Matthew 21

Jesus Tamo Yana Ado Gen Jerusalem Namen Ilen

(Mak 11:1-11; Luk 19:28-40; Jon 12:12-19)

Idi Jerusalem kelẽ difiye ken, Moul Arei bun Betfage fonõ wõ den, Jesus in dõ fiya tar uru sur feid fen, ĩ idi irokenẽdin, “Fonõ wagein ifaref tokõ weleg, ulõ wesig fen, kaisã bagai donki ifõya naal ado uledigouf. Idi biru weledig fen, wageun gurig usig. Taka nem ã ereb yeĩf, ĩ urokenẽgouf, Odug ĩ kabĩ ifenẽdiyou fenẽ orof, ago ge di, kaisã bagai sur fediyouf.”

Profet eig ye wogõ yen anĩ kisi falauf nigin agef wõ yen:

“Saion nẽ tamo kayau urokenẽgouf,
‘Ulef, ogon king õ garan isif,
imatkeis fen, donki bun ibodok,
donki naal teten.’”
21:5Sekaraia 9:9

In dõ fiya tar dilen, Jesus iron kilei age difen. Idi donki naal ado dirousi di, tetedin idi neid gabar du difedi di, Jesus anĩ tetedin ibodon. Tamo kayau musei, idi neid gabar naabur du difedin, tunĩ idi aa were kokour dife, naabur du difedin. Tamo kayau uyu dilen ado, dume dõ difen diweig diron,

“Hosiana,
21:9aAnĩ nẽ gariya, ‘Usennamã!’ Od anĩ tamo kayau Negur yana yaleseya nigin wogõ dedig.
Dawid Naal bun!”
“Odug yana bunem isif, ĩ el fiya ado!”
21:9bSam 118:26

“Hosiana, saa ilun bagai!”
10 Sain Jesus Jerusalem ulõ yesi di, taun anĩ bun tamo kayau ganan terẽ de fen, toti difen, “Tamo eĩ aim?”

11 Tamo kayau diron, “Eĩ Jesus, profet Nasaret taun Galili teneub bun tamal.”

Jesus Tempel Bun

(Mak 11:15-19; Luk 19:45-48; Jon 2:13-22)

12 Jesus tempel modoũ bun ile, wõ ye fen, na dale dile disi dife mog, an tamo kayau adok irudidin. Ĩ moni solo fediya neid tebol ado kuburir na sur fediya neid fatar eleg feledin. 13 Jesus idi irokenẽdin, “Negur nẽ Itotoya irok, ‘Neu fõ ĩ kosẽ nẽ fõ douf,’
21:13aAsaia 56:7
anĩ ere, ã ‘bẽ tamo neid iminẽya fõ’
21:13bJeremaia 7:11
unogen.”

14 Meleid ifofakeleya, yeid kirorõya, Jesus wagen tempel bun disi di, ĩ el fedin. 15 Anĩ ere, Jesus ereb biya bagai age fe di, kesu nanaal tempel modoũ bun diweig diron, “Hosiana, Dawid Naal bun,” age de di, pris odudug, lo ifelnẽdiya tamo geid, idi anĩ dileid fen, seye den.

16 Idi Jesus to difiyen, “Kesu nanaal enidi ereb def, õ karĩ wof de?”

Jesus aitedin yalen, “Ariya, ã Negur nẽ Itotoya to uwesegen de?

“‘Kesu momou kesu nanaal geid sigoreid bun
selu kulõ fiya nigin Negur idi mogo saika fedin.’
21:16Sam 8:2

17 Agef fen, Jesus an tamal idi itorneĩd, taun anĩ itor ken, Betani fonõ ilen, an bõ tekelei ibodon.

Aa Fig Gariri Kelen

(Mak 11:12-14, 20-24)

18 Bonimei bagai, Jesus Jerusalem kel ile fen, naab luwen naũ fen. 19 Mala irakelen, aa fig naab yerin ilen, Jesus iyok iselen fele fen, aa fig biya sã ege aarau dogol. Jesus aa fig irokenen, “Õ baban to bagai umauf!” Kaisã bagai, aa fig gariri kelen.

20 In dõ fiya tar anĩ dile mã, idi terẽ de kulõ de fen, diron, “Naig fe di, aa fig kaisã bagai gariri kelen?”

21 Jesus aitedin yale iron, “Aya ã momoi arokeneik, ã wauĩ momoi ge mã, wauĩ to ilef isi fouf, ã aa fig enĩ bun age afel dogol to ago gouf, sã arei enĩg urokenẽgouf, ‘Kusu fen, maaĩwõ irãyõf,’ are ĩ dõf age fouf. 22 Ã momoi gouf are, ereb taka nigin tog fen, kosẽ gouf, ã walogouf.”

Jesus Aim Igirnen Anĩ To Difiyen

(Mak 11:27-33; Luk 20:1-8)

23 Jesus tempel modoũ namen ulõ yeis fen, an tamo kayau od ifelneĩd mog, pris odudug, tamo kayau neid mudur adodo, ĩ wagen disi to difen, “Ere igirĩya bunem õ ereb ereb enĩ ago wof? Aim õ igirĩya enĩ ifonon?”

24 Jesus aitedin yale iron, “Ayag to fiya tekelei afeneĩf. Ã solog urokanagauf are, ereb igirĩya bunem ereb ereb enĩ age afef, aya ã arokeneĩf. 25 Jon nẽ naan igunẽdin, are nainenem isin? Are saa ilun tamal de, tamo bunem?”

