Psalms 2

Вскую шаташася языцы, и людие поучишася тщетным? Предсташа царие земстии, и князи собрашася вкупе на Господа и на Христа Его. Расторгнем узы их и отвержем от нас иго их. Живый на небесех посмеется им, и Господь поругается им. Тогда возглаголет к ним гневом Своим и яростию Своею смятет я: Аз же поставлен есмь Царь от Него над Сионом, горою святою Его, возвещаяй повеление Господне. Господь рече ко Мне: Сын Мой еси Ты, Аз днесь родих Тя: проси от Мене, и дам ти языки достояние Твое, и одержание Твое концы земли: упасеши я жезлом железным, яко сосуды скудельничи сокрушиши я. 10 И ныне, царие, разумейте, накажитеся вси судящии земли. 11 Работайте Господеви со страхом, и радуйтеся Ему со трепетом. 12 Приимите наказание, да не когда прогневается Господь, и погибнете от пути праведнаго, егда возгорится вскоре ярость Его: блажени вси надеющиися Нань.
Copyright information for CSlElizabeth