Romans 16

Pol a Rom naŋgi qa kaiye anjam qariŋyej

1Niŋgi gago jaja Fibi osib geregereiyiye. A na Kristen tamo uŋgasari Senkria qureq di unub qaji naŋgi qa waueqnu. 2Niŋgi Tamo Koba Yesus aqa ñam na Fibi osib geregereiyiye. Iga Qotei aqa segi tamo uŋgasari unum deqa iga kumbra bole di yqom. Fibi a gulube ti soqnimqa kio iŋgi bei qa truquamqa kio niŋgi na aqaryaiyiye. A nami tamo uŋgasari gargekoba naŋgi aqaryainjroqnsiq e dego aqaryaiboqnej. Deqa niŋgi a urataib. A kamba dego aqaryaiyiye.

3Niŋgi na ijo kaiye anjam endi osib Prisila wo Akwila wo naŋgi aiyel minjriye. Naŋgi aiyel e koba na Kristus Yesus aqa wau ojeqnum. 4Nami jeu tamo naŋgi na e lubqa laqnab naŋgi aiyel moiqa ulaosaiosib deqa e aqaryaibeb. Deqa e naŋgi qa osim Qotei biŋiyeqnum. E segi sai. Kristen tamo uŋgasari sawa sawa kalilq di unub qaji naŋgi dego naŋgi aiyel qa osib Qotei biŋiyeqnub. 5Niŋgi na ijo kaiye anjam endi osib Kristen tamo uŋgasari kalil Prisila wo Akwila wo naŋgo talq dia koroosib loueqnub qaji naŋgi dego minjriye.

Osib Epainetus dego ijo kaiye anjam endi minjiye. A ijo kadoi bole. A Esia sawa qaji. Nami tamo kalil Esia sawaq di unub qaji naŋgi are bulyosaisonabqa Epainetus a namoqna are bulyosiq Kristus qa aqa areqalo siŋgilatej.

6Niŋgi na ijo kaiye anjam endi osib Maria dego minjiye. A niŋgi aqaryaiŋgwa are qaloqnsiq waukobaoqnej.

7Niŋgi na ijo kaiye anjam endi osib Andronikus wo Junias wo naŋgi aiyel dego minjriye. Naŋgi aiyel ijo leŋ naŋgi. Jeu tamo naŋgi na naŋgi aiyel e ombla na ojeleŋosib tonto talq breigonab soqnem. Qotei na naŋgi aiyel wau enjrej deqa naŋgi aqa anjam maroqnsib laqnub. Deqa naŋgi aiyel dego ñam ti. Nami e are bulyosaisonam naŋgi namoqna are bulyosib Kristus qa naŋgo areqalo siŋgilateb.

8Ariya niŋgi ijo kaiye anjam endi Ampliatus dego minjiye. Aqo aiyel Tamo Koba Yesus aqa kumbra dauryeqnum deqa e na a tulaŋ qalaqalaiyeqnum.

9Niŋgi Urbanus dego ijo kaiye anjam endi minjiye. A iga ti koba na Kristus aqa wau ojeqnum. Ariya niŋgi Stakis dego ijo kaiye anjam endi minjiye. A ijo kadoi bole.

10Niŋgi Apeles dego ijo kaiye anjam endi minjiye. Iga qalieonum, a bole Kristus dauryeqnu.

Ariya niŋgi ijo kaiye anjam endi osib Aristobulus aqa leŋ naŋgi ti dego minjriye.

11Osib ijo kadoi Herodion a dego ijo kaiye anjam endi minjiye.

Ariya niŋgi ijo kaiye anjam endi osib Narsisus a ti aqa leŋ naŋgi ti dego minjriye. Naŋgi Tamo Koba Yesus aqa tamo bole.

12Niŋgi Trifina wo Trifosa wo naŋgi aiyel dego ijo kaiye anjam endi minjriye. Naŋgi aiyel Tamo Koba Yesus qa waukobaeqnub.

Niŋgi ijo kaiye anjam endi osib Persis dego minjiye. A ijo kadoi bole. A Tamo Koba Yesus aqa wau siŋgila na ojeqnu.

13Niŋgi ijo kaiye anjam endi Rufus dego minjiye. A tamo bole deqa a Tamo Koba Yesus dauryeqnu. Aqa aniqali dego ijo kaiye anjam endi minjiye. A ijo ai bul.

14Niŋgi ijo kaiye anjam endi osib Asinkritus na Flegon na Hermes na Patrobas na Hermas na Kristen was kalil naŋgi koba na unub qaji naŋgi ti dego minjriye.

