1 John 2

Ma Iesus Ke Narliiv Ama Mening Uut

Gua rluavik, ngua iil sagel ngen ne gua arlem. I ngen ip taquarl ngua uis na ngen. I quasik ngu narliip ngene tekmet ne ama viirang. De ariq i aiv iak, i qa mit puuqas i qa rekmet ne ama viirang, dai mager ip kerl guirl sagel auur a Maatpitka, ma Iesus Kristus. I ai de vetpet de qurli ma Iesus Kristus de auut Mam aa snaing i qe raring sagel ka bareq auut. I ma Iesus dai maikka ama Atluqa na qa. De ngerek se qa, i qa ral ama Ngemumaqa aa serlinki sever auur a viirang arle ves ip ke guirl auut sagel ka ip ke iames ne auut. De lua i qa ral ama getget dai quasiq aip bareq auut naik dap bareq ama qaqet per ama aivetki mai.

I ariq aiv uuret dadem ama lengi i ama Ngemumaqa qa qurl auut, dai uure taqat drlem ai rlas tem uut men a qa marevan. Dav ariq aiv iak ka sil ma’, “I qatikka ngua, dai sa qurli ngua mene ma Kristus aa liinka.”

Dav arik per aa mugunes dai quasik ket dadem ama Ngemumaqa aa lengi; dai luqa dai qe kaak temiis, i quasik kat drlem se qa, i quasik ke iames marevan.
Dap katikka muqas, i luqa i qet dadem ama Slurlka aa lengi ver aa mugunes, dai luqa qa mugelnas ne ama Ngemumaqa aa ngimsevetki marevan. I lungera ama gamansena dai ngere teqerl auut aip kua qurl uut per aa liinka marevan. I nemta i re tuqun ai ra nevet ma Kristus aa liinka dai qatikka mager ip ta tuaqen aa gamansena ver araa mugunes.

Ma Iesus Aa Ngimsevetki Dai Ama Barliini Aa

Maikka gua rluavik, kuasiq ai ngurl kurl a ngen te ama lengiini ama dlek pem iini ama iamesini. Dap ngua iil ama lengi i murl nge rarles ne ma Iesus a lat, i lua i qerl kurl auut tem nget. I murl nauirl i qa qurl auut te aa lengi ama dlek pem nget, be sa ngene narli sever a nget. Dap muqas, i ngua iil sagel ngen i raquarli ama lengiqi sever ama Slurlka aa ngimsevetki dai maikka qi veviit ip ngene narligel ki ip taquarl ama lengiqi ama iameski i qiat den. I qi tekmet na ngen iv a ngen arlem never a na ne ama revan, i uut lu ma Kristus aa arlem taqurla. Be raquarl ma Kristus aa nirlaqi qim ngim be qi bingbing men ama arlenki be maikka qi taqam ngim marevan. I ariq aiv iak ka taqen ma’, ‘Ngua dai qurli ngua mene ma Kristus aa aiska i ama nirlaqa never a ngua.’

Dav arik luqa dai ai de qe serlin be ama vu aa rutka sagel aa rluaqa, dai maikka ama bengaingki dai qia uung per a qa malai.
10 Dap nemta i araa arlem sagel araa rluavik dai maikka ma Iesus aa nirlaqi dai qia uung per a ra. Taqurla be quasik mager ip te serlmen se a qerang. 11 Dap nemta i rat drlem sa serlin dai maikka quasik tet lu ai ra tit taqurla, i ra tit men ama arlenki. I maikka ama arlenki qia uung per a ra.

Ma Jon Ka Iil Sagel Ama Barlta De Ngen Ama Lugutta

12 I ngua iil sagel ngen, i gua uis na ngen, i raquarli ma Kristus dai sa qa lemerl ngen te a ngen a viirang mai, ne aa dlek. I maikka aa rlenki dai qi veviit. 13 I ngua iil sagel ama ngerlmamta i ama barlta veleqes na ngen, i raquarli rlas tem ngen mene Luqa i ama Rarlimini-na-qa se ama tekmeriirang mai, i murl lua i nge rarles.

De ngua iil sagel ngen ama quatta ama lugutta, i raquarli sa ngene uirl se ma Satan i ama vuqa.

I ngua iil sagel ama arluis mai i raquarli ngen mai ngen drlem se a uut Mam.
14 De saqi ngua iil sagel ngen ama ngerlmamta i raquarli ngene taqat drlem Luqa i baing se ama tekmeriirang mai ne aa dlek i lua i qe tekmet ne ama aivetki.

De ngua iil sagel ama lugutta ama quatta i raquarli i ngene tal ama dlek ip ngen deraarl malkuil, i ama Ngemumaqa aa lengi dai qurli nget de a ngen a rlan. De ai de ngenerl uirl se ma Satan i ama vuqa.


