Revelation of John 3

Ma Kristus Aa Lengi Sagel Aa Liinka Vet Ma Sadis

De ngi iil gua lengi sagel ama Angeluqa i qe uas te ngua liinka vet ma Sadis. I gua lengi dai raqurliani ma’,

“Ngu taneng ama Ngemumaqa aa Qevepka i aa dlek i ngere taneng ama rleriirang ama ngeriqit ngen iiram. De ngu taneng ama ualdang ama ngeriqit ngen a iam na nget. I ngua nem lungera ama lengi sagel ngen. I nguat drlem se ama tekmeriirang i ai de ngene tekmet niirang. Be ai de iari ra taqen ai a ngen a Lautuqi dai ama atluqi. Dap kuasik. I sa qia ngip.
Taqurla, dai qula ngene brlaing. I raquarli ama qares ip ngenep ngip, dai maikka mager ip ngene sem madlek na nas ne lungera ama dleq ama langas. I quasik ngua lu a qeni never a ngen a gamansena i iini nge men be ama seserl iini de gua Ngemumaqa aa saqang. Dap mager ip puktik per a ngen ne lungera i mekai ngene narli nget de ngen mer a nget. De mager ip ngenet dadem nget de ngene guirltik per a ngen a rut. I ariq aip kuasik ngen maarlviit never ama brlaingki, dai naqatikka diip masna ngua ren sagel ngen. I diip masna ngua ren sagel ngen ip taquarl ai de ama suamka qat den. Be diip kuasik ngen drlem se gua giqi.

  • Dap katiaskerl iari never a ngen pet ma Sadis, i quasik ta rekmet ne a nge ama vu be ra dai ama atlu ra na ra. Be lura araa gamansena dai ama atlu nget. Be ra dai mager ip ta ruremiis ne ama luan ama lauil a nget, de ra tit te na ngua.
Dai ariq aip nemta i ra uirl se ama arasmesna, dai ra ru lungera raqurla ama luan ama a lauil a nget per a nas. De quasik mager ip ngu qirlvem se araa rlen nev ama Langinka ne ama Iames. Kuasik. Dap diip ngu sil ai ra nemen a ngua. I diip ngu sil taqurla vet Gumam aa saqang de vet ngen aa Angeluqena araa saqang.”
  • Dai lura mai i re narli liirang iara, dai maikka mager ip te taqa mu araa asdem te ama lengi i ama Qevepka ama Glasingaqa qa taqen na nget sagel ama Lautuqi.”

Ma Kristus Aa Lengi Sagel Aa Liinka Vet Ma Piladelpia

De maikka mager ip ngi iil sagel ama Angeluqa i qe uas te ama Slurlka aa liinka vet ma Piladelpia. I gua lengi dai raqurliani ma’,

“Ngua dai maikka ama glasingaqa ngua, de ngua dai ama rarlimini se ama gamansena ama a revan nget.
De gua dlek ip taquarl ma King Daivit. I qa raneng ama kiqa semer ama tarlka ser aa luqupki.
Be ngu taneng luqa ama kiqa. Be aip ngu raarl mer ama tar, dai quasik mager iv a qek ke ves.
De aip ngua ves, dai quasik mager iv a qek ke rattem.

De nguat drlem se ama tekmeriirang mai i ai de ngene tekmet niirang. Dai ngene lu! Per a ngen a saqang, dai ngua raarl mer ama tarlka. Be quasik mager iv a qek ke ves met ka. De nguat drlem ai naqa askerlka a ngen a dleq aa, i nget kuarla. Dap sa ngen mit kut gua lengi. De quasik ngen ngim temanau ne gua rlenki. De ngen drlem se lura i a ngen a qumespik, i ra nemen ma Satan aa liinka, i ai de re tuqun ai ra never ama Judaqena. Dap kuasiq ai ra never ama Judaqena. Dai ra dai ama kaak-met-ta. Dai ngene narli. Diip ngu rekmet ne lura ip ta ren ip ta aan araa buum sagel ngen. Be diip tat drlem, ai maikka ngu rarlik ngen.