15Osib Filologus wo Julia wo naŋgi aiyel dego ijo kaiye anjam endi minjriye. Ariya niŋgi na ijo kaiye anjam endi osib Nereus na aqa jaja na Olimpas na ariya Qotei aqa tamo uŋgasari kalil naŋgi koba na unub qaji naŋgi ti dego minjriye.

16Ariya niŋgi na nuŋgo Kristen was kalil naŋgi segi segi kundoqnjriye. Kumbra di agi Qotei aqa tamo uŋgasari kalil naŋgi yeqnub.

Ariya Kristus aqa tamo uŋgasari qure qure kalilq di unub qaji naŋgi na kamba dego niŋgi kaiyeiŋgonub.

Tamo qudei naŋgi Kristen tamo uŋgasari naŋgi potoaiyeltnjreqnub

17O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye. 18Tamo deqaji naŋgi gago Tamo Koba Kristus aqa wau ojosaieqnub. Naŋgi naŋgo segi jejamu qa are qaloqnsib deqa waueqnub. Osib tamo uŋgasari naŋgi walawalainjroqnsib gisa gisaŋnjroqnsibqa naŋgi nanaritnjreqnub. Deqa kumbra bole ti kumbra uge ti di naŋgi geregere poinjrosaieqnu. 19O was qu, e qalie, niŋgi Qotei aqa anjam geregere dauryosib laqnub. Laqnab tamo kalil naŋgi nuŋgo kumbra deqa queqnub. Deqa e niŋgi qa tulaŋ areboleboleibeqnu. Ariya e niŋgi endegsi merŋgwai. Niŋgi kumbra bole yqajqa geregere qalieosib kumbra uge yqajqa aŋgro kiñilala bul nanariosib soqniye. 20Qotei a na iga so bole ti lawo kumbra ti egeqnu. Sokiñala a na Satan ojsim osi bosim nuŋgo siŋgaq di atim niŋgi na sosqab.

Gago Tamo Koba Yesus a niŋgi qa are boleiyeme.

Tamo qudei naŋgi dego kaiye anjam Rom naŋgi qa qariŋyeb

21Ijo wau qujai Timoti a na niŋgi kaiyeiŋgwo. Lusius na Jeson na Sosipater na naŋgi qalub dego niŋgi kaiyeiŋgonub. Naŋgi qalub ijo leŋ naŋgi.

22Ijo ñam Tertius. E Pol aqa medabuq na anjam endi osim ijo segi baŋ na neŋgreŋyonum. E segi dego Tamo Koba Yesus aqa ñam na niŋgi kaiyeiŋgonum.

23Gaius a na dego niŋgi kaiyeiŋgwo. A na e osiqa aqa segi talq dia e geregereibeqnu. Osiqa Kristen tamo uŋgasari kalil endia unub qaji naŋgi dego geregereinjreqnu.

Erastus wo gago was Kwartus wo naŋgi aiyel dego niŋgi kaiyeiŋgonub. Erastus a na Korin qure naŋgo silali taqateqnu.

24Gago Tamo Koba Yesus Kristus a niŋgi kalil qa are boleiyeme. Bole.

Iga Qotei aqa ñam soqtoqnqom

25Qotei a siŋgila koba ti unu deqa a na niŋgi siŋgilatŋgwas. Yim niŋgi Yesus Kristus aqa anjam bole e na mare mare laqnum qaji di osib nuŋgo areqaloq di siŋgilatqab. O was qu, tulaŋ nami Kristus aqa anjam bole di uliesoqnej. 26Ariya bini Qotei na anjam di olo boleq atej. Qotei ŋambile gaigai unu qaji a marnaqa aqa medabu o qaji tamo naŋgi anjam di neŋgreŋyonab sonaqa iga na olo anjam di osim tamo uŋgasari sawa sawa kalilq di unub qaji naŋgi minjre minjre laqnum. Deqa naŋgi uli anjam di quoqnsib poinjreqnu. Qotei na anjam di boleq atej. Di kiyaqa? Tamo uŋgasari sawa bei beiq di unub qaji naŋgi anjam di qusib naŋgo areqaloq di siŋgilatosib dauryqajqa deqa. 27Qotei qujai di a powo koba ti unu. Kumbra kalil a Yesus Kristus aqa baŋ na yoqnej qaji iga deqa are qaloqnsim aqa ñam gaigai soqtoqnqom. Bole.

Copyright information for `BOJ