Acts 20

Ma Paulus Ka Guirl Savet Ma Masidonia

Baip prlesprlesdem ne ama buurlemki ne ama qaqet, de ma Paulus ka nes te ama Kristenkena ip te iing demna. Be aip ta iing demna de qa sem madlek na ra ne ama Slurlka aa lengi. Baip maget de qa mit namen na ra be qa mit savet ma Masadonia. De qurli ra vet luqia ama qerlingki ma Masadonia de qe sem madlek na ra ne ama lengi iirang i buup ne iirang. Baiv aa de ra mit savet ma Akaia Provins, sagel kurli ra se ama iaquan ama depguas. Baip lua i qa tuvem nanas ip diip ka tit savet ma Siria Provins de iari ra sil ba qa ai ama Judaqena ta tuvem nanas ip diip te veleng ka. Taqurla de ma Paulus ka mu aa qevep ip diip ke guirl ip ka iit pet ma Masadonia Provins.

Kuasik ngua sil ba ngen, dap medu iari dai re ne ma Paulus i araa rlen, ma’,

“Supater i qa navet ma Biria, i aa mam ma Pirhus.

De i aiam navet ma Tisalanikka, i ma Aristakas ke ne ma Sikundas.

De iak navet ma Dabi i aa rlenki ma Gaius, de iari ama depguas na ra navet ma Aisia Provins, i ma Timoti de ma Tikikas de ma Tropimas.”

I lura ama ngeriqit ngen a iam na ra dai ra uirl savet ma Troas be qurli ra re na uun. Dav as qurl uun aa vet ma Pilipai be qurl uun per ama Asmeski i ra tis ki ma, “Ama-Angeluqa-Ka-Ngim-Manep-Sagel-Ama-Qerekka.” Be aiv aa de uun mit dama sipki navet ma Pilipai. Baip naser ama niirl ama ngeriqit ngen a iam de vuk se uun gel auun a rluavik i medu ra uirl savet ma Troas. Be qurl uut pet ma Troas se ama niirl ama ngeriqit ngen a iam.

Ma Itikas Kaat Naivuk Dav Ama Slurlka Qa Iames Na Qa

Baip per ama Sandiqa de ama Kristenkena re iing demna ip te bingmet ne ama bret de ra tes ip ta tu araa qevep sevet ma Iesus. I qurli ra mer iaiq ama rumki ve ama vetki i qatias ama slurlki. I qatias kia maarl saiviit. Pe luqia ama vetki dai ama rum ama depguas i nget daleng men na. Be ra iing demna met luqia ama rumki i qi de qurli. De ma Paulus ke su ra ne ama lengi ama atlunget i raquarli bigia de qa tit namen na ra. I qe su ra be qe su ra be deng de ama arlenki araa rlan dap katiaskerl ke su. Dap maikka met luqia ama rumki dai buup ne ama mudem i ra mudem nget. Taqurla be maikka ama nangas mer ama rumki. Taqurla dav ai de iaq ama gilka i aa rlenki ma Itikas dai ai de qa mugun mer ama vinduaqi i ai de quasik tes pes met ki. I qa mugun aa mer ama vinduaqi dap ma Paulus dai qatiaskerl ka taqen per ama ainkules de luqa ma Itikas dai menep menep ka baiv aa de maikka qe taqa brlaing. I qe taqa brlaing be maikka quasik ke narli. Taqurla be qa mit ka aat naiviit be qatias ka aat imanep per ama aivet. De iari ret lu raqurla de qatias te qiuaik naiviit saver ama aivet ip tet lu qa. Tat den be ret luqa i qasa qa ngip. 10 Dap ma Paulus ka meriirl be sagel ka. Be qa aan aa buum gel ka de qa uurut men na qa de ka taqen sagel aa rluavik ma’,

“Kula ngeneng ning i maikka luqa dai as ama qeneqaqa pem ka.”

