2 Corinthians 6

Negur nẽ kabĩ tura tar amã, ã totol bagai marokeneik, are Negur nẽ wau ifenẽya walegen anĩ, ege to aaluwan ilauf. Ere nigin, Negur ĩ irok,

“Neu wau ifenẽya sain bun, aya õ karĩ ayon,
kel yaleya nẽ naa bun, aya õ asennon.”
6:2Asaia 49:8

Aya ã arokeneik, gama eĩ Negur nẽ wau ifenẽya nẽ sain, gama eĩ kel yaleya nẽ naa.

Pol Nẽ Morõ

Amã taka delẽ ilauf bun ye to tũ fouf nigin meein to manodig, are nemã kabĩ yana sane to ilauf nigin age mafedig. Age fiya ban, amã, naab ganan bun, amã Negur nẽ kabĩ tamo bagai ya anĩ mafelnẽdidig, are feseya sã ifareya bun, darau, morõ, wau morõ bun, didenamak bun, kalabus bun, kusĩ bun, kabĩ totol bun, bõ mulaĩ itorõya bun ado, naũ bun, karẽtut bun, keleĩ bun, molol bun, dor yaleya bun, Awa Uur Fateul bun ado, wau laa fiya bagai bun, momoi nẽ wogõ bun, Negur nẽ megeir bun, madur bagai nẽ waila ima biyalẽ ado ima kilẽ bun, tunĩ yanamã dalesedig ado tunĩ to yanamã dalesedig bunem, yana sane inoya ado yana biya inoya bunem; amã momoi marok, anĩ ere, amã idegẽya tamo gen kisi difedig; idi amã nigin keleĩ, anĩ ere, keleĩ sã gen kisi difedig; gare mauf, anĩ ere, amã mata mabodok; didenaman, anĩ ere, to didenamakesin; 10 waumã gudũ fef, anĩ ere, faimud waumã kulĩ yedig; maleg, anĩ ere, musei safina kisi feleya manenẽdidig; ereb taka sã, anĩ ere, ereb ereb ganan ado.

11 Korin tamo kayau, amã karika wogõ mayein. Age ma fen, amã ã bun waumã sukar fatuk bagai kã mafen. 12 Amã nemã waumã laa fiya ã bun to mafokeledig, anĩ ere, ãgenei wauĩ laa fiya amã bun ufokelegedig. 13 Aya neu kesu tar bun gen ã wogõ ayeik, ã solog fen, wauĩg sukar fatuk bagai kãg.

Momoiya Sã Geid To Bagu Gouf

14 Momoiya sã geid to bagu gouf. Madur bagai sane ado naig de nigal dũf? Lalan gugum ado ere bunem nigal dũf? 15 Kristus Satan ado naig fe di, waud tekelei youf? Ere anĩ momoiya ado, momoiya sã atun tekelei? 16 Negur nẽ tempel, idegẽya waitou atun, ere mamad katõ fiya ado? Are ada mata ibodõya Negur nẽ tempel. Negur iron kilei, “Aya idi geid mabod ken, idi atun ayõf, age afe fen, aya idi neid Negur ouf, age afe di, idi neu tamo kayau ouf.”
6:16Levitikas 26:12; Jeremaia 32:38; Esekiel 37:27


17 “Anĩ nigin, utornẽdig fen,
fire ufareg,
Odug irok.
Ereb amuyẽ ado to kobũg,
ago ge di, aya ã aleyeĩf.”
6:17Asaia 52:11; Esekiel 20:34, 41

18 “Aya ãgenei temeĩ di,
ã nau kesu tar, nau barai tar ouf,
Odug saa ilun nẽ kusĩ tamo guri feid uyu iroudig anĩ irok.”
6:182 Samuel 7:14; 7:8

Copyright information for `DAD