Ecclesiastes 10

Мухи умершыя згнояют елеа сладость: честно малое мудрости паче славы велики безумия. Сердце мудраго одесную его, сердце же безумнаго ошуюю его: и в путь егда безумный идет, сердце его лишается, и яже помышляет, вся безумие суть. Аще дух владеющаго взыдет на тя, места твоего не остави: яко изцеление утолит грехи велики. Есть лукавство, еже видех под солнцем, аки невольно изыде от лица владеющаго: вдан безумный в высоты велики, а богатии во смиренных сядут: видех рабов на конех, и князей идущих яко рабов на земли. Копаяй яму впадет в ню, и разоряющаго ограду угрызнет его змий. Иземляй камение поболит от них, разсецаяй дрова беду приимет в них: 10 аще спадет сечиво, и сам лицем смятется: и силы укрепит, и изюбилие мужу мудрость. 11 Аще угрызнет змий не в шепте, и несть излишества обавающему. 12 Словеса уст премудраго благодать, устне же безумнаго потопят его: 13 начало словес уст его безумие, и последняя уст его прелесть лукава. 14 Безумный умножает словеса: не разуме человек, что бывшее и что будущее, что созади его, (и) кто возвестит ему? 15 Труд безумных озлобит их, иже не разуме ити во град. 16 Горе тебе, граде, в немже царь твой юн, и князи твои рано ядят. 17 Блаженна ты, земле, еяже царь твой сын свободных, и князи твои во время ядят в силе и не постыдятся. 18 В леностех смирится строп, и в празднестве рук прокаплет храмина. 19 Во смех творят хлеб и вино и елей, еже веселитися живущым: и сребра со смирением послушают всяческая. 20 И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое.
Copyright information for CSlElizabeth