1 Timothy 4

Pol Timoti Faded Fiyen

Awa Uur yaor bagai irok, dum bun tunĩ fau momoiya ditor ken, idegẽya uur ado ereb ereb kaa sesen idim difelnẽdiyouf anĩ, idi dõ difouf. Ifelnẽdiya age fediya are, idegẽya tamo neid meleid yaleya bunem isif, idi neid kisi ain uruwam ifalege di, galig leya gen. Idi tamo kayau yaleya katũ difiyeĩd fen, saaf tunĩ nigineg katũ difiyẽdiyouf, saaf are Negurem tamo momoi de fen, momoi nigin keleĩ anidi Negur de difiye ken, dãf nigin inodin. Ereb ereb ganan Negur inon are biya, ereb ereb Negur de fiye ken, yaleyauf anĩ, to sese fiyẽyauf, ere nigin, are Negur nẽ od ado kosẽ bunem fateul ifenek.

Ereb ereb enei turã tar bun ufelnẽdiyouf are, momoiya od ado ifelnẽya biya dõ wodig anim megeir ifonõ di, Kristus Jesus nẽ kabĩ tamo biya wõ wouf. Negur ditoron anĩ nẽ od ado kayau tubau neid nenerĩ ege anĩ to urou, Negur nẽ tobonunã dõ fiya biya wõ wouf nigin, õ ogo tai wouf. Bouwa buru nẽ tai fiya are naal isennadaf, anĩ ere, Negur nẽ tobonunã dõ fiya biya are ereb ereb ganan nigin isennadaf, anim gama mata ibodõya nẽ ado dumen mata ibodõya nẽ promis od irouf.

Od enei momoi bagai, ganan dale fen, momoi douf nigin 10 (enei nigin, ada kabĩ tale fen, lakĩ tafef), are ada neda wauda iseya mata ibodõya Negur bun tanon, ĩ tamo ganan nẽ isennẽya, idi momoi def anidi neid bagai.

11 Ereb ereb eneidi urokeneĩd, su agog wiyeĩd fen, ufelneĩd. 12 Õ kesu oosi de fen, takam to lai yõi, anĩ ere, wogõya bun, ibodõya bun, wau laa fiya bun, momoiya bun, amuyẽ sã karẽtut bun, momoiya tamo neid suma ago fen, idi age de dõ difouf nigin ufelnẽdiyouf. 13 Atun meleid bun Negur nẽ Itotoya uwesauf, faded wediyouf, ago fen, ufelnẽdif ule mog, aya asiyouf. 14 Uyu irouya imeid õ teten dino fen, profet od bunem uur nẽ ege luwa walen anĩ to welebi wo.

15 Õ suma enei ganan dõ fen, waũ adok wenẽdiyouf, anĩ bunem, tamo kayau ganan ogon kabĩ naig fe ilef anĩ dilouf. 16 Õ ogo nigin ado ogon ifelnẽdiya nigin lo walauf. Anĩ feseya sã toku agouf, anĩ bunem, õ ogo ado idi karĩ diyõf anidi isennẽya walogouf.

Copyright information for `DAD