Romans 14

Niŋgi nuŋgo Kristen was naŋgo kumbra pegiyaib

Tamo bei a Yesus qa aqa areqalo siŋgilateqnu ariya aqa areqalo di kiñala siŋgilaosaiunu. Deqa niŋgi a qoreiyaib. Niŋgi a osib Kristen naŋgo ambleq osib boiye. Niŋgi aqa kumbra qudei uge qa minjsib a ombla anjam na qotoqnaib. Tamo qudei naŋgi Yesus qa naŋgo areqalo siŋgilateqnub deqa naŋgi iŋgi uyo bei getentosaieqnub. Kalil uyeqnub. Ariya tamo qudei naŋgo areqalo kiñala siŋgilaosaiunu deqa naŋgi wagme qudei uyosaieqnub. Kalil getenteqnub. Ariya tamo naŋgi iŋgi iŋgi kalil uyeqnub qaji naŋgi na olo tamo naŋgi wagme getenteqnub qaji naŋgi uge qa minjraib. Tamo naŋgi wagme getenteqnub qaji naŋgi na tamo naŋgi iŋgi iŋgi kalil uyeqnub qaji naŋgi dego uge qa minjraib. Qotei na naŋgi ti niŋgi ti eleŋej. Ni tamo kiero deqa ni na tamo bei aqa wau tamo a uge qa minjqam? A siŋgila na wau bole yqas kio aqa wau uloŋqas kio di aqa wau qa gate a segi na pegiyqas. Ariya e qalieonum, a siŋgila na tigelosim wau bole yqas. Di kiyaqa? Tamo Koba Qotei na a siŋgilatimqa a siŋgila na tigelesqas.

Tamo bei a endegsi are qalqas, “Bati qudei yori bati kokba. Bati qudei bati laŋaj.” Ariya tamo bei a marqas, “Sai. Bati kalil kerekere unub.” O was qu, niŋgi segi segi nuŋgo areqalo geregere tenemtosib areqalo bole ti soqniye. Tamo qudei naŋgi yori bati qudei uneqnub. Di naŋgi Tamo Koba Yesus qa are qalsib deqa uneqnub. Tamo qudei naŋgi iŋgi iŋgi kalil uyeqnub. Di naŋgi Tamo Koba Yesus qa are qalsib deqa iŋgi iŋgi kalil uyeqnub. Di kiyaqa? Naŋgi iŋgi uyqa oqnsib Qotei pailyoqnsib uyeqnub. Tamo qudei naŋgi iŋgi qudei getenteqnub. Di naŋgi Tamo Koba Yesus qa are qalsib deqa getenteqnub. Naŋgi dego iŋgi getentqa oqnsib Qotei pailyoqnsib getenteqnub.

Iga qalie, gago ambleq di tamo bei a endegsi marqa keresai, “Ijo ŋambile di ijo segi. E segi na taqatejunum. E moiqai di e segi na marsiy moiqai.” A degsi marqa keresai. Iga ŋambile sqom di Tamo Koba Yesus aqa segi. Ariya iga moiqom di dego Tamo Koba Yesus aqa segi. Deqa iga ŋambile sqom kio iga moiqom kio di iga Tamo Koba Yesus aqa segi tamo uŋgasari sqom. Kristus a dego moisiq olo ŋambile osiq subq na tigelej. Di kiyaqa? A tamo ŋambile unub qaji ti tamo moreŋeb qaji naŋgi ti naŋgo Tamo Koba sqajqa deqa.

10 Niŋgi kiyaqa nuŋgo Kristen was naŋgo kumbra laŋa tenemtoqnsib naŋgi uge qa minjreqnub? Osib naŋgi misiliŋnjreqnub? Niŋgi qalie, mondoŋ iga kalil Qotei aqa ulatamuq di tigelamqa a na iga pegigwas. 11 Agi Qotei aqa anjam bei nami endegsib neŋgreŋyeb unu, “E segi Tamo Koba. E ŋambile gaigai unum qaji. Deqa e anjam bole endegsi marqai. Mondoŋ tamo uŋgasari kalil naŋgi e qa bosib ijo areq di siŋga pulutosib naŋgo medabu qujaitosib merbqab, ‘Ni segi Qotei.’” 12 Qotei aqa anjam degsi unu. Deqa iga qalieonum, iga segi segi kalil Qotei aqa ulatamuq di tigelosim gago kumbra kalil babtosim minjnam a quqwas.

