1 Thessalonians 5

1Gama, turamã tar, amã sain ado naa nigin to matotkeneĩf. 2Ere nigin, ã keleĩ bagai, Odug nẽ naa, bẽ tamo bõ isiyouf gen wõ youf. 3Tamo kayau wau inosiya ado morõ sã tabodok de mog, daũ fiya nunũ idi bun, kayau kesu gõ fiya nigin firi yedig gen isi di, idi to diyalalauf.

4Anĩ ere, turamã tar, ã gugum bun to ufaregef, anĩ nigin, naa anĩ bẽ tamo gen to isi fen, ba yeĩf. 5Ã ganan lalan ado we bun temeleĩ. Ada bõ ado gugum nẽ sã. 6Anĩ nigin, ada, idi tunĩ denek gen to tafarauf, anĩ ere, ada lo tafel fen, karĩ adouf. 7Are idi mulaĩ temeleid, bõ anĩ denẽdig, idi aai meleid waĩ yedig, bõ anĩ aai meleid waĩ yedig. 8Anĩ ere, ada we nẽ nigin, ada dug nigin karĩ ado fen, momoiya wau laa fiya ado siot kapa gen tafoun ken, kel gei fiya nẽ wau iseya anim hat kapa gen kurũ tafouf. 9Negur ada didi yaleya nigin to igirnadan, anĩ ere, ada neda Odug Jesus Kristus bunem kel gei fadauf nigin igirnadan. 10Ĩ ada nigin laa fen, are ada mata be tabodok, gare be tauf are, ĩ geid tabodõf nigin age fen. 11Anĩ nigin, abob wau tales fen, abob walesagauf, gama ago gef gen.

Idikeleya Nẽ Faded Fiya

12Turamã tar, gama amã marokeneik, idi ã atun kabĩ totol dalef, idi Odug bun ãgenei uyu irouya difar fen, wedereĩ dirouf anidi karĩ wiyẽdigouf. 13Idi kabĩ dirouf nigin ge fen, idi nigin wauĩ laaf fen, fatuk bagai karĩ wiyẽdigouf. Abob nigin wau inosiya bun ufaragauf. 14Turamã tar, amã totol bagai marokeneik, fõ temeleid wedereid uroug, anini temeleid waud waleseg fen, forõ temeleid usennẽdigouf, ganan nigin nameĩ ukeleg ubodõgouf. 15Taka nem taka nẽ mosor to solo fouf, anĩ ere, abob nigin ado ganan nigin, faimud tobonunã biya ago gouf.

16Wauĩ bun faimud kulĩ youf, 17toku kosẽ gouf, 18ereb ereb ganan bun de wiyẽgouf, ere nigin, are ã nigin Kristus Jesus bun Negur nẽ oroya.

19Awa Uur nẽ yã to uroroukeleg, 20profet neid od to welebi ge. 21Ereb ereb ganan es gouf. Biya anĩ uroug, kafĩ walagauf. 22Ereb sesen fire fire ganan sese gouf.

23Negur ĩ yogo, wau inosiya nẽ Negur, fateul kisi feleya bagai inoyeĩf. Ãgenei uur, meleĩkanon ado, bouweĩ anĩ ganan, neda Odug Jesus Kristus isiyouf bun od sãf. 24Ĩ iweigneik ĩ yogon od dõ fiya biya, ĩ de age fouf.

25Turamã tar, amã nigin kosẽg. 26Tureĩ tar ganan, umã fiya fateul bunem aan wedig. 27Aya, tureĩ tar ganan bun pas enei uwesagauf nigin, Odug mala bun totol bagai arokeneik.

28Neda Odug Jesus Kristus nẽ wau ifenẽya ã ado ibodõf.

Copyright information for `DAD