Psalms 111

Anutuac ua feengkefude

1KEBU eriendzong memibesonga, hallelu Yac. Ngicngac uba kongaha amma ikoc nga hamangecngina kpac kecdae, yeneac kpebung habugoc namma heregoc yombongKEBU ubangerec ammibade.

2KEBUNGO uaya mekecde, imoc wiac engena nga imocac songo negengandae, yeneng imoc negengising angkecdae. 3Kebungo wiac sasawa meec, imocngo ngictauac kuhagoc nga damuyagoc wakema fede. Ye fakaya dindingacngo nasoya nasoya feengkefude.

4Ye uaya bibiagoc meec, imoc yeng negemmanu negenggec fekefude.KEBUNGO neneac ubea manganeu ubangerec anemmeude. 5Ngicngac eweheihei ammiandae, ye yeni yaka yemmeude nga dzadzahac meec, imoc nasoya nasoya negensikefude. 6Kebu ye ngicngacfora uayaac kuc edzacyunuma maridzoming dema bangec monnunac ngicngac yeneac bangec imoc ngicngacfora yemmeec.

7Yeng wiac mariango meande, imoc yoara modacma faka dindingacgoc. Nenang yeac dederecgeyoac sasawa negenserima mekecbisina. 8Ye dederecgeyoac faiu imocngo nasoya nasoya seria fema fefeseri feengkefude. Imoc ikoc nga hamangeha kpac kecma modacma kecbesonga. 9Yeng wiacfora sueyunuu yeneng ngicngacfora yungecyunugec. Ye dzadzaha feengkefudeac yoac seria edeyunuec. Yeac kpac imoc kpetiac nga bibiagoc.

10KEBU eweheihei ammima ye hoanggebesonga. Faka imoc negen negentegecac hania ande. Ye eweheiheigoc hoanggeandae, yeni negen negengngina irec ireckea. Yeac eriendzong, imoc nasoya nasoya feengkefude.

Copyright information for `DED