Romans 7

Iga areqalo bunuj osim dena iga kumbra bole dauryoqnqom

O was qu, e na anjam endi niŋgi tamo dal anjam qalie unub qaji niŋgi merŋgwai. Tamo a moiosaisoqnimqa dal anjam na a taqatoqnqas. Ariya a moiim dal anjam na a olo taqatqasai. Niŋgi di qaliesai kio? Agi dal anjam a marqo, uŋa bei a tamo ti soqnim aqa tamo a moiosaisoqnim a tamo di uratqa keresai. Dal anjam na getentejunu. Ariya aqa tamo moiimqa di a olo tamo bei oqa kere. Dal anjam na olo getentqasai. Deqa aqa tamo soqnim a tentsim olo tamo bei anjamyqas di iga a qa endegsi marqom, a sambala uŋa. Ariya aqa tamo moiimqa di a olo tamo bei oqa kere. Dal anjam na getentosai. Deqa a tamo bei oqas di a sambala uŋa sai.

Deqa ijo was qu, niŋgi Kristus aqa jejamu beteryosib a ombla moreŋeb. Deqa niŋgi olo dal anjam aqa sorgomq di sosai. Niŋgi tamo bei agi Kristus subq na tigelej qaji aqa segi tamo uŋgasari unub. Deqa iga kumbra bole Qotei a tulaŋ areareteqnu qaji di babtoqnqom. Nami iga areqalo namij aqa kumbra dauryoqnem bati deqa dal anjam a na gago siŋgaq di gago baŋq di gago jejamu kalilq dia areqalo uge uge tigelteqnaqa iga une yoqnem. Osim kumbra dena iga moio qa gam babtoqnem. Bati deqa dal anjam na iga tonto talq waigobulonaq soqnem. Ariya bini iga Kristus ombla moiobulejunum deqa iga olo dal anjam aqa sorgomq di sosai. Iga bini waueqnum di iga dal anjam nami neŋgreŋyeb qaji di dauryqajqa wauosai. Qotei aqa Mondor na kumbra bunuj osorgeqnaqa iga kumbra di dauryqajqa waueqnum.

Une na iga moiotgej

E maronum, nami dal anjam a na gago miligiq dia areqalo uge uge tigelteqnaqa iga une yoqnem. Deqa iga kiersi marqom? Dal anjam a une tamo bulej e? Sai. Dal anjam a une tamo bulosai. Dal anjam a na ijo une e osorbeqnu. Osorbosai qamu e une poibosai qamu. Agi dal anjam a marej, “Ni ino was aqa iŋgi iŋgi qa mamaulmaiq.” Degsi marosai qamu mamaul kumbra di kumbra uge e degsi poibosai qamu. Ariya dal anjam bej dena une a gam itosiqa ijo are miligiq di mamaul kumbra gargekoba babteleŋej. Dal anjam bosai qamu une a tamo moio qaji bulosiq uliejunu qamu. Nami e Qotei aqa dal anjam qalieosaisosimqa bati deqa e ŋambile soqnem. Ariya bunuqna Qotei aqa dal anjam ijoq bonaqa ijo une a tamo ŋambile so qaji bulosiq tigelej. 10 Onaqa dena e moiem. Dal anjam aqa wau utru agi tamo naŋgi ŋambile enjrqajqa. Ariya e dal anjam dena ŋambile osai. Dal anjam na e moiotbej. 11 Di kiyaqa? Dal anjam bej dena une a gam itosiqa e gisaŋbej. Kumbra dena une na e moiotbej.

12 Deqa iga dal anjam qa kiersi marqom? Iga endegsi marqom. Dal anjam a bole. A Qotei aqa segi dal anjam. A Qotei aqaq na bej. Dal anjam kalil di Qotei aqa segi anjam. A tiŋtiŋ kalil. A bole kalil. 13 Deqa e kiersi marqai? Dal anjam bole dena e lubsiq moiotbej degsi marqai e? Sai. Une na e moiotbej. Dal anjam bej dena une a gam itosiqa e moiotbej. Qotei a odonaqa une a kumbra degyej. Di kiyaqa? Qotei a endegsi are qalej, une a boleq dimqa iga unsim qalieqom, bole, une a tulaŋ ugedamu. Gam dena dal anjam a une aqa kumbra boleq atej. Une aqa kumbra di tulaŋ ugedamu.

Gago une na iga taqatgejunu

14 Iga qalie, Qotei aqa dal anjam a Qotei aqa Mondor aqaq na bej. Ariya e areqalo namijq di unum deqa e Qotei aqa areqalo dauryqa keresai. Di kiyaqa? Une na e tonto talq waibobulej unum deqa e une aqa wau tamo unum. 15 Kumbra e yeqnum qaji di aqa utru e poibosai. Kumbra e yqajqa arearetbeqnu qaji di e olo yosaieqnum. Ariya kumbra e yqajqa arearetbosaieqnu qaji di e olo yeqnum. 16 Ariya kumbra e yeqnum qaji di e yqajqa arearetbosaieqnu. Ijo kumbra dena e endegsi osorbeqnu, e are qalonum, Qotei aqa dal anjam a bole. 17 Deqa e segi na kumbra uge di yosaieqnum. Une ijo are miligiq di unu qaji a na kumbra uge di yeqnu. 18 E qalieonum, ijo are miligiq di iŋgi bole bei sosai. E ijo areqalo namij qa maronum. Bole, e kumbra bole dauryqa are unu. Ariya e dauryqa keresai. 19 Kumbra bole e yqajqa arearetbeqnu qaji di e yosaieqnum. Kumbra uge e yqajqa arearetbosaieqnu qaji di e olo yeqnum. 20 Ariya kumbra e yqajqa arearetbosaieqnu qaji di e olo yeqnum. Deqa e segi na kumbra di yosaieqnum. Une ijo are miligiq di unu qaji a na kumbra di yeqnu.

21 Deqa ijoq di e kumbra endegsi unonum. E kumbra bole dauryqajqa are sonaqa kumbra uge na olo gam getentetbeqnu. 22 Bole, ijo areqaloq di e Qotei aqa dal anjam tulaŋ arearetbeqnu. 23 Ariya e endegsi unonum. Une a ijo baŋq di ijo siŋgaq di ijo jejamu kalilq dia wauoqnsiqa Qotei aqa dal anjam ijo areqaloq di unu qaji di qoto iteqnu. Une di siŋgila koba. Deqa a na e tonto talq waibobuloqnsiqa ijo baŋ ti ijo siŋga ti ijo jejamu ti kalil di siŋgila na taqateqnu. 24 Gulube dena ijo areqalo tulaŋ ugetetbeqnu! Deqa tamo yai na e aqaryaibimqa e ijo jejamu moiqas qaji endi olo uratqai? 25 Od, e qalieonum. Gago Tamo Koba Yesus Kristus aqa baŋ na Qotei na e aqaryaibimqa e ijo jejamu endi uratqai. Deqa e Qotei tulaŋ biŋiyeqnum. Bole, e ijo segi areqalo na Qotei aqa dal anjam aqa sorgomq di unum. Ariya e areqalo namijq di unum deqa ijo une na e olo siŋgila na taqatbeqnu.

Copyright information for `BOJ