Revelation of John 12

Kayau Ado Gogour Odug

Uris odug fire bagai saa ilun wõ yen. Kayau taka gaa ifoun kel fen, yogon ye farumen ogolam ado, yogon mudur bun barisa tuwelf nẽ teter kurũ fen. Ĩ bou ado fen, kesu gõ fiya sain melsã di, darau nigin kaĩ yen. Age fe di, uris takag saa ilun wõ yen. Gogour giriya odug bagai mudur sewen, karat ten ado, teter sewen mudur sewen bun difaren ado wõ yen. Yogon ibum barisa fara fiya towo anĩ taka saa ilun waĩf, tenebur iraran. Gogour odug anĩ kayau kesu gõ fiya sain melsã anĩ wagen ifaren, are ĩ yogon kesu gõ falaisi di, itobouf nigin age fen. Kayau kesu taka gõ fen, are kesu monog, ĩ teneub ganan ain manig nem ulum irokenẽdiyouf. Age fe di, yogon kesu kaisã bagai gurar fe yale, Negur ado yogon king nẽ sia wagen irouselen. Kayau, Negurem modoũ dodok fenen nẽ gerere tuan iya ilen, an ĩ Negurem 1,260 naa kulatun fiyẽf.

Agef fen, saa ilun kusĩ wõ yen. Maikel yogon engel geid, gogour odug geid kusĩ den. Age fe di, gogour odug, yogon engel geid, abag idi geid kusĩ den. Anĩ ere, gogour odug in engel geid, idi neid megeir kisi feleya sã, anĩ nigin, idi saa ilun nedi modoũ ditoron. Gogour odug bagai are dale diran, are gogour kulu tamal bagai, anĩ Devil be, Satan dedig, ĩ teneub ganan idegnẽdidig. Ĩ tenebur dale dira ken, yogon engeleg ĩ geid diraran.

10 Age fe di, aya saa ilunem ait odug eig ye mog, karĩ aun:

“Gama neda Negur nẽ kel yaleya, megeir, tano ado,
yogon Kristus nẽ totol mogo isin.
Ere nigin, ĩ neda turada tar bouweid yũya od irõdig,
ĩ neda Negur wagen, gaa ado bõ, idi bouweid yũya od irõdig,
are mogo dale diran.
11 Idi Sipsip Naal naud bunem ado,
dogo neid Jesus nigin od wogõya bunem
ĩ wal difiyen.
Idi dogo mata ibodõya nigin kisi fatuk to dale fen,
laa uyu ditoron.
12 Anĩ nigin, saa ilun õ ado,
an ufaregef ã, wauĩ kulĩ ye!
Anĩ ere, teneub ado maaĩ ã, meleĩlon ado,
ere nigin, Satan mogo ã bun isilen!
Seye ĩ bun isokosef,
ere nigin, ĩ keleĩ, yogon sain mogo modegef.”
13 Sain gogour odug ĩ tenebur diran anĩ ile fen, ĩ kayau kesu monog gõ fen anĩ iruf ilen. 14 Kayau are, gerere tuan modoũ ĩ nigin dodok fenen anĩ bun fatutu ye ilauf nigin, webi odug nẽ waye uru difenen, an kayau gogour odug anim to irounẽf nigin, yar towo ado yar taka atun, kayau anĩ kulatun difiyẽf. 15 Age fe di, gogour ĩ awa kurenem, naan odug gen, naan foula fen, are kayau anĩ wal fiye ken, kuwei bun yale irousilauf nigin age fen. 16 Anĩ ere, teneub kayau isenne ken, awa aã ye fen, gogour odug awa kurenem naan odug foula fen anĩ yakasin. 17 Age fe di, gogour odug kayau nigin fatuk bagai name fen, kayau nẽ ibor tar fau dibodok anidi ganan geid kusĩya nigin ilen, idi Negur nẽ ĩtãfiya dõ de fen, Jesus nẽ biya od dirouf anidi.

Copyright information for `DAD