awai ugedamu oqnqab.
10 Naŋgo ŋamdamu dego geteŋnjrim sawa unqajqa keresaiinjrim sqab.
Soqnib Qotei na naŋgo qore tanu pulutetnjrim naŋgi tingiqa keresai. Naŋgi gaigai degsib sqab.”

Qotei na sawa bei bei qaji naŋgi olo eleŋeqnu

11 Deqa was qu, e niŋgi endegsi nenemŋgwai. Israel naŋgi ululoŋeb deqa naŋgi torei padalqab e? Sai. Bole, naŋgi Qotei qoreiyeb deqa Qotei a olo sawa bei bei qaji tamo uŋgasari naŋgi eleŋeqnu. Ariya Israel naŋgi Qotei aqa kumbra di unsibqa are ugeinjrim aqaq olo bqajqa deqa are qalsiq sawa bei bei qaji tamo uŋgasari naŋgi eleŋeqnu. 12 Israel naŋgi Qotei qoreiyeb deqa Qotei na olo tamo uŋgasari sawa bei beiq di unub qaji naŋgi geregereinjreqnu. Israel naŋgi Qotei aqa kumbra urateb deqa Qotei na olo sawa bei bei qaji tamo uŋgasari naŋgi kumbra bole enjreqnu. Deqa iga bole qalieonum, Israel tamo uŋgasari kalil naŋgi olo puluosib Qotei aqaq bqab di Qotei na tamo uŋgasari kalil naŋgi dego kumbra tulaŋ boledamu enjrqas.

13 Ariya endego e na niŋgi sawa bei bei qaji tamo uŋgasari naŋgi anjam endegsi merŋgit quiye. Qotei na e nuŋgo ambleq di wauqajqa deqa qariŋbej. Deqa e ijo wau deqa tulaŋ areboleboleibeqnu. 14 Di kiyaqa? E na ijo was qu Israel naŋgo areqalo tigeltetnjritqa iŋgi bole bole Qotei a niŋgi eŋgeqnu qaji di naŋgi dego oqa maribqa Qotei na naŋgi qudei eleŋqas. 15 Bati Qotei na Israel naŋgi walinjrsiqa bati deqa a na tamo uŋgasari sawa bei beiq di unub qaji naŋgo jeu kobotej. Deqa iga bole qalieonum, bati Qotei na Israel naŋgi olo eleŋosim bati deqa a na tamo uŋgasari kalil moreŋeb qaji naŋgi dego olo subq na tigeltnjrqas.

16 Tamo naŋgi wit bunuj oqnsib dena bem gereiyoqnsib poteqnub. Taqal bei naŋgi Qotei atraiyeqnub. Deqa bem kalil dego Qotei aqa segi bem. Ŋamtaŋ aqa jirim di Qotei aqa segi jirim. Deqa ŋam aqa dani di dego Qotei aqa segi dani. 17 Israel naŋgi ŋamtaŋ oliv qure qaji di bul. Dani qudei Qotei na giŋgeŋnjrsiqa breinjrej. Ariya niŋgi sawa bei bei qaji tamo niŋgi nañu qaji oliv aqa dani bul. Dani di Qotei na olo eleŋosiqa ŋamtaŋ oliv qure qaji di aqa qoboq di beterteleŋej unub. Dani di agi niŋgi segi. Dani Qotei na giŋgeŋnjrsiq breinjrej qaji naŋgo sawa di agi niŋgi na olo eb. Deqa bini niŋgi ŋamtaŋ oliv qure qaji aqa dani naŋgi ti namur bole oqnsib unub. 18 Deqa niŋgi endegsib are qalaib, “Iga tamo bole deqa iga na ŋamtaŋ oliv qure qaji aqa dani naŋgi buŋnjrejunum.” Niŋgi degsib are qalqab di niŋgi mati olo endegsib are qaliye. Ŋamtaŋ oliv aqa jirim na niŋgi namur eŋgeqnu. Niŋgi na ŋamtaŋ oliv aqa jirim namur yosaieqnub.

