1 Timothy 2

Al Kuruŋya mere teŋ teŋ mata

Niŋgeb ginhem gwahade po teŋ heŋyabe ge beleŋ doyaŋ yirde hayen mar goyen Al Kuruŋyen dirŋeŋ weŋbe gwaha mat hinayiŋ yeŋ saba yirde hayiŋ. Saba gobe gahade: Al Kuruŋya mere teŋ teŋ gobe det kuruŋ wor po geb, Al Kuruŋya mere teŋ teŋ mata teŋ hinayiŋ. Irde al kura det kuraŋ kandukŋeŋ nurde hinayiŋ mar niŋ Al Kuruŋ gusuŋaŋ irde hinayiŋ. Irde Al Kuruŋ beleŋ al hoyaŋ manaŋ tumŋaŋ faraŋ yuri yeŋbe Al Kuruŋ mere irde heŋya goke gusuŋaŋ irde hinayiŋ. Gwaha teŋ heŋyabe Al Kuruŋ beleŋ wol heŋ dunyeŋ yeŋ Al Kuruŋ igiŋ nurd uneŋ hinayiŋ. Al faraŋ yuri yeŋ gusuŋaŋ irde heŋyabe megen niŋ doyaŋ mar karkuwaŋya naŋamde niŋ doyaŋ marya goke biŋ sir ma yeŋ hinayiŋ. Gogab doyaŋ mar gore keŋkela doyaŋ yirke Al Kuruŋ palap irtek mata teŋ diliŋde wukkeŋ heŋ heŋ niŋ kandukŋeŋ ma nurde biŋ kamke igiŋ po hinayiŋ. Neŋ gayen Dumulgaŋ teŋ teŋ Alniniŋ Al Kuruŋ goyen gwahade mere irde hinayiŋbe yeŋ beleŋ igiŋ deneŋ amaŋ heŋ hiyeŋ. Yeŋbe al tumŋaŋ yumulgaŋ timeke mere fudinde goyen keŋkela bebak tiwoŋ yeŋ nurde hi. Gobe Al Kuruŋ yeŋ po gab alya bereya megen haŋ kuruŋ gate Al Kuruŋ. Hoyaŋ kura hi miŋmoŋ geb, gogo gwahade nurde hi. Gega go mar gobe tumŋaŋ ala harhok uneŋbe buluŋ po hamiŋ. Irkeb Yesu Kristu beleŋ megen haŋ mar go tumŋaŋ kanduk buluŋ wor po yentek heke yeneŋbe gasuŋmiŋ teŋ kamdebe go mar go sopte Al Kuruŋya awalikde hitek beleŋ kerd yunyiŋ. Go mata gobe al hoyaŋ kura beleŋ ma tiyyiŋ. Yesu Kristu yeŋ uŋkureŋ po meteŋ go tiyyiŋ. Yeŋbe Al Kuruŋ beleŋ bikkeŋ nalu kiryiŋ goyenterbe gogo kamde Al Kuruŋ beleŋ al yumulgaŋ tiyeŋ yeŋ dufaymiŋ kiryiŋ goyen kawan iryiŋ. Niŋgeb goyen goke teŋbe Yesu beleŋ, “Ne niŋ tagalde hayiŋ,” nineŋbe mere basaŋ almiŋ niryiŋ. Usi ma girde hime, fudinde wor po gineŋ hime. Nebe Yesu beleŋ, “Yuda mar moŋ al miŋ hoyaŋ goyen saba yirde hike dufaymiŋ Al Kuruŋ niŋ saŋiŋ irde yende mere goyen fudinde yeŋ nurde gama irnayiŋ,” yeŋ basiŋa niryiŋ.

Alya bereya Yesu gama irde haŋ marte mata

Be, mere gabe al diriŋ geya haŋ mar goke po tagaleŋ tihim geb, momoŋ yirayiŋ. Be, go mar gobe hinayiŋ kuruŋ goyenbe Al Kuruŋ mere irdeya ga hinayiŋ. Goyenbe mere irniŋ yeŋbe dufaymiŋ Al Kuruŋ diliŋde wukkeŋ po heŋya mere irde hinayiŋ. Bearar teŋ kadom mohoŋde teŋya Al Kuruŋ mere irde hinayiŋ gobe Al Kuruŋ diliŋde miŋ miŋmoŋ. Goke teŋbe mata buluŋ gwahade gob yubul po teŋ gab Al Kuruŋ mere irde hinayiŋ.

Be, bere niŋ wor tagaleŋ tihim. Berebe uliŋ umŋa tiniŋ yeŋ goya kalyayya kalyuyya damum hende wor po gore ma umŋa teŋ, amil damum hende wor po ma hor yirde hinayiŋ. Irde umŋa mormok, al dufaymiŋ buluŋ yirtek umŋa goyen ma teŋ hinayiŋ. Tonaŋ wor yentek igiŋ moŋ mat matam matam ma yirde hinayiŋ. Gwahade niŋgeb umŋa tiniŋ yeŋbe umŋa keŋkelak po teŋ hinayiŋ. Irkeb alya bereya beleŋ yeneŋbe bere igiŋ, dufaymiŋ buluŋ moŋ yeŋ nurde yuneŋ hinayiŋ. 10 Niŋgeb Al Kuruŋ palap irde haŋ mar berebe uliŋ umŋa niŋ ug po ma dufay henayiŋ. Gwaha titŋeŋbe mata igiŋ teŋ hinayiŋ. Gobe toneŋ umŋa yirtiŋ yara nurde hime.

11 Be, berer saba kurabe gahade: berebe doyaŋ marmiŋ beleŋ saba yirke kakŋar ma teŋ balmiŋ heŋbe gama yirde hinayiŋ. 12 Irde alya bereya gabu irde haŋde gor epte ma al saba yirde hinayiŋ. Irde epte ma al doyaŋ yirde hinayiŋ. Bere beleŋ mata gwahade teŋ teŋ gobe ne beleŋ utaŋ yirde hime. Berebe alya bereya gabu irde haŋde gor dufaymiŋde mali mere ma teŋ hinayiŋ, balmiŋ po hinayiŋ. 13 Gobe Al Kuruŋ beleŋ haŋkapyabe Adam wa iryiŋ irde Ewabe kame ga iryiŋ geb gago yeŋ hime. 14 Irde bere wa Satanyen usi nurdeb Al Kuruŋyen mere ma gama irde mata buluŋ tiyyiŋ. Adam moŋ. Niŋgeb goke teŋbe gago yeŋ hime. 15 Berebe Al Kuruŋ niŋ hekkeŋ nurde, kadom ge amaŋeŋ nurde hinayiŋ. Irde dufay buluŋ buluŋ fole irdeb megen niŋ marte mata buluŋ ma teŋ Al Kuruŋ diliŋde wukkeŋ hinayiŋ. Mata igiŋ gwahade goyen bada ma heŋ goyen po teŋ hinayiŋbe Al Kuruŋ beleŋ bere irdeya, “Berebe alyen faraŋ mar henayiŋ, irde diriŋ besa yirde hinayiŋ,” yiriŋ goyen keŋkela gama irde haŋ yeŋ nurde yuneŋ hiyeŋ.

Copyright information for `DAH