Niŋgi nuŋgo Kristen was naŋgi kumbra ugeq breinjraib

13 Deqa iga gago Kristen was naŋgo kumbra laŋa tenemtosim naŋgi uge qa minjrqasai. Iga areqalo bei dauryqom. Gago Kristen was naŋgi une ataib deqa iga na naŋgi kumbra uge beiq breinjrqasai. 14 Tamo Koba Yesus a na e powo ebej deqa e qalieonum, iŋgi iŋgi kalil Qotei na ateleŋej qaji di aqa ŋamgalaq di jiga bei saiqoji. Ariya Kristen was bei a iŋgi bei qa endegsi are qalqas, “Iŋgi di jigat.” A degsi are qalqas deqa a iŋgi di getentqas. 15 Deqa a iŋgi di jigat qa marimqa niŋgi iŋgi di osib uyib niŋgsimqa a are gulubeiyqas. Nuŋgo kumbra dena niŋgi qalaqalaiyo kumbra uratosib deqa niŋgi aqa are gulubetetqab. Kristus a nuŋgo was deqa osiq moiej deqa niŋgi nuŋgo iŋgi uyo qa osib a ugeugeiyaib. 16 Niŋgi mareqnub, iga iŋgi di uyqom di kumbra bole. Ariya nuŋgo kumbra bole di tamo qudei naŋgi unsib olo uge qa maraib deqa niŋgi geregere ŋam atoqniye. 17 Iga iŋgi ti ya ti uyoqnqom kumbra dena Qotei a gago Mandor Koba sosim iga taqatgwasai. Ariya iga kumbra tiŋtiŋ yoqnsim lawo kumbra dauryoqnsim Qotei aqa Mondor aqa wau na areboleboleigim sqom kumbra dena Qotei a gago Mandor Koba sosim iga taqatgwas. 18 Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

19 Deqa iga kalil lawo na sqajqa ti gago Kristen was naŋgo are siŋgilatetnjrqajqa ti deqa are qaloqnsim wauoqnqom. 20 Niŋgi iŋgi uyo qa are qalsib dena Qotei aqa wau ugetaib. Bole, niŋgi iŋgi iŋgi kalil uyqa kere. Ariya niŋgi iŋgi bei uysib dena nuŋgo was bei uneq waiyqab di niŋgi kumbra uge yonub. 21 Deqa niŋgi kumbra di uratiye. Niŋgi wagme kio niŋgi wain kio uysibqa o kumbra bei kio ysibqa dena nuŋgo was bei uneq waiyqab di niŋgi kumbra uge yonub. 22 Niŋgi Qotei qa nuŋgo areqalo siŋgilateqnub deqa niŋgi qalie, niŋgi iŋgi iŋgi kalil uyqa kere. Ariya niŋgi iŋgi bei uyib nuŋgo was bei a unsim uneq aiaim deqa niŋgi nuŋgo qalie di nuŋgo are miligiq di ulitib soqnem. Yim Qotei a segi unqas. Tamo bei a iŋgi bei bole qa marsim uyqa are gulubeiyqasai di a arebolebole na uyem. 23 Ariya tamo bei a iŋgi bei uyqa osim areqalo aiyeltosim uyqas di a une ti sqas. A Qotei qa aqa areqalo siŋgilatosiq ariya a qaliesai, a iŋgi di uyqas di kumbra bole kio sai kio. Degsim a une ti sqas. Iga Qotei qa gago areqalo siŋgilatosim ariya iga qaliesai, kumbra bei bole kio sai kio. Osim iga kumbra di yqom di iga une yonum.

Copyright information for `BOJ