Romans 12

Niŋgi nuŋgo segi jejamu osib Qotei atraiyiye

Ariya was qu, Qotei a iga qa are tulaŋ boleiyosiq eleŋej deqa e niŋgi siŋgila na endegsi merŋgwai. Niŋgi nuŋgo segi jejamu osib Qotei atraiyiye. Osib deqa niŋgi ŋambile sosib Qotei aqa segi tamo uŋgasari tiŋtiŋ sqab. Deqa niŋgi kumbra Qotei a tulaŋ areareteqnu qaji di yoqniye. Niŋgi degyoqnqab di niŋgi Qotei aqa kumbra na bole louoqnqab. Niŋgi mandam tamo naŋgo kumbra dauryosib walwelaib. Qotei na areqalo bunuj eŋgoqnimqa niŋgi kumbra bunuj dauryoqniye. Osib kumbra dena niŋgi Qotei aqa areqalo geregere qalieqab. Agi niŋgi kumbra bole ti kumbra Qotei a tulaŋ areareteqnu qaji de ti kumbra tulaŋ tiŋtiŋo de ti geregere qalieqab.

Wau segi segi Qotei na niŋgi eŋgej qaji di yoqniye

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib. Niŋgi qalie, iga kalil jejamu qujai. Ariya gago jejamu miligiq dia sarqei gargekoba unub. Naŋgi kalil wau qujai yosaieqnub. Naŋgi wau segi segi yeqnub. Dego kere iga tamo uŋgasari gargekoba unum. Ariya iga kalil Kristus aqa jejamu qujai. Deqa iga segi segi kalil koba na korooqnsim jejamu qujaiq di turtejunum.

Qotei a iga qa are boleiyonaq deqa iga powo segi segi egej. A na tamo qudei naŋgi aqa medabu osib anjam palontqajqa powo enjrej deqa naŋgi a qa nuŋgo areqalo siŋgilatosib aqa anjam geregere palontoqnebe. A na tamo qudei naŋgi aqa segi tamo uŋgasari naŋgi aqaryainjrqajqa powo enjrej deqa naŋgi na tamo uŋgasari naŋgi di geregere aqaryainjroqnebe. A na tamo qudei naŋgi aqa anjam plaltqajqa powo enjrej deqa naŋgi aqa anjam geregere plaltoqnebe. A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.

Niŋgi na nuŋgo Kristen was naŋgi bole qalaqalainjroqniye

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye. 10 Niŋgi gaigai Qotei aqa segi tamo uŋgasari naŋgi nuŋgo was tiŋtiŋ edegosib naŋgi qalaqalainjroqniye. Niŋgi nuŋgo segi ñam tentoqnsib Kristen was naŋgo ñam olo soqtoqniye. 11 Niŋgi gaigai siŋgila na Qotei aqa wau ojoqniye. Qotei aqa Mondor a nuŋgoq aioqnsim are tigeltetŋgoqnim niŋgi Tamo Koba Yesus aqa wau ojqajqa tulaŋ siŋgilaoqniye. 12 Mondoŋ Tamo Koba Qotei na niŋgi laŋ qureq osi oqwas. Niŋgi deq oqwajqa tariŋoqnsib areboleboleiŋgoqneme. Osib gulube niŋgi qa boqnimqa siŋgila na tigeloqnsib qoboiyoqniye. Osib gaigai Qotei pailyoqniye.

13 Qotei aqa segi tamo uŋgasari qudei naŋgi iŋgi qa truquoqnibqa niŋgi na naŋgi aqaryainjroqniye. Tamo laŋaj naŋgi dego nuŋgo meq boqnibqa naŋgi oqnsib geregereinjroqniye.

14 Tamo qudei naŋgi na niŋgi ugeugeiŋgibqa di uŋgum, niŋgi kamba olo naŋgi ugeugeinjraib. Niŋgi naŋgi qa pailyoqniye. Od, Qotei na naŋgi aqaryainjrqajqa deqa are qalsib naŋgi qa pailyoqniye. Qotei na naŋgi ugetnjrqajqa deqa pailyaib. 15 Kristen was qudei naŋgi areboleboleinjrimqa niŋgi kamba dego naŋgi koba na areboleboleiŋgeme. Ariya was qudei naŋgi akamoqnibqa niŋgi kamba dego naŋgi koba na akamoiye. 16 Niŋgi segi segi kalil areqalo qujaitosib soqniye. Niŋgi nuŋgo segi ñam soqtqa are qalaib. Niŋgi tamo laŋaj naŋgi koba na laqajqa areboleboleiŋgem. Niŋgi nuŋgo segi ñam soqtosib endegsib maraib, “Iga segi qalie koba ti unum.” Niŋgi degaib.

17 Tamo qudei naŋgi na niŋgi kumbra uge eŋgibqa niŋgi na kamba kumbra uge enjraib. Niŋgi tamo kalil naŋgo ŋamgalaq dia kumbra bole segi yoqniye.

18 Niŋgi ŋiriŋ ti qoto ti uratiye. Gam soqnimqa niŋgi gaigai tamo kalil naŋgi koba na are qujaitosib soqniye. 19 O ijo was bole, tamo qudei naŋgi na niŋgi gulube eŋgibqa niŋgi na kamba naŋgi gulube enjraib. Uratosib Qotei aqa baŋq di naŋgi atib a segi naŋgi qa minjiŋ oqim gulube enjrqas. Agi Tamo Koba Qotei aqa anjam bei nami endegsib neŋgreŋyeb unu, “Une kambatqajqa wau di ijo segi wau. E segi na tamo naŋgo une qa naŋgi kambatnjrqai. 20 Deqa ino jeu tamo bei a mamyimqa ni a gereiysim iŋgi anaiye. A ya qaryimqa dego gereiysim ya anaiye. Ni a degyimqa a aqa kumbra uge qa are qalsim jemaiyqas.” 21 O was qu, e niŋgi segi segi endegsi merŋgwai. Kumbra uge bei na ni ojqa laqnim ni segi siŋgilaosim kumbra bole dauryosim dena ni kumbra uge buŋyosim gotraŋyqam.

Copyright information for `BOJ