Kula Uure Rarliq Ama Tekmeriirang Never Ama Aivetki

15 Dap kula ngene rarliq ama tekmeriirang never ama aivetki de ngen ara gamansena. I ariq aiv iaq i vem ka se liirang aa, dai quasik mager iv auut Mam aa ngimsevetki dai kurli qi gel ka. 16 I raquarli ama gamansena mai never ama aivetki dai ngere baing se ama viirang naser ama qetdingki ara narliip; de maikka ngere kiarlet ne auut iv uure mali re ama viirang ne auur a saqang; de maikka ai de uure barlnas iv uure uas te ama tekmeriirang mai ne auur a dlek naik. Katikka liirang aa mai dai quasiq ai iirang nagel a uut Mam. Dap liirang aa mai dai iirang nge men never ama aivetki. 17 Be maikka liirang aa mai never ama aivetki dai maikka diip ngere aasik de diip perleset ne iirang. Dap nemta i ra mugelnas ne ama Ngemumaqa aa narliip, dai diip te iames gel ka masmas be quasik perlverleset.

Ma Iesus Aa Qumespik

18 Gua rluavik, i ngu rarlik ngen, i mager ip ngen drlem ai lua iara dai ama giqi ip diip prleset ne ama aivetki. I mekai uurel sil ba ngen sevet luqa i diip ke barlnas ip ma Kristus aa qumeska na qa. Dai be raqurla dai sa uut lu buup na ra i ra raneng ama luqupka ip ma Kristus aa qumes-ta na ra. Dai qatikka lua i baing se ra raqurla dai be uut drlem ai sa ama qares ip diiv ama Slurlka ke verleset ama aivetki mai. 19 I lura ama qumes-ta dai mekai qurli ra gel uut dap ta ngim temanau na uut, i raquarli quasiq ai ra nevet ma Kristus aa liinka ne ama revan. I quaatta i ra never auut marevan dai be mager ip kurli ra mas gel uut. Dap ta mit, taqurla be liina nge sil ai ra dai quasiq ai ra never auut.

20 Dap ngen, dai quasiq ai qurli ngen taqurla. I raquarli sa ama Ngemumaqa qa mel se ngen de qa mu aa Qevepka ver a ngen, be ngen mugelnas ne liirang aa ama revan iirang. 21 I quasiq ai ngua iil lungera ama lengi i raquarli quasiq ngen taqat drlem sever ama aiska ama revan. Kuasik. I nguat drlem ai ngene taqat drlem sever ama revan iirang, dai be mager ip ngen drlem ai quasik mager iv ama kaaqiirang dai iirang ngere riirl nev ama revan iirang. 22 Dai iari dai re kaak tem uut, dap ngu lu nanaa ip diiv uure taqat drlem se ra? Katikka lura i re tuqun ai ma Iesus dai quasiq ai ama Ngemumaqa qa nem ka manarevuk. Luqa i qa taqen taqurla dai qe kaak dap maikka qa dai ma Kristus aa qumeska na qa. I maikka qa ngim temanau ne ma Iesus ke ne auure Mam ne veleqes ama qaqet i buup na ra. 23 I lura mai i quasik tat drlem se ma Iesus i ama Ngemumaqa aa Uimka, dai saqikka quasik mager ip trlas tem ta men aa Mam ama Ngemumaqa.

Ama Qevepka Ama Glasingaqa Qe Su Uut Te Ama Lengi Ama Revan Nget

24 Dap mager ip ngene taneng ama Lengi ama Atlunget malkuil de a ngen a rlan, i murl nge rarlma de ngene narli nget. I aip ngen deraarl malkuil ne lungera ama lengi, dai diip kurli ngen mas gel auut Mam ke ne aa Uimka. 25 I murl ama Ngemumaqa qa muvuusep, ip diip ke iames nauut, be diip ke qurl uut te ama iames i qurli nget masmas.

26 I ngua iil sagel ngen sevet lura i re kaaq ai ra nemen ma Kristus, be re narliip te guirltik per a ngen a tuaqevep ip te lenges na ngen. 27 Dap maikka ama Ngemumaqa i qerl kuarl te ama Qevepka bareq a ngen be qurli qa mas de a ngen a rlan. Taqurla dai be quasik mager iv iari re rarles i re su ngen te iarang ama lengi. I raquarli aa dlek ngen aa saikngias dai lungera dai maget kut ngen ip ke taqa su ngen sever ama tekmeriirang mai. I qatikka ai de qe taqa su ngen ne ama revan be quasik mager ip ke kaak tem ngen ne liirang aa. Dap ka su ngen ai mager ip trlas tem ngen men ma Kristus sademna.

Mager Ip Ngen Daarl Malkuil I Raquarli Ma Kristus Ke Rarlik Ngen

28 Guariqena ngu rarlik ngen. I qatikka mager ip trlas tem ngen mene ma Kristus per ama niirl mai. Dai be lua i ma Kristus ka men se uut, dai be quasiq ama qelev uut dap diip mager iv uut, i uut taarl malkuil i ding se uut men a qa. 29 I ngen drlem ai ama Ngemumaqa dai maikka ama seserl-ka i qe tekmet ne ama atlu, taqurla be mager ip ngen drlem ai lura i ra tuaqen aa gamansena dai qatikka ra, dai ra never aa liinka marevan.

Copyright information for `BYX