Idi dogo dogol katõ de fen, diron, “Ada ‘Ĩ saa ilun tamal,’ tauf, ĩ irõf, ‘Ba anĩ, ere nigin ã ĩ nigin to momoi wiyẽgen?’
26 Anĩ ere, ada ‘Tamo bunem’ tauf, ada tamo kayau nigin kumĩ tafedif, ere nigin, tamo kayau idi ganan Jon nigin profet taka dedig.”

27 Anĩ nigin, idi Jesus ait solo de diron, “Amã keleĩ sã.”

Age de di, Jesus iron, “Ago gouf are, ayag, ere igirĩya bunem ereb ereb enĩ age afef anĩ to arokeneĩf.

Kesu Uru Bun Yaab Od

28 “Ã ere kisi gef? Tamo taka ĩ naal uru adon. Tama ĩ kesu matu garan ile iron, ‘Neu kesu, gama wain kabier ule, kabĩ walouf.’

29 “Ĩ aiten yalen, ‘Aya tuwauf,’ dum ĩ in kisi falei ye fen, ilen.

30 “Agef fen, tama kesu taka garan ile, od tekelei anĩ irokenen. Kesu aiten yalen, ‘Dei, aya age afouf,’ anĩ ere, ĩ ileya sã.

31 “Idi uru atun, aim anĩ tama oron anĩ age fen?”

Idi aiten dalen, “Matum.”

Jesus idi irokenẽdin, “Aya ã momoi arokeneik, takis yaleya tamo, kayau bouweid na nẽ sur difedig geid, ã atun, idi ketem Negur nẽ tano bun uyu dilauf.
32 Ere nigin, Jon naan igunẽdiya tamo ĩ, madur ibodõya nẽ naab ifelneĩf nigin ã garan isin, ã ĩ nigin to momoi gen, anĩ ere, takis yaleya tamo, kayau bouweid na nẽ sur difedig geid, idi momoi den. Ã ĩ ulegeneg, ã wauĩ to falei ge fen, ĩ to momoi wiyẽgen.

Tamo Kabĩ Lo Difedig Nẽ Yaab Od

(Mak 12:1-12; Luk 20:9-19)

33 “Yaab od taka nigin wedereĩ unog. Teneub marau taka ĩ yogon kabier aa wain itenen, ĩ kau ifõ kalĩ felen, wain sumin asi fiya nigin ku yalen, kabĩ lo fiya nẽ fõ inon. Agef fen, ĩ mala solo yalouf nigin wain kabĩ, kabĩ lo difedig tamo tunĩ imeid bun ino fen, uyu takã ilen. 34 Sain biya bure fele di, teneub marau wain biya fito fiya nigin in ferfer susur fe di, kabĩ lo difedig tamo garan dilen.

35 “Kabĩ lo difedig tamo, teneub marau nẽ ferfer dirouneĩd fen, taka dun, taka dukesin, taka meein tulu difen. 36 Age dife di, teneub marau ferfer tunĩ sur fedin, are idi musei uyulil sur fedin wal fiya. Age fe di, kabĩ lo difedig tamo uruwa age difen gen, baban yogon ferfer bun age difedin. 37 Dum bagai, teneub marau yogon naal idi garan sur fiyen. Ĩ iron, ‘Idi neu kesu nigin fau karĩ difiyẽf.’

38 “Anĩ ere, kabĩ lo difedig tamo, naal anĩ dile fen, idi abob dirokenen, ‘Eĩ inim wain kabĩ akorouf. Usig, ada ĩ taukeis fen, yogon akor talouf.’ 39 Age de fen, idi ĩ dale, wain kabĩ mayarẽ dira ken, dukesin.

40 “Age fiya nigin, sain wain kabĩ nẽ marau isiyouf, ĩ kabĩ lo difedig tamo ere naig fediyouf?”

41 Idi Jesus aiten dalen, “Teneub marau, idi sane bagai sane ye fen, idenkesiyouf, ĩ wain kabĩ anĩ, kabĩ lo difedig tamo tunĩ imeid bun ino fen, na yaledi di, idi wain mayof sain bun fito de fen, yogon biya difenẽf.”

42 Jesus idi irokenẽdin, “Ã od Negur nẽ Itotoya bun yenek anĩ to uwesegen de?

“‘Meein are fõ inoya tamom sane de fen, ditoron anĩ,
gama monog tor wõ yen,
anĩ Odug yogo age fe di,
malamã yun.’
21:42Sam 118:22, 23

43 “Anĩ nigin, aya ã arokeneik, Negur nẽ tano ã bun tamal son yeĩ yale, tamo kayau idi aayũ faat biya yũf anidi ifenẽdiyouf. 44 Aib taka meein anĩ teten kubũ youf, mered fe fisik fouf, takag, aib taka meein anĩ ĩ teten kubũ youf, ĩ danĩf aas lauf.”
21:44Itotoya tunĩ bun, itotoya 44 to ibodok.


45 Sain pris odudug, Farisia tamo geid, Jesus nẽ yaab od karĩ den, idi kelein, Jesus idi nigin wogõ yen. 46 Idi Jesus irounẽya nigin naab dimiren, anĩ ere, idi tamo kayau nigin kumĩ den, ere nigin, tamo kayau idi Jesus nigin profet taka dedig.

Copyright information for `DAD