19 Ariya niŋgi na e kamba endegsib merbqab, “Qotei na dani qudei giŋgeŋnjrsiq naŋgi breinjrsiqa olo iga osiqa naŋgo limeq di beterteleŋej unum.” 20 Di bole. Ariya Qotei aqa kumbra di aqa utru agiende. Israel naŋgi Qotei qa naŋgo areqalo siŋgilatosai deqa Qotei na naŋgi giŋgeŋnjrsiqa breinjrej. Ariya niŋgi Qotei qa nuŋgo areqalo siŋgilatejunub deqa Qotei na niŋgi olo eleŋej. Di nuŋgo wau na sai. Deqa niŋgi nuŋgo segi ñam soqtosib diqaib. Niŋgi ulaoiye. 21 Niŋgi are qaliye. Ŋamtaŋ oliv qure qaji aqa dani di Qotei na giŋgeŋnjrsiqa breinjrej. Dego kere niŋgi nuŋgo segi ñam soqtosib diqwab di a na niŋgi dego giŋgeŋŋgosim breiŋgwas. 22 Niŋgi geregere are qaliye. Qotei na tamo qudei naŋgi kumbra bole enjreqnu. Osiqa olo tamo qudei naŋgi gulube enjreqnu. Tamo naŋgi aqa kumbra urateqnub qaji naŋgi di a na gulube enjreqnu. Ariya niŋgi aqa kumbra bole dauryqa siŋgilaqab di a na niŋgi kumbra bole eŋgoqnqas. Saiqas di a na niŋgi dego giŋgeŋgosim breiŋgwas. 23 Dani qudei Qotei na nami ŋamtaŋ oliv qure qaji dena giŋgeŋnjrsiq breinjrej qaji naŋgi di olo are bulyosib Qotei qa naŋgo areqalo siŋgilatqab di a na naŋgi olo eleŋosim ŋamtaŋ oliv qoboq di betertnjrqas. Od, Qotei a na naŋgi olo betertnjrqa kere. 24 Niŋgi qalie, nami niŋgi nañu qaji oliv aqa dani soqneb. Onaqa Qotei na niŋgi giŋgeŋgosiqa osi bosiq ŋamtaŋ oliv qure qaji aqa qoboq di beterteleŋej. Ŋamtaŋ oliv qure qaji di nuŋgo ŋam utru tiŋtiŋ sai. Deqa iga bole qalieonum. Bunuqna Qotei na ŋamtaŋ oliv qure qaji aqa segi dani naŋgi olo eleŋosim bosim naŋgo segi limeq di olo betertnjrqas.

Qotei a tamo uŋgasari kalil naŋgi qa are boleiyosim eleŋqajqa are unu

25 O was qu, niŋgi segi powo koba ti unub niŋgi degsib are qalaib. Niŋgi degaib deqa e na uli anjam bei niŋgi endegsi merŋgwai. Israel tamo uŋgasari qudei naŋgo areqalo geteŋnjrejunu. Naŋgi degsib soqnib sawa bei bei qaji tamo uŋgasari Qotei na nami giltnjrej naŋgi di kalil eleŋekritosim kereamqa bati deqa a na Israel tamo uŋgasari kalil naŋgo areqalo dego waqtetnjrimqa naŋgi olo are bulyqab. 26 Gam dena Qotei na Israel naŋgi kalil eleŋqas. Agi Qotei aqa anjam bei nami endegsib neŋgreŋyeb unu, “Aqaryaigo Tamo Koba a Jerusalem dena tigelosim bosim Jekop aqa leŋ kalil naŋgi are bulyetnjrim naŋgi Qotei aqa anjam gotraŋyqajqa kumbra di olo uratqab. 27 Yimqa bati deqa e na ijo anjam bunuj siŋgilatosiy naŋgi enjrsiy dena naŋgo une kalil kobotetnjrqai.” Qotei aqa anjam nami degsib neŋgreŋyeb. 28 Israel naŋgi Yesus aqa anjam bole qoreiyeb deqa naŋgi Qotei ti jeu unub. Deqa Qotei na naŋgi kamba uratnjrsiq olo niŋgi sawa bei bei qaji tamo eleŋeqnu. Ariya nami Qotei na Israel naŋgi aqa segi tamo sqa marsiq naŋgi giltnjrsiq qalaqalainjrej. A naŋgo moma utru naŋgi qa are qalsiq deqa naŋgi qalaqalainjrej. 29 Iga qalie, Qotei na aqa segi tamo uŋgasari naŋgi metnjroqnsiq iŋgi bole bole enjreqnu. Aqa kumbra di a olo uratqa keresai.

30 Nami niŋgi Qotei aqa anjam gotraŋyoqneb. Ariya bini Israel naŋgi kamba Qotei aqa anjam gotraŋyeqnub. Gam dena Qotei a olo niŋgi qa are boleiyoqnsiq eleŋeqnu. 31 Dego kere Israel naŋgi Qotei aqa anjam gotraŋyeqnub ariya Qotei a niŋgi qa are boleiyoqnsiq eleŋeqnu gam dena bunuqna a naŋgi qa kamba olo are boleiyosim eleŋqas. 32 Qotei a na tamo uŋgasari kalil naŋgi uratnjreqnaqa naŋgi aqa anjam gotraŋyoqneb. Aqa kumbra dena a na naŋgi tonto talq di breinjrobulonaq soqneb. Qotei a degyej. Di kiyaqa? A naŋgi kalil qa olo are boleiyosim eleŋqajqa deqa.

Iga Qotei aqa ñam soqtoqnqom

33 O was qu, Qotei aqa kumbra ti aqa areqalo ti aqa powo ti di tulaŋ kokba. Di tulaŋ guma koba dego. Deqa iga na aqa areqalo di aqa utru geregere ubtsim marqa keresai. Aqa gam kalil dego iga dauryosim itqa keresai. 34 Agi Qotei aqa anjam bei nami endegsib neŋgreŋyeb unu, “Tamo yai a Qotei aqa areqalo qalieqa kere? Osim a gam osoryqa kere? 35 Tamo yai na Qotei iŋgi bei yosimqa a na kamba olo yqajqa minjqas? Tamo dego bei sosai.” 36 O was qu, Qotei a iŋgi iŋgi kalil ateleŋej. A iŋgi iŋgi kalil qa utru. Iŋgi iŋgi kalil di aqa segi. Deqa iga bati gaigai aqa ñam soqtoqnqom. Bole.

Copyright information for `BOJ