11 Baip maget de saqiaskerlka ma Pauluskena ta sik samer ama rumki. De ra bingmet ne ama bret de ra tes ip ta tu araa qevep sevet ma Iesus. De ma Paulus ka rluses ne aa lengi be deng se bingbigia. De qa mit namen na ra. 12 Taqurla de ra mit se luqa ama gilka ma Itikas i sa ma atluqa. Taqurla be maikka ama uairlka ver a ra malai.

13 Baip maget de ma Paulus ka ruqun na uut iv uure uirl dama sipki savet ma Aisia. Dap ka dai diip ka tit ne aa ilaing pe ama qevel naser auut. 14 Baip kurl uut pet ma Asus de ma Paulus ka men gel uut. De qe ne uut sede ama sipki be uut mit navet ma Asus savet ma Mitilini. 15 Baiv aa de uut mit dama sipki be uure brlaing per ama kaska. Be aip bigia de uure aang pet ma Sios, de uut tit be saqiaskerlka uut brlaing dama sipki. Baip bigia de uut men pet ma Samos. De mas per auut. Baip bigia de uut tit be uut men pet ma Militis. 16 Dap maikka ma Paulus dai ama qenken per a qa i qe narliip masna qa ren pet ma Jarusalem ip kurli qa ver ama nirlaqa ma Pentikos. Taqurla de ma Paulus ka aangmes pet ma Epasas i quasik ke narliip kurli qa ver ama ainkules pet ma Aisia Provins.

17 Baip kurl uut pet ma Militis de ma Paulus ka nem ama lengi sagel lura i re uas te ama Kristenkena pet ma Epasas. De qa ruqun ip ta ren sagel ka pet ma Militis. 18 Baip ta men sagel ka de qa ruqun na ra ma’,

“Guariqena, sa ngen drlem sevet gua mugunes i qurli ngua gel ngen. I mekai lua i nge rarles i ngua men per a ngen a Provins ma Aisia be qurli ngua gel ngen pet ma Epasas.
19 I ngua dai ama Slurlka aa maatpitka na ngua, be ngua manep nanas. Dap maikka ama Judaqena i ai de re siquat ip te lenges na ngua. Maikka ai de ama merlenka ver a ngua be maikka nguk nak se liirang aa. 20 De ngen drlem i quasiq ai ama aamuu ngua se ama Slurlka aa lengi. Dap maikka ngu teqerl a ngen de ngu taqa su ngen sever a qa. I ngu su varlen ama buurlem ne ama qaqet de ngu su ve a ngen a vet. 21 A revan i sa ngua reqerl a ngen ama Judaqena ngen ama nangista. I ngua su ngen taqurliani, ma’, ‘Maikka ngenem ngim temanau ne a ngen a viirang mai de maikka arlem ngen naver ama Ngemumaqa. De maikka rlas tem ngen de ngen diit naser a uur a Slurlka ma Iesus.’

22 Dap ngene lu, sa iara dai ama Qevepka ama Glasingaqa qa raneng a ngua ip diip ngua tit savet ma Jarusalem. Dap kuasik ngua drlem aip diiv a qerang nanaa nget den per a ngua. 23 Dap sa medu ama Qevepka ama Glasingaqa qa sil ba ngua ai lua i ngu paikmet gel ama Kristenkena ver araa luqup. I qa sil ba ngua raqurliani ma’, “Diip ngi iit savet ma Jarusalem dap diip ta ru ngi ve ama Karabus de diiv ama merlen iirang nget den per a ngi.”

24 Dap ngua dai quasik mager ip ngua tu gua qevep sever a nas be ariq aip ta veleng ngua dai quasiq a qeni. Dap maikka ngu narliip ngu verleset ne ama rletki i ama Slurlka ma Iesus ka nem ngua ip ngut matna. I gua rletki ip ngul sil ne ama lengi ama atlunget sever ama Ngemumaqa aa ngimsevetki.”

