Romans 9

Negur Yogo Bagai Igirin

Aya Kristus bun momoi orok, aya idegẽya sã, neu kisi es fiya wau bun ibodok, Awa Uur Fateul bunem, aya bun anĩ megeir fef, are aya fatuk bagai wau gudũf fen, aya faimud wau bun morõ ado. Ere nigin, aya, neu turau tar, neu ibor anidi nigin, aya yug isisna fen, Kristus bun tamal yalelnauf anĩg, aya orouf. Idi Israel tamo kayau. Negur nẽ gere tar ya anĩ dogo neid, Negur nẽ fula fiya medeĩya anĩ, idi bun yaor fen, Negur ado bar itenẽya, lo yaleya, tempel bun Negur yana yaleseya ado, ereb Negur age afouf ye fen igirin, are dogo neid. Tubuid tar Abraham, Isak, Jakop are dogo neid, idi neid ibor anĩ isi isi Kristus wõ yen, Kristus ĩ Negur, ganan ĩ farumen dibodok, faimud ĩ yana talesauf! Momoi.

Are Negur nẽ od irofosiya gen sã. Ere nigin, Israel ibor bun wõ den anĩ, ganan Israel sã. Idi Abraham nẽ ibor nẽ tubu tar ba, anĩ ere, ganan Abraham nẽ gere tar bagai sã. Age fiya ban, “Isak bunem, ogon ibor tar douf.”
9:7Jenesis 21:12
Are, tamo nẽ tobonunã nẽ naud bunem Abraham nẽ gere tar wowã den anidi ganan, Negur nẽ gere tar sã, anĩ ere, promis nẽ gere tar idi, Abraham nẽ ibor tar youf. Negur nẽ promis od anĩ eig fiya, “Yogon sain bun bagai, aya kelauf, Sara kesu adouf.”
9:9Jenesis 18:10, 14


10 Anĩ dogol sã, anĩ ere, Rebeka nẽ gere tar tama tekelei ado, are tubuda Isak. 11 Anĩ ere, kesu uru fau gõ fiya sã bun, ereb biya be sane be age fiya sã mog, Negur nẽ oroya anĩ, kabĩ bunem sã, iweignẽdif ĩ bunem, yogon igirĩya bun ifarauf nigin, 12 ĩ Rebeka irokenen, “Matu anĩ, ibuye nẽ aruna yaleyẽf.”
9:12Jenesis 25:23
13 Are Negur nẽ Itotoya bun ibodok kilei, “Aya Jakop nigin wau laa fen, anĩ ere, Esau to oroun.”
9:13Malakai 1:2, 3


14 Age fiyauf are, ada ere tauf? Negur madur sã de? Sã bagai! 15 Ere nigin, Negur Moses irokenen,

“Aya aib nigin wau yuk anĩ bun, wau yũya afenẽf,
aya aib nigin wau irok, ĩ nigin wau yenẽf.”
9:15Eksodas 33:19

16 Anĩ nigin, are, tamo nẽ oroya be kabĩ totol yaleya bunem sã, Negur nẽ wau yũya bunem. 17 Negur nẽ Itotoya bun, Isip nẽ king Farao nigin eig ye irok, “Aya õ enei nigin bagai king anenon, are aya õ bun neu megeir yaor afe di, teneub ganan bun, neu yanau kurõ difalaisiyouf nigin age afen.”
9:17Eksodas 9:16
18 Anĩ nigin, Negur aib ĩ wau yũya ifenẽya nigin orof bun, ĩ wau yũya ifenẽdig, agef fen, ĩ aib nẽ wau katĩ feleya nigin orof bun, ĩ katĩ feledig.

19 Ã takam aya irokanauf, “Age fiyauf are, ere nigin Negur fau ada bouwada bun od yuk? Aim anĩ yogon oroya katĩ felef?” 20 Anĩ ere, tamo õ ai anĩ Negur od solo urokenẽf? “Ereb kare fen anim ĩ kare fen anĩ, ‘Ere nigin eig wo unoyan?’ fiyẽf de?”
9:20Asaia 29:16; 45:9
21 Mis inoya tamo ĩ mafer de tekelei anim, mis uru, taka kabĩ biya ifenẽya nẽ, taka kabĩ sane ifenẽya nẽ, yogon oroyam inoya kisi feleya sã de?

22 Negur ĩ yogon didi anĩ yaor fe di, yogon megeir anĩ tamo kayau keleĩ youf nigin wau iro ken, yogon didi idi bun ile, daũ feidlauf anidi nigin molol bunem loloum fedi di, sain meluk ibodon ouf are, ada ere tauf? 23 Negur ĩ idi fula fiya medeĩya dalouf nigin dodok fe fen, yogon wau yũya ifenẽdiyouf anidi bun, yogon fula fiya medeĩya barikã anĩ yaor fiya nigineg wau iron ouf are, ada ere tauf? 24 Ada buneg Negur iweignadan, Juda temeleid dogol sã, haiden buneg. 25 Are Hosia nẽ itotoya buneg Negur wogõ yef kilei,

“Aya idi neu tamo kayau sã anidi, neu tamo kayau auf,
age afe fen, aya neu oboiyou sã anĩ, neu oboiyou auf,”
9:25Hosia 2:23

26 takag,

“Negur ‘Ã neu tamo kayau sã’ yen nẽ modoũ anĩ bun,
idi anĩ ‘Negur mata ibodõya nẽ gere tar’ youf.”
9:26Hosia 1:10

27 Asaia Israel nigin iweig iron,

“Israel tamo kayau maaĩ ubun mumul gen musei bagai,
anĩ ere, musei sã dogol kel gei fediyouf.
28 Ere nigin, Odug ĩ teneub bun,
yogon tamo kayau es fediyouf nẽ od ganan kaisã bagai dõf agef kisi falauf.”
9:28Asaia 10:22, 23

29 Are Asaia mogo iron kilei,

“Odug saa ilun nẽ kusĩ tamo guri feid uyu iroudig anĩ,
neda ibor nẽ tubu tar tunĩ to itornẽdim are,
ada Sodom gen wõ taum,
ada Gomora gen tabodom.”
9:29Asaia 1:9

Israel Tamo Kayau Momoiya Sã

30 Anĩ nigin, ada ere tauf? Haiden idi madur bagai anĩ to dimiren anidi, momoiya bunem madur bagai anĩ dalen. 31 Anĩ ere, Israel idi madur bagai nẽ lo dõ difen, idi madur bagai anĩ yaleya sã. 32 Ere nigin yaleya sã? Idi Negur nigin momoiya bunem dõ fiya sã, anĩ ere, lo dõ fiya bunem, Negur mala bun madur bagai dalouf nigin age difen nigin. Idi ye tũ fiya nẽ meein anim yeid tũ fen. 33 Are Negur nẽ Itotoya bun ibodok kilei,

“Lo weleg, aya Saion oun tamo yeid tũ fiya nigin meein taka,
idi kubũ douf nigin sa tuwa taka anof,
age afe di, taka ĩ, ĩ nigin momoi youf, ĩ mama to bagai yalouf.”
9:33Asaia 8:14; 28:16

Copyright information for `DAD