10 
  • De ngen dai sa ngen mit kut gua lengi, be ngen maarl madlek pe ama merlen mai i nge men per a ngen. Taqurla be diip ngu uas tem ngen. Be liina i aiv ama qasiquatka qat den per ama qaqet mai ver ama aivetki, dai diip ngu uas tem ngen ip kuasik ka lenges na ngen.
11 I ama qares ip nguat den. Be liirang aa i ngene taneng iirang, dai maikka mager ip ngene taneng iirang merep. I ariq a qek ka at a ngen a ranbandem. 12  I nemta i re ruirl se ama arasmesna, dai diip ngua raarl na ra, be diip kurli ra ip taquarl ama venaik ip ngere sem madlek ne Gumam ama Ngemumaqa aa vetki. Be diip kuasik mager ip lura ra aang nev ama Ngemumaqa aa vetki ip saqias sedarliik. Maikka quasik maget. I diip ngu iil gua Ngemumaqa aa rlenki men a ra. I luqia ama qerlingki dai ma Jarusalem ama iameski. I luqia dai qiat den navuk nev uusep nagel gua Ngemumaqa. De qerekka diip ngu iil gua rlenki ama iameski men a ra.” 13 
  • Dai lura mai i re narli liirang iara, dai maikka mager ip te taqa mu araa asdem te ama lengi i ama Qevepka ama Glasingaqa qa taqen sagel aa Lautuqi.”

Ma Kristus Aa Lengi Sagel Aa Liinka Vet Ma Laodisia

14 De maikka mager ip ngi iil sagel ama Angeluqa i qe uas te ama Slurlka aa liinka vet ma Laodisia. I lungera ama lengi dai nget nagel ngua, i qurli ngua masmas ip ngu uas te Gumam aa lengi ip baing se aa tekmeriirang mai i qa muvuusep nauirl. I ama Ngemumaqa dai ama Revanka, taqurla be ngua maarl malkuil, be ai de vet ngu taqal sil ne aa lengi. I qatikka ai de masmas ngurl uirl se ama tekmeriirang mai i raquarli ama Ngemumaqa qa mu ngua nauirl.

15 De sa nguat drlem se ama tekmeriirang mai i ai de ngene tekmet niirang. I quasiq ama uilas per a ngen a rut sever a ngua, de quasiq ai ama uises de a ngen a rlan sever a ngua. De quasiq ama arlias per a ngua i aip ma uilas kuarla dap kua ama uupka quarla, i quasik ngu narliip se liiram a mai. Maikka quasik. Taqurla dai diip ngua quat na ngen taquarl ama kainaqi i ama qunengaar vemki.

17 I ai de ngene tuqun ma’, “Uut dai buup ne auur a qelaing. De uut dai buup ne auur a quvang iirang aa. Be quasiq ai ama ruus per a uut te a qeni.”

  • Kuasik, i maikka qurli ngen mavik, be maikka mager iv ama qaqet araa arlem never a ngen. I maikka ngen dai ama vu ngen de ama ruus per a ngen te ama Slurlka aa tekmeriirang. De ngen dai ama rlen ngen de qurli ngen sena. Dap katikka ngen, dai quasik ngen drlem ai qurli ngen taqurla.
18  Taqurla dai be maikka mager ip ngene van per ama tekmeriirang ama atliirang nagel ngua. I mager ip ngene raneng Gua gol, i sa ama altingki qia iin me nget be ama glasing a nget. Be qia verleset ne ama semaning mai naver a nget. I aip ngen ban pet lungera ama gol nagel ngua, dai diip buup ne a ngen a tekmeriirang ama atliirang. De maikka mager ip ngene van per ama luan ama gelagil a nget ip ngen uung per a ngen a qetdingki na nget. Taqurla ip diip kuasiq ama qaqet tet lu ngen i qurli ngen naik be ama qelep ngen. De mager ip ngene van per ama marasin ip ngen du nget per a ngen pes, ip mager ip ngenem ngim ne ama atlu. 19 De lura gua qaqet i vem ngua se ra, i ngu rarlik ta, dai ai de ngu seserl ver araa ne gua lengi, de ngu su ra ip kuasik te tekmet ne ama vu. Taqurla dai maikka mager ip ngene guirltik per a ngen a rut.

20 
  • Ngene narli. Ngua iara i ngua maarl mer ama tarlka, be qurli ngua aa de ngu deldel. Be ariq aip nemka i qe narli ngua qenem de qa rattem mer ama tarlka, dai be diip ngua ran be diip kurli ngu na qa. De diip ngu na qa, uun dres i auun a rluaiam na na.
21 Dai aip nemta i ra uirl se ama arasmesna, dai diip gua ding se ra ip ta ruqun de gua snaing ip te na ngua uure uas pet gua luqupki. Taqurla ip saqikka raquarl murl ngua, i ngua uirl se ama arasmesna. Be ngua mugun ngu ne Gumam mer a siaqi ve aa dlek.

22 
  • Dai lura mai i re narli liirang iara, dai maikka mager ip te taqa mu araa asdem te ama lengi i ama Qevepka ama Glasing-aqa qa taqen sagel aa Lautuqi ver ama luquviirang.
Copyright information for `BYX