Ma Paulus Ka Sil Ai Diip Kuasik Te Lu Qa

25 “De ngen lu. Sa mekai ngua tit gel ngen per a ngen a luqup mai de ngul sil sever ama Ngemumaqa aa tekmeriirang. Dav iara dai diip ngua tit mas namen na ngen be saqias diip kuasik mager ip ngene lu gua sakngaqi. 26 Taqurla dai vet luqa iara ama nirlaqa de ngu taqal sil ba ngen. Ai ariq aiv iak ka mit puuqas ne ama Slurlka aa Aiska dai quasiq ai diip gua qeni sevet liina i arle ves. 27 I raquarli ngua dai ai de quasik ngu aang per a qeni arle ves dap maikka ngua sil sever ama Ngemumaqa aa tekmeriirang mai bareq a ngen. 28 Dap maikka ngen i ama Ngemumaqa qa mu ngen i aa Qevepka ama Glasingaqa ka mak na ngen ip ngene uas te aa uis. Dai maikka mager ip ngene taqa uas temiis ngen aa uis. Be mager ip ngene taqa uas te aa uis ip taquarl ama durlaikki i ai de qi taqa uas te are uis. I maikka ama Ngemumaqa dai qa vandem per a uut ama Kristenkena ne aa uimka aa qerekka. 29 I maikka iara dai ngua drlem ai aip ngua mit namen na ngen de diiv iari ip taquarl ai de ama serlik-pe-ailaing i ai de qe suam se ama durlaik, i diip te siquat ip te lenges ne a ngen a tuaqevep. 30 De ngul sil ba ngen, ai qatiaskerlka diiv iari never a ngen ta raarlviit de re kaak te iari naver a ngen. Dap lura dai re lenges ne ama lengi i maikka re narliip te kiat mer iari ama Kristenkena ip ta tit naser a ra. 31 Taqurla dai maikka ngenem ngim miqet te liirang aa. De quasik mager ip ngerlangken per a ngen na ngua i mekai ngut matna gel ngen se ama ages ama depguas. I maikka raquarli gua arlem naver a ngen taqurla de maikka ngu sem madlek na ngen iak de iak.

32 Be iara ngu kuarl tem ngen iv ama Ngemumaqa qe uas tem ngen. De diiv aa lengi ngen aa ngimsevetki dai diip ngere riirl ngen. De qatikka diip ke qurl a ngen de ngene lura i sa qa mak na ra te aa tekmeriirang ama atliirang per aa luqupki. 33 De ngen lu, mekai qurli ngua gel ngen de quasiq ai ngu kiat mer a ngen aa tekmeriirang ip taquarl ama qelaing ngen ama luan. 34 Dap ngen drlem ai mekai ngut matna ne gua ngerik ip te ama qelaing ip nge tat naver a ngua, ngu ne gua ari. 35 De sa ngua reqerl a ngen ne gua rletki i ngut matna madlek dai saqikka mager ip ngene tekmet taqurla. Taqurla be diip ngen derat never iari i quasiq araa qerang. De mager ip ngen drlem sever auur a Slurlka ma Iesus aa lengi i qa su uut ma’, “Ariq aiv iak ka qurl a ngi dai diiv ama arlias per a ngi dav ariq aip ngia qurl iak te a qeni dai maikka diiv ama Ngemumaqa qe quarl te ama arlias malai.”

36 Baip ma Paulus ka taqen be verleset de qa aan aa buum ke na ra de qe raring. 37 Baip ke raring be verleset de maikka ama qilkilem na ra de re rurut per a qa de ra taneng per a qa de re sarl araa ngerik te na qa. 38 I maikka re tekmet taqurla i ama arlem ta i raquarli qa sil ba ra ai saqias diip kuasik mager ip te lu a sakngaqi. Taqurla de ra mu ve aa rleng dama sipki.

Copyright information for `BYX